Gunnar Bragi Sveinsson sjávarútvegs- og landbúnaðarráðherra mælti í dag fyrir breytingum á búvörulögum, búnaðarlögum og tollalögum en þessar breytingar eru forsenda nýgerðra búvörusamninga.
Í framsöguræðunni sagði Gunnar Bragi að samningarnir mörkuðu tímamót – þetta væri í fyrsta skipti sem samið er um alla búvörusamninga og búnaðarlagasamning í einu. Það þyrfti að breyta núverandi kerfi, auðvelda nýliðun í stétt bænda og gera stuðningsformin almennari og minna háð einstökum búgreinum til að opna möguleika á nýtingu nýrra tækifæra.
Helstu markmið samninganna væru að stuðla að aukinni framleiðslu búvara og bæta samkeppnishæfni landbúnaðarins og afkomu bænda. Þannig væri tryggt fjölbreytt framboð heilnæmra gæðaafurða á sanngjörnu verði til neytenda og fæðu- og matvælaöryggi þjóðarinnar aukið.
Í samningnum eru aukin framlög til aðlögunar að lífrænni framleiðslu og tekinn verður upp stuðningur við mat á gróðurauðlindum, geitfjárrækt, fjárfestingastuðningi í svínarækt og stuðning við framleiðslu skógarafurða. Þá væri mikilsvert að efla landbúnað sem atvinnugrein í dreifðum byggðum og stuðla að sjálfbærri landnýtingu. Á samningstímabilinu er gert ráð fyrir endurskoðun samninganna tvisvar, þ.e. árin 2019 og 2023.
Samningarnir voru undirritaðir fyrir hönd ríkisstjórnar Íslands 19. febrúar sl. af þáverandi sjávarútvegs- og landbúnaðarráðherra og fjármálaráðherra með fyrirvara um nauðsynlegar lagaheimildir Alþingis.
Heimild: www.atvinnuvegaraduneyti.is
