Category: Fréttir

Ingibjörg Isaksen, alþingismaður og formaður þingflokks Framsóknar, kynnti í störfum þingsins að hún muni leggja fram þingsályktunartillögu sem hefur að markmið að tryggja áframhaldandi stuðning við geðendurhæfingu ungmenna með fjölþættan vanda. Tilefnið er að starfsemi Janusar endurhæfingar, sem þjónustað hefur ungt fólk með alvarlegan geðrænan og félagslegan vanda í yfir 25 ár, stendur frammi fyrir lokun án þess að sambærilegt úrræði komi í staðinn.

Loforð stjórnvalda

Ingibjörg vakti athygli á því að stjórnvöld hafi ítrekað lýst yfir vilja sínum til að efla geðheilbrigðisþjónustu, sérstaklega fyrir ungt fólk. Hún benti á að í stjórnarsáttmála ríkisstjórnarinnar sé lögð sérstök áhersla á þessi mál, auk þess sem fjölbreytt rekstrarform eigi að fá að njóta sín.

„Við þekkjum öll setningarnar; geðheilbrigðismál í forgang, sérstök áhersla á þjónustu við ungt fólk, fjölbreytt rekstrarform á að fá að njóta sín,“ sagði Ingibjörg. „En orð duga skammt ef ábyrgð fylgir ekki.“

Hvers vegna að loka Janusi endurhæfingu?

Í ræðu sinni gagnrýndi hún þá ákvörðun að loka Janusi endurhæfingu án útskýringa og án þess að kynna valkost í staðinn. „Það sem hefur virkað er nú lagt niður og engin sambærileg lausn er tilbúin í staðinn,“ sagði hún og bætti við að fyrir marga skjólstæðinga hafi þetta ekki verið valkostur, heldur líflína. „Þjónustan hefur skipt sköpum og fyrir marga því verið beinlínis lífsspursmál.“

Tillagan sem Ingibjörg leggur fram felur í sér bráðabirgðasamning, samráð við fagfólk og notendur og vinnu að framtíðarskipulagi. Að hennar mati er þetta nauðsynleg brú milli þess sem hefur virkað og framtíðarsýnar í geðheilbrigðisþjónustu fyrir ungt fólk.

Ingibjörg kallaði eftir ábyrgð frá þingmönnum meirihlutans og hvatti til þess að orð í stjórnarsáttmála verði látin fylgja með raunverulegum aðgerðum. Hún lagði áherslu á að þetta mál snúist ekki um hana sjálfa né um Janus endurhæfingu sem stofnun, heldur um rétt ungs fólks til árangursríkrar þjónustu:

„Þetta snýst ekki um mig og þetta snýst ekki um Janus endurhæfingu, þetta snýst um unga fólkið okkar og hvort það eigi rétt á að fá þjónustu sem virkar eða ekki.“

Í kraftmikilli ræðu á Alþingi í dag vakti Halla Hrund Logadóttir, alþingismaður, athygli á því hvernig alþjóðasamfélag – og íslensk stjórnvöld sérstaklega – hafi brugðist þegar kemur að hörmungunum sem nú eiga sér stað í Gaza.

Þögn um átökin í Gaza

Í ræðu sinni minnti Halla Hrund á grimmdarverk fortíðar og lýsti reynslu sinni sem nemandi við háskóla, þegar hún skrifaði ritgerð um þjóðarmorðin í Rúanda:

„Ég man svo vel eftir ritgerð sem ég skrifaði í háskólanum um þjóðarmorðin í Rúanda. Þegar ég fór yfir söguna þá greyptist hún fast í huga mér. Þarna féllu þúsundir Tútsa fyrir framan augu heimsins og enginn svaraði kallinu.“

Halla Hrund benti á að heimurinn hefði að lokum sagt „aldrei aftur“, en að nú væri samskonar hryllingur að eiga sér stað á Gaza – án þess að stjórnvöld víða um heim bregðist við.

„Í dag er þó slíkt hið sama að raungerast á Gaza og aftur horfir heimurinn þögull á hryllingsmynd í beinni.“

Þögnin eftir kosningar

Halla Hrund gagnrýndi harðlega aðgerðarleysi íslenskra stjórnmála eftir kosningar, sérstaklega þegar horft væri til orða leiðtogaefna fyrir kosningar:

„Það er ekki boðlegt að leiðtogaefni keppist við að stíga fram sem friðardúfur í aðdraganda kosninga og þegi svo þunnu hljóði úr valdastóli í kjölfarið.“

Hún benti á að loforð um norrænt samstarf og að beita rödd Íslands fyrir friði hefðu litlu skilað. Sömuleiðis vakti hún athygli á því hvernig stjórnmálamenn forðuðust þátttöku í mikilvægustu friðarviðburðum Evrópu, eins og minningarathöfn í Auschwitz.

„Afboði sig jafnvel á stærsta friðarviðburð Evrópu í Auschwitz […] eða tjái sig ekki með skýrum hætti fyrr en allt í einu um Eurovision þegar þátttaka þjóða í keppninni er löngu staðfest.“

Orð fylgi ábyrgð

Ræðu sinni lauk Halla Hrund með ákalli til ráðamanna um að sýna ábyrgð og ganga heiðarlega til verka í samræmi við orð og loforð:

„Kæru ráðamenn þjóðar vorrar. Verið sannar í orðum ykkar og gjörðum. Þið eruð fyrirmyndir, ekki síst fyrir unga fólkið, um hvað loforð og yfirlýsingar og aðgerðir þýða í raun. Þeim fylgir ábyrgð og það þarf að sýna þá ábyrgð í verki.“

Og hún endaði með hnífskarpri spurningu:

„Hvar standið þið og þjóðin öll þegar nemendur framtíðarinnar rýna í söguna?“

Stefán Vagn Stefánsson, alþingismaður, hvetur ríkið til að axla aukna ábyrgð á stuðningi við íþróttastarf, sérstaklega á landsbyggðinni.

Mikill kostnaður fellur á fjölskyldur

Í ræðu á Alþingi í dag beindi Stefán Vagn athygli sinni að mikilvægi íþrótta fyrir börn og samfélagið, og þeirri fjárhagslegu byrði sem fellur á fjölskyldur – einkum á landsbyggðinni.

„Það verkefni sem við stöndum frammi fyrir í dag er kostnaðurinn við að halda úti slíku starfi, sérstaklega á landsbyggðinni, þar sem ferðakostnaður félaganna er oft mikill, sem endar oftar en ekki hjá iðkendum og fjölskyldum þeirra,“ sagði Stefán Vagn og lagði áherslu á að kostnaðurinn geti orðið umtalsverður fyrir venjulegar fjölskyldur, sérstaklega þegar um fleiri en eitt barn er að ræða.

Opinber ábyrgð og jöfn tækifæri

Íslensk löggjöf og stefna í málefnum barna og íþrótta leggur áherslu á jöfn tækifæri til þátttöku óháð búsetu eða efnahag. Þrátt fyrir það segir Stefán Vagn að ríkið hafi brugðist hlutverki sínu þegar kemur að stuðningi við starfsemi íþróttafélaga á landsbyggðinni.

„Stuðningurinn við félögin kemur að mestu frá nærsamfélaginu og sveitarfélögunum. Þarna þarf ríkið að stíga sterkar inn,“ bætti hann við.

Lýðheilsa og samfélagslegur ávinningur

Stefán Vagn vísaði til jákvæðra áhrifa íþrótta á börn og samfélagið í heild: „Jákvæð áhrif íþrótta eru óumdeild hvað varðar lýðheilsu, félagslega sem og samfélagslega.“ Hann benti á að aukinn stuðningur við íþróttastarf muni skila sér margfalt til baka með sterkari einstaklingum, bættri heilsu og samheldnari samfélögum.

Áhrifum kostnaðarins gerði hann sérstaklega góð skil: „Foreldrar eru á sitthvorum enda landsins á sama tíma að fylgja barninu sínu eftir. Ekki þarf að útskýra fyrir þingmönnum hvað ein slík helgi kostar; akstur, möguleg gisting og fæði.“

Ríkið þarf að stíga inn – þetta snýst um réttlæti

Í niðurlagi sinnar ræðu lagði Stefán Vagn áherslu á að nú væri tímabært að ríkið létti undir með íþróttafélögum og þar með fjölskyldum og börnum þeirra.

„Við þurfum að gera betur í stuðningi við íþróttastarf; fjármagn sem við munum fá margfalt til baka,“ sagði hann og ítrekaði: „Þetta er jafnréttis- og sanngirnismál, virðulegur forseti.“

Jónína Brynjólfsdóttir, varaþingmaður, flutti í dag jómfrúarræðu sína á Alþingi og kallaði hún eftir skýrri og markvissri byggðastefnu sem stuðli að fjölgun opinberra starfa á landsbyggðinni og eflingu samfélaga utan höfuðborgarsvæðisins.

Skortur á markvissri stefnu

Jónína vakti athygli á því að íbúafjölgun á landsbyggðinni haldi ekki í við fjölgun íbúa á höfuðborgarsvæðinu og benti á að áratugalangar tilraunir til að skapa raunhæfa byggðastefnu hafi mistekist.

„Hingað til hefur stefnumörkunin einkennst af tilviljanakenndum ákvörðunum, teknum á ólíkum tímum og án samhæfingar,“ sagði hún og bætti við að afleiðingin sé sú að bæði fólk og opinber stjórnsýsla sé í sífellu beint inn á sama svæði.

Byggðirnar bjóða upp á tækifæri

Þrátt fyrir skort á opinberri stefnu, benti hún á að landsbyggðirnar bjóði upp á fjölmörg tækifæri, betri lífsgæði og bætt þjónustustig, meðal annars vegna aukinnar ferðaþjónustu.

„Á landsbyggðunum er nóg pláss fyrir alla, húsnæði á sanngjörnu verði, nægt framboð af lóðum, pláss á leikskólum […]. Við búum nær náttúrunni, höfum meiri fjármuni til ráðstöfunar og meiri tíma til að lifa lífinu án þess að sitja föst í umferð.“

Hún lagði einnig áherslu á að þar eigi sér stað mikil verðmætasköpun – í sjávarútvegi, orkuvinnslu, stóriðju, landbúnaði og þjónustu – en að opinber störf hafi sífellt fækkað.

Skýr aðgerðaráætlun nauðsynleg

Jónína beindi spjótum sínum að ríkisstjórninni og krafðist breytinga.

„Ég hvet ríkisstjórnina til að breyta stefnu sinni og stuðla að fjölgun opinberra starfa á landsbyggðunum,“ sagði hún og bætti við að leggja verði fram „byggðastefnu með skýrri aðgerðaáætlun sem styrkir landsbyggðirnar í stað þess að leggja auknar álögur á atvinnuvegina sem halda samfélögunum gangandi.“

„Eins konar nýlendustefna“ gagnrýnd

Í ræðu sinni vék hún að þeirri hugmynd að íbúar landsbyggðanna væru ekki treystandi til að stjórna eigin málum. Hún sagði slíka afstöðu jafngilda nýlendustefnu og mótmælti harðlega.

„Ég vil sérstaklega mótmæla þeirri eins konar nýlendustefnu að treysta ekki íbúum landsbyggðanna til að reka og stýra þeim opinberu fyrirtækjum sem nánast eingöngu hafa starfsemi sína þar.“

Tími til að stíga skrefið

Jónína lauk ræðu sinni með áskorun til ríkisstjórnarinnar um að gera betur og horfa til raunhæfra lausna.

„Við þurfum byggðastefnu sem beinir fólki til landsbyggðanna, ekki frá þeim.“

Sigurður Ingi Jóhannsson, formaður Framsóknar, gagnrýndi harðlega forsætisráðherra í ræðu á Alþingi og lýsti yfir miklum áhyggjum af nýlegri skipan í stjórnir ríkisfyrirtækja. Hann velti því upp hvort ríkisstjórnin væri að víkja frá eigin stefnu um gegnsæi og fagmennsku í stjórnarkjörum.

„Ég verð að viðurkenna að eftir síðustu samskipti hér í óundirbúnum fyrirspurnum er ég enn meira hugsi yfir svörum forsætisráðherra heldur en ég var fyrir,“ sagði Sigurður Ingi og vísaði til þeirra breytinga sem ný ríkisstjórn hefur gert á verklagi við stjórnarskipanir.

Sigurður Ingi rifjaði upp að fyrri ríkisstjórn hefði sett fram „ágætisplan“ um að opna fyrir umsóknir og tryggja að hæfustu einstaklingarnir kæmust að. „Ekki þannig að skilja að það hafi ekki setið hæft fólk í stjórnum ríkisfyrirtækja hingað til,“ bætti hann við. „En engu að síður hefur þetta verklag nú vikið fyrir kerfi sem einkennist af einsleitni og takmörkuðum samfélagslegum þverskurði.“

Sérstaklega gagnrýndi hann að fulltrúar af landsbyggðinni væru nær alfarið undanskildir í nýrri skipan. „Það var næstum því forskrift,“ sagði hann. „Þó að ríkisfyrirtækin mörg hver starfi fyrst og fremst úti á landsbyggðinni […] þá virtist meginlínan vera að velja einsleita menn.“

Þá lýsti hann furðu á því að ráðherra hefði skipað eingöngu flokksmenn í stjórn Húsnæðis- og mannvirkjastofnunar. „Það var ekki gert í síðustu stjórn HMS,“ sagði hann. „Þar var tekið tillit til ólíkra sjónarmiða ólíkra flokka.“

Að lokum beindi Sigurður Ingi spurningu að forsætisráðherra:
„Var þetta planið, að gera eitt í dag og annað á morgun og undanskilja algerlega landsbyggðina?“

Ræða Sigurðar Inga í heild sinni á Alþingi:

Deila

Prenta grein