Halla Hrund Logadóttir, alþingismaður, lagði í ræðu á Alþingi áherslu á að fjárfesting í íþróttastarfi barna og ungmenna sé „ein sú besta forvörn sem völ er á“ og skili sér „margfalt til baka“. Hún hvatti ríkisstjórnina til að funda með ungmennafélagshreyfingunni um skýrar aðgerðir og aukið fjármagn.
Halla Hrund sagði að fjármunir til íþrótta væru lykilatriði fyrir betri líðan barna, öflugri námsárangri, sterkari félagsleg tengsl og aukna samheldni fólks af ólíkum uppruna. „Ef við erum ekki að styðja við forvarnir og styrkja íþróttahreyfinguna þá erum við augljóslega á rangri leið,“ sagði hún.
Að hennar mati hefur sókn í málaflokknum staðnað, á sama tíma og áhyggjur af andlegri líðan ungmenna aukast. Hún vísaði til lengri biðlista í úrræði og umræðu kennara um ofbeldi í skólum í vikunni sem liðið er. „Biðlistar í úrræði lengjast og agamál … eru líklegri til að ágerast,“ sagði hún.
Halla Hrund benti jafnframt á að rekstur margra minni íþróttafélaga víða um land stæði illa. Hún sagði Ungmennafélag Íslands (UMFÍ) hafa ítrekað kallað eftir samtali við ríkisstjórnina um fjármagn, skýrar aðgerðir og samvinnu að settu marki.
„Kæra ríkisstjórn ef ykkur er raunverulega alvara í því að bæta líðan barna þá hvet ég ykkur til að funda og ræða við ungmennafélagshreyfinguna… hún veit sínu viti, enda er hún að byggja á sannreyndum aðferðum.“
Að lokum skoraði hún á stjórnvöld að forgangsraða stuðningi við íþróttastarf sem forvarnarstarf og grunn að samfélagslegri samheldni. „Köstum ekki krónunni fyrir aurinn, sýnum heldur öflugan stuðning við íþróttastarf og ræktum þannig líf og land,“ sagði Halla Hrund og vitnaði þar í slagorð UMFÍ.
