Author: einar

„Kerecis, Controlant, CCP, Grid, Marel, Meniga og Myrkur Games… þetta eru ekki orð í skrúfu heldur fyrirtæki sem hafa skapað gríðarlega þekkingu og verðmæti fyrir íslenskt samfélag,“ sagði Halla Hrund Logadóttir, alþingismaður, í sérstakri umræðu á Alþingi um stöðu verkfræði-, stærðfræði-, raunvísinda- og náttúruvísindanáms á háskólastigi.

Halla Hrund lagði áherslu á að efling STEM-greina væri lykilforsenda samkeppnishæfni þjóðarbúsins, bæði með hliðsjón af yfirstandandi tæknibyltingu í gervigreind og til að laða ungt fólk aftur heim úr námi. „Ef þessum fyrirtækjum tekst vel til þá græða allir í íslensku samfélagi,“ sagði hún og nefndi m.a. Oculis, Lucinity, Bláa lónið, GeoSilica, 1939 Games og Aldin Dynamics sem dæmi um sprota og vaxtarfyrirtæki sem byggja á STEM-menntun.

Kallar eftir „sókn“ í stað „átaks“

Halla Hrund hvatti menningar-, nýsköpunar- og háskólaráðherra til að stilla upp markvissri sóknaráætlun. „Við erum að tala um átak í grunnskólum og framhaldsmenntun, en við þurfum sókn núna því málin breytast hratt,“ sagði hún og óskaði eftir skýrari útfærslu á því hvernig slík sókn myndi birtast og tengjast stuðningi við nýsköpunarumhverfið og atvinnustefnu í mótun.

Grunnurinn þarf að vera sterkur og seiglan skipti máli

Í seinni ræðu sinni þakkaði Halla Hrund fyrir málefnalega umræðu og tók undir ábendingar þingmanna um að grunnfærni í stærðfræði og raungreinum yrði að vera traust. Hún lagði jafnframt áherslu á aga og þrautseigju í námi: „Við þurfum að æfa seigluna, æfa okkur í því sem krefst aga,“ sagði hún og vísaði til innlegga sem bentu á mikilvægi vinnuvana og úthalds.

Auðlindirnar drifkraftur byggðaþróunar

Halla Hrund beindi sérstakri athygli að tækifærum í auðlindatengdri nýsköpun um land allt. „Þetta er sennilega eitt mesta tækifærið fyrir byggðaþróun; auðlindirnar eru dreifðar og því getur verðmætasköpunin orðið það líka,“ sagði hún og nefndi sem dæmi Kerecis og Primex ásamt Bláa lóninu og GeoSilica.

Til að kveikja áhuga ungmenna lagði hún til að skólakerfið og atvinnulífið næðu betur saman með markvissum kynningum og heimsóknum: „Fáum ungt fólk inn á vinnustaðina, sýnum þeim verkefnin og tengjum algebruna við raunveruleg tækifæri. Þá skýrist myndin og þá vegnar okkur vel.“

Ingibjörg Isaksen, alþingismaður og formaður þingflokks Framsóknar, beindi fyrirspurn til mennta- og barnamálaráðherra um stöðu meðferðarúrræða fyrir börn og ungmenni. Tilefnið er tvö nýleg mál þar sem ungmenni leituðu meðferðar erlendis vegna skorts á viðunandi þjónustu hérlendis.

Ingibjörg sagði að foreldrar hefðu lýst því sem „þungbæru“ að senda börn sín úr landi til að fá lífsnauðsynlega þjónustu. Hún tók undir mikilvægi þess að öll úrræði, heima og erlendis, byggðust á gagnreyndum aðferðum og viðurkenndum stöðlum, en lagði áherslu á að bið eftir innlendum úrræðum mætti ekki verða til þess að börn sættu þjónustuleysi.

„Þegar úrræði eru ekki til staðar innan lands eða þegar börn þurfa að bíða mánuðum saman eftir plássi eða þjónustu, lífsnauðsynlegri þjónustu, þá er mikilvægt að hægt sé að leita einhverra leiða,“ sagði hún og bætti við að ekki væri boðlegt að fjölskyldur stæðu frammi fyrir vali á milli biðar heima eða sjálfsaflaðra lausna erlendis „með tilheyrandi kostnaði og óvissu“.

Ingibjörg minnti á að ráðherra hefði áður vísað til þess að tiltekin erlendu úrræði uppfylltu ekki staðla sem gerðir eru kröfur um fyrir börn og ungmenni, hvorki hér né á Norðurlöndum, sem hún taldi rétt sjónarmið í sjálfu sér. „En það breytir ekki þeirri staðreynd,“ sagði hún, „að þegar innlend úrræði eru ekki til staðar þarf að tryggja samfellda og örugga þjónustu með öðrum hætti þar til þau eru tilbúin.“

Kallar eftir formlegu mati og mögulegri tímabundinni lausn

Ingibjörg lagði þrjár spurningar fyrir ráðherra:

• Hefur verið metið með formlegum hætti hvort þetta umrædda úrræði uppfylli þá staðla sem við gerum kröfur um?

• Eru önnur úrræði erlendis sem uppfylla slíka staðla?

• Ef hægt er að tryggja meðferð erlendis á stofnunum sem uppfylla slíka staðla mun ráðherra þá endurskoða afstöðu sína til þess að veita tímabundinn stuðning við meðferðarúrræði erlendis þegar það er eina raunhæfa leiðin til að tryggja barninu samfellda og örugga þjónustu þar til innlend úrræði eru tilbúin?

Sigurður Ingi Jóhannsson, alþingismaður og formaður Framsóknar, kallaði eftir skýrari svörum frá ríkisstjórninni, í óundirbúnum fyrirspurnum á Alþingi, um „mjög misvísandi upplýsingar“ um mögulegan kostnað ríkissjóðs og tengdra fyrirtækja vegna falls flugfélagsins Play. Hann krafðist þess að fjármálaráðherra legði þegar fram eina, heildstæða tölu og útskýrði hvernig hún skiptist.

Sigurður Ingi vísaði til þriggja mismunandi fjárhæðna sem hafi verið nefndar á fáum dögum: „Fjármálaráðherra sagði […] að það væri trúlega um nokkur hundruð milljónir að ræða. Nokkrum dögum síðar kom hæstv. innviðaráðherra og taldi að kostnaðurinn væri 1,5 milljarðar. Síðan fréttist af minnisblaði fjármálaráðuneytisins þar sem talað var um 5 milljarða.“ Sigurður Ingi sagði þennan breytileika óásættanlegan og spurði: „Hver er rétta talan, ef einhver veit hana?“

Spyr um áhrif á stöðugleikareglu og Isavia

Jafnframt vildi Sigurður Ingi fá staðfest hvort mögulegt tjón hefði áhrif á svonefnda stöðugleikareglu ríkisfjármála. „Ef það eru 5 milljarðar er þá stöðugleikareglan í uppnámi?“ spurði hann og minnti á að „ríkisstjórnin hafi skilið um 500 milljónir eftir“ í ramma.

Mikilvægt væri að greina hvað félli á A-hluta ríkissjóðs og hvað á Isavia, sem starfar utan A-hlutans: „Ef þetta er vegna þess að kostnaðurinn falli á Isavia […] hver er þá kostnaður Isavia vegna þessa?“ bætti hann við.

Vaxandi tekjurýrnun vegna verkfalls

Í sömu andrá tengdi hann málið yfirvofandi tekjurýrnun hjá Isavia vegna verkfalls flugumferðarstjóra og áhrif þess á ferðaþjónustu og þjóðarbúið. „Er þá orðin hætta á því að lánalínur Isavia, sem er í miklum framkvæmdum, séu í uppnámi? Er hætta á innköllun á lánalínum eða […] að hér þurfi á að halda auknu eigin fé úr ríkissjóði til Isavia, til þess að Isavia geti haldið áfram sínum dampi?“ spurði hann.

Kallar eftir „heiðarlegum og réttum svörum“

Sigurður Ingi sagði brýnt að Alþingi fengi „heiðarlegri og rétt svör“ frá ríkisstjórninni og að ekki skeikaði „nokkru hundruð milljónum upp í 5 milljarða“. Hann lagði áherslu á að ráðherrar samræmdu tölur og settu fram sundurliðaða mynd af mögulegu tjóni og skuldbindingum ríkisins og dótturfyrirtækja þess.

Haustfundur miðstjórnar hefur boðað til 38. Flokksþings Framsóknar helgina 14.-15. febrúar 2026 á Hilton Reykjavík Nordica í Reykjavík. Á þinginu verður mótuð meginstefna flokksins í landsmálum, kosið í lykilembætti og sett ný eða endurskoðuð flokkslög.

Samkvæmt lögum Framsóknar er flokksþing haldið eigi sjaldnar en annað hvert ár og að jafnaði á fyrri hluta árs. Flokksþing hefur æðsta vald í málefnum flokksins.

Á dagskrá þingsins er meðal annars að kjósa formann Framsóknar, sem jafnframt verður formaður miðstjórnar, auk varaformanns, ritara og tveggja skoðunarmanna reikninga. Þá verður kosið í laganefnd og siðanefnd; tveir meðstjórnendur og tveir til vara í hvora nefnd.

Helstu dagsetningar og skilafrestir

15. janúar: Viðmiðunardagur fulltrúatölu aðildarfélaga.

30. janúar: Lagabreytingum skal skila til flokksskrifstofu.

7. febrúar kl. 10.00: Kjörbréfum skal skila til flokksskrifstofu.

Fulltrúar og þátttaka

Hvert flokksfélag getur sent einn fulltrúa með atkvæðisrétt fyrir hverja 15 félagsmenn eða brot úr þeirri tölu. Jafnmargir varamenn skulu kjörnir. Fulltrúatala miðast við félagatal sem liggur fyrir á skrifstofu flokksins 30 dögum fyrir flokksþing.

Um fyrirkomulag kosninga fulltrúa fer eftir lögum viðkomandi aðildarfélags. Tilkynna skal val á fulltrúum til skrifstofu flokksins eigi síðar en viku áður en flokksþing er sett.

Allir félagsmenn Framsóknar eiga rétt á að sækja flokksþing með málfrelsi og tillögurétt, en miðstjórnarmenn eiga jafnframt sæti á þinginu með atkvæðisrétti.

Lilja Rannveig Sigurgeirsdóttir, varaþingmaður, var kjörin ritari Framsóknar á haustfundi miðstjórnar á laugardaginn. Alls greiddu 169 miðstjórnarfulltrúar atkvæði og fór kosningin þannig: Lilja Rannveig hlaut 90 atkvæði (53,3%), Jónína Brynjólfsdóttir, forseti sveitarstjórnar Múlaþings, hlaut 46 atkvæði (27,2%) og Einar Freyr Elínarson, sveitarstjóri Mýrdalshrepps, hlaut 33 atkvæði (19,5%).

„Ég er afar þakklát fyrir traustið og spennt fyrir nýju hlutverki,“ sagði Lilja Rannveig eftir kjörið. „Mikil verkefni eru fram undan þar sem sveitarstjórnarkosningar nálgast.“

Lilja Rannveig hefur verið virk í starfi flokksins í yfir áratug. Hún var kjörin formaður Sambands ungra Framsóknarmanna árið 2018 og gengdi því embætti til ársins 2021. Lilja Rannveig var kjörin til setu á Alþingi í alþingiskosningunum 2021 fyrir Norðvesturkjördæmi og var alþingismaður til 2024. Hún er í dag formaður málefnanefndar flokksins og vinnur að málefnastarfi fram að Flokksþingi. Lilja Rannveig er formaður Framsóknarfélags Borgarbyggðar.

Við í Framsókn óskum Lilju Rannveigu innilega til hamingju með kjördið og þökkum jafnframt fráfarandi ritara Framsóknar Ásmundi Einari Daðasyni fyrir mjög gott og öflugt starf í þágu flokksins.

Miðstjórnarfundur Framsóknar haldinn 18. október 2025 gagnrýnir stefnulausa og þróttlitla efnahagsstjórn ríkisstjórnarinnar sem bitnar á heimilum landsins. Verðbólgan eykst og vaxtalækkunarferlið hefur brotlent. Þrátt fyrir að húsnæðisvandinn sé einn helsti drifkraftur verðbólgu og hárra vaxta, skilar ríkisstjórnin auðu í þeim málaflokki.

Framsókn er flokkur fjölskyldunnar og brýnir stjórnvöld til þess hlúa betur að fólkinu í landinu. Stjórnvöld verða að standa með sveitarfélögunum sem veita almenningi mikilvægustu nærþjónustuna. Miðstjórn Framsóknar leggur ríka áherslu á að gripið verði til aðgerða til þess að efla íslenskukennslu, sérstaklega fyrir börn af erlendum uppruna. Það er grundvallaratriði svo öll börn á Íslandi standi jafnfætis í námi og njóti jafnra tækifæra. Miðstjórn mótmælir því harðlega áformum ríkisstjórnarinnar um að skera niður fjárveitingar til íslenskukennslu fyrir innflytjendur.

Fjárfesting í menntun og velferð barna er ein besta fjárfesting sem hvert samfélag getur ráðist í. Réttlátt samfélag hugar ekki síður að lýðheilsumálum og þjónustu við eldra fólk og tryggir þeim verst stöddu mannsæmandi lífskjör.

Ljóst er að ríkisstjórnin hyggst auka miðstýringu og takmarka vald nærsamfélaga til að taka ákvarðanir um eigin mál. Framsókn mótmælir þessari stefnu harðlega. Ákvörðunarvald hvers sveitarfélags yfir sínum málum er hornsteinn stjórnskipunar Íslands. Framsókn mun berjast fyrir því að þessi grundvallarréttindi verði virt og að samvinna ríkis og sveitarfélaga verði efld á jafnræðisgrundvelli.

Miðstjórn Framsóknar gagnrýnir harðlega að ríkisstjórnarflokkarnir skuli ótrauðir stefna inn í  Evrópusambandið þrátt fyrir afgerandi yfirlýsingar fyrir kosningar um að aðild væri ekki á dagskrá. Það eru svik við kjósendur. Miðstjórn Framsóknar hafnar alfarið þeirri vegferð og fordæmir þá forgangsröðun sem setur aðild að Evrópusambandinu ofar brýnum aðgerðum til stuðnings heimila og fjölskyldna í landinu.

Ríkisstjórnin hefur einnig svikið skýr loforð til kjósenda um að hækka ekki skatta á almenning og atvinnulíf. Nú þegar hafa verið lagðar til umtalsverðar skattahækkanir á bæði einstaklinga og fyrirtæki en samt er áætlaður halli á ríkisrekstri umtalsverður.

Ríkisstjórnin hóf kjörtímabilið á því að vega að tveimur af grunnatvinnuvegum þjóðarinnar, sjávarútvegi og ferðaþjónustu, og stefnir að því að veikja íslenskan landbúnað. Frumvarp atvinnuvegaráðherra um breytingar á búvörulögum grefur undan byggðum landsins, matvælaframleiðslu og lífsviðurværi bænda.

Miðstjórn Framsóknar vill auka sjálfbæra orkuframleiðslu, tryggja orkuöryggi og jöfn tækifæri til verðmætasköpunar um allt land. Þá leggur miðstjórn áherslu á náttúruvernd og að eignarhald auðlinda séu í íslenskum höndum.

Framsókn er flokkur sem vinnur að hagsmunum allra íbúa, hvort sem þeir búa á höfuðborgarsvæðinu eða landsbyggðunum. Framsókn berst fyrir hag Íslands, bæði innanlands og utan og hafnar öfgum hvort sem er til vinstri eða hægri.

Framsókn er leiðandi afl í sveitarfélögum landsins og mun mæta af krafti inn í komandi sveitarstjórnarkosningar. Sterk Framsókn skiptir sköpum fyrir framtíð landsins.

Samþykkt á haustfundi miðstjórnar haldinn í Reykjavík laugardaginn 18. október 2025.