Category: Fréttir

Hafdís Hrönn Hafsteinsdóttir, alþingismaður, sagði í umræðu um umhverfi fjölmiðla á Alþingi í liðinni viku að mikilvægt væri að ræða stöðu Ríkisútvarpsins í nútímanum, hvort að RÚV verði að vera á auglýsingamarkaði? Hvort þörf væri á því að hafa tvær opinberar útvarpsstöðvar, þ.e. Rás 1 og Rás 2?

„Það liggur í augum uppi að það er hægt að hagræða betur, bæði í þágu ríkissjóðs og fjölmiðlastéttarinnar. Mögulega getur það verið til hagsbóta að leggja Rás 2 niður. Fjölmargar einkareknar útvarpsstöðvar eru starfræktar í dag og RÚV þarf einungis eina útvarpsstöð til að sinna sínum starfsskyldum og vera til staðar ef þörf er á,“ sagði Hafdís Hrönn.

„Virðulegur forseti. Samkeppnin á íslenskum fjölmiðlamarkaði er hörð. Einkareknir miðlar hafa ítrekað bent á erfiðið við að keppa við ríkisrekinn miðil, þ.e. Ríkisútvarpið. RÚV rekur sjónvarpsstöð og útvarpsstöðvar sem eru aðgengilegar öllum ásamt því að vera á auglýsingamarkaði. Sú blanda leiðir vissulega til þess að þeir sem vilja auglýsa leita fyrst til RÚV. Frjáls fjölmiðlun er mikilvæg lýðræðislegri umræðu. Hún veitir stjórnvöldum, atvinnulífinu og helstu stofnunum samfélagsins nauðsynlegt aðhald. Þó getur það reynst þeim erfitt að finna rekstrargrundvöll í samkeppni við þann risa sem RÚV er, en auglýsingamarkaðurinn horfir einnig til erlendra efnisveita á borð við Instagram og Facebook í meira mæli en áður.

Á síðasta kjörtímabili lögfesti ríkisstjórnin styrki til einkarekinna fjölmiðla að norrænni fyrirmynd til að jafna samkeppnisstöðuna í breyttu rekstrarumhverfi. Það hefur sýnt sig að styrkirnir hafa skipt máli við að halda einkareknum miðlum samkeppnishæfum. Þeir hafa komið í veg fyrir brottfall í geiranum og jafnvel fjölgað stöðugildum blaða- og fréttamanna. Það er þó mikilvægt að taka umræðuna um stöðu Ríkisútvarpsins í nútímanum. Þarf RÚV að vera á auglýsingamarkaði? Er þörf á því að hafa tvær opinberar útvarpsstöðvar, þ.e. Rás 1 og Rás 2? Það liggur í augum uppi að það er hægt að hagræða betur, bæði í þágu ríkissjóðs og fjölmiðlastéttarinnar. Mögulega getur það verið til hagsbóta að leggja Rás 2 niður. Fjölmargar einkareknar útvarpsstöðvar eru starfræktar í dag og RÚV þarf einungis eina útvarpsstöð til að sinna sínum starfsskyldum og vera til staðar ef þörf er á.

Að lokum vil ég hvetja hæstv. menningar- og viðskiptaráðherra áfram til dáða í sinni frábærri vinnu við að tryggja samkeppnishæfni sjálfstæðra fjölmiðla.“

B-listi Framsóknar og annarra framfarasinna kynnti í dag framboð sitt til sveitarstjórnarkosninga í sameinuðu sveitarfélagi Blönduósbæjar og Húnavatnshrepps. Listinn, sem mun sækja um bókstafinn B, var kynntur á opnum fundi hjá Framsóknarfélagi Austur-Húnavatnssýslu sem haldinn var 27. mars í Glaðheimum á Blönduósi.

Fundurinn var vel sóttur og mættu liðlega 50 manns. Þar á meðal Stefán Vagn Stefánsson, alþingismaður, sem ávarpaði fundinn.

Mikil jákvæðni og baráttuhugur kom fram í máli fundarmanna og einhugur er um að vanda til málefnastarfs á næstu vikum. Þau sem listann skipa vilja mjög gjarnan leita sjónarmiða sem flestra í nýju sveitarfélagi.

Þeir sem áhuga hafa á að taka þátt í málefnastarfi, koma sjónarmiðum á framfæri, eða spyrja út í starfið framundan er velkomið að hafa samband í netfangið framsoknogframfarasinnar@gmail.com.

Eftirtaldir skipa B-listann:

1. Auðunn Steinn Sigurðsson, skrifstofumaður
2. Elín Aradóttir, framkvæmdastjóri
3. Grímur Rúnar Lárusson, lögfræðingur
4. Erla Gunnarsdóttir, ferðamálafræðingur og ferðaþjónustubóndi
5. Magnús Valur Ómarsson, málarameistari
6. Elín Ósk Gísladóttir, fótaaðgerðarfræðingur og sjúkraliði
7. Agnar Logi Eiríksson, rafvirki og sjúkraflutningsmaður
8. Sara Björk Þorsteinsdóttir, hjúkrunarfræðingur og landbúnaðarfræðingur
9. Karol Galazyn, verkamaður
10. Halldór Skagfjörð Jónsson, bóndi og smiður
11. Finna Birna Finnsdóttir, deildarstjóri/leikskólaleiðbeinandi
12. Anna Margret Sigurðardóttir, verkefnisstjóri í upplýsingatækni, heimilisfræðikennari og sveitarstjórnarmaður
13. Magnús Sigurjónsson, bóndi, B.ed í kennslufræðum
14. Sigþrúður Friðriksdóttir, bóndi
15. Þorgils Magnússon, byggingatæknifræðingur
16. Björn Ívar Jónsson, sjómaður
17. Höskuldur Birkir Erlingsson, aðalvarðstjóri
18. Valgarður Hilmarsson, fyrrv. sveitarstjóri

Á félagsfundi í kvöld var samþykkt samhljóða tillaga uppstillinganefndar að lista Framsóknar til sveitastjórnarkosninga í Grindavík í vor.

Uppstillinganefnd hefur verið að störfum síðustu vikurnar þar sem viðtöl voru tekin við frambjóðendur í öllum efstu sætum ásamt því sem rætt var við félagsmenn og kjósendur. Niðurstaðan var sú að Ásrún Helga Kristinsdóttir kennari skipar 1. sæti listans og Sverrir Auðunsson framkvæmdastjóri skipar 2. sæti listans.

Fólk sem er tilbúið að leggja á sig vinnu til að gera samfélagið okkar betra

„Ég er sérstaklega spennt fyrir að vinna með þessum sterka lista. Ég veit að hér er fólk sem er tilbúið að leggja á sig vinnu til að gera samfélagið okkar betra. Bæði fólk á listanum og líka fólk sem er til hliðar við hann. Við erum með gott og sterkt lið og ætlum okkar að spila sókn og hafa gaman af kosningabaráttunni,“ segir Ásrún Helga Kristinsdóttir, nýkjörinn oddviti Framsóknar í Grindavík.

Árangur er ekki eins manns verk

„Árangur er ekki eins manns verk og er því gaman að tilheyra góðum hóp sem hefur samvinnu og sameiginlega sýn á að taka þátt í að betrumbæta samfélagið okkar í Grindavík,“ segir Sverrir Auðunsson er skipar 2. sæti á lista Framsóknar í Grindavík

Listi Framsóknar í Grindavík 2022:

1. Ásrún Helga Kristinsdóttir,  kennari, 47 ára
2. Sverrir Auðunsson, framkvæmdastjóri, 46 ára
3. Rannveig Jónína Guðmundsdóttir – kennari, 37 ára
4. Viktor Guðberg Hauksson – rafvirki og knattspyrnumaður, 21 árs
5. Vilhjálmur Ragnar Kristjánsson, sölustjóri heildsölu, 34 ára
6. Sigurveig Margrét Önundardóttir, sérkennari, 46 ára
7. Valgerður Jennýjardóttir, leiðbeinandi, 37 ára
8. Þórunn Erlingsdóttir, íþróttafræðingur, 40 ára
9. Páll Jóhann Pálsson, útvegsbóndi, 64 ára
10. Hólmfríður Karlsdóttir, náms- og starfsráðgjafi, 41 árs
11. Hilmir Kristjánsson, sjúkraþjálfaranemi, 25 árs
12. Klara Bjarnadóttir, rekstrarstjóri, 45 ára
13. Gunnar Vilbergsson, eldri borgara, 76 ára
14. Bjarni Andrésson, vélstjóri, 72 ára

Ingibjörg Isaksen, alþingismaður, sagði í óundirbúnum fyrirspurnartíma á Alþingi í gær að áhrifa innrásar Rússa í Úkraínu gæti víða. „Fæðuöryggi í heiminum er ógnað, bæði hér heima og erlendis. Miklar áhyggjur eru af keðjuverkandi áhrifum innrásarinnar. Staðan var nú þegar slæm vegna undangengins heimsfaraldurs og nú bætir í bakkafullan lækinn. Íslensk matvælaframleiðsla treystir á mikilvæg innflutt aðföng, svo sem hráefni til fóðurgerðar, áburð, og olíu. Í skýrslunni „Fæðuöryggi á Íslandi“ frá árinu 2021 segir, með leyfi forseta:

„Stríð eru sennilega sú tegund „hamfara“ sem líklegast er að geti á skjótan hátt stöðvað innflutning á fóðri.“

Í sömu skýrslu er farið yfir hvaða afleiðingar fóðurskortur hefur í för með sér hér á landi. Ef allt fer á versta veg vofir yfir framleiðslustöðvun í eggja-, alifugla- og svínarækt ásamt því að draga þarf verulega úr framleiðslu í mjólkuriðnaði og nautgripa- og sauðfjárrækt. Staðan er því grafalvarleg. Uppistaðan í dýrafóðri er korn. Því vil ég spyrja hæstv. matvælaráðherra: Er til staðar viðbragðsáætlun til að bregðast við ástandinu sem nú vofir yfir og hvernig getum við tryggt aðgengi að lykilaðföngum til innlendrar matvælaframleiðslu næsta árið?“

Þórarinn Ingi Pétursson, alþingismaður, var málshefjandi í umræðu um fæðuöryggi þjóðarinnar í ljósi stríðsins í Úkraínu.

Áherslupunktar og spurningar Þórarins Inga í þessari umræðu voru fimm talsins og fór hann yfir þá.

1. Hvaða vinna á sér stað hjá Þjóðaröryggisráði og öðrum hagvörnum til þess að tryggja fæðuöryggi í landinu?
2. Er þörf á því að setja af stað sérstaka vinnu sem greinir og metur viðbrögð við hækkandi matar- og afurðarverði hér á landi út af þeim aðstæðum sem nú eru uppi?
3. Hefur ráðherra gert áætlanir um að tryggja samvinnu milli matvælaráðuneytis, viðskiptaráðuneytis og fjármálaráðuneytis svo hægt sé að meta áhrif þessara aðstæðna á þjóðina?
4. Með hvaða hætti ætlar ráðherra að aðstoða bændur til þess að bregðast við þessu óvenjulega ástandi?
5. Telur ráðherra þörf á því að efla innlenda matvælaframleiðslu með einhverjum hætti til þess að bregðast við ástandinu og mun ráðherra beita sér fyrir því?

Ef við skilgreinum fæðuöryggi er eftirfarandi skilgreining til, með leyfi forseta:

„Fæðuöryggi er til staðar þegar allt fólk hefur ávallt raunverulegan og efnahagslegan aðgang að nægum, öruggum og næringarríkum matvælum til að uppfylla næringarþarfir sínar með frjálsu fæðuvali til að lifa virku og heilsusamlegu lífi.“

Í skýrslu um fæðuöryggi á Íslandi sem kom út árið 2021, virkilega ljómandi góð skýrsla og hvet ég þingheim allan til að lesa hana, segir, með leyfi forseta:

„Eiginlegt fæðuöryggi Íslendinga er háð fjórum meginforsendum: […]

að þekking á framleiðslu og tæki til framleiðslu séu til staðar, að aðgengi að aðföngum sé tryggt fyrir framleiðslu sem mætir þörfum þjóðarinnar, s.s. olíu, áburði og fóðri, að birgðir séu til af þeim fæðutegundum sem þjóðin þarfnast en sem innlend matvælaframleiðsla getur ekki tryggt eða slík framleiðsla hér heima verði efld.“

Mikilvægasti punkturinn af þessum fjórum er að auðlindir til framleiðslunnar séu til staðar, svo sem fiskstofnar og land til ræktunar.

„Í kjölfar innrásar Rússa í Úkraínu og í ljósi ástandsins í heiminum í dag, getur sú staða komið upp að aðgengi að aðföngum til matvælaframleiðslu getur brugðist. Eitt af þessum mikilvægu aðföngum er áburður. Hann er gríðarlega mikilvægur t.d. til kornframleiðslu og til að hámarka framleiðsluna,“ sagði Þórarinn Ingi.

Áburðarframleiðsla er orkufrek en orkuverð hefur einnig rokið upp og áburðarverð hefur tvöfaldast á einu ári. Nú eru horfur á því og stefnir í það að áburðarverð komi til með að hækka enn meira. Samspil milli áburðarverðs og matvælaverðs er þannig að það helst yfirleitt alltaf í hendur. Það er raunverulega sú staða sem við horfum á núna. Það getur líka orðið uppskerubrestur eins og t.d. var núna í Kína á síðasta ári þar sem voru mikil flóð og það var mun minni framleiðsla, og einnig var mun minni framleiðsla í Bandaríkjunum á síðasta ári vegna þurrka. Síðan bætist stríðið við.

Í niðurlagi skýrslunnar um fæðuöryggi segir, með leyfi forseta:

„Allar greinar fæðuframleiðslu á Íslandi eiga það sammerkt að þær byggja á þekkingu sem er til staðar í landinu og framleiðsluaðferðum sem lúta reglum sem hér gilda. Til að þessar greinar haldi velli þurfa þær að búa við ásættanlega afkomu. Innflutningur á þeim vörum sem gefa versluninni mesta framlegð getur orðið til þess að framleiðsla í heilli búgrein leggst af. Búgreinarnar eru háðar hverri annarri, ef ein þeirra leggst af getur fjarað fljótt undan öðrum.“

Forsætisráðherra, Katrín Jakobsdóttir, sagði þetta stórmál.

Fjallað er um fæðuöryggi í þjóðaröryggisstefnunni sem samþykkt var 2016. Í eftirlitsskýrslu þjóðaröryggisráðs sem gefin var út um tímabilið 2019–2020 kemur fram að það liggi fyrir undirbúningur að gerð fæðuöryggisstefnu, að hefja fæðuöryggisstefnu, en eins hafi verið kynnt ný matvælastefna til ársins 2030 ásamt aðgerðaáætlunum.

„Í skýrslu þjóðaröryggisráðs um mat á ástandi og horfum í þjóðaröryggismálum, sem gefin var út í febrúar 2021, og mér finnst ágætt að vekja athygli á þessu, kemur fram að helstu ógnir við fæðuöryggi sé hversu háð matvælaframboð og framleiðsla er innflutningi aðfanga, svo sem fóðurs, áburðar og umbúða og eins olíubirgða í tilfelli fiskveiða. Hátt hlutfall matvæla komi að utan og innlend matvælaframleiðsla sé háð þessum innflutningi á aðföngum, eins og ég nefndi hér. Þá benti þjóðaröryggisráð á að mikilvægt væri að stuðla að aukinni sjálfbærni í matvælaframleiðslu og gera reglulegar úttektir á matvælabirgðum í því skyni að tryggja lágmarksviðmið um birgðir í landinu.

Í stefnu almannavarna og öryggismálaráðs er einnig fjallað um nauðsynlegar birgðir til að tryggja lífsafkomu þjóðarinnar og er unnið að því núna undir forystu forsætisráðuneytis að skilgreina viðmið fyrir nauðsynlegar birgðir til að tryggja lífsafkomu þjóðar á neyðartímum. Þá höfum við einnig ákveðið að uppfæra mat ráðsins á þjóðaröryggismálum með hliðsjón af þeirri stöðu sem er komin upp vegna innrásar Rússa í Úkraínu. Matvælaráðuneytið fylgist mjög grannt með þróun matar- og afurðaverðs í kjölfar innrásarinnar og hefur verið í sambandi við matvælaframleiðendur, birgja og hagsmunasamtök. Starfshópurinn sem ég vísaði til áðan vinnur hins vegar að því að móta tillögur að viðbragðsáætlun eða skipulagi þar sem er skilgreint er hvað skuli teljast til neyðarbirgða og umfang og skyldu til nauðsynlegs birgðahalds og leiðir til að tryggja nauðsynlega birgðastöðu. Hann er ekki eingöngu að fjalla um matvæli. Hann er líka að fjalla, eins og hefur komið fram í máli mínu í dag, um lyf og lækningavörur, eldsneyti og nauðsynlegar birgðir varahluta til að tryggja öryggi fjarskipta og rafmagns. Það er svona víðtækara hlutverk.

Hv. þingmaður nefndi mikilvægi þess að við mótum okkur langtímastefnu í þessum málum og vitnaði hér til góðrar skýrslu sem Landbúnaðarháskólinn vann um fæðuöryggi. Ég er algjörlega sammála því að sú skýrsla er góð og hefur Landbúnaðarháskólanum verið falið að vinna drög að fæðuöryggisstefnu fyrir Ísland og drög að henni eigi að liggja fyrir í apríl næstkomandi. Þannig að við eigum von á stefnumótun sem byggir á þessari ágætu skýrslu. Hv. þingmaður fór nú yfir ýmis atriði úr henni þannig að ég ætla ekki að endurtaka það. En það er áhugavert að sjá hve mikil sóknarfæri við eigum í matvælaframleiðslu í þeim greinum þar sem við erum ekki sjálfum okkur nóg. Mér er náttúrlega tíðrætt hér um grænmetisræktun og við höfum verið að gefa í þar. Það held ég að sé gríðarlega mikilvægt, líka í ljósi breyttra neysluvenja, en 43% af því grænmeti sem við neytum er innlend framleiðsla og það er mjög mismunandi milli einstakra tegunda. Að sjálfsögðu borðum við meira af innlendum kartöflum og rófum, en t.d. í tilfelli blómkáls þá minnir mig að yfir 90% séu innflutt. Þarna eigum við mikil tækifæri í að gera miklu betur, fyrir utan auðvitað í kornræktinni, sem er um 1% af heildarneyslu.

Þegar kemur hins vegar að kjöti, eggjum og mjólkurvörum þá sér búfjárrækt okkur fyrir 90% plús, upp í 99% þegar kemur að mjólkurvörunum. Hins vegar eru framleiðslugreinar mjög misháðar þessum aðföngum sem ég nefndi hér áðan og áhrif af skorti á einhverjum af þessum aðföngum eru mismikil eftir greinum. Til að mynda eru alifugla- og svínarækt háðar innfluttu fóðri. Slíkur skortur myndi ekki hafa áhrif á lambakjötsframleiðslu. Þetta þurfum við því að setja niður fyrir okkur: Hversu háðar eru greinarnar innfluttum aðföngum og hvað þarf að gera til þess að draga úr því hæði, svo að ég orði það nú með þessum hætti? Það sama á í raun og veru við um fiskveiðarnar sem eru háðar innflutningi á eldsneyti o.s.frv,“ sagði forsætisráðherra.

Hafdís Hrönn Hafsteinsdóttir, alþingismaður, sagði í umræðu um „framtíð félagslegs húsnæðis“ á Alþingi í liðinni viku að nauðsynlegt væri að skilgreina ábyrgð sveitarfélaganna þegar kemur að því að tryggja framboð félagslegs húsnæðis sem og annars húsnæðis.

„Það liggur fyrir að sveitarfélögin þurfa að tryggja að byggt verði nóg þannig að framboð á húsnæði, og þá líka félagslegu húsnæði, verði nægjanlegt. Sveitarfélögin mega ekki vera dragbítur í baráttunni við húsnæðisvandann,“ sagði Hafdís Hrönn.

Nefndi hún sem dæmi Reykjavíkurborg sem hefur lýsir því yfir að 1.000 íbúðum verði úthlutað í ár þegar þörfin er rúmlega 4.000.

„Það þarf að spýta í lófana ef stefnan er að bæta húsnæðismarkaðinn og stuðla að betri framtíð hans í heild.“

Sagði hún mikilvægt að tryggja framboðið og dreifa því þvert yfir landið en einnig mætti horfa til frekari útvíkkunar á hlutdeildarlánunum sem komið var á fót fyrir tilstilli Framsóknar á síðasta kjörtímabili.

B-listi Framsóknarflokksins býður fram eftirfarandi lista í sameinuðu sveitarfélagi Akrahrepps og Sveitarfélagsins Skagafjarðar í sveitarstjórnarkosningum þann 14. maí 2022.

Gríðarleg stemming og jákvæðni var í loftinu í gærkvöldi þegar framboðslisti Framsóknar í Borgarbyggð var kynntur. Guðveig Eyglóardóttir sveitarstjórnarfulltrúi leiðir listann þriðja kjörtímabilið í röð. Í öðru sæti er Davíð Sigurðsson, sveitarstjórnarfulltrúi og framkvæmdarstjóri og í því þriðja Eðvarð Ólafur Traustason, flugstjóri og atvinnurekandi. Þá þakkaði fundurinn Finnboga Leifssyni sérstaklega fyrir sitt starf síðustu áratugi með dynjandi lófaklappi, en hann skipar nú heiðurssæti listans.

Framboðslisti Framsóknar í Borgarbyggð fyrir n.k. sveitarstjórnarkosningar er eftirfarandi:

1 Guðveig Eyglóardóttir, sveitarstjórnarfulltrúi
2 Davíð Sigurðsson, framkvæmdastjóri og sveitarstjórnarfulltrúi
3 Eðvarð Ólafur Traustason, flugstjóri og atvinnurekandi
4 Eva Margrét Jónudóttir, sérfræðingur hjá Matís
5 Sigrún Ólafsdóttir, bóndi og tamningamaður
6 Þórður Brynjarsson, búfræðinemi
7 Sigríður Dóra Sigurgeirsdóttir, framkvæmdastjóri
8 Weronika Sajdowska, kennari og þjónn
9 Bergur Þorgeirsson, forstöðumaður Snorrastofu
10 Þorsteinn Eyþórsson, eldir borgari
11 Þórunn Unnur Birgisdóttir, lögfræðingur
12 Erla Rúnarsdóttir, leikskólakennari
13 Hafdís Lára Halldórsdóttir, nemi
14 Höskuldur Kolbeinsson, bóndi og húsasmiður
15 Sonja Lind Eyglóardóttir, aðstoðarmaður þingflokks
16 Orri Jónsson, verkfræðingur
17 Lilja Rannveig Sigurgeirsdóttir, alþingismaður
18 Finnbogi Leifsson, sveitarstjórnarfulltrúi og bóndi