Framsóknarflokkurinn var stofnaður 16. desember 1916 við samruna Bændaflokksins og Óháðra bænda og er elsti starfandi stjórnmálaflokkur á Íslandi.
Framsókn er flokkur sem setur samvinnuhugsjónir á oddinn, og þær gegna oft á tíðum lykilhlutverki í því að leiða saman ólík öfl við stjórn landsins eða í sveitarstjórnum. Eins og segir í grunnstefnu flokksins aðhyllumst við frjálslynda hugmyndafræði og teljum farsælast að ná fram niðurstöðu með samvinnu ólíkra afla og hagsmuna, sem byggð er á hófsemi og heiðarleika. Líklega hefur sjaldan verið jafn nauðsynlegt og nú að rödd og hugmyndafræði Framsóknar heyrist, þegar pólitískur óstöðugleiki og öfgar eru sífellt að aukast.
Hvað eru samvinnuhugsjónir?
Samvinnuhugsjón er hugtak sem vísar til hæfni til samvinnu þar sem markmiðið er að ná sameiginlegum lausnum í hópi eða félagslegu samhengi. Það felur í sér getu til að vinna með öðrum, deila upplýsingum og hugmyndum, þróa traust og skilning á mismunandi sjónarmiðum og leggja áherslu á að ná einingu um markmið eða lausnir. Samvinnuhugsjón er grundvallaratriði á mörgum sviðum lífsins, svo sem í vinnu, skóla, stjórnmálum og samfélagslífi.
Framsókn og samvinnuhugsjónin
Jónas Jónsson frá Hriflu var einn af áhrifamestu leiðtogum Framsóknarflokksins og mótaði stefnu hans á fyrstu áratugum 20. aldar. Hann var ötull talsmaður samvinnuhugsjóna og hafði djúpa trú á því að þjóðin gæti byggt upp öflugt samfélag með sameiginlegu átaki og samvinnu. Á hans tíma var lögð mikil áhersla á að efla menntun, tryggja jafnan aðgang að tækifærum og byggja upp samfélagslega innviði með samvinnu að leiðarljósi.
Jónas stóð fyrir stofnun ýmissa mikilvægra félagasamtaka og menningarstofnana sem hafa haft varanleg áhrif á íslenskt samfélag. Meðal hans helstu afreka var stuðningurinn við stofnun kaupfélaga, sem efldu efnahagslegt sjálfstæði bænda, og áherslan á alþýðumenntun til að efla vitund og þekkingu almennings. Jónas hafði sterka sýn á að byggja samfélag á réttlæti og jöfnum tækifærum og sá samvinnuhugsjónir sem leið að því markmiði. Framsókn beitir enn slíkri hugmyndafræði og byggir stjórnmál sín á þessum gildum. Við aðhyllumst frjálslynda hugmyndafræði og teljum farsælast að ná fram niðurstöðu með samvinnu ólíkra afla og hagsmuna, sem byggð er á hófsemi og heiðarleika.
Tími öfgastjórnmála er liðinn
Við sjáum það nú á tímum sem þessum að tími öfgastjórnmála er liðinn. Öfgar frá hægri og vinstri eru ekki raunverulegar lausnir til framtíðar. Í staðinn þurfum við að beita skynsemi og rökfræði og velja þær leiðir sem eru bestar fyrir þjóðina í heild. Það er margt gott í stefnu vinstrimanna og margt gott í stefnu hægrimanna, en ekki allt. Þess vegna á rödd Framsóknar svo vel við, þar sem við setjum samvinnuhugsjónir á oddinn og beitum skynsemi. Við trúum því að framtíðin ráðist á miðjunni.
Nú skulum við efla þann flokk sem hefur hvað best þjónað þjóðinni þegar hún hefur staðið á barmi sundrungar. Setjum X við B fyrir Ísland.
Anton Guðmundsson, oddviti Framsóknar í Suðurnesjabæ.
Greinin birtist fyrst í Morgunblaðinu 16. nóvember 2024.
