Month: November 2013

Kjördæmisþing framsóknarmanna í Suðvesturkjördæmi, haldið í Hafnarfirði 9. nóvember 2013, fagnar þeim góða árangri sem náðist í síðustu alþingiskosningum um allt land. Í fjölmennasta kjördæmi landsins, Suðvesturkjördæmi, nær tvöfaldaði Framsóknarflokkurinn fylgi sitt og náði inn þremur öflugum þingmönnum; hefur Framsóknarflokkurinn aldrei fengið fleiri greidd atkvæði í neinum kosningum en í Suðvesturkjördæmi í síðustu alþingiskosningum. Árangur náðist vegna sterkra frambjóðenda, einbeitts málflutnings þeirra og mikils sjálfboðaliðastarfs fjölmargra í baklandinu. Fyrir það ber að þakka. Mikilvægt er að hefja sem fyrst undirbúning fyrir komandi sveitarstjórnarkosningar og byggja á þeim góða árangri sem náðist í síðustu alþingiskosningum. Þingið hvetur því almenna flokksmenn til að huga í tíma að kosningum á vori komanda.

Þingið bindur miklar vonir við nýja ríkisstjórn Framsóknarflokks og Sjálfstæðisflokks. Afar mikilvæg hagsmunamál s. s. skuldamál heimilanna, efling atvinnulífs og að standa vörð um velferðarkerfið eru stærstu verkefnin framundan. Eins og fram kemur í stefnuyfirlýsingu ríkisstjórnarinnar frá 22. maí í vor eru heimilin undirstaða og drifkraftur þjóðfélagsins. Þingið fagnar því  áherslu stefnuyfirlýsingarinnar um að farið verði í markvissar aðgerðir til að taka á skuldavanda íslenskra heimila sem er til kominn vegna hinnar ófyrirsjáanlegu höfuðstólshækkunar verðtryggðra lána sem leiddi af hruni fjármálakerfisins. Þar er tiltekið að um verði að ræða almennar aðgerðir með áherslu á jafnræði og skilvirkni. Ljóst er að forsendubrestur er verulegur og nauðsynlegt að leiðrétta hann til að koma íslenskum heimilum til hjálpar. Heimilin eru undirstaða samfélagsins og er bætt staða heimilana forsenda þess að hagvöxtur aukist og hjól atvinnulífsins fari að snúast. Þingið telur eðlilegt að þeir sem bjuggu til forsendubrestinn greiði fyrir leiðréttingu á lánum heimilanna.
Þingið fagnar þingsályktun sem samþykkt var á Alþingi í sumar um framtíðarskipan húsnæðismála. Þar er félags- og húsnæðismálaráðherra falið að koma með tillögur að nýju húsnæðislánakerfi, meðal annars með það í huga að tryggja virkan leigumarkað og skilvirk félagsleg úrræði fyrir þá sem á þurfa að halda.
Oft var þörf en nú er brýn nauðsyn á aðgerðum til að bæta aðstæður á húsnæðismarkaði þannig að öllum verði gert kleift að koma sér upp þaki yfir höfuðið og skapa sér og sínum öruggt heimili. Þær aðstæður eru ekki fyrir hendi núna, sérstaklega þarf að huga að eflingu leigumarkaðarins. Mikilvægt er að tryggja ólík búsetuform þar sem öryggi er lykilatriði.
Aðkoma hagsmunaaðila s.s. sveitarfélaganna skiptir einnig miklu máli. Skipulagsvaldið er í höndum sveitarfélagana og þar með ráða þau áherslum við uppbyggingu húsnæðis, hvar skuli byggt og hvernig, samsetningu og fjölbreytni íbúðarhúsnæðis.

Þingið telur mikilvægt að standa vörð um velferðar og heilbrigðiskerfið. Áfram skal stefnt að því að árangur íslenska heilbrigðiskerfisins verði í fremstu röð. Áfram verði lögð áhersla á að bjóða þá bestu heilbrigðisþjónustu sem völ er á hverju sinni.

Breytingar og niðurskurður í heilbrigðisþjónustunni á síðustu árum hafa sett allt heilbrigðiskerfið í uppnám.  Því er nauðsynlegt að snúið verði af þeirri braut og leitað allra leiða til að hlúa að og efla heilbrigðisþjónustuna og forvarnir almennt.

Þingið hvetur forsætisráðherra, ráðherra flokksins og þinglið til að hafa forystu um mótun heildarstefnu um bætta lýðheilsu íslensku þjóðarinnar, sbr. stjórnarsáttmála Framsóknarflokks og Sjálfstæðisflokks.

Þingið fagnar að kjaraskerðing aldraðra og öryrkja sem tók gildi 1. júlí 2009 sé afturkölluð. Einnig telur þingið mikilvægt að almannatryggingarkerfið verði endurskoðað þar sem sérstök áhersla verði lögð á sveigjanleg starfslok og starfsgetumat.
Fjölskyldan í fjölbreyttri mynd er meginstoð og hornsteinn íslensks samfélags.  Framsóknarflokkurinn leggur mikla áherslu á að styðja við heimili landsins í þeim erfiðleikum sem á hafa dunið. Gott samspil fjölskyldu og samfélags er forsenda heilbrigðrar samfélagsþróunar.
Þingið áréttar einnig mikilvægi þess að virkja þann kraft sem býr í mannauði Íslendinga. Gamalkunna stef okkar framsóknarmanna vinna-vöxtur-velferð, lýsir í hnotskurn samhengi hlutanna. Án vinnu verður vöxtur takmarkaður og erfitt að standa undir velferð. Þingið hvetur því nýja ríkisstjórn til að leggja allt kapp á að skapa starfsumhverfi sem ýtir undir fjárfestingu og fjölgun starfa, ekki síst hjá litlum og meðalstórum fyrirtækjum.
Þingið fagnar því að sú pólitíska óvissa sem einkenndi síðasta kjörtímabil, sérlega undir lokin, er á undanhaldi. Mikilvægt er að skapa ró um þau verkefni sem leysa þarf á næstu misserum og ná sem mestri samvinnu og sátt um þau úrræði sem gripið verður til. Þingið treystir nýrri ríkisstjórn og nýju Alþingi til að vinna í þeim anda.

Framsóknarmenn í Suðvesturkjördæmi leggja áherslu á mikilvægi umhverfismála. Ráðuneyti umhverfis- og auðlindamála þarf að efla og skilgreina þarf betur verkefni þess. Mikilvægt er að ekki sé gengið á hina einstöku náttúru Íslands og að náttúruvernd og náttúrunýting fari vel saman. Um þetta er nauðsynlegt að sátt ríki í þjóðfélaginu og því styðja framsóknarmenn í Suðvesturkjördæmi heils hugar þá vinnu sem er að fara í gang við endurskoðun náttúruverndarlaga. Nauðsynlegt er að atvinnuuppbygging, þar á meðal í ferðaþjónustu, taki mið af jafnvægi náttúruverndar og náttúrunýtingar.

Íslendingar eru leiðandi í heiminum í nýtingu endurnýjanlegrar orku og til þess að svo verði áfram er mikilvægt að styðja við innlenda tækniþróun og nýsköpun tengdri nýtingu á grænni orku. Íslenskir vísindamenn og fyrirtæki eru í fremstu röð á sviði endurnýjanlegrar orku og vilja framsóknarmenn í Suðvesturkjördæmi kappkosta við að svo verði áfram.

Það var mikil afturför í umhverfismálum þegar rammaáætlun um vernd og nýtingu landsvæða var dregin í pólitískar deilur af síðustu ríkisstjórn. Þess vegna er mikilvægt að rammaáætlun verði endurskoðuð á grundvelli niðurstaðna faghópa sérfræðinga, út frá því sjónarmiði að náttúruvernd og náttúrunýting fari vel saman.

Framsóknarmenn í suðvesturkjördæmi telja það brýnt að draga úr losun allra mengandi efna, þar með talið gróðurhúsalofttegunda.  Með því að draga úr notkun jarðefnaeldsneytis og auka notkun innlendra og vistvænna orkugjafa, eins og t.d metans, raforku eða metanóls, getum við Íslendingar verið fyrirmynd fyrir aðrar þjóðir í þessari vegferð. Í þeim tilgangi er mikilvægt að smám saman auka kröfur til innihalds vistvænna orkugjafa í eldsneyti og styðja við innlenda framleiðslu á vistvænum orkugjöfum. Íslendingar eru háðir því að lífríki hafsins sé heilbrigt, og því er nauðsynlegt að koma í veg fyrir að það hljóti skaða af vegna mengandi efna. Einnig er mikilvægt að efla landgræðslu og skógrækt hér á landi.

Þingið telur að hefja beri endurskoðun á lífeyriskerfi landsmanna með það í huga að einfalda það til muna og jafna kjör. Skoða þarf kosti og galla þess að einn sjóður haldi utan um grunnlífeyrisréttindi allra landsmanna. Áfram verði tryggð réttindi til söfnunar séreignarlífeyris.
Lögð verði meiri áhersla á tækni-, iðn- og verkmenntun til að tryggja öflugt atvinnulíf í landinu. Gera verður slíkt nám eftirsóknarverðara en verið hefur með kynningarstarfi í grunnskólum. Fyrirtækjum verði auðveldað að taka nemendur á samning í slíkum greinum.

Þingið telur að endurskoðað verði nám á öllum skólastigum þannig að nemendur komist fyrr í sérnám og út á vinnumarkað.

Sigmundur Davíð Gunnlaugsson, forsætisráðherra, flutti í dag á Alþingi skýrslu um aðgerðir ríkisstjórnarinnar í skuldamálum heimilanna. Fram kom að þegar væri hafin vinna í forsætisráðuneytinu við nýtt frumvarp um höfuðstólslækkun. Jafnfram kom fram að viðskiptabankarnir þrír myndu ljúka endurútreikningi sínum á gengistryggðum lánum um áramót. Meiri óvissa væri um áætlanir Dróma og Lýsingar. Sérfræðingahópur um afnám verðtryggingar myndi skila af sér tillögum í desember. Sigmundur Davíð sagði þingsályktun er var samþykkt á sumarþingi Alþingis ganga samkvæmt áætlun.
Hér að neðan má lesa skýrsluna.
***
Forsætisráðherra, Sigmundur Davíð Gunnlaugsson:
Virðulegur forseti. Það þarf ekki að fara mörgum orðum um það í sal Alþingis hvaða áhrif hin ófyrirsjáanlega höfuðstólshækkun verðtryggðra húsnæðislána hafði á heimilin í landinu. Alþingi bar gæfu til þess í júní síðastliðnum að samþykkja aðgerðir vegna þessa skuldavanda íslenskra heimila, vanda sem leiddi af hruni fjármálakerfisins. Í þingsályktuninni kemur fram að forsætisráðherra muni flytja Alþingi skýrslu um stöðu mála á haustþingi 2013 og á vorþingi 2014.
Það er gleðilegt að geta sagt Alþingi frá því nú að framgangur þingsályktunarinnar er með ágætum og samkvæmt áætlun. Sumum liðum þingsályktunarinnar er lokið og vinna við aðra liði í fullum gangi í mörgum ráðuneytum í samræmi við ákvæði ályktunarinnar. Þingsályktunin er í tíu liðum. Ég mun hér á eftir fara í gegnum stöðu mála við einstaka liði ályktunarinnar.

1. liður er að settur verði á fót sérfræðingahópur sem útfæri mismunandi leiðir til að ná fram höfuðstólslækkun verðtryggðra húsnæðislána og geri tillögur þar að lútandi.

Sérfræðingahópur var skipaður í sumar undir formennsku Sigurðar Hannessonar og hefur hópurinn unnið að tillögum að útfærslu á höfuðstólslækkun verðtryggðra húsnæðislána. Hópurinn byggir vinnu sína á þeim forsendum sem fram komu í þingsályktuninni, þ.e. að leiðrétta eigi þann forsendubrest sem heimili urðu fyrir vegna verðbólguskots áranna 2007–2010. Leiðréttingin skal vera almenn en meta á hvort setja skuli þak á þá fjárhæð sem hvert heimili getur fengið. Einnig verður metinn fýsileiki þess að ná fram lækkun höfuðstóls með skattafslætti. Hópurinn hefur fengið til sín gesti úr ýmsum áttum, m.a. frá lánveitendum, Seðlabanka, Fjármálaeftirlitinu, Hagsmunasamtökum heimilanna og umboðsmanni skuldara. Skipaðir hafa verið fjórir undirhópar sérfræðingahópsins. Einn hópurinn undirbýr tillögur um framkvæmd leiðréttingarinnar, annar um stofnun leiðréttingarsjóðs, þriðji um notkun skattkerfisins til að ná fram skuldalækkun og sá fjórði um hvata til að skuldbreyta verðtryggðum lánum í óverðtryggð.
Einnig hafa utanaðkomandi sérfræðingar verið fengnir til að vinna afmarkaða hluta, t.d. mat á efnahagslegum áhrifum. Gerður var samningur við Analyticu ehf. um greiningu á áhrifum leiðréttingarinnar og fleiri þáttum er snerta hagræna þætti verkefnisins. Þá er rétt að upplýsa Alþingi um að í forsætisráðuneytinu er að hefjast vinna við gerð frumvarps um höfuðstólsleiðréttingar. Eins og kunnugt er mun hópurinn skila tillögum sínum fyrir lok þessa mánaðar.

2. liður er að gerð verði úttekt á kostum og göllum þess að stofna sérstakan leiðréttingarsjóð vegna húsnæðislána.

Undirhópur sérfræðingahópsins um höfuðstólslækkun vinnur að því að meta kosti og galla þess að stofna sérstakan leiðréttingarsjóð í tengslum við þetta verkefni. Markmið slíks sjóðs er að flýta fyrir framkvæmd leiðréttingar en sem kunnugt er stendur til að nýta í leiðréttinguna hluta þess svigrúms sem myndast við skuldaskil fallinna fjármálafyrirtækja.

3. liður er að kannað verði hvernig gera megi yfirskuldsettum íbúðareigendum kleift að losna án gjaldþrots undan eftirstöðvum sem veðið sjálft stendur ekki undir.

Um er að ræða tímabundna aðgerð sem miðar að því að leysa vanda tengdan afleiðingum efnahagshrunsins. Vinnuhópur skipaður sérfræðingum innanríkisráðuneytis og velferðarráðuneytis hefur farið yfir verkefnið og tekið til skoðunar þau úrræði sem nú eru til staðar til lausnar á vanda skuldsettra heimila og jafnframt til hvaða viðbótarúrræða væri unnt að grípa til að takast á við vandamálið. Hópurinn hefur sett fram tillögur að úrræðum sem eru til nánari skoðunar. Meðal þeirra aðgerða sem hafa verið teknar til nánari skoðunar eru breytingar á lögum um samningsveð, stofnun félags sem leysir til sín yfirveðsettar eignir, samningar við kröfuhafa um niðurfellingu skulda og sérstakan fyrningartíma á kröfum sem eftir standa við nauðungarsölu.

4. liður er að skipuð verði verkefnisstjórn um framtíðarskipan húsnæðismála.

Félags- og húsnæðismálaráðherra hefur skipað sjö manna verkefnisstjórn sem hefur það hlutverk að leggja fram tillögur að framtíðarstefnu í húsnæðismálum en Samband íslenskra sveitarfélaga á áheyrnarfulltrúa sem situr fundi verkefnisstjórnarinnar. Verkefnisstjórnin mun hafa forustu í verkefninu, safna gögnum og greina þau í samvinnu við óháða sérfræðinga, framkvæma stöðumat og móta stefnu um framtíðarskipan húsnæðismála. Verkefnisstjórnin hélt fyrsta fund sinn í september 2013 og hefur fundað reglulega síðan.
Jafnframt hefur ráðherra skipað 32 manna samvinnuhóp um framtíðarskipan húsnæðismála sem hefur það hlutverk að starfa náið með verkefnisstjórninni að mótun framtíðarskipulags húsnæðismála á Íslandi.
Í þessu viðamikla verkefni verður kannað hvaða fyrirkomulag og fjármögnun almennra húsnæðislána sé hagkvæmast hér á landi og hvernig slíku fyrirkomulagi verði komið á. Jafnframt verður skoðað hvernig unnt sé að tryggja virkan leigumarkað sem og skilvirk félagsleg úrræði fyrir þá sem á slíku þurfa að halda. Í því sambandi verður kannað með hvaða hætti stjórnvöld geti sinnt afmörkuðu hlutverki sem felst í veitingu þjónustu í almannaþágu á húsnæðismarkaði. Ríkisstjórnin leggur áherslu á að sem breiðust sátt og samstaða náist um framtíðarskipan húsnæðismála hér á landi og því mikilvægt að sem flestir sem láta sig málið varða fái tækifæri til að hafa áhrif á vinnuna.
Á vefsíðu verkefnisins gefst almenningi því kostur á að fylgjast með þróun og mótun tillagna hvers teymis og koma á framfæri frekari hugmyndum og athugasemdum um framtíðarskipan húsnæðismála.
Verkefnisstjórnin mun taka tillögurnar til frekari úrvinnslu í nánu samstarfi við Íbúðalánasjóð, Samtök fjármálafyrirtækja og Samband íslenskra sveitarfélaga. Gert er ráð fyrir að verkefnisstjórnin skili að verkefninu loknu skýrslu með ítarlega útfærðum tillögum að framtíðarstefnu í húsnæðismálum til félags- og húsnæðismálaráðherra.

5. liður er að lögfest verði flýtimeðferð dómsmála sem tengjast skuldavanda heimilanna og varða ágreining um lögmæti þess að binda fjárskuldbindingu við gengi erlendra gjaldmiðla eða vísitölu.

Um þennan lið er það að segja að frumvarp hefur þegar verið lagt fram á Alþingi og samþykkt.

6. liður er að settur verði á fót sérfræðingahópur um afnám verðtryggingar af neytendalánum.

Í samræmi við þennan lið var skipaður sérfræðingahópur í ágúst undir formennsku Ingibjargar Ingvadóttur. Hópurinn hefur kynnt sér helstu gögn og fundað með hagsmunaaðilum og sérfræðingum, svo sem Seðlabanka Íslands, umboðsmanni skuldara, Fjármálaeftirlitinu, Íbúðalánasjóði, Hagsmunasamtökum heimilanna, Samtökum fjármálafyrirtækja, Landssamtökum lífeyrissjóða, Félagi fasteignasala, bönkum og ýmsum hagfræðingum.
Efnisyfirlit, verkáætlun og verkaskipting liggur fyrir. Skoðuð verða áhrif afnáms verðtryggingar á neytendur, lánveitendur, fasteignamarkað og efnahagslíf og lagðar fram tillögur að útfærslu og tímasettri áætlun ásamt mótvægisaðgerðum. Áætluð skil eru upp úr miðjum desember.

Í 7. lið segir að kannað verði hvernig eignalausum einstaklingum verði gert kleift að greiða kostnað vegna gjaldþrotaskipta á búi sínu.

Unnið er að frumvarpi til laga um veitingu fjárhagsaðstoðar til greiðslu tryggingar á kostnaði vegna gjaldþrotaskipta til þeirra sem eiga engan kost annan en að fara fram á gjaldþrotaskipti á eignum sínum. Áætlað er að frumvarpið verði lagt fram á Alþingi í lok nóvember 2013.

8. liður fjallar um að sérfræðingahópur meti möguleika á því að leggja gjald á fjármálafyrirtæki vegna umtalsverðra tafa á endurútreikningi lána.

Þessari gjaldtöku er ætlað að styrkja stöðu skuldara gagnvart fjármálafyrirtækjum sem sjá um endurútreikning lána þeirra.
Fjármála- og efnahagsráðuneytið hefur unnið greinargerð um málið og hefur hún fengið umfjöllun í starfshópi sem falið hefur verið það verkefni að endurskoða bann við gengistryggingu fjárskuldbindinga í lögum um vexti og verðtryggingu, nr. 38/2001. Ályktanir starfshópsins koma fram í niðurlagi greinargerðarinnar, en þar er meðal annars vísað til afstöðu réttarfarsnefndar sem telur umrædda gjaldtöku ekki framkvæmanlega að teknu tilliti til ákvæða stjórnarskrár vegna vandkvæða við að afmarka skilyrði gjaldtökunnar nægilega skýrt.
Fjármálaeftirlitið sem er sjálfstætt stjórnvald getur í skjóli valdheimilda sinna aflað upplýsinga um eðli vandans og umfang. Í ályktun starfshópsins kemur fram að til greina komi að beita viðurlaga- og úrbótaheimildum stofnunarinnar ef tafir á endurútreikningi eru að hennar mati umtalsverðar og óréttlætanlegar. Svör viðskiptabankanna þriggja benda til þess að endurútreikningi gengistryggðra lána eigi að verða lokið fyrir næstu áramót en áætlanir Dróma og Lýsingar virðast vera meiri óvissu háðar.
Það er einnig mat starfshópsins að úrlausn ágreinings um gengistryggð lán gefi ásamt öðru tilefni til að endurskoða starfshætti úrskurðarnefndar um viðskipti við fjármálafyrirtæki í því skyni að tryggja betri eftirfylgni með úrskurðum hennar. Fjármála- og efnahagsráðherra hefur hafið vinnu við endurskoðun á samþykktum nefndarinnar.

9. liður fjallar um að stimpilgjöld af lánsskjölum verði endurskoðuð og stefnt að afnámi stimpilgjalda vegna kaupa einstaklinga á húsnæði til eigin nota.

Um þennan lið er það að segja að frumvarp hefur verið lagt fram á Alþingi um afnám stimpilgjalda af lánsskjölum í samræmi við þingsályktunina. Með frumvarpinu er lagt til að stimpilgjald af lánsskjölum verði afnumið en stimpilgjald vegna eignayfirfærslna fasteigna hækkað um 0,4% í tilviki einstaklinga. Einnig er með frumvarpinu lögð til mikil einföldun á framkvæmd og innheimtu gjaldsins. Með afnámi stimpilgjalda af lánsskjölum dregur úr kostnaði við lántöku og einnig mun sú aðgerð auka hreyfanleika viðskiptavina milli banka og stuðla þannig að aukinni samkeppni á fjármálamarkaði.

Í 10. lið segir að Hagstofa Íslands fái skýrar heimildir til að afla upplýsinga frá fjármálafyrirtækjum um fjárhagsstöðu heimila og fyrirtækja.

Frumvarp um þetta efni var samþykkt á Alþingi í september. Undirbúningur Hagstofunnar eftir samþykkt laga nr. 104/2013 hefur falist í tvenns konar aðgerðum. Í fyrsta lagi er tæknilegur undirbúningur, einkum um þætti sem varða gagnasendingar og gagnaöryggi. Má þar nefna tæknilega útfærslu á afnámi persónuauðkenna í gagnasendingum og aðferðum við að skipta út kennitölum í þeim gögnum sem unnið verður með. Samið hefur verið við utanaðkomandi sérfræðing um yfirferð öryggismála og gerð tillagna um aðgerðir vegna öryggisvottunar hjá Hagstofunni. Í öðru lagi er undirbúningur að afhendingu gagna. Hefur verið rætt við Íbúðalánasjóð vegna málsins og á næstu dögum verða fundir haldnir með stærstu fjármálafyrirtækjunum.
Herra forseti. Eins og sést á þessari upptalningu gengur framkvæmd þingsályktunarinnar samkvæmt áætlun. Það er mjög gleðilegt enda hafa skuldsett heimili marga fjöruna sopið á undanförnum árum. Það er von mín að góð samstaða myndist á Alþingi um þau mál sem enn eiga eftir að koma til kasta þingsins vegna þessarar þingsályktunar. Íslensk heimili eiga það skilið.
Tenglar: https://www.althingi.is/altext/143/11/l07111222.sgml

Félags- og húsnæðismálaráðherra, Eygló Harðardóttir, og jafnréttisráð buðu til jafnréttisþings síðastliðinn föstudag. Jafnréttisþingið var jafnframt lokaviðburður jafnréttisviku sem hófst á kvennafrídaginn, 24. október sl.

Hlutverk jafnréttisþingsins var að að efna til samræðu milli stjórnvalda og þjóðar um málefni kynjajafnréttis og gefa öllum áhugasömum kost á að hafa áhrif á stefnu stjórnvalda í jafnréttismálum. Fjallað var um fjölmargar hliðar jafnréttismála en megináhersla þingsins var að þessu sinni á jafnrétti á vinnumarkaði.

Fanný Gunnarsdóttir, formaður jafnréttisráðs, setti þingið og hófst dagskráin með ávarpi Eyglóar Harðardóttur sem fylgdi úr hlaði skýrslu um stöðu og þróun jafnréttismála árin 2011-2013.

Tilraunaverkefni um innleiðingu jafnlaunastaðals ÍST 85:2012 var einnig kynnt á þinginu af Önnu Kolbrúnu Árnadóttur formanns aðgerðahóps stjórnvalda og aðila vinnumarkaðarins um launajafnrétti. Verkefnið hefur verið lengi í undirbúningi og komu fyrst hugmyndir fram um jafnlaunavottun árið 2005 í tíð Árna Magnússonar félagsmálaráðherra.

Fjölmargar málstofur voru haldnar á þinginu ásamt fyrirlestrum og pallborðsumræðum og endurspeglaðist efnisval framsögumanna í áherslum þingsins um á jafnrétti á vinnumarkaði.

Ísland skipar nú fimmta árið í röð efsta sæti lista Alþjóðaefnahagsráðsins á sviði kynjajafnréttis sem staðfestir þann góða árangur sem náðst hefur á sviði jafnréttismála á síðustu árum. Þótt enn sé nokkuð í land svo jafnri stöðu og jöfnum áhrifum kvenna og karla verði að fullu náð ber að halda því til haga sem vel er gert og hefur borið góðan árangur. Í skýrslu ráðherra er til að mynda fjallað um áhrif laga um fæðingar- og foreldraorlof frá því þau tóku gildi í ársbyrjun 2001. Þrátt fyrir að breytingar hafi orðið á töku fæðingarorlofs í kjölfar efnhagsþrenginganna er ljóst er að enn tekur mikill meirihluti nýbakaðra mæðra og feðra á innlendum vinnumarkaði fæðingarorlof. Ennfremur sýna nýjar rannsóknir að hlutdeild feðra í umönnun barna hefur aukist verulega frá því að lögin tóku gildi en sú staðreynd verður að teljast til jákvæðra áhrifa laganna.

Eftir tvö ár verða 100 ár liðin frá því að íslenskar konur, 40 ára eldri, fengu kosningarétt og kjörgengi til Alþingis. Þessi tímamót verða nýtt til að beina sjónum að þeim verkefnum sem miða að því að auka kynjajafnrétti á sviðum þar sem enn hallar á annað kynið. Alþjóðlega fjármálakreppan, íslenska bankahrunið og efnahagsþrengingar sem fylgdu í kjölfarið hafa haft margræð áhrif á stöðu kvenna og karla og þróun jafnréttismála. Færa má rök fyrir því að jafnari þátttaka kynja í stjórnmálum, opinberri stjórnsýslu og í nefndum, stjórnum og ráðum hafi að einhverju leyti verið afleiðing þess að kallað var eftir breytingum í kjölfar efnahagsþrenginganna.  Konur eru nú um 40% kjörinna fulltrúa á sveitarstjórnarstiginu og á Alþingi. Hlutfall kvenna er nú sambærilegt því sem gerist annars staðar á Norðurlöndunum. Þá hefur hlutur kvenna í stjórn atvinnulífsins aukist eftir að ákvæði um hlutfall kynja í stjórnun hlutafélaga var sett í í lög og áhrifa þeirra fór að gæta.

Í lok þingsins kom fram í  máli Kristínar Ástgeirsdóttur, framkvæmdastýru jafnréttisstofu, að brýnast væri að fræða ungt fólk og börn um jafnréttismál og að skólarnir gengdu þar lykilhlutverki. Það væri áhyggjuefni að íhaldssamasta viðhorfið væri að finna hjá ungu fólki sem hugsanlega endurspeglast í  því stöðuga áreiti sem það verður fyrir í formi efnis sem hamri mjög á íhaldssömum og hefðbundnum kynímyndum. Svo virðist sem meira sjáist af ákveðinni andstöðu við jafnrétti kynjanna og mikilvægt að stöðva þá óheillavænlegu þróun.

Jafnréttisþingið var vel sótt, rúmlega 300 þátttakendur sátu þingið.

Tenglar:

Skýrsla jafnréttisráðherra: https://www.velferdarraduneyti.is/media/Rit_2013/Jafnrettisskyrsla_2013.pdf

Jafnréttisþing 2013: https://www.velferdarraduneyti.is/jafnrettisthing2013

 

Landsstjórn Framsóknarflokksins boðar til haustfundar miðstjórnar 22.-23. nóvember á Hótel Selfossi í Árborg. Samkvæmt lögum flokksins skal á haustfundi taka félagsstarf flokksins á komandi starfsári sérstaklega til umræðu.

Drög að dagskrá:

Föstudagur 22. nóvember 2013

17.00  Setning

Sigmundur Davíð Gunnlaugsson,  forsætisráðherra og formaður Framsóknarflokksins

17.05  Kosning embættismanna fundarins.

2 fundarstjórar og  2 fundarritarar

17.10  Skýrsla landsstjórnar, Eygló Harðardóttir félags og húsnæðisráðherra og ritari Framsóknarflokksins

17.30  Skýrsla málefnanefndar

17.40  Umræður um skýrslur

18.10  Reglur um framboðsleiðir til sveitarstjórna og sveitarstjórnarkosningarnar almennt

18.30  Skýrsla fræðslu- og kynningarnefndar

18.40  Hópastarf:

• framboðsreglur

• sveitarstjórnarmál

20.00  Kvöldverður

 

Laugardagur 23. nóvember 2013

08.30-09.30  Morgunverður

09.30  Hópastarf

11.30  Hópastarfi lokið

11.45  Hádegisverður

13.15  Ræða formanns Framsóknarflokksins. Sigmundar Davíð Gunnlaugssonar forsætisráðherra

14.00  Almennar umræður

15.30  Kaffihlé

16.00  Niðurstöður hópastarfs

16.30  Kosið í fastanefndir miðstjórnar skv. lögum flokksins

• Fjóra fulltrúa í fræðslu- og kynningarnefnd Framsóknarflokksins og tvo til vara

• Fjóra fulltrúa í málefnanefnd Framsóknarflokksins og tvo til vara

17.00  Önnur mál og fundarslit
***
Fastanefndir miðstjórnar munu flytja skýrslu um störf sín og jafnframt skulu miðstjórnarmenn kjósa úr sínum hópi til eins árs í senn a) fjóra fulltrúa í fræðslu- og kynningarnefnd Framsóknarflokksins og tvo til vara og b) fjóra fulltrúa í málefnanefnd Framsóknarflokksins og tvo til vara.
Miðstjórnarmenn eru hvattir til að gefa kost á sér í þessar nefndir og senda framboð á netfangið framsokn@framsokn.is.
Stefnt er að því að halda skemmtikvöld, föstudagskvöldið 22. nóvember, í samvinnu við framsóknarmenn í Árborg.
Aðalmenn í miðstjórn eru vinsamlegast beðnir um að staðfesta komu eða forföll til skrifstofu Framsóknar í síma 540-4300 eða á netfangið framsokn@framsokn.is. Mikilvægt er að vita um forföll í tíma til að geta boðað varamenn á fundinn.
Nánari tilhögun verður kynnt síðar en miðstjórnarfulltrúar eru beðnir að taka dagana frá og gera ráðstafanir með gistingu sbr. tilkynningu þar að lútandi sem send var með tölvupósti.