Tilgangur þessara siðareglna er að stuðla að trúmennsku, ábyrgð, heiðarleika, réttsýni og sanngirni.  Þeim er ætlað að efla traust og tiltrú á störfum einstaklinga sem tala, skrifa eða tjá sig á annan hátt í nafni Framsóknarflokksins.  Trúnaðarmenn og starfsmenn skulu ávallt stuðla að framgangi þessara reglna, styðja við þær og ganga á undan með góðu fordæmi.  Siðareglurnar eru aðgengilegar á heimasíðu flokksins og þar aðgengilegar öllum, þær ná til allra félaga.  Öllum sem gegna trúnaðarstörfum í nafni Framsóknarflokksins ber að fylgja lögum og siðareglum í störfum sínum.

1. gr.  Virðing og traust
Framsóknarflokkurinn starfar með hagsmuni þjóðarinnar að leiðarljósi.  Í störfum sínum ber félagsmönnum að hafa það hugfast og á þann hátt styðja hver annan í starfi.

2. gr.  Heiðarleiki og hagsmunaárekstrar
Öllum störfum í þágu flokksins skal gegna af trúmennsku og heiðarleika.  Greina skal opinberlega frá öllum persónulegum hagsmunum sem geta haft óeðlileg áhrif á störf í þágu flokksins.

3. gr.  Ábyrgð
Flokksfélagar og starfsmenn eiga að vinna störf sín af háttvísi og samviskusemi og eiga ávallt að vera reiðubúnir að axla ábyrgð á verkum sínum.  Ef flokksfélagi, sem gegnir trúnaðarstörfum, sætir rannsókn samkvæmt 9. gr. þessara siðareglna, skal hann afla sér traustsyfirlýsingar miðstjórnar ef hann hyggst sitja áfram í stöðu sinni þar til rannsókn er til lykta leidd.

4. gr.  Gagnsæi
Grundvallarreglur góðrar stjórnsýslu eiga ávallt að vera hafðar í heiðri.  Lögmæt og málefnaleg sjónarmið eiga ávallt að ráða för við ákvarðanatöku.

5. gr.  Hlutlægni 
Ákvarðanir á að taka á yfirvegaðan hátt hverju sinni.  Óheimilt er að misnota stöðu í eigin þágu eða annarra.  Kjörnir fulltrúar, eiga í hvívetna að gæta þess að fara vel með hlutverk sitt.

6. gr.  Jafnrétti
Jafnrétti á að hafa að leiðarljósi í öllum störfum á vegum flokksins, með það að markmiði að koma í veg fyrir mismunun svo sem vegna uppruna, kyns, kynhneigðar, fötlunar búsetu, stéttar, trúarbragða og heilsufars.

7. gr.  Trúnaður
Trúnaðarmenn flokksins eiga að virða trúnað í sínum störfum og vinna eftir gildandi reglum um þagnarskyldu jafnt innan flokks sem utan.  Trúnaðarmönnum, er óheimilt að nýta trúnaðarupplýsingar í eigin ágóðaskyni.

8. gr.  Gjafir og styrkir
Framsóknarflokkurinn starfar samkvæmt lögum um fjármál stjórnmálaflokka.  Trúnaðarmönnum flokksins er óheimilt að þiggja gjafir eða fríðindi sem ætla má að gefnar séu í óeðlilegum tilgangi vegna stöðu þeirra.

9. gr.  Tilkynningar til siðanefndar
Brot á siðareglum eru litin alvarlegum augum.  Félagsmenn sem verða vitni að atvikum sem ætla má að að brjóti gegn siðareglum flokksins geta tilkynnt brotið afdráttarlaust og með rökstuðningi til siðanefndar skriflega.

10.gr.  Meðferð brota á siðareglum
Siðanefnd skal halda trúnað um tilkynningar sem berast nefndinni.  Hver sá einstaklingur sem á einhvern hátt er talinn hafa brotið siðareglur Framsóknarflokksins getur kært þá niðurstöðu til laganefndar flokksins sem kveður þá upp endanlegan úrskurð í málinu.

Samþykkt á 31. flokksþingi Framsóknarmanna 2011