Category: Fréttir

Það er Silja Dögg Gunnarsdóttir alþingmaður í Suðurkjördæmi sem sýnir okkur áhugaverða B-hlið í þessari viku.
Fullt nafn: Silja Dögg Gunnarsdóttir.
Gælunafn: Hef ekki fundið neitt sniðugt, Silja verður að duga.
Aldur: 40 ára.
Hjúskaparstaða? Sérlega vel gift.
Börn? Þrjú stykki.
Hvernig síma áttu? Iphone. Mjög praktísk græja, annars hef ég engan áhuga á tækjum. Reyni að forðast þau nema þessi allra nauðsynlegustu. Öll þessi tæki eru frekar truflandi fyrirbæri.
Uppáhaldssjónvarpsefni? Breskir sakamálaþættir eins og Lewis, Scott og Baily, Barnaby og DCI Banks. Amerísku þættirinir True Detectives með Woody Harrelson og Matthew McConaughey voru líka algert listaverk; leikararnir, sagan, tónlistin og myndmálið. Er með meiriháttar óþol fyrir amerískum grínþáttum; sérstaklega svona fjölskyldugríni.
Uppáhalds vefsíður: Að sjálfsögðu www.framsokn.is og www.siljadogg.is
Besta bíómyndin? Tvímælalaust Dirty Dancing. Fæ alltaf gæsahúð þegar ég horfi á hana. Frábær tónlist. En svona af alvarlegri myndum þá myndi ég segja þríleikurinn; Rauður, Hvítur og Blár og Breaking the Waves. Sannkölluð meistaraverk.
Hvernig tónlist hlustar þú á? Allt mögulegt en fer eftir veðri og vindum hverju sinni. Fíla t.d. Mugison og Dranga. Geggjaðir live! Fíla flott fönk, t.d. Jagúar og almennilega rokkara eins og Quarashi…Já, íslenskt er best!
Uppáhaldsdrykkur: Vatn, kaffi og rauðvín – í þessari röð.
Hvað finnst þér best að borða? Segi það sama á við og um tónlistina, fer eftir aðstæðum og mjög mikið eftir veðri. Kjötsúpa er alltaf góð en hún bragðast til dæmis einstaklega vel á köldum dögum. Nætursöltuð ýsa með soðnum rófum og hamsatólg og plokkfiskur með rúgbrauði og smjöri, eru réttir sem koma sterkir inn á virkum dögum. Grillaður humar með hvítlauk og smjöri á ljúfum sumardögum. Í útlöndum vil ég fá eitthvað spennandi þá myndi ég segja að arabískur og ítalskur matur sé í uppáhaldi. En allra best þykir mér þegar mér er komið á óvart. Gott hráefni og ástríðufull eldamennska eru almennt lykilatriði þegar maturinn á að verða góður.
Hvaða lag kemur þér í gírinn? Þessa dagana; titillagið úr kvikmyndinni París Norðursins; ömurleg mynd en lagið mjög töff. Annars kemur lagið Baseline og Stick´em up, með hljómsveitinni Quarashi mér alltaf í brjálað stuð og flest lögin með Skunk Anansie.
Ertu hjátrúarfull? Ég er sannfærð um að það séu til fleiri víddir en við nemum. Ég útiloka ekki að til séu álfar. Búálfarnir geta t.d. verið skæðir þegar þeir taka uppá því að fela hluti fyrir manni.
Hverslags viðfangsefni myndirðu ekki leggja nafn þitt við? Lögleiðingu fíkniefna og sölu áfengis í matvöruverslunum.
Hver var fyrirmyndin þín á yngri árum? Verð að nefna ömmurnar mínar sem ég kynntist á lífi; amma Lóa, Sigga og Gústa. Sterkar, heilsteyptar, gáfaðar, skemmtilegar og frábærar mæður og ömmur.
Hver er fyrirmyndin þín í dag? Ömmurnar og tengdamamma heitin. Hugsa oft til þeirra og fæ styrk og leiðsögn hjá þeim.
Hverjir eru sessunautar þínir á Alþingi? Steingrímur J. og Vigdís Hauksdóttir.
Hver eru helstu áhugamálin? Ríf reglulegaí lóðin eins og enginn sé morgundagurinn. Líka mjög hressandi og orkugefandi að fara í sjósund. Mín helsta nautn er þó bóklestur, þá les ég helst skáldsögur og ævisögur. Tækifærin sem ég fæ til lesturs nú til dags eru á ferðalögum og á næturna á sumrin. Þá er ljúft að liggja uppi á háalofti í sumarbústaðnum þegar aðrir sofa, njóta næturbirtunnar og lesa. Í æsku dreymdi mig um að lokast inni á bókasafni og dvelja þar næturlangt, alein, í félagsskap bóka. Ég hugleiddi oft að fela mig þegar safninu lokaði, en lét þó ekki verða af því. Ég er víst ekki nógu mikill villingur.
Besti vinurinn í vinnunni? Elsa Lára og Sigurður Ingi. Þórunn og Eygló koma einnig sterkar inn. Ási verður kannski móðgaður þegar hann sér þetta…”Ási, þú ert fínn gaur!”
Helsta afrekið hingað til? Að fara í sjósund með Elsu Láru.
Uppáhalds manneskjan? Get ekki gert upp á milli barnanna minna. Þau eru tvímælalaust uppáhaldsfólkið mitt (nú verður Ási aftur sár: “Ási, þú ert í alvöru fínn gaur”).
Besti skyndibitinn? Arabísk vefja (shawarma) í sjoppunni Mandi, við Ingólfstorg. Soldið skotin í arabískum mat.
Það sem þú borðar alls ekki? Borða nú flest nema það sem er illa eldað og bragðlaust. Nenni ekki að borða svoleiðis mat.
Lífsmottóið? Lífið er ekki áfangastaður heldur ferðalag. Ég ætla mér að halda áfram að njóta ferðalagsins og þakka fyrir hvern einasta dag sem ég fæ og öll tækifærin sem mér bjóðast.
Þetta að lokum: Það sem þið vissuð sennilega ekki um mig era ð ég var orðin altalandi 14 mánaða. Þótti æði bráðger og kerlingaleg með eindæmum. Mér skilst að ég hafi þó ekki verið sérlega skemmtilegt barn, hafði a.m.k. ekki mikinn húmor fyrir öðrum. Ein af mínum uppáhaldssetningum lengi vel var: “Þetta er ekkert fyndið”. Sagði þetta gjarnan með miklum þunga þegar galgopaháttur fjölskyldumeðlima gekk algjörlega fram af mér.
Ég get líka upplýst hér með að ég var fjögurra ára þegar ég lærði að reima. Tók því að mér að reima skóna á félagana í leikskólanum og síðan á bekkjarfélagana í sex ára bekk þar sem kennarinn komst ekki yfir að reima á allan skarann tímanlega fyrir frímínútur (þetta var fyrir tíma stuðningsfulltrúa).
Ég tók einnig að mér (óbeðin) að raða bekkjarfélögunum í raðir, eftir stærð. Ég vildi sjá ákveðna samfellu í röðinni, lágvaxnir fremst og hávaxnir afast. Menn voru mis ánægðir með það frumkvæði mitt þar sem aðal málið hjá flestum var að komast fremst röðina. Menn lögðu jafnvel á sig að mæta eldsnemma í skólann til að komast fremst í röðina eða fórnuðu hluta af leiktíma í frímínútum og stylltu sér ábúðarfullir upp fremst eða framarlega í röðinni. Það dugði þó ekki til þegar ég mætti og hóf að raða öllum upp á nýtt. Ég lenti aldrei í slagsmálum út af þessari áráttu minni, sem ég tel stórmerkilegt. Ég hlýt að hafa verið mjög sannfærandi.
Þegar ég fer nú í þessa naflaskoðun (þökk sé þér Kolla) og hugsa til baka, þá finnst mér ótrúlegt að ég skuli hafa átt vini í grunnskóla. Þetta gat náttúrulega ekki endað nema á einn veg;-)
 
PS: Ertu á Facebook? Því ekki að verða aðdáandi Framsóknar.

Sigmundur Davíð Gunnlaugsson, forsætisráðherra, flutti ávarp á kvennafrídeginum og degi Sameinuðu þjóðanna, við árlegt málþing Jafnréttissjóðs. Afhenti af því tilefni fjóra styrki til rannsóknarverkefna á sviði jafnréttismála samtals að upphæð kr. 8.600.000.
Sigmundur Davíð sagði í ávarpi sínu að við stofnun Jafnréttissjóðs, á þrjátíu ára afmæli kvennafrídagsins 2005, hafi sjóðurinn verið kynntur sem gjöf til jafnréttis- og kvennahreyfingarinnar í landinu og þakklætisvottur fyrir það afl, frumkvæði og nýsköpun sem í henni hefur falist til framfara, mannréttinda og almennrar velsældar í samfélagi okkar.
„Í fimm ár í röð hefur Ísland skipað efsta sætið á lista Alþjóða efnahagsráðsins yfir stöðu jafnréttis kynjanna í heiminum, en það mat byggir á sextán mælikvörðum á sviði vinnumarkaðar, menntunar, heilbrigðismála og stjórnmálaþátttöku.
Um margra ára skeið hafa erlendir blaðamenn, fræðimenn og áhugafólk líka, leitað hingað og spurt: Hvernig getur það verið að hér á landi er atvinnuþátttaka kvenna mest miðað við OECD löndin, vinnutíminn einna lengstur, fæðingartíðnin hæst og konur hafa náð svo langt sem raun ber vitni í forystusætum?“
Forsætisráðherra vék m.a. einnig að fyrirhugaðri karlaráðstefnu sem Ísland og Surinam hyggjast standa fyrir í New York á næsta ári og kvað hann tíðindin sem felast í þeirri ráðstefnu fyrst og fremst vera þau að þar verða karlar kallaðir til umræðu um kynbundið ofbeldi.
Styrkina til rannsóknarverkefna á sviði jafnréttismála samtals að upphæð kr. 8.600.000 hlutu:

• Björg Hjartardóttir, doktorsnemi við University of British Columbia í Kanada til rannsóknar á Vestur-íslenska kvenréttindablaðinu Freyja, 
• Guðný Björk Eydal prófessor og Ingólfur V. Gíslason dósent við Háskóla Íslands til rannsóknarinnar Jafn réttur til fæðingarorlofs: Hvernig haga pólskir og íslenskir foreldrar atvinnuþátttöku og umönnun barna sinna?
• Guðný Gústafsdóttir doktorsnemi við Háskóla Íslands til rannsóknar á mótsögnum kvenleikans, kyngervi og þegnrétti á Íslandi,
• Marta Einarsdóttir sérfræðingur við Rannsóknarmiðstöð Háskólans á Akureyri til rannsóknar á íslensku ofurfjölskyldunni – samræmingu fjölskyldu og atvinnulífs. 

Í mörgum tilvikum vinna nemar og aðrir samstarfsmenn að rannsóknum með styrkþegum.
 
PS: Ertu á Facebook? Því ekki að verða aðdáandi Framsóknar.

Í síðustu viku fór fram sérstök umræða á Alþingi um stöðu barnaverndar í landinu. Jóhanna María Sigmundsdóttir, alþingismaður, var málshefjandi en Eygló Harðardóttir, félags- og húsnæðismálaráðherra var til andsvara.
Jóhanna María Sigmundsdóttir fór yfir að í ársskýrslu Barnaverndarstofu fyrir árin 2012–2013 komi fram að fyrir árin 2009–2013 var töluverð aukning í beiðnum um fósturheimili fyrir börn. „Algengast er að barnaverndarnefndir ráðstafi 15 ára börnum í tímabundið fóstur, 16 ára börnum í varanlegt fóstur og 15 ára börnum í styrkt fóstur.“
En einnig kemur fram í skýrslunni að umsóknum um „meðferð á meðferðarheimili fyrir börn á aldrinum 12–18 ára hefur fækkað töluvert í heildina á milli áranna 2009 og 2013 þótt fjöldi barna sem eru í meðferð á þessum árum endurspegli ekki þá fækkun. Hjá þeim sem hafa lagt inn umsókn um meðferð er algengasta fjölskyldugerðin einstæð móðir og reyndar áberandi hærri en hjá öðrum fjölskyldugerðum.“
„Eitt frábært framtak Barnaverndarstofu er Barnahús. Það er hannað sérstaklega til að mæta þörfum barna. Mjög góð aðstaða er í húsinu, bæði fyrir börn og þá sem þeim fylgja. Í húsinu er sérútbúið viðtalsherbergi til að framkvæma rannsóknarviðtöl og skýrslutökur. Þar er einnig hægt að taka könnunarviðtöl og gera læknisskoðanir.
Fjöldi barna sem kom í rannsóknarviðtöl í Barnahúsi jókst á milli áranna 2012 og 2013 um meira en 40 tilfelli. Þá hefur aukist að börn segi frá kynferðislegu ofbeldi í rannsóknarviðtölum á milli áranna úr 37,8% í 51,8%. Er þessi aukning samferða þeirri vitundarvakningu sem orðið hefur í þjóðfélaginu um þessi mál.“
Eygló Harðardóttir, félags- og húsnæðismálaráðherra, sagði „óumdeilt að velferð barna á fyrstu æviárunum leggur grunn að allri þeirra framtíð. Þar kemur til umhyggja foreldra og almenn þjónusta, svo sem öflug mæðraskoðun og ungbarnaeftirlit, góðir leikskólar og grunnskólar sem tryggja flestum börnum farsæla æsku og uppvaxtarár, en einstaka barn þarf meiri aðstoð.“
Eygló telur Íslendinga verða að bæta sig „verulega til að tryggja að þau þjónustukerfi sem við höfum í velferðarsamfélagi okkar vinni mun betur saman. Þá er ég að tala um heilbrigðiskerfið, skólakerfið, félagsþjónustuna og barnaverndina, að ógleymdu að sjálfsögðu samstarfi við foreldrana og börnin sjálf. Við erum ekki að mínu mati með nægilega heildstætt þjónustuferli.“
„Úrræði barnaverndarnefnda eru margþætt, þar með talin leiðsögn til foreldra, að stuðla að því í samvinnu við hlutaðeigandi stofnanir að börn njóti þjónustu samkvæmt öðrum lögum, útvega barni viðeigandi stuðning eða meðferð eða útvega barni eða fjölskyldu persónulegan ráðgjafa eða stuðningsfjölskyldu. Einnig geta barnaverndarnefndir beitt úrræðum utan heimilis, svo sem fóstri, styrktu fóstri eða vistun á meðferðarheimili.
Á vegum Barnaverndarstofu eru sem sagt rekin úrræði sem barnaverndarnefndir geta nýtt sér, meðferðarheimili og einnig MST-fjölkerfameðferðin, sem felur í sér aðstoð utan stofnana fyrir börn og fjölskyldur þeirra vegna alvarlegs hegðunar- og fíkniefnavanda. Markmiðið er að efla og styðja fjölskylduna til að takast á við vandann og bregðast við bakslögum. Það er unnið þétt í umhverfi barnsins og eru samstarfsaðilar meðal annarra skólakerfið, Barna- og unglingageðdeild, Fjölsmiðjan og lögreglan.
Í dag er þessi þjónusta, MST-þjónustan, aðeins í boði í 100 km radíus frá Reykjavík. Ég er núna að leita leiða til að tryggja að við getum tryggt börnum alls staðar á landinu MST eða sambærilega þjónustu.“
„Varðandi tilkynningarnar hjá okkur tel ég jákvætt að við sjáum að tikynningum hefur fjölgað jafnt og þétt vegna þess að fólk lætur vita. Það er það sem vitundarvakningin gekk út á, að hafa í huga að félagsþjónustan og barnaverndin eru þarna til að hjálpa fólki.“
Hægt er að kynna sér umræðuna í heild sinni hér.
 
PS: Ertu á Facebook? Því ekki að verða aðdáandi Framsóknar.

14. Kjördæmisþing Framsóknarfélaganna í Norðausturkjördæmi (KFNA) haldið á Hallormsstað 18. október 2014 ályktar um flokksmál.

Flokksmálaályktun

Framsóknarfélögin
Kjördæmisþingið fagnar þeim fjölda fólks er bauð sig fram á listum flokksins fyrir sveitarstjórnarkosningarnar s.l. vor og þeim góða árangri sem þar náðist. Framsóknarfélögin gegndu lykilhlutverki í þessum árangri.
Þingið leggur áherslu á að starf félaganna um land allt eflist enn frekar þar sem þau sinna mikilvægu hlutverki í að gera stjórnmál áhugaverð og standa fyrir öflugri þjóðfélagsumræðu. Kjördæmisþingið hvetur félögin til aukinnar sameiningar/samstarfs til eflingar starfsins. Mikilvægt er að þingflokkur og þingmenn kjördæmisins taki þátt í starfi félaganna með ábyrgum hætti og sýni þannig gott fordæmi ef vel á til að takast í þessum efnum.
Ásýnd og ímynd
Kjördæmisþingið minnir á að flokkurinn hefur í starfi sínu unnið markvisst að því að efla ásýnd og ímynd í stjórnmálum almennt. Framsóknarflokkurinn innleiddi fyrstur flokka siðareglur fyrir sitt innra starf. Kjördæmisþingið leggur áherslu á að þetta góða starf haldi áfram og flokkurinn verði leiðandi afl í að endurheimta traust þjóðarinnar á Alþingi. Framsóknarflokkurinn var fyrstur flokka til að setja fram samræmdar framboðsreglur fyrir Alþingis- og sveitarstjórnarkosningar.
Kjördæmisþingið leggur á það áherslu að kjörnir fulltrúar Framsóknarflokksins hafi stefnuskrá og siðareglur flokksins ætíð að leiðarljósi í starfi sínu.
Fyrirkomulag kjördæmisþinga KFNA
Kjördæmisþing skal haldið til skiptis á Akureyri og Fljótsdalshéraði, þó skal í aðdraganda kosninga til Alþingis halda kjördæmisþing í Mývatnssveit. Stjórn kjördæmissambandsins ber ábyrgð á að ályktunum þingsins verði fylgt eftir til flokksþings og birtar á heimasíðu flokksins.
Fjáröflun
Þingið felur stjórn kjördæmissambandsins og skrifstofu flokksins að vinna að samræmdri fjáröflun kjördæmasambanda Framsóknarflokksins.

*****

PS: Ertu á Facebook? Því ekki að verða aðdáandi Framsóknar.

Kjördæmisþing Framsóknarfélaganna í Norðausturkjördæmi haldið á Hallormsstað 18. október 2014 fagnar þeim árangri sem ríkisstjórn Sigmundar Davíðs Gunnlaugssonar hefur náð í ríkisrekstri frá því að stjórn hans tók við. Mælikvarðar sem stuðst er við, til að vega og meta hagsæld þjóða, stefna upp á við. Það er ekki tilviljun. Þeirri stöðu hefur verið náð undir forystu Framsóknarflokksins sem hefur haldið fast í gildi sín sem frjálslyndur félagshyggjuflokkur.

• Þingið leggur áherslu á að við afgreiðslu fjárlaga verði þess gætt að fyrirhugaðar skattabreytingar auki kaupmátt, lækki almennt verðlag og bæti sérstaklega stöðu lág- og millitekjuhópa.
• Þingið leggur áherslu á að framfylgja stefnu Framsóknarflokksins í byggðamálum.
• Þingið mótmælir öllum hugmyndum um tilflutning Reykjavíkurflugvallar úr Vatnsmýrinni. Núverandi staðsetning hans er eitt stærsta byggðamál samtímans og er grundvallarforsenda þess að Reykjavík sé höfuðborg landsins alls.
• Tryggja verður fjármuni í viðhald smærri flugvalla.
• Þingið styður flutning aðalstöðva Fiskistofu til Akureyrar. Þingið hvetur ríkisstjórnina til að flytja fleiri störf á vegum hins opinbera í landsbyggðirnar.
• Þingið leggur áherslu á að góðar samgöngur eru grunnur að allri samfélagsþróun í kjördæminu og hvetur til aukinna framkvæmda á því sviði. Ástand fjarskiptamála er víða í algjörum ólestri. Þingið leggur áherslu á að sú vinna sem nú stendur yfir á vegum ríkisstjórnarinnar skili úrbótum sem allra fyrst.
• Trygg raforka og aðgangur að öruggu háhraða netsambandi eru mikilvægar forsendur á þessu sviði. Mikilvægt er að litið verði á innanlandsflug sem einn lið í almenningssamgöngum og brýnt að tryggja rekstraröryggi þess til framtíðar. Jafnframt þarf að halda áfram að þróa almenningssamgöngur á landi.
• Það er verulegt áhyggjuefni hve litlu fjármagni hefur verið varið til viðhalds á vegakerfinu til fjölda ára. Viðhald og endurbætur malarvega í kjördæminu er sérlega brýnt, ásamt áframhaldandi uppbyggingu vegakerfisins. Þær stórframkvæmdir sem nú standa yfir við Norðfjarðar- og Vaðlaheiðargöng eru fagnaðarefni. Nauðsynlegt er að halda áfram undirbúningsrannsóknum fyrir göng undir Fjarðarheiði annars vegar og endurbótum á Ólafsfjarðargöngum hins vegar.
• Mikilvægt er að opna Ísland betur fyrir ferðamönnum og skapa aukinn grundvöll fyrir vöxt í ferðaþjónustu. Liður í því er að opna fleiri gáttir inn í landið s.s. með eflingu Akureyrar- og Egilsstaðaflugvalla.
• Þingið leggur árherslu á trausta heilbrigðisþjónustu óháð búsetu. Standa þarf vörð um starfsemi sjúkrahúsa og heilbrigðisstofnana í kjördæminu með áherslu á heilsugæslu- og heimaþjónustu.
• Mikilvægt er að unnið verði markvisst að áætlun um uppbyggingu hjúkrunarrýma og þróun öldrunarþjónustu sem taki mið af aðstæðum á hverjum stað.
• Þingið leggur áherslu á að Háskólinn á Akureyri haldi sjálfstæði sínu og fjárhagslegum styrk til að þjóna hlutverki sínu. Samhliða flutningi aðalstöðva Fiskistofu til Akureyrar gefst kostur á eflingu sjávarútvegsdeildar Háskólans. Jafnframt verði hugað að því að hefja kennslu í dreifbýlislækningum við Háskólann sem lið í eflingu heilbrigðisdeildar.
• Þingið leggur áherslu á mikilvægi framhaldsskóla fyrir þróun samfélagsins. Jafnframt er bent á nauðsyn öflugrar iðn- og verkmenntunar í ljósi vaxandi umsvifa í kjördæminu og á Norðurslóðum. Þingið lýsir yfir miklum áhyggjum, komi til aldurstakmarkana í framhaldsskólum og leggur þunga áherslu á sérstöðu og sjálfstæði smærri framhaldsskóla í kjördæminu sem lið í jafnrétti til búsetu.
• Þingið undirstrikar stefnu flokksins um mikilvægt hlutverk LÍN til að tryggja jafna möguleika til náms óháð efnahag og búsetu.
• Þingið undirstrikar mikilvægi öflugrar atvinnuþróunar og nýsköpunar. Mikilvægt er að fjármunir sem ætlaðir eru til þessara verkefna nýtist sem best.

*****

PS: Ertu á Facebook? Því ekki að verða aðdáandi Framsóknar.

Í störfum þingsins í vikunni voru þingmenn Framsóknarflokksins áberandi.
Karl Garðarsson ræddi „baunabyssurnar“ og sagði lögregluna hafa í „haft yfir að ráða skotvopnum í tugi ára“. Þó flestum þingmönnum og jafnvel fyrrverandi ráðherrum hafi yfirsést það. „Við lifum nefnilega ekki í neinu Disneylandi þó að stjórnarandstaðan haldi svo. Hlutverk lögreglu felst ekki bara í því að mæla umferðarhraða eða hjálpa gömlu fólki yfir götu. Við lifum ekki í heimi barnaævintýra þar sem allir eru innst inni vinir þó að einstaka sinnum slettist upp á vinskapinn.“ Karl bætti við að hans mati hafi „bullkvóti ársins hafi verið fylltur í umræðu um þessi mál á þingi í gær“.

Elsa Lára Arnardóttir fór yfir svör við skriflegri fyrirspurn sinni „varðaði skráningu viðskiptasögu einstaklinga hjá fjármálastofnunum“. Viðskiptasaga einstaklinga eru mjög persónulegar upplýsingar sem geta verið viðkvæmar, upplýsingar sem eiga ekki að fara neitt án samþykkis þess er þær varða. Fram kemur í svari fjármálaráðherra að bankar hafi „aðgang að gagnasöfnum upplýsingastofa og í því samhengi má benda á skuldastöðukerfi og vanskilaskrá Creditinfo hf“. Eins fóru öll gagnasöfn með upplýsingum um viðskiptasögu einstaklinga frá gömlu bönkunum yfir í nýju bankana.
„Í þessu samhengi hef ég velt fyrir mér nokkrum þáttum. Hvað varð um stöðu neytandans í þessu máli? Hvað varð um persónuvernd og meðferð persónuupplýsinga?
Gerum okkur grein fyrir að margir íslenskir neytendur á íslenskum heimilum fóru jafnframt illa út úr því sem gerðist hér haustið 2008, m.a. vegna ýmissa þátta innan fjármálakerfisins. Það veit Framsóknarflokkurinn og hann hefur ítrekað bent á þá staðreynd hve erfið staða heimilanna er. Þessa dagana berjast samt sem áður aðilar er samþykktu neyðarlögin, hv. þingmenn er samþykktu neyðarlögin, á móti því að heimilin fái eitthvað að gert í sínum málum og að komið verði á móts við skuldastöðu þeirra. Mér finnst það til skammar.“

Þórunn Egilsdóttir ræddi rjúpnaveiðitímabilið, er stendur yfir í 12 daga, þar sem má veiða í þrjá daga í senn, frá föstudegi til sunnudags, fjórar helgar í röð, síðasti veiðidagur er 16. nóvember. „Það er ekki víst að veðrið verði veiðimönnum hliðhollt alla daga og því er mikilvægt að huga vel að undirbúningi. Ég hvet alla sem ætla að ganga til veiða að huga vel að þeim undirbúningi. Menn þurfa að þekkja vopnin sín, vita hvað þeir eru með í höndunum, hvernig á að fara með það og gæta varúðar í öllu. Það er mjög mikilvægt að menn kanni landslagið, þekki til staðhátta og láti vita af sér. Áður en farið er af stað er mjög mikilvægt að vera í vatnsheldum skóm með grófum sóla því að maður veit aldrei í hverju maður lendir. Ef maður villist af leið er mjög gott að hafa áttavita, kort og fjarskiptatæki til að láta vita af sér. Þannig er það með mörg verkefni sem við förum í því að það er árviss viðburður að björgunarsveitir eru ræstar út til að bjarga rjúpnaskyttum í vanda. Veiðimönnum ber skylda til að gera sitt ýtrasta til að fyrirbyggja slíkt. Því er undirbúningurinn það sem öllu máli skiptir og ég hvet okkur til að gæta vel að honum.“

Silja Dögg Gunnarsdóttir fór yfir leiðréttingu á verðtryggðum húsnæðislánum. „Á sumarþingi 2013 samþykkti Alþingi þingsályktunartillögu um aðgerðir vegna skuldavanda heimilanna. Það sem ég vil draga fram í dag er að samþykkt tillaga er í tíu liðum. Leiðréttingin sjálf er aðeins einn liður af þessum tíu.
Ég verð að segja að mér finnst dálítið einkennilegt að heyra suma hv. þingmenn sem kenna sig við jöfnuð og réttlæti tala þessa aðgerð niður, gera hana jafnvel tortryggilega. Það er eiginlega bara sorglegt. Þetta gera jafnvel sömu þingmenn og vildu fara í slíkar aðgerðir á síðasta kjörtímabili en án árangurs. Hvað hefur breyst? Eru menn heiðarlegir í málflutningi sínum eða ástunda þeir lélega pólitík? Spyr sá sem ekki veit.“
„Ég er mjög stolt af því að tilheyra þeim hópi þingmanna sem hefur barist fyrir heimilin í landinu. Rökin fyrir leiðréttingunni eru bæði sanngirnisrök og efnahagsleg rök. Í kjölfar bankahrunsins haustið 2008 var ráðist í stórar efnahagsaðgerðir. Skuldir fyrirtækja voru færðar að því sem greiðslugeta þeirra sagði til um og gengistryggð lán voru endurreiknuð vegna dóma Hæstaréttar. Þá hafa fjármagnseigendur verið í sterkri stöðu þar sem skuldarar bera verðbólguáhættuna vegna verðtryggingar. Þeir sátu eftir sem skulduðu verðtryggð lán á meðan holskeflan reið yfir.“

Þorsteinn Sæmundsson vék athygli á hverjir væru hinu einu sönnu einangrunarsinnar á Alþingi. „Árið 1982 var sett á sérsveit á Keflavíkurflugvelli sem hafði yfir að ráða hríðskotavopnum. Af hverju? Vegna þess að hér er alþjóðaflugvöllur. Það kemur kannski úr óvæntri átt en flokkurinn sem ég tilheyri hefur verið sakaður um einangrunartilburði. En hvað mundi það þýða ef við stæðumst ekki kröfur sem alþjóðaflugvellir þurfa að búa yfir? Þá væri hér ekkert millilandaflug. Hverjir eru einangrunarsinnar hér?
Annað er það að hér hafa hreiðrað um sig glæpasamtök sem hafa alþjóðlegar tengingar. Ætlum við að senda lögreglumennina okkar, þetta fólk sem fórnar fjölskyldulífi sínu og öðru, berhenta á vettvang? Er það svo? Höfum við meiri áhyggjur í þessum sal af góðkunningjum lögreglunnar en lögreglunni sjálfri? Á sú stétt sem stóð vörð um þessa stofnun hér þegar hart var í ári það skilið að verið sé að sá fræjum tortryggni í hennar garð í þessu húsi? Ég held ekki, þingmenn góðir.“

 
PS: Ertu á Facebook? Því ekki að verða aðdáandi Framsóknar.

Við eigum marga góða þingmenn og það er Sigrún Magnúsdóttir, þingflokksformaður Framsóknarmanna, sem sýnir okkur B – hliðina í þetta sinn.
Fullt nafn:  Sigrún Magnúsdóttir.
Gælunafn:  Didda (nánast allir hættir að nota það, en gekk undir því í æsku minni).
Aldur:  70 ára.
Hjúskaparstaða?  Gift.
Börn?  2 dætur, svo fékk ég 3 með Páli mínum = 5.
Hvernig síma áttu?  Samsung.
Uppáhaldssjónvarpsefni?  Landinn.
Uppáhalds vefsíður:  Á enga. Sinni því lítið að vafra.
Besta bíómyndin?  Á hverfanda hveli.
Hvernig tónlist hlustar þú á?  Hlusta lítið nema í bílnum. Þjóðlagatónlist.
Uppáhaldsdrykkur:  Kaffi.
Hvað finnst þér best að borða?  Skötuna á Þorláksmessu.
Hvaða lag kemur þér í gírinn?  Frjáls eins og fuglinn.
Ertu hjátrúarfull?  Já… trúi á tölur og tákn.
Hverslags viðfangsefni myndirðu ekki leggja nafn þitt við?  Einelti.
Hver var fyrirmyndin þín á yngri árum?  Pabbi.
Hver er fyrirmyndin þín í dag?  Pabbi.
Hverjir eru sessunautar þínir á Alþingi?  Ásmundur Einar Daðason (hef bara einn).
Hver eru helstu áhugamálin?  Fjölskyldan. Stjórnmál. Handavinna. Þjóðfræði.
Besti vinurinn í vinnunni?  Vigdís og Þórunn.
Helsta afrekið hingað til?  Koma á laggirnar Sjóminjasafni í Reykjavík.
Uppáhalds manneskjan?  Barnabörnin 17.
Besti skyndibitinn?  Harðfiskur með smjöri.
Það sem þú borðar alls ekki?  Ég sniðgeng innflutt hormónakjöt. (Hinsvegar borða ég bæði roð og bein, kæst og sigið ha ha).
Lífsmottóið?  Seigla. Aldrei gefast upp.
Þetta að lokum:
Stolt af flokknum mínum. Ánægð með víðsýni félagana að velja bæði yngstu og elstu konuna sem inn á Alþingi hafa sest vorið 2013. Nánast hálf öld skilur þær að í aldri. Hamingjusöm að hafa fengið þetta tækifæri – að fá að taka þátt í endurreisn landsins. Allt að dafna á ný.
 
PS: Ertu á Facebook? Því ekki að verða aðdáandi Framsóknar.

Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði fagnar ánægjulegum árangri á mörgum sviðum á fyrsta starfsári núverandi ríkisstjórnar. Má þar nefna:

• aðgerðir vegna skuldavanda heimilanna,
• hallalaus fjárlög,
• aukinn verðlagsstöðugleika,
• aukinn kaupmátt heimilanna,
• lækkun skatta,
• hækkun barnabóta,
• aukin framlög í þágu eldri borgara og öryrkja,
• aukin framlög til heilbrigðismála,
• aukin framlög til hvatningar rannsókna og nýsköpunar og þannig mætti áfram telja.

Ekki hafa þó allar aðgerðir ríkisstjórnarinnar verið unnar með nægjanlega faglegum hætti eða hlotið eðlilegan framgang. Má þar nefna sameiningar heilbrigðisstofnana í þremur heilbrigðisumdæmum, þ.e. á Vestfjörðum, Norðurlandi og Suðurlandi en þær sameiningar voru keyrðar í gegn án samráðs við heimamenn á hverjum stað og á grundvelli órökstuddra markmiða með einfaldri reglugerðarbreytingu heilbrigðisráðherra. Þingið telur með ólíkindum að jafn viðamikil breyting skuli geta verið háð duttlungum og ákvörðun eins manns og lýsir yfir megnri óánægju með hvernig að þessum sameiningum var staðið. Mikilvægt er að sú þjónusta sem veitt var á þeim stofnunum sem sameinaðar voru skerðist ekki frá því sem nú er heldur verði lögð áhersla á að bæta hana þannig að landsmenn njóti sömu grunnþjónustu, óháð búsetu.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði lýsir yfir andstöðu við fyrirhugaða hækkun virðisaukaskatts á matvæli en með þeirri hækkun er fyrst og fremst vegið að innlendri matvælaframleiðslu og fjöldi starfa á landsbyggðinni sett í hættu. Þeim mun meiri undrun vekur að um leið og álögur á matvæli eins og grænmeti skuli vera hækkaðar leggi fjármálaráðherra til að svokallaður sykurskattur verði felldur niður en þar er um að ræða tekjustofn sem styður við markmið um lýðheilsu og forvarnir. Hækkun virðisaukaskatts á almenn matvæli gengur einfaldlega gegn þeim er lakari hafa kjörin og stríðir gegn stefnu flokksins um jöfnuð og velferð í íslensku þjóðfélagi.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði leggur áherslu á að framfylgja stefnu Framsóknarflokksins og ríkisstjórnarinnar í byggðamálum þar sem lögð er áhersla á jafnrétti til búsetu og að íbúar landsins fái notið þeirrar grunnþjónustu sem gera á kröfu um í þróuðu nútímasamfélagi. Minnir þingið þar sérstaklega á að mjög víða á landsbyggðinni búa íbúar við algjörlega óviðunandi aðstöðu hvað varðar fjarskipti, s.s. aðgengi að ljósleiðara, auk bágra samgangna og ótryggs raforkuöryggis. Auk þess sem veitt verði auknu fjármagni til vegamála í kjördæminu og áætlunarflug til Bíldudals, Gjögurs og Sauðárkróks verði tryggt með framlagi úr ríkissjóði. Sömuleiðis verði staðið við núverandi samgönguáætlun.
Nauðsynlegt er við breytingar á húsnæðislánakerfi að gætt verði að jöfnuði er kemur að aðgengi íbúa landsins að lánsfé til íbúðakaupa og nýbygginga.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði krefst þess að orkukostnaður heimila og fyrirtækja verði jafnaður til fulls.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði fagnar áformum um fjölgun opinberra starfa á landsbyggðinni sem eðlilegu mótvægi við opinbera þjónustu og stjórnsýslu á höfuðborgarsvæðinu. Minnir þingið í því sambandi á að í stefnuyfirlýsingu núverandi ríkisstjórnar er kveðið á um að mikilvægt sé að stuðla að fjölbreyttu atvinnulífi um allt land.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði fagnar skipan Norðvesturnefndar og væntir mikils af niðurstöðum hennar. Í kjölfarið verði ráðist í sambærilegar úttektir og tillögugerðir fyrir önnur landssvæði sem glíma við fólksfækkun og veikt atvinnustig, svo sem kveðið er á um í stefnuyfirlýsingu ríkisstjórnarinnar.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði leggur áherslu á að vel verði gert við menntastofnanir í kjördæminu og aðrar þær aðgerðir sem hækka menntunarstig íbúa landsins. Í stefnuyfirlýsingu ríkisstjórnar Sigmundar Davíðs Gunnlaugssonar segir að fjölbreytileiki í skólastarfi sé lykill að kraftmiklu og skapandi samfélagi. Fjárlög ársins 2015 eru í hróplegu ósamræmi við þessa yfirlýsingu. Þar er boðuð algerlega óásættanleg fækkun nemendaígilda í framhaldsskólum og verulega þrengt að háskólunum að Bifröst, Hólum og Hvanneyri. Þingið krefst þess að samræmi verði milli orða og efnda þannig að þessar mikilvægu stofnanir geti áfram sinnt hlutverki sínu og treyst undirstöður búsetu og aukna samkeppnisfærni landsbyggðarinnar.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði heitir á landbúnaðar- og sjávarútvegsráðherra að tryggja samkeppnis- og rekstrarhæfi íslensks sjávarútvegs við fyrirhugaðar breytingar á lögum um stjórn fiskveiða og búi greininni rekstrarlegan stöðugleika, sérstaklega verði gætt að litlum og meðalstórum fyrirtækjum. Þingið hvetur ráðherra til að tryggja að hluti af sértæku veiðigjaldi renni beint til viðkomandi sveitarfélags. Þá skorar þingið á ríkisvaldið að efla rannsóknir á sviði fiskeldis, s.s. burðarþolsmats sem er forsenda þess að atvinnugreinin geti þróast í sátt við umhverfið.
Þingið skorar á ráðherra að bregðast nú þegar við mikilli ýsugengd á grunnslóð sem gerir mönnum ókleift að sækja þorskinn. Ýsan er nú ráðandi í afla bátanna. Ýsukvótinn er í engu samræmi við allt það magn sem er á veiðislóðinni og því nauðsynlegt að grípa til sértækra aðgerða strax.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði hvetur til rannsókna á mögulegum virkjanakostum í kjördæminu sem stuðlað geta að aukinni uppbyggingu fjölbreyttra og vel launaðra starfa. Sérstaklega skal þar horfa til Blönduvirkjunar, Hvalárvirkjunar og mögulegrar nýtingar fallvatnanna í Skagafirði. Tengigjald frá virkjunum verði afnumið í Norðvesturkjördæmi og farið verði nú þegar í hringtengingu raforku og ljósleiðara í Norðvesturkjördæmi.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði hvetur til áframhaldandi uppbyggingar í ferðaþjónustu. Mikilvægt er að vekja athygli á og stuðla að uppbyggingu ferðamannastaða um land allt til að dreifa ferðamönnum víðar um landið og draga úr álagi á þá staði sem fjölsóttastir eru. Vinna þarf áfram að lengingu ferðamannatímabilsins svo ferðaþjónusta verði atvinnugrein sem veitt getur starfsfólki vel launaða atvinnu árið um kring og skilað enn auknum tekjum til þjóðarbúsins.
Kjördæmisþing framsóknarmanna í Norðvesturkjördæmi (KFNV) 11.-12. október á Patreksfirði minnir á grunngildi flokksins sem eru m.a. byggð á frjálslyndri hugmyndafræði þar sem leitast er við að ná fram niðurstöðu með samvinnu ólíkra afla og hagsmuna sem byggð eru á hófsemi og heiðarleika. Framsóknarflokkurinn hefur ávallt unnið að hugmyndum og lausnum sem miða að því að koma til móts við heimilin, standa vörð um velferðarkerfið, skapa jákvætt umhverfi fyrir atvinnulíf, fjárfestingar og nýta tækifæri sem eru allt í kringum okkur. Með slík grunngildi að leiðarljósi er ljóst að bjartari tímar eru framundan í íslensku samfélagi.

*****

PS: Ertu á Facebook? Því ekki að verða aðdáandi Framsóknar.

Jómfrúrræða Önnu Maríu Elíasdóttur á Alþingi, flutt í störfum þingsins 15. október sl.:
„Herra forseti. Ég fagna því að í fjárlagafrumvarpi fyrir árið 2015 sé gert ráð fyrir því að fjármagn vegna úrræða fyrir þolendur kynferðisofbeldis verði gert varanlegt, en fram til þessa hefur fjárframlagið verið tímabundið og þannig heft skipulagt starf Barnahúss til lengri tíma. Ég tel að með ráðningu tveggja sérfræðinga í Barnahús, sem tillaga samráðshóps um samhæfða framkvæmd stjórnvalda til að sporna gegn kynferðislegu ofbeldi hljóðar upp á, fái þolendur kynferðisofbeldis þá aðstoð sem nauðsynleg er til að þeir geti unnið úr málum sínum.
Eins og við vitum öll er atburðurinn ekki tekinn til baka heldur þurfa þeir sem fyrir ofbeldinu verða að læra að lifa með því um ókomna tíð. Það er staðreynd að þeir sem lenda í áföllum af mannavöldum eru í mikilli hættu á að þjást af áfallaröskun. Fyrir þá sem ekki vita er áfallaröskun einkenni um andlegar, líkamlegar og félagslegar afleiðingar áfalls og skaða sem lýsir sér í endurupplifun atburða, vantrausti á öðrum, hræðslu við umhverfi, skömm, sektarkennd, sjálfsásökunum og lágu sjálfsmati. Slík röskun getur því, ef ekki er gripið til aðgerða strax, haft alvarlegar heilsufarslegar afleiðingar seinna á lífsleiðinni með tilheyrandi auknum heilbrigðiskostnaði.
Í skýrslu Barnaverndarstofu þar sem bornir eru saman fyrstu sex mánuðir ársins 2013 og 2014 kemur fram að þrátt fyrir fækkun rannsóknarviðtala á árinu 2014 um 40% hefur greiningar- og meðferðarviðtölum fjölgað um 15%. Erfitt er þó að leggja mat á þessar tölur þar sem fjölgun rannsóknarviðtala á árinu 2013 var slík að ekki var hægt að veita viðeigandi úrræði til allra sem eftir þjónustunni leituðu.“

 
PS: Ertu á Facebook? Því ekki að verða aðdáandi Framsóknar.