Öllum tryggt pláss í framhaldsskólum

Alls bárust 4.677 umsóknir um pláss í framhaldsskólum landsins haustið 2024 en innritun er nú lokið. Allir nýnemar úr grunnskóla sem sóttu um hafa fengið inngöngu. Þannig var hægt að samþykkja allar umsóknir þeirra í verknám en á undanförnum árum hefur þurft að vísa stórum hluta frá vegna skorts á aðstöðu og kennurum.

Mennta- og barnamálaráðuneytið, Miðstöð menntunar og skólaþjónustu og framhaldsskólar hafa lagt höfuðáherslu á að koma öllum nýnemum úr grunnskóla að á haustönn. Unnið hefur verið að auknu námsframboði framhaldsskóla til að koma til móts við fjölbreyttan nemendahóp s.s. aukinn fjölda nemenda á starfsbrautum, í verknámi eða með fjölbreyttan tungumála- og menningarbakgrunn.

„Með góðu samstarfi framhaldskólanna og Miðstöðvar menntunar og skólaþjónustu hefur tekist að innrita alla nýnema úr grunnskóla í framhaldsskóla. Það er mikill áfangi og vil ég þakka okkar öfluga skólafólki fyrir að svara ákallinu. Það er sérstakt ánægjuefni að sjá að skólakerfið okkar getur tekið við öllum nýnemum í verknám en það hefur einmitt verið eitt af stefnumálum ríkisstjórnarinnar,“ segir Ásmundur Einar Daðason, mennta- og barnamálaráðherra.

Framhaldsskóli	Val 1	Val 2	Alls	Innritaðir nemendur
Tækniskólinn	441	392	833	383
Kvennaskólinn í Reykjavík	308	403	711	212
Verzlunarskóli Íslands	522	161	683	370
Menntaskólinn í Kópavogi	312	349	661	264
Fjölbrautaskólinn í Garðabæ	251	367	618	200
Menntaskólinn í Reykjavík	272	276	548	270
Menntaskólinn við Sund	209	269	478	243
Borgarholtsskóli	219	245	464	292
Verkmenntaskólinn á Akureyri	204	209	413	218
Menntaskólinn við Hamrahlíð	210	196	406	231
Flensborgarskólinn í Hafnarfirði	167	235	402	188
Fjölbrautaskólinn í Breiðholti	152	247	399	238
Menntaskólinn á Akureyri	190	124	314	174
Fjölbrautaskóli Suðurnesja	253	54	307	261
Fjölbrautaskóli Suðurlands	244	59	303	260
Fjölbrautaskólinn við Ármúla	92	168	260	194
Fjölbrautaskóli Vesturlands	111	31	142	114
Menntaskólinn að Laugarvatni	68	57	125	56
Fjölbrautaskóli Norðurlands Vestra	75	30	105	75
Framhaldsskólinn í Mosfellsbæ	37	55	92	62
Menntaskóli Borgarfjarðar	31	44	75	33
Menntaskólinn á Ísafirði	61	13	74	64
Menntaskólinn á Egilsstöðum	49	24	73	51
Framhaldsskólinn í Vestmannaeyjum	55	2	57	56
Framhaldsskólinn á Laugum	19	35	54	20
Verkmenntaskóli Austurlands	32	22	54	33
Fjölbrautaskóli Snæfellinga	27	8	35	27
Menntaskólinn á Tröllaskaga	11	17	28	12
Framhaldsskólinn á Húsavík	19	5	24	19
Menntaskóli í tónlist	16	8	24	14
Framhaldsskólinn í A-Skaftafellssýslu	19	3	22	19

84,5% nemenda komast inn í þann skóla sem þeir sóttu um sem fyrsta val á meðan 11,8% fá pláss í þeim skóla sem þeir völdu sem annað val. Alltaf eru einhverjir nemendur sem fá ekki inngöngu í annan af þeim skólum sem sótt var um en þeim er þá úthlutað plássi í þriðja skóla. Þetta árið eru það 3,7% umsækjenda.

Skipting milli starfsnáms og bóknáms er með svipuðu sniði og undanfarin ár en alls munu 17,6% nemenda innritast í starfsnám næsta haust. Flestar umsóknir bárust Tækniskólanum en heildarfjölda umsókna í hvern skóla, ásamt úthlutuðum plássum má sjá í eftirfarandi töflu:

Heimild: stjr.is