Category: Fréttir

Þorsteinn Sæmundsson, alþingismaður, vakti athygli á því á Alþingi í dag að markaðslögmálin eigi mögulega ekki við um „eldsneyti“ á Íslandi og þrátt fyrir að það séu fimm dreifingaraðilar á eldsneytinu.
„Ef við keyrum hér horna á milli í Reykjavík eða horna á milli á landinu getum við átt von á því að fá mismunandi verð, allt frá 10 aurum til 30 aura á lítrann.“
Og Þorsteinn bætti við, „þannig er sú samkeppni“.
Þorsteinn upplýsti að bjatari tíma sé reyndar von þar sem íslenska karlalandsliðið í handbolta verður á heimsmeistaramótinu „og hafi þeim hingað til gengið vel höfum við venjulega fengið dálítið skarpa lækkun daginn eftir,“ sagði Þorsteinn.
„Síðan í janúar í fyrra hefur heimsmarkaðsverð á dísilolíu og bensíni lækkað um 33%. Á sama tíma hefur veruleg styrking orðið á gengi íslensku krónunnar gagnvart erlendum gjaldmiðlum og maður skyldi ætla að nú gæti maður farið hlakkandi á næstu dælustöð. En verðlækkun á eldsneyti á Íslandi á þessum sama tíma nemur í kringum 10,7%,“ sagði Þorsteinn.
Samkvæmt útreikningum FÍB eru íslensku olíufélögin með um það bil 6 kr. meiri álagningu á lítra en þau voru með í janúar í fyrra. „Hver króna í eldsneytisverði á Íslandi kostar íslenskar fjölskyldur 360 millj. kr., þannig að þessar 6 kr. sem hægt væri að skila í eldsneytisverði kosta íslensk heimili í kringum 2 milljarða kr. á ári,“ sagði Þorsteinn.
„Ég held því að nú sé tækifæri á aðventunni fyrir stjórnendur olíufélaganna, sem sitja á ofurlaunum í boði lífeyrissjóðanna á Íslandi, að færa Íslendingum smá jólaglaðning með lækkun á eldsneyti,“ sagði Þorsteinn að lokum.
 
PS: Ertu á Facebook? Því ekki að verða aðdáandi Framsóknar.

Vegna rangra upplýsinga í frétt á forsíðu og á bls. 8 í Fréttablaðinu í dag vill forsætisráðuneytið taka eftirfarandi fram:
Aðstoðarmenn ráðherra og ríkisstjórnar eru ráðnir samkvæmt heimild í 22. gr. laga  nr. 115/2011, um Stjórnarráð Íslands. Samkvæmt henni heyra aðstoðarmenn beint undir ráðherra og er meginhlutverk þeirra að vinna að stefnumótun á málefnasviði ráðuneytis undir yfirstjórn ráðherra og í samvinnu við ráðuneytisstjóra. Þá kemur fram að aðstoðarmenn gegni störfum fyrir ráðherra svo lengi sem ráðherra ákveður, þó ekki lengur en ráðherra sjálfur.
Eftirtaldir tveir aðstoðarmenn eru starfandi í forsætisráðuneytinu sem aðstoðarmenn forsætisráðherra:

• Jóhannes Þór Skúlason, aðstoðarmaður ráðherra.
• Ásmundur Einar Daðason, alþingismaður og aðstoðarmaður ráðherra. Ásmundur þiggur ekki laun fyrir störf sín í forsætisráðuneytinu.

Að auki hefur ríkisstjórn Íslands lagaheimild til að ráða þrjá aðstoðarmenn. Sú heimild hefur ekki verið að fullu nýtt en tveir aðstoðarmenn starfa á grundvelli hennar og hafa þeir aðsetur í forsætisráðuneytinu:

• Benedikt Árnason, efnahagsráðgjafi forsætisráðherra og ráðherranefnda ríkisstjórnarinnar
• Sigurður Már Jónsson, upplýsingafulltrúi ríkisstjórnarinnar.

Þessu til viðbótar starfar Margrét Gísladóttir sem sérstakur ráðgjafi ráðherra í forsætisráðuneytinu í láni frá utanríkisráðuneytinu.
Aðrir starfsmenn forsætisráðuneytisins sem tilgreindir eru í Fréttablaðinu í dag eru ekki aðstoðarmenn forsætisráðherra. Þeir heyra undir ráðuneytisstjóra og starfa að tímabundnum og afmörkuðum verkefnum. Lilja Alfreðsdóttir, aðstoðarframkvæmdastjóri á skrifstofu bankastjóra og alþjóðasamskipta í Seðlabankanum, var ráðin til forsætisráðuneytisins á grundvelli tímabundins vistaskiptasamnings við Seðlabankann til að sinna verkefnum er snúa m.a. að fjármagnshöftum. Hrannar Pétursson, sérfræðingur í samskipta- og upplýsingamálum, hefur það hlutverk að stýra endurskoðun á samskipta- og upplýsingamálum Stjórnarráðsins. Um er að ræða tímabundna ráðningu til tveggja mánaða.
Vegna umfjöllunar Fréttablaðsins er rétt er að benda á, að Hanna Birna Kristjánsdóttir hefur látið af embætti innanríkisráðherra og tilgreindir aðstoðarmenn hennar eru einnig hættir störfum. Ólöf Nordal, sem tók við embætti innanríkisráðherra þann 4. desember, hefur ekki ráðið sér aðstoðarmenn. Þá skal bent á að Sigurður Ingi Jóhannsson gegnir bæði embætti umhverfis- og auðlindaráðherra og landbúnaðar- og sjávarútvegsráðherra. Honum er því heimilt samkvæmt lögum að ráða 4 aðstoðarmenn.
Heimild: stjornarrad.is
 
PS: Ertu á Facebook? Því ekki að verða aðdáandi Framsóknar.

Önnur umræða fjárlaga hófst á Alþingi í gær og verið framhaldið í dag. Vigdís Hauksdóttir formaður fjárlaganefndar mælti fyrir nefndaráliti meirihluta fjárlaganefndar og fór yfir áform meirihlutans.
Fjárlaganefnd hefur haft frumvarpið til umfjöllunar eftir að málið gekk til hennar þann 12. september. Fjölmargir gestir hafa verið kallaðir fund nefndarinnar, þar má nefna fulltrúa 43 sveitarfélaga, fulltrúa landshlutasamtaka sveitarfélaga, fulltrúa allra ráðuneyta, Hagstofunnar, Ríkisendurskoðunar, Sambands íslenskra sveitarfélaga, Seðlabanka Íslands auk annarra gesta.

• Nefndarálit um frumvarp til fjárlaga fyrir árið 2015. Frá meirihluta fjárlaganefndar.
• Breytingartillaga við frumvarp til fjárlaga fyrir árið 2015. Frá meirihluta fjárlaganefndar.

Fór Vigdís yfir í ræðu sinna að forgangsraðað hefur verið í þágu grunnþátta samfélagsins, heilbrigðismála, menntamálin, samgöngumál, þ.e. aukið fé í flugvelli, vegi og ljósleiðaravæðingu landsins.
Á næstu missirum verður kynnt losun hafta og samninga við kröfuhafa þannig að þá skapast svigrúm til þess að ríkið geti grynnkað á skuldum sínum. Vaxtakostnaðurinn nemur í dag hærri fjárhæð en öll framlög ríkisins til reksturs Landspítalans og Sjúkratrygginga Íslands. „Miklar skuldir ríkissjóðs eru ávísun á að börn okkar og barnabörn muni að öllu óbreyttu ekki njóta sömu lífsgæða og núverandi kynslóðir,“ sagði Vígdís.
„Mikið vantar upp á að skilningur sé í stjórnkerfinu á mikilvægi hagræðingar og forgangsröðunar innan ríkiskerfisins. Meiri hluti fjárlaganefndar vekur sérstaklega athygli á verkefnum um útboð og innkaup ríkisstofnana. Aðföng í rekstri ríkisstofnana nema um 130 milljörðum kr. á ári. Ljóst er að endurbætur á innkaupaferlum geta skilað umtalsverðri hagræðingu fyrir ríkissjóð og ríkisstofnanir. Innkaup eru á hendi fjölmargra aðila og því er mikilvægt að leggja innkaupaaðilum í hendur markvisst verklag og skilvirk verkfæri til þess að árangur verði sem mestur. Almenn útboð á vöru eða þjónustu og rammasamningsútboð eru slík verkfæri,“ sagði Vígdís.
„Fyrir réttu ári skilaði hagræðingarhópur ríkisstjórnarinnar tillögum sínum. Meiri hluti fjárlaganefndar telur að of hægt gangi að koma þeim til framkvæmda. Af 95 tillögum sem voru á ábyrgðarsviði einstakra ráðherra hefur nú 14 tillögum verið hrundið í framkvæmd, 53 tillögur eru í vinnslu og 17 eru í forathugun. 11 tillögur eru ekki hafnar eða verða ekki framkvæmdar. Meiri hlutinn leggur ofuráherslu á að framkvæmdarvaldið komi þessum tillögum í framkvæmd sem fyrst til að ná fram enn frekari sparnaði í ríkisrekstrinum,“ sagði Vígdís ennfremur.
Framlög til Íbúðalánasjóðs hafa numið 53,5 milljörðum kr. frá árinu 2009 og að öllu óbreyttu verða framlögin 5,7 milljarðar kr. á árinu 2015. Að þeim meðtöldum hafa framlögin frá árinu 2009 numið svipaðri fjárhæð og nemur byggingarkostnaði nýs Landspítala.
Ríkisútvarpið fær aukið 181,9 millj. kr. skilyrt framlag til rekstrar í þessum tillögum. Sú tímabundna fjárheimild er háð þeim skilyrðum að fram fari vinna á fjárhagslegri endurskipulagningu Ríkisútvarpsins. Þá verði útborgun fjárheimildarinnar enn fremur háð því að haldbærar rekstraráætlanir séu lagðar fram þar sem fram komi hvernig starfsemi stofnunarinnar verði komið á réttan kjöl og hún verði sjálfbær til frambúðar.
Að meirihluta áliti fjárlaganefndar standa auk Vigdísar, Guðlaugur Þór Þórðarson, Ásmundur Einar Daðason, Willum Þór Þórsson, Haraldur Benediktsson og Valgerður Gunnarsdóttir.
Framsaga Vigdísar Hauksdóttur formanns fjárlaganefndar:

 
PS: Ertu á Facebook? Því ekki að verða aðdáandi Framsóknar.

Hanna María, sýnir B – hliðina og hún segir, m.a. þetta: „Ég held líka að við séum frekar heppin í þingflokknum hvað það varðar að ná vel saman“.
Fullt nafn: Jóhanna María Sigmundsdóttir.
Gælunafn: Hanna María, Hannsa.
Aldur: 23 ára.
Hjúskaparstaða? Einhleyp.
Börn? Engin, en á rosalega mikið í börnum systkina minna.
Hvernig síma áttu? Svona svartan epla síma.
Uppáhaldssjónvarpsefni? Fræðslu- og gamanþættir. Það léttir lundina að hlæja og svo er alltaf gaman að læra meira og fræðast um eitthvað nýtt.
Uppáhalds vefsíður: Ef ég skoða toppsíðurnar í vafranum þá er þar að finna althingi.is, youtube.com, bbl.is og trendnet.is.
Besta bíómyndin? A Hard days night, svarthvít og klassísk.
Hvernig tónlist hlustar þú á? Ég er virkilega alæta á því sviðinu, en eldri tónlist nær betur til mín, The Shadows, Vilhjálmur Vilhjálmsson, The Beatles, The Platters, Haukur Mortens, Ellý…
Uppáhaldsdrykkur: Ísköld ógerilsneydd mjólk.
Hvað finnst þér best að borða? Lambakjötið hefur sjaldan brugðist.
Hvaða lag kemur þér í gírinn? Út á gólfið – Hemmi Gunn.
Ertu hjátrúarfull? Ég hélt ekki, en ég hendi samt annað slagið salti yfir öxlina við eldamennskuna.
Hverslags viðfangsefni myndirðu ekki leggja nafn þitt við? Það er mat í hverju máli fyrir sig, en til að mynda er ég mótfallin því að leyfa sölu áfengis í öðrum verslunum heldur en verslunum ÁTVR, sem hefur komið mörgum á óvart vegna aldurs míns. Önnur viðfangsefni eru m.a. ofbeldi, einelti og Evrópusambandið.
Hver var fyrirmyndin þín á yngri árum? Auðvitað horfir maður upp til foreldra og systkina. En ég leit mikið upp til Guðna Ágústssonar, hann gat fengið fólk til að hlægja en einnig til að hlusta þegar alvaran átti við. Ég vildi þróa það með mér að geta fengið fólk til að hlusta en einnig til að brosa.
Hver er fyrirmyndin þín í dag? Simbi afi sem sagði alltaf það sem honum brann í brjósti, mikill samvinnuhugsjónar maður.
Hverjir eru sessunautar þínir á Alþingi? Bjarkey Gunnarsdóttir og Katrín Júlíusdóttir.
Hver eru helstu áhugamálin? Landbúnaður, félagsmál, matreiðsla, hönnun og tónlist.
Besti vinurinn í vinnunni? Elsa mín í NV er mín stoð og stytta og svo er óendanlega gott að hafa Gunnar Braga og Ásmund („strákana okkar“) með okkur. Ég held líka að við séum frekar heppin í þingflokknum hvað það varðar að ná vel saman.
Helsta afrekið hingað til? Hingað til er það að komast inn á Alþingi sem kjörinn fulltrúi og þar með vera yngst í sögu lýðveldisins til að komast þar inn, en er hvergi nærri hætt í að afreka meira.
Uppáhalds manneskjan? Ég get ekki gert upp á milli í fjölskyldunni. Foreldrar mínir og systkini styðja mig í öllu sem ég tek mér fyrir hendur og reyna að tala um fyrir mér þegar það á við, þegar eitthvað gleðilegt kemur upp er ekki nóg að hringja bara í einn fjölskyldumeðlim, það er öll línan tekin.
Besti skyndibitinn? Skútupylsa í Skútunni á Akranesi og Kleifarbúinn-pizza í Besta bitanum á Patreksfirði.
Það sem þú borðar alls ekki? Hrútakjöt *hrollur*
Lífsmottóið? Til að forðast gagnrýni skaltu segja ekkert, gera ekkert og vera ekkert.
Þetta að lokum: Við ákveðum sjálf hvenær tindinum er náð og hvar hann er, ekkert er ómögulegt.
 
PS: Ertu á Facebook? Því ekki að verða aðdáandi Framsóknar.

Í þessari viku er það félags- og húsnæðismálaráðherra, Eygló Harðardóttir, sem sýnir B – hliðina. „Styrkur hinna smáu liggur í samvinnu og gefstu ekki upp, velgengni í lífinu er langhlaup.“
Fullt nafn: Eygló Þóra Harðardóttir.
Aldur: 41.
Hjúskaparstaða? Gift Sigurði E. Vilhelmssyni.
Börn? Hrafnhildur Ósk (14) og Snæfríður Unnur (8).
Hvernig síma áttu? Samsung Galaxy S4.
Uppáhaldssjónvarpsefni? Morðgátur og matreiðsla. Ekkert betra en skammtur af Miss Marple og Anthony Bourdain No Reservations.
Uppáhalds vefsíður: nytimes.com, guardian.co.uk, dn.se, bbc.co.uk/food, arla.se og foodnetwork.com.
Besta bíómyndin? Svo margar … the Commitments, the Breakfast Club, La Reine Margot, G.I. Jane, Star Trek (2009), öll Alien serían, the Murder on the Orient Express (1974) og Hringadróttinssaga e. Peter Jackson. Nú þegar fer að líða að jólum er einnig notalegt að kíkja á Die Hard seríuna með Bruce Willis og the Long Kiss Goodnight með Geena Davis og Samuel Jackson.
Hvernig tónlist hlustar þú á? Popp, r&b og blues.
Uppáhaldsdrykkur: Kolsýrt vatn.
Hvað finnst þér best að borða? Allur matur er góður, svo lengi sem hann er vel eldaður. Lengi vel var indverskur matur í miklu uppáhaldi, en hef verið að prófa mig áfram með ítalskan, franskan, amerískan og breskan mat auk þess að norræn matur er alltaf að verða betri og betri.
Hvaða lag kemur þér í gírinn? River deep, mountain high eða Hung up með Madonnu.
Ertu hjátrúarfull? Nei.
Hver var fyrirmyndin þín á yngri árum? Móðir mín og Vigdís Finnbogadóttir.
Hver er fyrirmyndin þín í dag? Móðir mín, Vigdís Finnbogadóttir, Hillary Clinton og eiginmaður minn.
Hverjir eru sessunautar þínir á Alþingi? Illugi Gunnarsson, menntamálaráðherra.
Hver eru helstu áhugamálin? Stjórnmál, vinnan, matreiðsla og útsaumur.
Helsta afrekið hingað til? Fimmtán ára gott og hamingjuríkt hjónaband og dætur mínar.
Besti skyndibitinn? Kjötbollurnar í Ikea.
Það sem þú borðar alls ekki? Súrsaðan mat og hákarl.
Lífsmottóið? „Styrkur hinna smáu liggur í samvinnu og gefstu ekki upp, velgengni í lífinu er langhlaup“. Geðráðin 10 eru einnig mjög góð lífsmóttó.
 
PS: Ertu á Facebook? Því ekki að verða aðdáandi Framsóknar.

Sigmundur Davíð Gunnlaugsson, forsætisráðherra og formaður Framsóknar, hefur lokið ræðu sinni á haustfundi miðstjórnar Framsóknar á Hornafirði. Kom hann víða víð í ræðunni. Fagnaði hann að núna einu og hálfu ári eftir að miðstjórn flokksins samþykkti stjórnarsáttmála og ríkisstjórnarsamstarf í maí 2013 hafi orðið algjör viðsnúningur á fjölmörgum sviðum. Þetta mun gera svo mikið betur kleift að leysa úr þeim vanda sem eftir stendur og bæta hag allra í íslensku samfélagi.

• Ræða Sigmundar Davíðs Gunnlaugssonar í heild sinni.
• Myndir frá haustfundi miðstjórnar á Hornafirði.

„Á innan við einu og hálfu ári er skuldaleiðréttingin komin til framkvæmda. Mál sem við framsóknarmenn höfum barist fyrir frá því í upphafi árs 2009. Mál sem við töldum svo mikilvægt að við vorum reiðubúin til að gefa öðrum flokkum tækifæri til að stjórna í minnihlutastjórn gegn því skilyrði að ráðist yrði í aðgerðina.“
Fór Sigmundur Davíð yfir að með hjálp góðra manna hafi tekist „að gera það besta úr stöðu sem hafði virst nánast vonlaus“. Sagði Sigmundur Davíð að með því hafi verð staðið að öllu leiti við fyrirheit sem gefin voru fyrir síðustu kosningar. Minnti hann á að andstæðingarnir hafi kallað það „stærsta kosningaloforð allra tíma“.
Sigmundur Davíð sagði að næstu dagar muni að mestu snúast um fjárlagavinnuna sem nú er í fullum gangi. „Við erum að komast í stöðu til að bæta í og halda áfram endurreisn heilbrigðiskerfisins. Það er þó mikilvægt að ekki gleymist í þeirri umræðu allri að þótt Landsspítalinn sé gríðarlega mikilvæg stoð í heilbrigðiskerfinu er hann ekki heilbrigðiskerfið allt.“
Framlög til Landsspítalans á næsta ári verða þau mestu frá 2008, ekki aðeins í krónutölu heldur að raunvirði, á föstu verðlagi.
Stendur vinna yfir við fjárlög ársins 2015 á Alþingi og eftir helgi verða kynntar tillögur um breytingar vegna annarrar umræðu fjárlaga. Sagði Sigmdundur Davíð að þar væri að vænta góðra frétta og ekki bara á sviði heilbrigðismála. Agi er ný ríkisstjórn innleiddi í ríkisfjármálunum sé þegar byrjaður að skila sér.
Ríkið skuldar um 1.500 milljarða króna
„Árlegar vaxtagreiðslur hafa numið um það bil tvöföldum rekstrarkostnaði Landsspítalans undanfarin ár. Það er því augljóst að á þessum vanda verður að vinna og það er gert annars vegar með því að greiða niður skuldir og hins vegar með því að lækka vextina á þeim skuldum sem eftir standa“, sagði Sigmundur Davíð.
Breytingar á virðisaukaskattskerfinu
„Öll þekkjum við umræðuna um breytingar á virðisaukaskattskerfinu og allir höfum við, framsóknarmenn, viljað fá vissu fyrir því að þær breytingar sem ráðist verður í muni örugglega bæta stöðu almennings, sérstaklega fólks með tekjur undir meðaltali, sagði Sigmundur Davíð og hélt áfram, “skattkerfisbreytingum var ætlað að draga úr skattaundanskotum ekki hvað síst í virðisaukaskattskerfinu með því að, fækka undanþágum, leysa úr flækjum og minnka bilið milli skattþrepa“.
„Við framsóknarmenn settum það sem skilyrði að tryggt yrði að afleiðingin af aðgerðunum yrði sú að verðlag í landinu myndi lækka“, sagði Sigmundur Davíð.
„Þegar allt er talið á matvælaverð ekki að hækka vegna breytinganna um nema í mesta lagi um 1,4% og helst ekki neitt. Flestar vörur munu lækka í verði og nauðsynleg lyf alveg sérstaklega. Heildaráhrif breytinganna þýða að neysluskattar lækka verulega og, það sem er mikilvægast, áhrifin verða mest hjá þeim tekjulægstu.“
„Takist okkur svo að varðveita verðlagsstöðugleikann með kaupmáttarsamningum á vinnumarkaði getur kaupmáttur haldið áfram að vaxa hraðar á Íslandi en í nokkru öðru Evrópulandi og við tryggt að jöfnuður verði áfram einhver sá mesti í Evrópu en nú er Ísland það land þar sem fæstir eru undir lágtekjumörkum eða 12,7% en meðaltalið í Evrópusambandinu er 25%“, sagði Sigmundur Davíð.
„Búast má við mikilli uppbyggingu iðnaðar víða um land, íslenskur sjávarútvegur skilar nú meiri verðmætum til samfélagsins en nokkurn tímann áður og nýjum lögum um stjórn fiskveiða er ætlað að veita greininni stöðugleika og virkja nýsköpunarmöguleika í sjávarútvegi en um leið tryggja hámarks samfélagslegan ávinning.
Landbúnaður, atvinnugrein framtíðarinnar eins og menn eru nú farnir að kalla það, getur vaxið mikið á komandi árum og aukin áhersla á rannsóknir og vísindi auk nýrra hvata mun gera það að verkum að enn fleiri nýsköpunarfyrirtæki munu spretta upp á Íslandi en á undanförnum árum.“
Það skiptir máli hverjir fara með stjórnvöldin og með stefnumótun Framsóknar á síðasta flokksþingi hefur náðst ótrúlegur viðsnúningur.
„Við vitum öll að það er gríðarlega mikið verk óunnið. Við vitum að margt fólk stendur enn höllum fæti í íslensku samfélagi og við vitum að kjörin þurfa að batna meira“, sagði Sigmundur Davíð.
Að lokum sagði Sigmundur Davíð að: „hvers konar árangri er hægt að ná með trúa því að við séum í aðstöðu til að ná lengra, trúa því hægt sé að gera betur. Þess vegna getum við leyft okkur að vera enn bjartsýnni á framhaldið en við vorum fyrir einu og hálfu ári síðan og þess vegna eigum við að leyfa okkur að gleðjast. Framsókn Ísland er frábært land, íslenska þjóðin er frábær þjóð og ef hún hefur trú á sér og því að framtíðin á Íslandi verði enn betri“.
 
PS: Ertu á Facebook? Því ekki að verða aðdáandi Framsóknar.