Ingibjörg Isaksen, þingmaður og formaður þingflokks Framsóknar, beindi fyrirspurn á Alþingi til félags- og húsnæðismálaráðherra, Ingu Sæland, um hvort ráðherrann styddi að flýta þjóðaratkvæðagreiðslu um mögulega inngöngu Íslands í Evrópusambandið.
Í ræðu sinni rifjaði Ingibjörg upp að ráðherrann hafi áður tekið eindregna afstöðu gegn ESB-aðild og vitnaði í orð ráðherrans frá fyrri tíð, þar sem hún sagði inngöngu í sambandið vera „verri hlutur fyrir íslenskan almenning en nokkuð annað.“
Ingibjörg lagði áherslu á að margir Íslendingar deili sömu áhyggjum og ráðherrann varðandi mögulegan missi á fullveldi, skerðingu á yfirráðum yfir sjávarútvegi og takmarkaðan sjálfsákvörðunarrétt ef Ísland gengi í ESB. Hún sagði Evrópusambandið hafa veikst að undanförnu og benti á vaxandi vantraust innan sambandsins sjálfs, sem kallaði á varfærni og gagnrýna umræðu um hugsanlega aðild Íslands.
Þá gagnrýndi Ingibjörg einnig þau rök sem hafa verið notuð til að réttlæta inngöngu í sambandið, eins og lækkun vaxta og verðbólgu. Hún sagði þá umræðu hafa færst nú yfir á varnarmál og öryggisstefnu í ljósi óstöðugleika í alþjóðamálum. Hún undirstrikaði jafnframt að ákvörðun um inngöngu í ESB væri stærsta ákvörðunin í utanríkismálum sem þjóðin tæki frá stofnun lýðveldisins og að slík ákvörðun krefðist vandlegs undirbúnings og ítarlegrar umræðu.
Ingibjörg lauk máli sínu með spurningu til ráðherrans: „Styður hæstv. ráðherra það að flýta þjóðaratkvæðagreiðslu um inngöngu Íslands í Evrópusambandið?“
„Flokkur fólksins er alfarið á móti inngöngu Íslands í Evrópusambandið, algerlega, bæði núna og þá. Hvað framtíðin ber í skauti sér get ég ekki svarað fyrir,“ sagði félags- og húsnæðismálaráðherra.
Ingibjörg þakkaði félags- og húsnæðismálaráðherra, Ingu Sæland fyrir skýr svör og lagði áherslu á að viðræður við ESB séu ekki einföld skoðunarferð heldur aðlögunarferli. Hún benti á að aðildarviðræður snúist um hvernig íslenskt samfélag geti aðlagast kerfum og regluverki sambandsins, sem hefur breyst mikið á síðustu árum.
Ingibjörg vitnaði í orð ráðherrans um að Evrópusambandið sé ekki í sömu stöðu og áður og að mikil ólga sé innan sambandsins. Hún lagði áherslu á að þjóðin fái allar upplýsingar áður en gengið er til kosninga og að undirbúningur verði vandaður.
