Á undanförnum áratugum hefur menningarsalur okkar sunnlendinga staðið tómur og engum til gagns. Mikið hefur verið um málefnið rætt en ekkert hefur gerst. Nú er mál að linni. Við þurfum að fá stað á Suðurlandi fyrir menningarviðburði. Sinfóníuhljómsveit Suðurlands hefur verið stofnuð, kórar eru víða aðþrengdir um pláss og aðrir sviðslistahópar gera sér hóflegt húsnæði að góðu. Á þessu ástandi tapa allir, því líf okkar allra er fátækara með takmarkaðan aðgang að listviðburðum.
Menningarsalurinn og skýrsluskrif
Á árinu 2021 var tekin saman skýrsla af EFLU þar sem kostnaður við fullbúinn sal var metinn og sérfræðiálitum var safnað saman. Margir hlutaðeigandi aðilar voru spurðir álits og samantektin er greinargóð. Áætlaður kostnaður við uppbygginguna losaði milljarð króna. Áætla má að kostnaður yrði hærri ef ráðist væri í framkvæmdir nú. Þessi framkvæmdakostnaður miðar við að salurinn sé fullbúinn. Ráðherra menningar Lilja Alfreðsdóttir sótti nýverið fund hjá okkur í Hótel Selfoss og tók af öll tvímæli um að ríkið hyggðist ekki auka við framlag sitt sem er um 280 mkr. Féð er til reiðu og bíður eftir því að komast í vinnu okkur öllum til handa.
Stofna þarf félag
Til að koma málum af stað þarf að vinna málstaðnum framgang. Í október verður menningarmánuður Árborgar og þá er líklegt að víða verði gaman. Alls kyns viðburðir verða settir upp okkur til ánægju og lærdóms. Allt þetta mun gerast án menningarsalarins sem er sorglegt. Við þurfum að leggjast á árarnar um að stofna félagasamtök þar sem sveitarfélagið Árborg mun leggja eignina inn. Enn fremur mætti nálgast ráðherra menningarmála, Lilju Alfreðsdóttur, og kanna með að leggja fram fé ríkisins í samtökin. Til viðbótar mætti gera rekstrarsamning við eigendur hótelsins og þá er kominn tími til að bjóða einstaka verkþætti út. Þetta er nú allur galdurinn og er fyrirsjáanlegt að opna mætti menningarsalinn fyrir undir 500 mkr. ef aðhalds er gætt og ef allir sætta sig við að einungis hluta er lokið í fyrsta áfanga og salnum komið í notkun. Svo þetta megi fram ganga þá þarf að vinna að framgang málsins og erum við í Framsókn í Árborg tilbúin að vinna að málinu með öllum sem brenna fyrir bættri aðstöðu menningar á Suðurlandi.
Arnar Freyr Ólafsson, oddviti Framsóknar í Árborg.
Greinin birtist fyrst á sunnlenska.is 3. október 2023.
