Gunnar Bragi Sveinsson ráðherra byggðamála opnaði í vikunni ráðstefnuna „Nordic Ruralities: Crisis and Resilence“. Um þrjú hundruð sérfræðingar á sviði byggðamála frá 27 löndum kynna rannsóknir sínar á ráðstefnunni sem haldin er í Háskólanum á Akureyri.
Í ávarpi sínu sagði Gunnar Bragi m.a. frá mótun nýrrar byggðaáætlunar sem þessar vikurnar er í kynningu og umræðu um allt land. Þá fór hann yfir mikilvægi efnahagslegs fjölbreytileika fyrir landsbyggðina og hvernig ríkisstjórnin er að mæta því, m.a. með styrkjum til ljósleiðaravæðingu fyrir landsbyggðina.
Meðal viðfangsefna ráðstefnunnar má nefna ímynd norðurslóða í kvikmyndum, áfengis- og vímuefnaneyslu ungs fólks, svæðisbundin áhrif háskólastarfs, skipulag heilbrigðisþjónustu, ferðaþjónustu og húsnæðismarkað, áhrif fiskveiðistjórnunar á byggðaþróun og starfsemi frumkvöðla af erlendum uppruna í dreifðum byggðum.
Heimild: www.atvinnuvegaraduneyti.is/sjavarutvegs-og-landbunadarmal
