Framsokn.is
19/10/2024
Uppstilling í öllum kjördæmum hjá FramsóknAð loknum kjördæmisþingum Framsóknar í dag er ljóst að uppstilling verður viðhöfð sem aðferð við val á framboðslista flokksins í öllum kjördæmum. Kjördæmisþing Framsóknar í Reykjavík hafði fyrr í vikunni samþykkt að viðhafa uppstillingu. Tillaga um uppstillingu var samþykkt samhljóða í öllum kjördæmum.
Framboðslistar Framsóknar munu verða samþykktir á kjördæmisþingum næsta laugardag, 26. október.
Deila
Prenta grein
19/10/2024
Stærsta hagsmunamáliðÞað er ábyrgðahluti að sitja í ríkisstjórn Íslands. Á undanförnum árum höfum við í Framsókn einbeitt okkur að því að horfa fram á veginn, vera á skóflunni og vinna vinnuna í þágu íslenskra hagsmuna. Við höfum haldið okkur fyrir utan reglulegt hnútukast milli annarra stjórnmálaflokka og reynt að einblína frekar á verkefnin og finna á þeim hagfelldar lausnir fyrir land og þjóð.
Ég er stolt af þeim árangri sem náðst hefur á ýmsum sviðum þjóðlífsins á undanförnum árum. Margt hefur áunnist þótt það séu fjölmörg tækifæri til þess að gera betur. Þannig er gangur lífsins.
Lægri verðbólga og lækkun vaxta eru stærsta hagsmunamál heimila og fyrirtækja um þessar mundir. Það voru jákvæð tíðindi þegar Seðlabankinn lækkaði vexti nú í byrjun mánaðar. Slíkt gerist ekki af sjálfu sér. Lykilatriði á næstu vikum er að tryggja að atburðarásin á næstunni verði ekki til þess að tefja vaxtalækkunarferlið. Framsókn mun ekki láta sitt eftir liggja í þinginu til að tryggja að skynsamleg fjárlög verði samþykkt, líkt og boðað er í því fjárlagafrumvarpi sem fjármála- og efnahagsráðherra hafði mælt fyrir fyrr í haust. Leiðarljós þess eru að ná niður verðbólgu og bæta þannig kjör heimila og fyrirtækja. Það er skoðun okkar að traust samspil peningastefnu Seðlabanka Íslands, opinberra fjármála og aðila vinnumarkaðarins sé lykilforsenda þess að stuðla að stöðugu verðlagi og skapa skilyrði fyrir lækkun verðbólgu og vaxta. Í þágu þessa þarf forgangsröðun í opinberum fjármálum sem kallast á við aðgerðir stjórnvalda í þágu langtímakjarasamninga á vinnumarkaði, sem snúa að því að fjárfesta í fólki.
Það eru áhugaverðir tímar í íslenskum stjórnmálum um þessar mundir. Það er skylda okkar sem störfum á þeim vettvangi að takast á við stöðuna af ábyrgð og festu enda er til mikils að vinna að ná mjúkri lendingu í hagkerfinu. Það er heiður að starfa í umboði kjósenda landsins og vinna í þágu íslenskra hagsmuna. Í komandi kosningum munu flokkarnir óska eftir endurnýjuðu umboði til þess að sitja á Alþingi Íslendinga. Við í Framsókn erum klár í bátana og vélarnar hafa verið ræstar, tilbúin til að leggja okkur öll áfram fram til þess að gera samfélagið betra en það var í gær.
Lilja Dögg Alfreðsdóttir, menningar- og viðskiptaráðherra og varaformaður Framsóknar.
Greinin birtist fyrst í Morgunblaðinu 19. október 2024.
Deila
Prenta grein
18/10/2024
Halla Hrund boðin velkomin í FramsóknSigurður Ingi Jóhannsson, formaður Framsóknar, hefur í yfirlýsingu ákveðið að færa sig niður í annað sæti framboðslistans Framsóknar í Suðurkjördæmi. Sigurður Ingi segir í yfirlýsingu að formaður sem ekki leggi ekki sjálfan sig að veði fyrir flokkinn sinn sé ekki sannur leiðtogi. Sigurður Ingi býður Höllu Hrund Logadóttur velkomna í öflugan hóp Framsóknarfólks og í forystu sæti flokksins í kjördæminu.
„Ég er fullviss um að þessi nýja rödd Framsóknar og samvinnustefnunnar muni hljóma sterk fyrir kjördæmið og landið allt á Alþingi Íslendinga.“
„Síðustu dagar hafa verið dagar mikilla umbrota í íslenskum stjórnmálum. Á sunnudag tilkynnti forsætisráðherra og formaður Sjálfstæðisflokksins mér og formanni Vinstri grænna, og nokkrum mínútum síðar þjóðinni á blaðamannafundi, að hann hefði ákveðið að slíta ríkisstjórnarsamstarfinu. Sú ákvörðun var formlega staðfest í gær með þingrofi og ríkisráðsfundi á Bessastöðum.
Það er því ljóst að kosningar til Alþingis verða haldnar eftir sex vikur.
Ef horft er á skoðanakannanir þá á Framsókn á brattann að sækja. Staða flokksins í Suðurkjördæmi er sú að enginn kjördæmakjörinn þingmaður Framsóknar næði inn á þing ef kosið væri nú. Það væri ekki aðeins slæmt fyrir flokkinn heldur er það einlæg trú mín að það séu hagsmunir kjördæmisins og þjóðarinnar að Framsókn eigi sterka rödd á þjóðþinginu. Ég hef því tekið ákvörðun um að leggja til við kjörstjórn Framsóknar í Suðurkjördæmi að Halla Hrund Logadóttir, starfandi orkumálastjóri, verði í fyrsta sæti á lista Framsóknar fyrir Alþingiskosningarnar 30. nóvember. Sjálfur býð ég mig fram í annað sæti.
Með þessari tillögu legg ég sjálfan mig undir. Enda lít ég svo á að sá formaður sem ekki leggur sjálfan sig að veði fyrir flokkinn sinn sé ekki sannur leiðtogi.
Ég býð Höllu Hrund velkomna í öflugan hóp Framsóknarfólks. Ég er fullviss um að þessi nýja rödd Framsóknar og samvinnustefnunnar muni hljóma sterk fyrir kjördæmið og landið allt á Alþingi Íslendinga.“
Halla Hrund Logadóttir hefur einnig sent frá sér yfirlýsingu sem má lesa í heild sinni hér að neðan:
„Kæru vinir og stuðningsfólk,
frá því ég man eftir mér hef ég verið knúin áfram af ástríðu fyrir landinu okkar, auðlindunum sem við eigum, og þeim tækifærum sem þær gefa okkur sem þjóð.
Eins og þið vitið hef ég aldrei tilheyrt stjórnmálaflokki, því ég hef alltaf séð mig fyrst og fremst sem Íslending, sem vill vinna með fólki úr öllum áttum með hagsmuni landsins okkar að leiðarljósi. Í kosningabaráttunni í vor fékk ég tækifæri til að vinna með einstöku fólki úr öllum stjórnmálaflokkum sem brennur fyrir samfélaginu okkar. Það sýndi mér svo vel að það sem sameinar okkur er sterkara en það sem sundrar – ástin á landinu og framtíðarsýn um betri tíð.
Það er einmitt þess vegna sem ég hef ákveðið að ganga til liðs við Framsókn. Að mínu mati er hann hvorki hægri né vinstri. Ég tengi flokkinn einnig sterkt við að vera einfaldlega eins og Íslendingur sem vill vinna ötullega að fyrir landið sitt enda er Framsókn elsti stjórnmálaflokkur landsins. Hann er flokkur sem leggur áherslu á samvinnu og málamiðlanir. Það skal vera nýr tónn stjórnmálanna og þannig vil ég vinna í Framsókn fyrir Ísland.
Það sem knýr mig til þátttöku á sviði stjórnmálanna eru auðlindamálin. Þar stöndum við á mikilvægum tímamótum, og ég tel það vera skyldu mína að leggja mitt af mörkum til að tryggja að auðlindir okkar séu nýttar á skynsaman og sanngjarnan hátt og að ábati þeirra renni til samfélagsins. Ég vil vera vakin og sofin yfir verðmætunum sem við eigum í einstakri náttúrunni og þeim ólíku nytjum sem hún gefur; fyrir komandi kynslóðir um ókomna tíð. Ég bið um stuðning ykkar til að geta unnið að þessum málum.
Hjarta mitt slær ekki síst fyrir landsbyggðina. Við megum aldrei missa sjónar á því að mikilvæg verðmæti – eins og fiskurinn í sjónum, orkan sem við treystum á, matvælin okkar og ferðaþjónustan – verða til víða um landið. Ég vil tryggja að allir landshlutar fái að taka þátt í þeirri þróun sem við upplifum í dag. Sterkir innviðir, fjölbreytt menningarlíf og atvinnumöguleikar um allt land skapa ekki aðeins betri lífskjör heldur líka fleiri spennandi tækifæri fyrir ungt fólk til að þroskast og vaxa hér heima.
Samhliða vil ég efla áherslu á líðan og samkennd í samfélaginu okkar, þvert á stétt, uppruna og stöðu. Það skiptir máli að allir hafi möguleika á að tilheyra og finna sér farveg. Einstaklingshyggjan og einangrun hópa má ekki taka yfir. Við erum í samfélagi, og samvinna og þátttaka skiptir öllu.
Húsnæðismálin eru mér einnig sérstakt hjartans mál því núverandi staða ýtir undir misskiptingu og sundrung. Það er ólíðandi að venjulegt fólk þurfi að keppa við fagfjárfesta á fasteignamarkaði. Slíkt ástand er ekki sjálfbært. Hér þarf skynsemi og stjórnmálamenn sem geta tekið ákvarðanir með almannahagsmuni í forgrunni.
Ég trúi á jákvæðni, drifkraft og skapandi lausnir á öllum sviðum, frá innviðum til íþrótta, menningar og lista, sem kjarna hver við erum. Slíkur metnaður á öllum sviðum lýsir sjálfstæðri þjóð í sókn sem hlúir að fólkinu sínu og gæðum landsins fyrir framtíðina. Ég vonast eftir þínum stuðningi í þá vegferð og hlakka til samstarfs við Sigurð Inga og ykkur sem flest næstu vikurnar.“
Deila
Prenta grein
18/10/2024
Spennandi dagur í vændum!Á laugardaginn 19. október verður stór dagur hjá Framsóknarfólki víðsvegar um landið. Við byrjum með kjördæmisþing í Suðurkjördæmi kl. 11.00 á fjarfundi. Kjördæmisþing þing í Suðvesturkjördæmi hefst kl. 13.00, í Bæjarlindinni í Kópavogi. Á sama tíma hefst kjördæmisþing í Norðvesturkjördæmi að Laugum í Sælingsdal.
Norðausturkjördæmi verður með aukakjördæmisþing á fjarfundi á Teams kl. 14.00.
Við viljum minna á söfnun meðmælenda á framboðslista Framsóknar – þið skráið ykkur inn með rafrænum skilríkum á hlekkinn hér að neðanog xB er að sjálfsögðu málið!
HLEKKUR Á MEÐMÆLENDASÖFNUN FRAMSÓKNAR
Boðað er til aukakjördæmisþings KSFS laugardaginn 19. október 2024 í fjarfundi á Teams kl. 11.00. (HLEKKUR)
Fyrir aukakjördæmisþinginu liggur aðeins eitt mál sem er að afgreiða aðferð við val frambjóðenda á framboðslista fyrir komandi alþingiskosningar.
Vegna þeirrar stöðu sem upp er kominn er uppstilling á framboðslista flokksins sú aðferð sem rúmast innan þess þrönga tímaramma sem fyrir liggur, en þarf engu að síður samþykki kjördæmisþings.
Boðað er til 24. Kjördæmisþings Framsóknarmanna í Suðvesturkjördæmi (KFSV) laugardaginn 19. október að Bæjarlind 14-16 í Kópavogi. Húsið opnar kl. 12:00 og verður boðið upp á kjötsúpu kl. 12:30 og þingið setning kl. 13:00.
Boðað er til 24. Kjördæmisþings Kjördæmissambands Framsóknarmanna í Norðvesturkjördæmi (KFNV) dagana 19.-20. október að Laugum í Sælingsdal. Þingsetning er kl. 13.00 laugardaginn 19. október. Þinggjaldið er kr. 4.000,-
Formenn aðildarfélaga eru hvattir til þess að huga að því að manna kjörbréf fyrir þingið og gott væri að áhugasamir félagsmenn myndu tilkynna sig til þeirra.
Boðað er til aukakjördæmisþings KFNA laugardaginn 19. október 2024 á Teams kl. 14.00. (HLEKKUR)
Fyrir aukakjördæmisþinginu liggur aðeins eitt mál sem er að afgreiða aðferð við val frambjóðenda fyrir komandi alþingiskosningar.
Vegna þeirrar stöðu sem upp er kominn er uppstilling á framboðslista flokksins sú aðferð sem rúmast innan þess þrönga tímaramma sem fyrir liggur, en þarf engu að síður samþykki kjördæmisþings.
Deila
Prenta grein
14/10/2024
Á ríkið að svíkja samninga?Í vikunni birtist frétt í Morgunblaðinu um tillögur Viðskiptaráðs, en þær hafa það að markmiði að spara ríkinu ákveðnar fjárhæðir. Það sem þar kemur aðallega á óvart er að margar tillögur snúast um það að ríkið eigi að virða skuldbindingar sínar að vettugi og draga úr mikilvægum aðgerðum fyrir fólkið í landinu.
Að eiga aðild að samningum er ábyrgð sem ber að sinna af heiðarleika og heilindum og það er engum til heilla ef ríkið á að draga til baka loforð, skuldbindingar og undirritaða samninga. Slík ríkisstjórn myndi varla vera traustvekjandi í augum þjóðarinnar, hvað þá einstaklinga sem binda miklar vonir við þær aðgerðir sem ríkið hefur skuldbundið sig til.
Að sjálfsögðu á ríkið að vera með ábyrga og skynsamlega hagstjórn. Við sjáum að aðhald og aðgerðir núverandi ríkisstjórnar eru farin að hafa áhrif á lækkun verðbólgu og vextir eru byrjaðir að lækka.
Það er umhugsunarvert að svo virðist sem að Viðskiptaráð beri ekki mikla virðingu fyrir rótgróinni meginreglu samningaréttar um að samninga skuli halda. Það er rétt að skiptar skoðanir eru á því hvort ríkið hefði átt að stíga inn í síðustu kjaraviðræður. Einnig er rétt að það er mikilvægt að við tökum þátt í slíkum samningaviðræðum af varfærni, eins og Viðskiptaráð hefur bent á. En þegar búið er að gefa fyrirheit, þá er mikilvægt að standa við það sem lagt hefur verið fram.
Undirritun kjarasamninga í mars sl. á almennum markaði var mikilvæg skref. Aðilar almenna vinnumarkaðarins sýndu með þessum samningum mikla ábyrgð og framsýni. Aðkoma stjórnvalda, bæði ríkis og sveitarfélaga, skipti sköpum í þeirri samningagerð. Þær aðgerðir, sem ríkið skuldbatt sig til, eru til þess fallnar að auka ráðstöfunartekjur heimila með sérstakri áherslu á húsnæðisuppbyggingu, tryggja húsnæðisstuðning og stórefla stuðning við barnafjölskyldur. Þetta er stuðningur við þau sem standa höllum fæti á húsnæðismarkaði og hafa orðið fyrir aukinni byrði vegna húsnæðiskostnaðar. Aðgerðir til að auka framboð íbúðarhúsnæðis stuðla að auknu jafnvægi á húsnæðismarkaði og lægri húsnæðiskostnaði.
Er Viðskiptaráð virkilega að leggja til að auka byrði barnafjölskyldna og auka byrði húsnæðiskostnaðar þeirra sem síst geta? Það að svíkja skuldbindingar sínar og láta þann hóp bera aukinn kostnað getur haft langvarandi áhrif þó svo að það myndi spara ríkissjóð einhverjar fjárhæð í dag.
Hvað varðar tillögu Viðskiptaráðs um lækkun vaxtabótakerfisins og hlutdeildarlána er nauðsynlegt að ítreka að ríki og sveitarfélög hafa aðkomu að þriðjungi af byggingu húsnæðis ár hvert. Það er ekki nýtt að ríkið gangi til aðgerða á húsnæðismarkaði með það að markmiði að grípa viðkvæma hópa og jafna aðgengi að markaðnum.
Tímabilið 2019-2024 hefur verið mesta uppbyggingartímabil Íslandssögunnar, en það hefur þó ekki dugað til. Eftirspurn eftir húsnæði hefur aukist umtalsvert á stuttum tíma samhliða mikilli fólksfjölgun hér á landi. Því erum við að byggja undir áætlaðri íbúðaþörf, en ekki vegna aðgerðaleysis í húsnæðismálum.
Við í Framsókn höfum lagt höfuðáherslu á að auka aðgengi að húsnæði, sérstaklega fyrir ungt fólk, fyrstu kaupendur og leigjendur. Þetta gerum við m.a. með hlutdeildarlánunum, sem hafa reynst þessum hópum vel og reynst mikilvæg aðgerð í húsnæðismálum.
Hlutdeildarlán fyrir fyrstu kaupendur eru komin til að vera og ríkisstjórnin hefur nú þegar samþykkt að veita 4 milljarða til hlutdeildarlána á þessu ári. Annars vegar til að styðja við fyrstu kaupendur og til að hvetja framkvæmdaaðila til að halda áfram að byggja. Eins var þetta til þess að framkvæmdaaðilar lækkuðu verð til að passa inn í viðmið hlutdeildarlána. Hlutdeildarlánin stuðluðu beinlínis að því að halda fasteignaverði niðri, þvert á orð Viðskiptaráðs.
Til að mæta auknum vaxtakostnaði heimilanna síðustu misseri var á árinu 2024 greiddur út sérstakur vaxtastuðningur til heimila með íbúðalán. Grunnfjárhæðir húsnæðisbóta og eignaskerðingamörk í húsnæðisbótakerfinu hækka 1. júní 2024 auk þess sem aukið tillit verður tekið til fjölskyldustærðar og munu framlög til húsnæðisbóta aukast um 2,5 ma.kr. á ársgrundvelli vegna þessa.
Áfram verður dregið úr tekjuskerðingum barnabóta þannig að mun fleiri foreldrar njóta stuðnings. Barnabætur hækka því ríflega og unnið verður að því í samstarfi ríkis og sveitarfélaga að skólamáltíðir grunnskólabarna verði gjaldfrjálsar frá og með hausti 2024. Þá verða hámarksgreiðslur úr Fæðingarorlofssjóði hækkaðar í þremur áföngum á næstu tveimur árum. Þegar breytingar á framlagi til Fæðingarorlofssjóðs verða að fullu komnar til framkvæmda árið 2027 nemur uppsöfnuð hækkun um 5,7 ma.kr. á ársgrundvelli.
Við í Framsókn leggjum mikla áherslu á hag íslensku þjóðarinnar í heild m.a. með nauðsynlegri íhlutun ríkisins á húsnæðismarkaði. Við höldum áfram með aðgerðir til að tryggja stöðugleika og draga úr neikvæðum áhrifum á hagkerfið og viljum stuðla að því að áfram verði unnið með þann grundvöll sem þegar hefur verið lagður.
Ingibjörg Isaksen, þingflokksformaður Framsóknar.
Greinin birtist fyrst í Morgunblaðinu 12. október 2024.
Deila
Prenta grein
14/10/2024
Ísland verður leiðandi í gervigreind og máltækniÞegar reynir á stoðir tungumáls okkar og menningar finnum við til ábyrgðar. Málefni tungumálsins hafa sjaldan verið eins áberandi í umræðunni og síðustu ár. Íslenskan skiptir okkur öll máli og okkur þykir öllum raunverulega vænt um tungumálið okkar. Því í tungumálinu býr menning okkar, merk og aldagömul saga; sjálf þjóðarsálin. Máltækniáætlun stjórnvalda og atvinnulífs hefur skilað undraverðum árangri fyrir tungumálið svo eftir er tekið um allan heim. Enn frekari aðgerða er þörf á því sviði og ég mun beita mér fyrir því að komið verði á fót gervigreindar- og máltæknimiðstöð á Íslandi, í áframhaldandi samvinnu við atvinnulífið.
Hæfni barna í móðurmálinu ræður oft för um tækifæri þeirra til framtíðar. Ég finn vel fyrir áhyggjum Íslendinga af framtíð tungumálsins. Í minni ráðherratíð, sem ráðherra menningarmála, er þetta líklega það mál sem ég er tíðast brýnd til að beita mér fyrir. Fólk gefur sig á tal við mig úti á götu með áhyggjur af stöðu barnanna okkar sem hrærast í ensku málumhverfi, í símunum og allt of oft í sjálfum skólunum þar sem sífellt fleiri starfsmenn og samnemendur þeirra tala litla sem enga íslensku. Þegar fólk gengur um miðbæ Reykjavíkur blasa við því upplýsingaskilti, auglýsingar og matseðlar á ensku. Erlendu afgreiðslufólki fjölgar sífellt sem talar enga íslensku. Nýjustu tæknilausnir hafa síðasta áratug aðeins verið aðgengilegar á ensku. Ég leyfi mér þó að horfa bjartsýnum augum til framtíðar og segja að okkur sé að takast að snúa þessari þróun við.
Fjöldinn allur af lausnum sem aðstoða innflytjendur við að læra íslensku hefur birst á síðasta ári, sem allar njóta verulegra vinsælda. Ég nefni þar sem dæmi RÚV ORÐ, sem kennir fólki íslensku í gegnum afþreyingarefni RÚV, og Bara tala, forrit með sérsniðinni íslenskukennslu eftir orðaforða úr mismunandi starfsgreinum á Íslandi. Þetta gerðist ekki af sjálfu sér. Upplýsingaskilti í Leifsstöð gera nú loksins íslensku hærra undir höfði en ensku, líkt og eðlilegt er á íslenskum flugvelli eins og ég hef bent á ítrekað undanfarin ár. Þetta gerðist ekki af sjálfu sér.
Stærstu mállíkön heims hafa á síðasta ári lært því sem næst lýtalausa íslensku. Nýjustu fyrirtækjalausnir, sem flestar eru byggðar ofan á þau líkön, eru því nothæfar á íslensku. Áhrifamesta gervigreindarfyrirtæki heims gumar af hæfni mállíkans síns í tungumáli sem um 350 þúsund manns tala, íslensku. Ekkert af þessu gerðist af sjálfu sér.
Farsælt samstarf stjórnvalda og atvinnulífs í þróun á nýjustu tækni fyrir tungumálið hefur sannað sig. Umfangsmikil fjárfesting stjórnvalda í þessari þróun, sem hófst árið 2018 með fyrstu máltækniáætlun, hefur borgað sig. Með söfnun á gríðarlegu magni gagna á íslensku og þróun á gervigreindartækni á íslensku hefur Ísland orðið leiðandi afl meðal smáþjóða í heimi máltækni og gervigreindar. Fjárfesting og þróun á tæknilegum innviðum sem þessum í nafni tungumáls og menningararfs heillar þjóðar hefur vakið athygli út fyrir landsteinana. OpenAI, eitt stærsta gervigreindarfyrirtæki heims, hefur viljað vinna náið með Íslandi á þessum forsendum: við deilum áhuga með fyrirtækinu á tungumálinu og gerum okkur grein fyrir að stærsta tæknibylting síðustu áratuga, gervigreindarbyltingin, grundvallast á samspili mannlegs tungumáls og tölvutækni.
Við erum hvergi af baki dottin. Ég er þess fullviss að tæknin muni á næstu árum, jafnvel mánuðum, færa okkur lausnir við mörgum af helstu vandamálum sem nú ógna tungumáli okkar. Tækni sem þýðir og talsetur barnaefni með eins röddum og í upphaflegri útgáfu þess er rétt handan við hornið. Fleiri tæknilausnir sem auðvelda innflytjendum að læra íslensku eiga eftir að koma út. Nýjustu lausnir frá Microsoft og Google og fleiri tæknirisum verða aðgengilegar á íslensku. iPhone-síminn þinn mun á endanum geta talað íslensku. Ég er viss um það. En þetta gerist hins vegar ekki af sjálfu sér.
Við verðum að tryggja áframhaldandi þróun í íslenskri máltækni og gervigreind og að málaflokkar þessir tali saman. Um síðustu mánaðamót hrinti menningar- og viðskiptaráðuneytið annarri máltækniáætlun af stað, sem felur í sér mikla fjárfestingu og áframhaldandi sókn í máltækni. Þar er áherslan á hagnýtingu þeirra innviða sem við höfum smíðað síðustu ár og lausnir á íslensku sem gagnast almenningi og tungumálinu.
Sýn okkar er að Ísland verði að koma á fót öflugri einingu, helst í samstarfi stjórnvalda og atvinnulífs, sem færi með málefni bæði gervigreindar og máltækni. Slík eining myndi vinna stöðugt að eflingu þessara greina á Íslandi, tryggja nýsköpun innan þeirra, hagnýtar rannsóknir háskóla sem gagnast íslenskum fyrirtækjum og vera leiðandi afl á þessu sviði meðal smærri þjóða. Ísland hefur alla burði til að standa undir slíku starfi. Græn orka og náttúrulegar aðstæður eru fullkomnar fyrir framleiðslu á reikniafli, sem getur umbylt tækniiðnaði og rannsóknarstarfi á Íslandi. Íslenskt hugvit og tækni geta staðið stolt á meðal fremstu þjóða heims, og efling þessi verður reist á grundvelli menningar og tungumáls Íslendinga. Við höfum lagt til að ráðast í samstarf við háskóla-, iðnaðar- og nýsköpunarráðuneytið um að gera þessa framtíðarsýn að veruleika og ég vonast til að við getum hafið þessa uppbyggingu á allra næstu mánuðum. Mín von er að slík gervigreindar- og máltæknimiðstöð yrði rekin í samvinnu stjórnvalda og atvinnulífs með ekki ósvipuðu fyrirkomulagi og Íslandsstofa. Hægt væri að sameina ýmsar smærri stofnanir og einingar í máltækni, gervigreind og nýsköpun undir einum hatti og auka hagræði í málaflokkunum báðum á sama tíma og starf innan þeirra yrði eflt.
Bókmenntaarfur Íslands þykir eitt af undrum veraldar og er sannarlega framlag okkar til heimsbókmenntanna. Að sama skapi hefur Ísland alla burði til að vera ein öflugasta gervigreindar- og máltækniþjóð í heimi.
Lilja Dögg Alfreðsdóttir, menningar- og viðskiptaráðherra og varaformaður Framsóknar.
Greinin birtist fyrst í Morgunblaðinu 13. október 2024.
Deila
Prenta grein
13/10/2024
Áform um einkavæðingu á vatnsveitu SandgerðisÍ nútímasamfélagi er eitt mikilvægasta verkefni okkar að tryggja jafnan aðgang að grunninnviðum eins og vatni og rafmagni. Nú liggja fyrir áform um einkavæðingu á vatnsveitu Sandgerðis í Suðurnesjabæ, áform sem geta haft víðtækar og ófyrirséðar afleiðingar fyrir íbúa. Samkvæmt tillögu núverandi meirihluta bæjarstjórnar – Sjálfstæðisflokks, Samfylkingar og Bæjarlistans – er til skoðunar að selja vatnsveituna til HS Veitna. Við teljum þetta mál kalla á athygli og þátttöku íbúa.
Ákvörðun um einkavæðingu grunninnviða á borð við vatnsveitu á ekki aðeins við um rekstur heldur snýr hún beint að því hvernig við tryggjum jafnan og sanngjarnan aðgang að nauðsynlegum auðlindum. Með því að selja vatnsveituna til einkaaðila, eins og núverandi meirihluti leggur til, er verið að opna á möguleika þess að þjónusta muni fara frá almannaeign yfir í hendur einkafjárfesta, með ófyrirséðum afleiðingum. Þar sem þjónustugæði og verðlagning geta ráðist af arðsemiskröfum fjárfesta frekar en samfélagslegum hagsmunum.
Við þekkjum dæmi þar sem slík sala hefur farið fram áður, til dæmis í Garði, þar sem vatnsveitan var seld einkaaðilum. Þar missti sveitarfélagið yfirráð yfir mikilvægum vatnsréttindum við Árnarétt, sem nú gegnir lykilhlutverki á Reykjanesi vegna jarðhræringa. Nú er rekstur vatnsveitunnar í höndum HS Veitna, fyrirtækis sem er að stórum hluta í eigu einkafjárfesta. Reynslan ætti því að vera okkur víti til varnar þar sem slík sala hefur ekki endilega leitt til aukinna hagsbóta fyrir íbúa.
Á 56. fundi framkvæmda- og skipulagsráðs Suðurnesjabæjar lagði Einar Jón Pálsson, oddviti Sjálfstæðisflokksins og formaður ráðsins, fram starfsáætlun fyrir vatnsveituna. Þar kom í ljós að viðræður væru hafnar við HS Veitur um möguleg kaup á vatnsveitunni í Sandgerði, án þess að formleg umræða hefði átt sér stað innan stjórnsýslu Suðurnesjabæjar. Því er afar mikilvægt að íbúar Suðurnesjabæjar viti hvaða afleiðingar einkavæðing getur haft og hvaða áhrif hún hefur á rekstur og stjórnun vatnsveitunnar. Með því að vera vel upplýst og taka virkan þátt í umræðunni getum við tryggt að hagsmunir íbúa séu settir í forgang.
Grunninnviðir eins og vatnsveita eru lífsnauðsynlegir fyrir samfélagið. Opinber eign á slíkum innviðum tryggir aðgang allra óháð búsetu eða efnahag. Þegar auðlindir og grunninnviðir færast í hendur einkaaðila, er hætta á að þjónustan verði ekki lengur veitt á jafnræðisgrundvelli, þar sem hagsmunir fjárfesta geta orðið fyrirferðarmiklir.
Við eigum að standa vörð um vatnsveituna sem almannaeign og tryggja að hún haldist í opinberri eigu. Það er á ábyrgð okkar að tryggja að auðlindir okkar séu ekki seldar frá okkur án þess að við fáum tækifæri til að segja okkar skoðun.
Aðkoma íbúa að svona stórum ákvörðunum er lykilatriði. Stöndum saman og tryggjum að grunnþjónusta, eins og vatnsveitan, verði áfram í höndum almennings. Það er mikilvægt að íbúar séu vel upplýstir um slík áform og fái tækifæri til að koma skoðunum sínum á framfæri þegar kemur að sölu á sameiginlegum innviðum.
Anton Guðmundsson og Úrsúla María Guðjónsdóttir bæjarfulltrúar Framsóknar í Suðurnesjabæ.
Sunneva Ósk Þóroddsdóttir varabæjarfulltrúi Framsóknar.
Magnús Sigfús Magnússon óháður bæjarfulltrúi.
Deila
Prenta grein
13/10/2024
Hjördís Guðný nýr formaður Kvenna í FramsóknHjördís Guðný Guðmundsdóttir var um liðna helgi kjörin nýr formaður á Landsþingi Kvenna í Framsókn. Fráfarandi formaður Guðveig Lind Eyglóardóttur gaf ekki kost á sér til endurkjörs og eru henni færðar þakkir fyrir mikilvægt og óeigingjarnt starf.
Hjördís Guðný hefur gegnt margvíslegum trúnaðarstörfum fyrir Framsókn frá árinu 2017 og er meðal annars sitjandi formaður Framsóknar í Garðabæ. Hún er fulltrúi Framsóknar og minnihluta bæjarstjórnarinnar í Garðabæ í málefnahópi um málefni fatlaðs fólks og sem áheyrnarfulltrúi í skólanefnd Garðabæjar. Áður hefur Hjördís setið sem aðalmaður í stjórn Tónlistarskóla Garðabæjar og stjórn Kvenréttindafélags Íslands. Er Hjördís þá einnig varamaður í útflutnings- og markaðsráði, skipuð af Lilju Dögg Alfreðsdóttur, menningar- og viðskiptaráðherra.
Hjördís Guðný er með B.Ed gráðu frá Háskóla Íslands og stundaði meistaranám í mannauðsstjórnun við sama skóla. Hefur hún starfað sem stjórnandi í grunnskóla um árabil og þar áður sinnt grunnskólakennslu og stigsstjórn.
„Var landsþingið kröftugt og rödd kvenna einróma í því að jafnrétti skuli setja á oddinn í málefnavinnu flokksins og að bakslag það sem sést hefur í samfélaginu hvað jafnrétti varðar sé áskorun sem stjórnvöld og félagasamtök verða að mæta af fullum krafti. Verkefnið sé ærið og snertir alla kima stjórnsýslunnar og samfélagsins,“ segir Hjördís Guðný.
Aðrar kjörnar í framkvæmdastjórn Kvenna í Framsókn eru þær Ásdís Helga Bjarnadóttir, Liv Åse Skarstad, Linda Hrönn Þórisdóttir, Margrét Vala Marteinsdóttir og Ragnheiður Ingimundardóttir. Til vara eru þær Ragnheiður Ingimundardóttir og Karítas Ríkharðsdóttir.
Landsstjórn Kvenna í Framsókn skipa:
Díana Hilmarsdóttir (Suður)
Fanný Gunnarsdóttir (Reykjavík norður)
Svava H. Friðgeirsdóttir (Suðvestur)
Rakel Dögg Óskarsdóttir (Reykjavík suður)
Sunna Hlín Jóhannesdóttir (Norðaustur)
Sonja Lind Estrajher Eyglóardóttir (Norðvestur)
Drífa Sigfúsdóttir (Suður)
Ingveldur Sæmundsdóttir (Reykjavík suður)
Magnea Gná Jóhannesdóttir (Reykjaík norður)
Pálína Margeirsdóttir (Norðaustur)
Ragnheiður Ingimundardóttir (Norðvestur)
Þórey Anna Matthíasdóttir (Suðvestur)
Skoðunarmenn reikninga voru kjörnar:
Hildur Helga Gísladóttir og
Þorbjörg Sólbjartsdóttir
Deila
Prenta grein
11/10/2024
„Aðeins tveir aðilar uppfylla skilyrðin og því ríkir algjört upplausnarástand í eyjunni“Ingibjörg Isaksen, alþingismaður og formaður þingflokks Framsóknar, fór yfir ákvörðun matvælaráðuneytisins og Byggðastofnunar að ekki stæði til að vera með frekari undanþágur frá vinnsluskyldu vegna úthlutunar á sértækum byggðakvóta til Grímseyjar. Fyrri undanþágur voru vegna byggðaþróunarverkefnisins Brothættar byggðir.
„Aðeins tveir aðilar uppfylla skilyrðin og því ríkir algjört upplausnarástand í eyjunni,“ sagði Ingibjörg.
„Aðrir sem vilja fá þennan sértæka byggðakvóta þurfa að koma upp vinnslu úti í eyjum með tilheyrandi kostnaði, mannskap, sem ekki er til staðar, og flytja hann í land með ferjunni með enn meiri kostnaði, ferju sem ekki alltaf er til staðar.“
„Staðan úti í eyju er því þannig að líklega er hluti íbúa að horfa nú til flutnings. Þessi ákvörðun vekur furðu þar sem hún er hrikalegt bakslag fyrir byggð í Grímsey. Grímsey er eðli málsins samkvæmt ekki rík af auðlindum en hún er sannarlega rík af nálægðinni við sjóinn og hafa Grímseyingar alla tíð lifað af því sem sjórinn og eyjan gefa af sér. Það hefur ekki alltaf verið auðvelt að búa í Grímsey en Grímseyingar hafa alla tíð verið duglegir til vinnu og hafa náð að skapa sér verðmæti með því að sækja sjóinn og nú á síðustu árum byggt upp ferðaþjónustu að sumri, sem er tímabil sem er alltaf að lengjast. Frekar eigum við að horfa til þess að styðja við búsetu í eyjunni með góðum samgöngum og innviðauppbyggingu, því þó svo að Grímsey sé ekki lengur þátttakandi í verkefni Byggðastofnunar um brothættar byggðir þá er byggðin enn brothætt og hefur líklega aldrei verið brothættari en nú.
Með öðrum orðum sagt: Eftir mörg hundruð ára sögu um búsetu í eyjunni er hún mögulega að líða undir lok og það er á okkar ábyrgð. Það er sorglegt að sjá okkur taka skref aftur á bak hvað varðar stuðning ríkisins við brothættar byggðir í landinu því að þegar öllu er á botninn hvolft er það ákvörðun að halda byggð í landinu, halda byggð í öllu landinu,“ sagði Ingibjörg að lokum.
„Virðulegur forseti. Í gær komust matvælaráðuneytið og Byggðastofnun að þeirri niðurstöðu að ekki stæði til að vera með frekari undanþágur frá vinnsluskyldu vegna úthlutunar á sértækum byggðakvóta til Grímseyjar, en fyrri undanþágur voru vegna byggðaþróunarverkefnisins Brothættar byggðir. Aðeins tveir aðilar uppfylla skilyrðin og því ríkir algjört upplausnarástand í eyjunni. Aðrir sem vilja fá þennan sértæka byggðakvóta þurfa að koma upp vinnslu úti í eyjum með tilheyrandi kostnaði, mannskap, sem ekki er til staðar, og flytja hann í land með ferjunni með enn meiri kostnaði, ferju sem ekki alltaf er til staðar.
Staðan úti í eyju er því þannig að líklega er hluti íbúa að horfa nú til flutnings. Þessi ákvörðun vekur furðu þar sem hún er hrikalegt bakslag fyrir byggð í Grímsey. Grímsey er eðli málsins samkvæmt ekki rík af auðlindum en hún er sannarlega rík af nálægðinni við sjóinn og hafa Grímseyingar alla tíð lifað af því sem sjórinn og eyjan gefa af sér. Það hefur ekki alltaf verið auðvelt að búa í Grímsey en Grímseyingar hafa alla tíð verið duglegir til vinnu og hafa náð að skapa sér verðmæti með því að sækja sjóinn og nú á síðustu árum byggt upp ferðaþjónustu að sumri, sem er tímabil sem er alltaf að lengjast. Frekar eigum við að horfa til þess að styðja við búsetu í eyjunni með góðum samgöngum og innviðauppbyggingu, því þó svo að Grímsey sé ekki lengur þátttakandi í verkefni Byggðastofnunar um brothættar byggðir þá er byggðin enn brothætt og hefur líklega aldrei verið brothættari en nú.
Með öðrum orðum sagt: Eftir mörg hundruð ára sögu um búsetu í eyjunni er hún mögulega að líða undir lok og það er á okkar ábyrgð. Það er sorglegt að sjá okkur taka skref aftur á bak hvað varðar stuðning ríkisins við brothættar byggðir í landinu því að þegar öllu er á botninn hvolft er það ákvörðun að halda byggð í landinu, halda byggð í öllu landinu.“
Deila
Prenta grein
11/10/2024
Göng milli Vestmannaeyja og landsJóhann Friðrik Friðriksson, alþingismaður, ræddi í störfum þingsins vinnu starfshóps um skoðum á hversu fýsilegt er að leggja göng milli Vestmannaeyja og lands. Sigurður Ingi Jóhannsson, þáverandi innviðaráðherra, skipaði starfshópinn til þess að skoða málið gaumgæfilega.
„Nú berast mér fréttir um að hópurinn sé á lokametrunum að skila af sér skýrslu til núverandi innviðaráðherra, Svandísar Svavarsdóttur, og er það vissulega mikið fagnaðarefni,“ sagði Jóhann Friðrik.
Starfshópurinn er skipaður öflugu fólki og vinna hópsins hefur gengið vel þó um sé að ræða ærið verkefni. Í framhaldi velti Jóhann Friðrik fyrir sér hver gæti orðið möguleg niðurstaða skýrslunnar.
„Ég er auðvitað að vonast eftir því að hún verði jákvæð fyrir Vestmannaeyinga og landsmenn alla. Það er mjög mikilvægt að við skoðum gaumgæfilega hvaða skref er hægt að taka ef það er á annað borð fýsilegt að leggja göng til Vestmannaeyja. Það hefði gríðarlega jákvæð áhrif á lífskjör Vestmannaeyinga, og landsmanna allra, segi ég. Það hefur auðvitað verið gríðarleg uppbygging í Vestmannaeyjum á undanförnum árum og ég leyfi mér að segja sú mesta frá því fyrir gos, þar sem bæði landeldi og ferðaþjónusta hefur verið að blómstra, Vestmannaeyingum hefur verið að fjölga og það verður mjög fróðlegt að heyra niðurstöður þessarar skýrslu. Ég hlakka til og vonast til þess að geta verið viðstaddur þegar sú kynning fer fram þannig að við getum tekið næstu skref í þessari vegferð fyrir Eyjamenn,“ sagði Jóhann Friðrik að lokum.
„Frú forseti. Svo það komi fram þá hyggst ég ekki fara að pakka neinu saman í bili en ég er hér kominn upp í störfunum til að lyfta upp mikilvægu máli sem snýr að Vestmannaeyjum. Vestmannaeyingar, ásamt bæjarstjórninni þar, hafa kallað eftir því að við skoðum almennilega hversu fýsilegt er að leggja göng milli Vestmannaeyja og lands. Sú áskorun kom fyrir svolitlu síðan og Sigurður Ingi Jóhannsson, þáverandi innviðaráðherra, skipaði starfshóp til þess að skoða málið gaumgæfilega. Nú berast mér fréttir um að hópurinn sé á lokametrunum að skila af sér skýrslu til núverandi innviðaráðherra, Svandísar Svavarsdóttur, og er það vissulega mikið fagnaðarefni. Þessi starfshópur, sem var settur á laggirnar að mig minnir í fyrra, er skipaður ansi öflugu fólki. Þar er bæði fagleg og svæðisbundin þekking. Það er Kristín Jónsdóttir, eldfjalla- og jarðskjálftafræðingur hjá Veðurstofunni, sem leiðir hópinn en einnig eiga sæti í hópnum jarðeðlisfræðingurinn Freysteinn Sigmundsson, Freyr Pálsson fyrir hönd Vegagerðarinnar, Anton Kári Halldórsson fyrir Rangárþing eystra og Gylfi Sigfússon fyrir Vestmannaeyjabæ. Frá því að hópurinn hóf störf skilst mér að vinnan hafi gengið vel. Þetta er að sjálfsögðu ærið verkefni.
Virðulegi forseti. Ég velti fyrir mér hver niðurstaðan verður. Ég er auðvitað að vonast eftir því að hún verði jákvæð fyrir Vestmannaeyinga og landsmenn alla. Það er mjög mikilvægt að við skoðum gaumgæfilega hvaða skref er hægt að taka ef það er á annað borð fýsilegt að leggja göng til Vestmannaeyja. Það hefði gríðarlega jákvæð áhrif á lífskjör Vestmannaeyinga, og landsmanna allra, segi ég. Það hefur auðvitað verið gríðarleg uppbygging í Vestmannaeyjum á undanförnum árum og ég leyfi mér að segja sú mesta frá því fyrir gos, þar sem bæði landeldi og ferðaþjónusta hefur verið að blómstra, Vestmannaeyingum hefur verið að fjölga og það verður mjög fróðlegt að heyra niðurstöður þessarar skýrslu. Ég hlakka til og vonast til þess að geta verið viðstaddur þegar sú kynning fer fram þannig að við getum tekið næstu skref í þessari vegferð fyrir Eyjamenn.“
Deila
Prenta grein
