Category: Fréttir

Grænbók um byggðamál, sem ætlað er að meta stöðu byggðamála og vera grundvöllur fyrir nýja stefnumótun í byggðamálum til fimmtán ára, hefur verið birt í samráðsgátt stjórnvalda. Allir hafa tækifæri til að senda inn umsögn eða ábendingar um grænbókina en frestur til að skila umsögn er til og með 25. janúar 2021.

Um er að ræða fyrstu grænbók, sem tekin hefur verið saman um byggðamál í takt við stefnumótunarferli Stjórnarráðsins og samræmingu áætlana á sviði samgöngu-, fjarskipta-, sveitarstjórnar- og byggðamála. Í grænbókinni er leitast við að svara því hvernig núgildandi byggðaáætlun hafi reynst og hverjar séu helstu áskoranir næstu fimmtán ára. Þá eru sett fram lykilviðfangsefni og áherslur og lagðar til leiðir til að fylgja þeim eftir. 

Grænbókin er umræðuskjal og er almenningi og haghöfum boðið að leggja fram sín sjónarmið sem nýst gætu í stefnumótuninni. Að loknu samráði eru niðurstöður dregnar saman (hvítbók) og mótuð stefna til 15 ára og aðgerðaáætlun til fimm ára.

Grænbók byggir á samráði

Grænbókin byggir á miklu samráði við endurskoðun núgildandi byggðaáætlunar. Samráðið hófst með fundi með ýmsum haghöfum þann 11. júní sl. og sama dag var opnuð samráðsgátt á vef Byggðastofnunar. Í haust voru haldnir samráðsfundir með fulltrúum allra landshlutasamtaka sveitarfélaga, Sambands íslenskra sveitarfélaga, alþingismönnum og stýrihópi Stjórnarráðsins um byggðamál, alls 11 fundir. Tilgangur fundanna var fyrst og fremst að leita eftir skoðunum og sjónarmiðum á gildandi byggðaáætlun og áskorunum komandi ára. Fundirnir voru vel sóttir, umræður virkar og nýttust vel við gerð grænbókar.

Á samráðsfundum kom fram almenn ánægja með form og inntak gildandi byggðaáætlunar. Lykilviðfangsefni og áherslur, sem settar eru fram í grænbókinni, byggja að miklu leyti á samráðinu. Sem dæmi má nefna að gæta þurfi að samspili þéttbýlis og dreifbýlis til uppbyggingar sjálfbærra byggðarlaga, vinna með fjölbreytileikann og lýðfræðilega þætti á borð við kyn og aldur og loks nýta tækifæri sem felast í mannauðnum í hverju byggðarlagi, sérstaklega þeim sem fólgin eru í fjölmenningarlegu samfélagi.

Samhliða endurskoðun byggðaáætlunar verður unnið tilraunaverkefni þar sem kynja- og jafnréttissjónarmið verða skoðuð sérstaklega. Sú vinna fer fram undir leiðsögn forsætisráðuneytisins, en stefnt er að því að innan skamms tíma verði það meginregla að samhæfa kynja- og jafnréttissjónarmið allri opinberri áætlanagerð. Byggðaáætlun mun þannig ríða á vaðið.

Í júní 2018 samþykkti Alþingi einróma stefnumótandi byggðaáætlun fyrir árin 2018-2024. Skömmu síðar voru gerðar breytingar á ýmsum lögum til samræmingar á áætlunum á sviði samgöngu-, fjarskipta-, sveitarstjórnar- og byggðamála sem fólu meðal annars í sér að ráðherra skyldi á að minnsta kosti þriggja ára fresti leggja fyrir Alþingi tillögu til þingsályktunar um stefnumótandi byggðaáætlun til fimmtán ára í senn. Þar skyldi jafnframt mörkuð aðgerðaáætlun til næstu fimm ára. Vorið 2021 verða þrjú ár liðin frá samþykkt byggðaáætlunar og því er hafin vinna við gerð nýrrar tillögu til þingsályktunar.

• Skoða grænbók í samráðsgátt stjórnvalda
• Nánar um byggðamál á vef ráðuneytisins

Skólafólk og nemendur í Fellahverfi í Breiðholti munu vinna saman að því að efla íslenskukunnáttu og styrkja sjálfsmynd barna í Fellahverfi. Um er að ræða samstarfsverkefni til þriggja ára sem miðar að því að efla málþroska og læsi og breyta starfsháttum í leik- og grunnskólum og frístundaheimili hverfisins. Verkefnið er nú þegar komið á fullt skrið en að verkefninu koma félagsmálaráðuneyti, mennta- og menningarmálaráðuneyti, Menntavísindasvið Háskóla Íslands, Þjónustumiðstöð Breiðholts og skrifstofa skóla- og frístundasviðs Reykjavíkur.

Ásmundur Einar Daðason, félags- og barnamálaráðherra, Lilja Alfreðsdóttir, mennta- og menningarmálaráðherra og Dagur B. Eggertsson borgarstjóri heimsóttu Fellaskóla í gær og kynntu sér áherslur verkefnisins og hittu aðstandendur þess.

Lilja Alfreðsdóttir mennta- og menningarmálaráðherra:
„Menntun stuðlar að jöfnuði og er eitt mikilvægasta hreyfiaflið til framfara og betra lífs. Að stuðla að jöfnum tækifærum til menntunar er viðvarandi verkefni, og eitt af leiðarljósum nýrrar menntastefnu. Það öfluga fagfólk sem hefur hrundið verkefninu í Fellahverfi af stað þekkir mátt samvinnu og gagnreyndra aðferða og starfar að skýrum markmiðum. Ég hlakka til að fylgjast með þessu verkefni dafna og bind vonir við að margir munu njóta góðs af því.“

Ásmundur Einar Daðason félags- og barnamálaráðherra:
„Menntun er lykill til betri framtíðar og við viljum að öll börn hafi jöfn tækifæri til þess að mennta sig. Eftir því sem bakgrunnur barna í leik- og grunnskólum verður fjölbreyttari er mikilvægt að við leggjum áherslu á það að öllum nemendum líði vel í skólanum og skilji það sem þar fer fram. Þetta verkefni er gríðarlega spennandi og það verður gaman að fylgjast með framvindu þess.“

Dagur B. Eggertsson borgarstjóri:
„Þetta er jákvætt og gott verkefni sem við fórum af stað í með ráðuneytunum til þess að efla enn frekar íslenska málvitund og málþroska hjá krökkunum í Fellaskóla. Við höfum verið með sérstakan fókus á skólann á undanförnum árum og fjöldi góðra verkefna þar í gangi sem lýtur að málþroska, læsi og eflingu móðurmáls og íslenskrar málvitundar. Það er því fagnaðarefni að fá ráðuneytin að borðinu ásamt Menntavísindasviði Háskóla Íslands.“

Starfsfólk leikskólanna Aspar og Holts, Fellaskóla og frístundaheimilisins Vinafells vinna saman að því að bæta námsárangur og líðan nemenda en markmið verkefnisins eru meðal annars:

• Auka hæfni leik- og grunnskólanemenda í íslensku.
• Efla læsi, sérstaklega málörvun, málþroska, orðaforða og lesskilning nemenda með annað móðurmál en íslensku.
• Efla snemmbæran stuðning, samstarf og samfellu milli leik- og grunnskóla og frístundaheimila.
• Stuðla að bættri líðan nemenda og virkni í námi.
• Efla þekkingu starfsfólks leik- og grunnskóla og frístundaheimila um land allt á þessu sviði.

Til þessa fær starfsfólkið fjölbreyttan stuðning og liðsinni, m.a. frá Menntavísindasviði H.Í. með faglegri ráðgjöf lestrarfræðings og aðkomu að mati á verkefninu.

Verkefninu er ætlað að stuðla að jöfnum tækfærum barna Fellahverfis og annarra barna á Íslandi til menntunar en gert er ráð fyrir að á síðasta ári verkefnis verði haldin starfsþróunarnámskeið fyrir kennara og starfsfólk leik- og grunnskóla og frístundaheimila um land allt, sem byggja á niðurstöðum og reynslu af verkefninu.

Heimild: stjornarradid.is

Sigurður Ingi Jóhannsson, formaður Framsóknar og samgöngu- og sveitarstjórnarráðherra, var í viðtali í Bítinu á Bylgjunni í morgun.

Öfgar hægri og vinstri eru að valda árásum á lýðræðið, að þá er auðvitað betra að vera miðjumaður. Miðjumaður lýsir því yfir að hann sé gegn öfgum.

Það er auðvitað þannig að við eigum mjög auðvelt með að hoppa í skotgrafir – það eru auðvitað hlutverk fjölmiðla að draga fram þá sem æpa hæst, og þannig fá þeir oft meiri hljómgrunn heldur en hin venjulega, skynsama rödd sem að ég held að flestir aðhyllist, líka í Bandaríkjunum.

Ég var að lesa bókina „Konan sem elskaði fossinn“ um Sigríði í Bratthotli í gær. Hún beitti nú ekki miklu ofbeldi, hún tók einhverja girðingarstaura, því hún var á móti gaddavír. Það var að ég held eina ofbeldið sem hún stundaði. Annars notaðir hún rök og sannfæringar máttinn.

Samgöngumálin

„Við erum svo sannarlega að nota tímann til að bæta samgöngumál. Eftir þetta kjörtímabil erum við með gríðarleg  sterk plön um uppbyggingu vegna, hafna, flugvalla, fjarskipta, flugstefnu, sú fyrsta er hefur verið samin á Íslandi, fystu almenningssamgöngustefnu sem samin hefur verið á Íslandi og við verum að vinna eftir þessu öllu saman. Við erum að tala um umfang aðgerða í samgöngum upp á einhverja 900 milljarða. Ég held einmitt að við séum komin á réttan stað hvað það varðar, við erum að nota vel tímann þar sem er minni umferð á vegunum. Held við séum að byggja undir framtíðina og hafnirnar og flugvellina.

Hafnir

Við erum að tala um umtalsverðar framkvæmdir við hafnir, við getum verið að tala um nokkrar hafnir sem eru að stækka sem nauðsynlegar fiski- og flutningshafnir, eins og við höfum séð á Dalvík og mun gerast á Sauðárkróki. Við höfum verið að sjá fiskeldishafnir bæði á Djúpavogi og Bíldudal og víðar, við höfum sé Ísafjörð vaxa, við höfum séð byltingu í Þorlákshöfn og þar erum við að setja inn verulega fjármuni á næstu árum til að byggja upp þá viðbótar gátt inn í landið. Þar eru fyrst og fremst fragtflutningar en mér skilst að hugmyndir séu um að sigla með ferju til Skotlands á næstu árum þegar höfnin er undir það búin.

Þarf þá ekki að laga veginn á milli Þorlákshafnar og Reykjavíkur?

Jú, í framhaldinu þá kallar það alltaf á eitthvað nýtt. Við erum með eitthvað plan, en svo sjáum við fiskeldið og þungaflutningana á Vestfjörðum, suðurfjörðunum og á Austurlandi, sem mun vaxa alveg gríðarlega á næstu árum. Þess vegna verðum við að hafa plön fyrir það. En eins er ætlunin að flytja eitthvað af laxinum beint, ferskt, hugsanlega frá Egilsstaðaflugvelli. Þá þarf auðvitað að stækka hann enn frekar. 

Við munum þurfa að koma hlutunum betur í gegn frá Vestfjörðunum. Vegirnir hafa ekki verið byggðir upp fyrir jafn mikla þungaflutninga.

Verkefnum er ekki lokið. Við sjáum t.d. allan Suðurlandsveginn, þar sem hvort tveggja flutningarnir að austan, frá Hornafirði og frá fjörðunum, Austfjörðunum, og núna fiskeldið, sem keyra vegina auðvitað mjög mikið. En þar fyrir utan allar rúturnar og einkabílarnir sem þarna voru og bílaleigubílarnir.

Verður meira um stóru þungaflutningana á vegum landsins í náinni framtíð?

Ég sé að það er óhjákvæmilegt, nema að okkur takist áfram að gera þetta samtvinnað, þ.e.a.s. að byggja upp hafnirnar þannig að það geti orðið fleiri útflutningshafnir á fleiri stöðum og hugsanlega flug. Við sjáum ekki fyrir okkur að sjófrakt á milli staða, nema að einhverju leiti að fraktflutningaskip geti farið á milli tveggja, þriggja staða og geti tekið með sér vörur á milli hafna.

Vegirnir eru ekki að þola þessa þungaflutninga og því viðvarandi verkefni að bæta vegina. Vegagerðin er með einhverja 13.000 km. og eitt af því sem við þurfum að gera, er að malbika fleiri kílómetra og þá minna slitlag á vegakerfinu. Við erum að hækka standardinn hjá okkur, við   erum að koma grunnkerfinu í þokkalegt ástand. Þar er eitt að fækka einbreiðum brúm, erum að gera verulegt átak á hringveginum, þeim fækkar mjög stóru einbreiðu brúnum á Suðurlandi á næsta ári. Á stóru brúnum erum við komin með plan alveg til næstu 15 ára. Hvort sem er yfir Jökulsá á Fjöllum eða yfir Lagarfljótið og víðar. Okkur hefur gengið alveg prýðilega á þessu kjörtímabili en við þurfum að halda áfram.

Sundabraut

Við erum núna með starfshóp að störfum sem að vinnur með Faxaflóahöfnum og sveitarfélögunum á höfuðborgarsvæðinu og Reykjavíkurborg og á að skila af sér núna í þessum mánuði. Þá erum við komin væntanleg á þann stað að búið sé að ákveða eina leið, einn valkost, yfir Kleppsvíkina. Sem gerir það að verkum að næsta skref er þá að ljúka við skipulag, sem þarf þá að uppfæra, deiliskipulag inni á aðalskipulagi, það þarf að uppfæra tengingarnar og síðan að setja verkefnið í umhverfismat. Þá í framhaldinu að koma verkinu af stað.

Sveitarstjórnarmál – staða sveitarfélaga

Horfur um fjárhagsstöðu sveitarfélaga þessa árs eru auðvitað mjög erfið. Og mörg sveitarfélög taka þá skynsamlegu ákvörðun um að viðhalda allri grunnþjónustu og jafnvel að bæta í fjárfestingar og að taka lán fyrir þessu ári. Það eru nokkur sveitarfélög sem standa mjög illa. Og við höfum verið að gera ýmislegt á síðasta ári og þess vegna hafa sveitarfélögin komist í gegnum 2020 býsna bærilega. En gleymum því ekki að auðvitað er ríkið að taka nokkur hundruð milljarða að láni til þess m.a. halda uppi alls konar störfum og starfsemi, sem m.a. nýtist sveitarfélögunum mjög vel.

Staða landbúnaðarmála – hvernig horfir þú til þeirra?

Staða landbúnaðarmála er erfið, mjög erfið. Það stafar af ýmsu og Covid-19 spilar þar auðvitað inn í. Það eru ekki 2 milljónir ferðamanna að borða íslenskan mat, það munar ansi mikið um það að úti í hinum stóra heimi er, eins og á Íslandi, að það er minni eftirspurn eftir okkar fiski og okkar matvælum. Síðan hefur ýmislegt þróast upp á verri veg. Þannig að það er eitthvað sem að við erum reyndar með augun á hjá ríkisstjórninni og við munum þurfa að gera ýmislegt á þessu kjörtímabili áður en við göngum til kosninga, en eitt af þeim verkefnum er þarf að laga. Það er ekki í lagi hvernig tollaumhverfi okkar er, sem dæmi, það er ekki í lagi hvernig íslenskar afurðastöðvar eru reknar litlar í samanburði og samkeppni við bæði alheiminn, mjög stórar afurðastöðvar og síðan innilokaðar hér á Íslandi. Þannig að það er ýmislegt sem þarf að lagfæra. Ég held að það sé eitt sem eigi að koma til skoðunar, s.s. aukið samstarf þar á milli og þar af leiðandi hagræðing sem gæti orðið þar. Annað sem ég hef nefnt, er að mér finnst fullkomlega eðlilegt að í þessari nýsköpun, er að ör sláturhús eða minni sláturhús, að þau eigi líka rétt á sér og eiga að finna sér stað. Það hef ég stutt og talað fyrir því og skrifað um það greinar.

Miðhálendisþjóðgarður

Við Framsóknarmenn segjum hugmyndina sem slíka sé ágæt, en við þurfum að spyrja okkur til hvers við erum að þessu. Er það gert til þess að nýta hálendið fyrir ferðamenn. Þau rök hafa stundum verið notuð, að það sé helsta söluvaran. Það er ekki vandamál á Suðurlandi að nýta hálendið í þágu ferðamennsku. Þurfum við að bæta landverndina og umsjónina, skipulagið. Ég held að það komi vel til greina, getum við gert það innan núverandi þjóðlenda með sveitarfélögunum, það er ekki spurning í mínum huga. Ég hef af magan hátt sagt Hálendisþjóðgarður þurfi lengri tíma. Við þurfum að sjá svæðisskipulag sveitarfélaganna, eins og er verið að vinna á Suðurlandi. Það þarf að ljúka við það fyrst. Ég held að vinna verði hugmyndinni betri farveg og svo er eitt sem er alveg klárt að Vatnajökulsþjóðgarður hefur á margan hátt gert mjög gott, en þar er enn mörgum hlutum þar en ólokið. Við eigum að einbeita okkur að því á næstu fimm árum og við munum ekki hafa neitt umfram fjármagn í einhver önnur verkefni á næstu fimm árum og því eigum við að gefa okkur tíma til að sinna því sem þegar er. Ég hef verið þeirrar skoðunar. Við getum einnig stækkað þjóðgarðinn, Vatnajökulsþjóðgarð og taka einhver skref í átt að Miðhálendisþjóðgarði. En ég held að við verðum að vanda okkur, við eigum að hafa fólkið í landinu með okkur. Við höfum sett eina sjö megin fyrirvara Þingflokkur Framsóknarmanna þegar við afgreiddum frumvarpið.

Mjög mörg sveitarfélög er liggja að hálendinu í dag, og eru þá að tala fyrir hönd sinna samfélaga, vilja bíða, vilja taka hægfara skref. Það er ekki lengur en fyrir 10-15 ár síðan sem þjóðlendumálið hófst og það byrjaði mjög illa. Það byrjaði á Suðurlandi, það byrjaði á því að ríkið kom og sagði, „Heyrðu við ætlum að halda því fram að við eigum þetta land. Ef þú getur ekki sýnt fram annað með löggiltum pappírum, þá tökum við það“. Þetta eru auðvitað ósvífni, svo var reyndar þessum rökstuðningi snúið við og ríkið varð að sýna fram á að það ætti landið sem það var að reyna að sölsa undir sig. En því verkefni er lokið og væri rétt að ljúka við það verkefni áður en að við tökum næsta slag. Þá væri orðið ljóst hvað skilji þarna á milli, hvaða þjóðlendur væru sannanlega eign þjóðarinnar, að hluta til er skipulagsvaldið hjá viðkomandi sveitarfélagi en þeir verða að gera það í samstarfi við forsætisráðuneytið. Er það ekki ágætt milli stig eins og staðan er núna. Síðan erum við að vinna út frá því hvort að skynsamlegt sé að búa til þjóðgarð. Ég segi aftur, er það gert til þess að draga að fleiri ferðamenn inn á hálendið, á sama tíma og við erum að tala um að vernda. Er búið að ganga nægjanlega frá þessum hlutum. Það er ekki vandamál að nýta hálendið, a.m.k. Suðurlands megin.

• Bítið – Allt á fullu í samgöngumálum fyrir væntanlega ferðamenn – Sigurður Ingi Jóhannsson, samgönguráðherra ræddi við okkur.

Spennandi tímar eru handan við hornið! Mikilvægt er að sem flestir taki þátt í kröftugu og skemmtilegu flokksstarfi Framsóknar. Svo að nýir félagar geti gengið fljótt og vel frá nýskráningu, þá er það hægðarleikur með rafrænum skilríkjum á slóðinni:

https://framsokn.is/ganga-i-flokkin/

Hvort sem þú ert í tölvu eða í farsíma er nóg að slá inn þessari slóð og þú skráir þig í Framsóknarflokkinn með rafrænum skilríkum.

Hlökkum til að taka þátt með þér í uppbyggilegu, spennandi og skemmtilegu flokksstarfi!

FRAMSÓKN

Kjörstjórn póstkosningar Framsóknarmanna í Norðvesturkjördæmi hefur ákveðið vegna strangra sóttvarnarreglna sem skapað hafa verulega erfiðleika við framkvæmd póstkosningarinnar að fresta kosningunni um 15 daga. Frestunin byggir á heimild í reglum um póstkosningu 40.gr.

Eftirfarandi breytingar verða á dagsetningum:

Framboðsfrestur til þátttöku í póstkosningunni rennur út þriðjudaginn 1. febrúar 2021, kl. 12:00 á hádegi.

Kjörskrá verður gerð samkvæmt félagatali 16. janúar 2021.
(Frestur til skráningar á félagatal er til miðnættis 16. janúar 2021.)

Framboðum skal skila til formanns kjörstjórnar, Valgarðs Hilmarssonar, á netfangið vallih@centrum.is.  Formaður veitir einnig frekari upplýsingar.

Atkvæðisseðlar verða sendir út 16. febrúar og er frestur til að skila þeim inn til og með 13. mars 2021. Kosið verður um 5 efstu sæti listans.  Sjá nánar inn á framsokn.is.

Ráðist verður í aðgerðir til þess að styðja við starf íþrótta- og æskulýðsfélaga sem raskast hefur verulega vegna afleiðinga sóttvarnaráðstafana COVID-19. Þátttaka barna og ungmenna í skipulögðu íþrótta- og æskulýðsstarfi hefur fjölþætt gildi og er mikilvægt að íþrótta- og æskulýðsfélög geti hafið óbreytta starfsemi sem fyrst þegar faraldrinum lýkur. Þá hefur faraldurinn einnig haft mikil áhrif á starf eldri flokka og afreksstarf í íþróttum. Stuðningur stjórnvalda á þessu sviði verður einn sá mesti á Norðurlöndunum.

Lilja D. Alfreðsdóttir, mennta- og menningarmálaráðherra:
„Virkni og vellíðan fara saman; um allt land er blómlegt íþrótta- og æskulýðsstarf mikilvægur þáttur í hverju samfélagi. Um það starf viljum við standa vörð og tryggja að iðkendur á öllum aldri geti sem best sinnt sínum áhugamálum áfram.“

Ásmundur Einar Daðason, félags- og barnamálaráðherra:
„COVID-19 faraldurinn hefur haft mikil áhrif á íþrótta- og æskulýðsstarf í landinu og sóttvarnaraðgerðir hafa raskað starfsemi íþróttafélaga. Íþrótta- og æskulýðsstarf hefur jákvæð og þroskandi áhrif á börn og ungmenni og því er mjög mikilvægt að við stöndum vörð um það góða starf. Með þessum umfangsmiklu aðgerðum tryggjum við að íþrótta- og æskulýðsstarf geti haldið áfram með þeim hætti sem við þekkjum þegar faraldrinum líkur. Þetta er skynsöm fjárfesting sem skilar sér margfalt til baka fyrir samfélagið allt.“

Lárus L. Blöndal, forseti ÍSÍ:
„Aðgerðir stjórnvalda til stuðnings íþrótta- og æskulýðsstarfinu í landinu eru gríðarlega mikilvægar og stuðla að því að íþróttahreyfingin geti haldið úti sínu faglega starfi og sett aukinn kraft í starfsemina þegar öllum takmörkunum verður aflétt. Með þessu er líka búið að koma upp öryggisneti þannig að ef framhald verður á takmörkunum vegna farsóttarinnar þá er tryggt að íþróttahreyfingin getur staðið skil á launum og verktakagreiðslum, sem er undirstaða starfseminnar.”

Haukur Valtýsson, formaður UMFÍ:
„Það er svo mikilvægt að standa vörð um skipulagt íþrótta- og æskulýðsstarf með öllum ráðum, í því er fólginn lykillinn að lýðheilsu þjóðarinnar. Það hefur því verið aðdáunarvert að sjá breiðu samstöðuna fyrir aðgerðum stjórnvalda. Það sýnir að samstarf skilar mestum árangri, það er samfélaginu til góða.“

Aðgerðirnar eru eftirfarandi:

Greiðslur vegna launakostnaðar íþróttafélaga

Til að tryggja að sem minnst röskun verði á íþróttastarfi til lengri tíma litið og félög geti viðhaldið ráðningasambandi við starfsfólk sitt verður veittur styrkur sem nemur launakostnaði þess, að tilteknum skilyrðum uppfylltum, hafi hlutaðeigandi íþróttafélagi verið gert að fella tímabundið niður starfsemi vegna opinberra sóttvarnaráðstafana á tímabilinu frá 1. október 2020 til og með 30. júní 2021.

Vinnumálastofnun mun annast framkvæmd þessa og er ráðgert að opnað verði fyrir umsóknir í janúar næstkomandi og verður úrræðið kynnt nánar á fundi Vinnumálastofnunar með íþróttahreyfingunni milli jóla- og nýárs. Ráðgert er að heildargreiðslur vegna þessarar aðgerðar nemi um einum milljarði kr.

Viðbótarframlag til stuðnings íþróttafélögum

Veitt verður stuðningsframlag til íþróttafélaga, að uppfylltum ákveðnum skilyrðum, og verður sami háttur hafður á og við úthlutun styrkja til félaganna í vor. Framlag sem nemur 300 milljónum kr. verður skipt milli íþróttafélaga sem starfrækja skipulagt íþróttastarf fyrir börn og unglinga 6-18 ára. Tillit verður tekið til fjölgreinafélaga og getur úthlutun til einstaks íþróttafélags getur ekki orðið hærri en 3% af veltu félagsins samkvæmt staðfestum reikningsskilum 2019. Íþrótta- og Ólympíusamband Íslands gerir tillögu til ráðherra um úthlutunina. Stuðningur þessi kemur til viðbótar 450 milljónum kr. sem úthlutað var til rúmlega 200 íþrótta- og ungmennafélaga í sumar sem lið í fjárfestingarátaki stjórnvalda.

Styrkir til æskulýðsfélaga

Félagasamtök sem standa fyrir skipulögðu starfi fyrir börn og ungmenni munu geta sótt um styrki vegna tekjutaps félaga vegna afleiðinga COVID-19. Til úthlutunar verða alls 50 milljónir kr. og verður styrkurinn auglýstur á vef mennta- og menningarmálaráðuneytisins í janúar. Umsóknum um styrki skal vera hægt að sýna fram á veruleg neikvæð áhrif á afkomu félagsins. Stuðningur þessi kemur til viðbótar 50 milljón kr. stuðningi sem auglýstur var til félaganna í júní síðastliðinn.

Heimild: stjr.is

„Ég bið Alþingi Íslendinga að standa með íslenskum landbúnaði og huga að matvælaöryggi, ekki bara til skamms tíma heldur til lengri tíma!“

Lilja Dögg Alfreðsdóttir, varaformaður Framsóknar, talaði skýrt í ræðu á Alþingi rétt í þessu, í atkvæðagreiðslu um búvörulög. Þar hvatti hún þingheim til að standa með íslenskum landbúnaði á algjörum tímamótum. Sagði hún að tryggja yrði matvælaöryggi, allar þjóðir heims einblíni á það, ekki aðeins hér á Íslandi, heldur alls staðar.

„Allir eru að hugsa um hvernig megi koma í veg fyrir að það eigi sér stað mengun milli dýra og samskipta við mannfólkið. Eitt af því sem við höfum gert gríðarlega vel hér á Íslandi er að huga að þessu,“ sagði Lilja Dögg.

Líneik Anna Sævarsdóttir, alþingismaður, er fyrsti flutningsmaður tillögu til þingsályktunar um ríkisábyrgð á viðspyrnulán til atvinnuþróunar. „Vaxandi atvinnuleysi, samdráttur í landsframleiðslu, versnandi hagvaxtarhorfur og samdráttur í atvinnuvegafjárfestingu kalla á viðbrögð stjórnvalda. Við þessar aðstæður er sérstaklega mikilvægt að aðstoða og hvetja fyrirtæki til framþróunar og arðbærra fjárfestinga í takt við samfélagsbreytingar á meðan heimsfaraldurinn gengur yfir og til að mæta breytingum sem óhjákvæmilega munu fylgja í kjölfar hans. Samfélagið þarf á virkri atvinnuþróun, fjölgun starfa og auknum gjaldeyristekjum að halda. Aðstæður kalla á að stjórnvöld fari í aðgerðir sem styrkja atvinnulífið í bráð og lengd. Auk hvata og stuðnings við nýsköpun þarf aðgerðir til að halda atvinnulífinu gangandi, koma í veg fyrir stöðnun og skapa nýjar tekjur og störf hratt,“ segir í greinargerð tillögunar.

Tillögugreinin hljóðar svo:

„Alþingi ályktar að fela ferðamála-, iðnaðar- og nýsköpunarráðherra að hafa forgöngu um að hrinda í framkvæmd tímabundinni aðgerð sem hvetji til fjárfestinga í atvinnuþróun og greiði fyrir aðgengi atvinnuþróunarverkefna að lánsfjármagni á tímum efnahagslegs samdráttar af völdum heimsfaraldurs kórónuveiru. Aðgerðin felist í ríkisábyrgð á lán sem lánastofnanir veiti lögaðilum til atvinnu- og gjaldeyrisskapandi atvinnuþróunarverkefna.
Útfærsla verkefnisins, þ.m.t. tillögur að nauðsynlegum lagabreytingum, liggi fyrir eigi síðar en 1. febrúar 2021. Miðað verði við að aðgerðin komi til framkvæmdar fyrir 1. mars 2021.“

Meðflutningsmenn með þingsályktuninni eru Halla Signý Kristjánsdóttir, Silja Dögg Gunnarsdóttir, Willum Þór Þórsson og Þórunn Egilsdóttir.

Markmið tillögunnar er að tryggja að atvinnu- og gjaldeyrisskapandi verkefni hafi aðgengi að lánsfé og styðja þannig við viðspyrnu framsækinna fyrirtækja. Í þessu skyni verði komið á fót kerfi þar sem ríkið ábyrgist að hluta lán til slíkra verkefna. Ábyrgðunum er ætlað að draga úr óvissu og áhættu þess fjármagns sem fer í arðbæra fjárfestingu á tímum samdráttar af völdum heimsfaraldurs kórónuveiru.

Vaxandi atvinnuleysi, samdráttur í landsframleiðslu, versnandi hagvaxtarhorfur og samdráttur í atvinnuvegafjárfestingu kalla á viðbrögð stjórnvalda. Flutningsmenn hafa skoðað ýmsar leiðir til opinbers stuðnings við atvinnuþróun, svo sem styrki, skattaívilnanir og ríkisábyrgðir. Ákveðið var að leggja til ríkisábyrgðir á lán sem lánastofnanir veiti lögaðilum til lítilla og meðalstórra atvinnu- og gjaldeyrisskapandi verkefna. Forsenda tillögunnar er að hún leiðir ekki til útgjalda úr ríkissjóði um leið og aðgerðin hefst. Ef vel tekst til skila verkefni sem heppnast tekjum í ríkissjóð umfram útgjöld vegna verkefna sem ekki lifa út lánstímann, jafnvel verulegum tekjum umfram ætluð útgjöld. Aðgerðin krefst því ekki útgjalda úr ríkissjóði, nema ef fleiri ábyrgðir falla á ríkissjóð en áætlanir gera ráð fyrir. Eigi aðgerðin að ná markmiðum sínum þurfa ríkisábyrgðir til hennar að nema að lágmarki 10–15 milljörðum kr.

Atvinnuleysi fer vaxandi og spár gera ráð fyrir að atvinnuleysi verði allt að 8% í árslok 2020 og allt að 10% um mitt ár 2021.

Endurskoðuð tekjuáætlun ríkissjóðs fyrir árið 2020 gerir ráð fyrir 140 milljarða kr. lækkun frá samþykktum fjárlögum og samkvæmt fjárlagafrumvarpi ársins 2021 er gert ráð fyrir að heildartekjur ríkissjóðs sem hlutfall af landsframleiðslu lækki um 2,7 prósentustig samanborið við árið 2019.

Samdráttur landsframleiðslunnar var um 5,7% á fyrri helmingi ársins 2020 og ef nýjustu spár Seðlabankans ganga eftir nær landsframleiðslan ekki því stigi sem hún var árið 2019 fyrr en á árinu 2023. Útlit er fyrir að 8,5% samdráttur verði á árinu öllu. Horfur fyrir næsta ár hafa að sama skapi versnað enda ekki enn ljóst hvenær tök nást á farsóttinni.
Á öðrum ársfjórðungi varð 38,8% samdráttur í vöru- og þjónustuútflutningi milli ára sem er mesti samdráttur sem mælst hefur á einum ársfjórðungi frá upphafi mælinga. Horfur um þróun vöruútflutnings seinni hluta ársins og næsta ár hafa einnig versnað eftir því sem líður á faraldurinn.

Þá liggur fyrir að atvinnuvegafjárfestingar, þ.e. fjárfestingar í einkaaðilum í atvinnurekstri, höfðu dregist saman um 4,7% milli ára á fyrri helmingi 2020. Samdráttur almennrar atvinnuvegafjárfestingar á fyrri hluta ársins (fjárfestingar utan stóriðju, skipa og flugvéla) var enn meiri eða tæplega 18% milli ára og stóriðjufjárfesting dróst saman um 30%. Hlutfall atvinnuvegafjárfestingar af landsframleiðslu hefur því lækkað hratt undanfarið og er nú komið niður fyrir meðaltal undanfarins aldarfjórðungs.
Útlit er fyrir að þessi samdráttur haldi áfram og gangi nýjasta spá Seðlabankans eftir verður atvinnuvegafjárfesting tæplega fimmtungi minni í ár en í fyrra. Þá benda kannanir til að fjárfesting atvinnuveganna standi nánast í stað á næsta ári.

Við þessar aðstæður er sérstaklega mikilvægt að aðstoða og hvetja fyrirtæki til framþróunar og arðbærra fjárfestinga í takt við samfélagsbreytingar á meðan heimsfaraldurinn gengur yfir og til að mæta breytingum sem óhjákvæmilega munu fylgja í kjölfar hans. Samfélagið þarf á virkri atvinnuþróun, fjölgun starfa og auknum gjaldeyristekjum að halda.

Aðstæður kalla á að stjórnvöld fari í aðgerðir sem styrkja atvinnulífið í bráð og lengd. Auk hvata og stuðnings við nýsköpun þarf aðgerðir til að halda atvinnulífinu gangandi, koma í veg fyrir stöðnun og skapa nýjar tekjur og störf hratt.

Ríkisstjórnin hefur nú þegar bætt verulega í fjárveitingar til nýsköpunar og unnið er að endurskipulagningu nýsköpunarumhverfisins í ljósi aðstæðna og í samræmi við stjórnarsáttmála. Nýsköpun og hvers konar hagnýting hugvits er mikilvæg forsenda fjölbreytts atvinnulífs, sterkrar samkeppnisstöðu, hagvaxtar og velferðar þjóða, ekki síst í ljósi þeirra þjóðfélagsbreytinga sem vænta má í atvinnu- og menntamálum vegna örra tæknibreytinga. Ný vísinda- og tæknistefna og yfirlýsing um 50% aukningu fjárveitinga til nýsköpunar næsta ár er mikið fagnaðarefni og grunnur framtíðartekna. Það sama má segja um Kríu – sprota- og nýsköpunarsjóð, sbr. lög nr. 65/2020, og tímabundin mótframlagslán til sprota- og nýsköpunarfyrirtækja frá Nýsköpunarsjóði atvinnulífsins, sbr. lög nr. 83/2020. Samspil sértækra aðgerða til að efla nýsköpun og almennra aðgerða, á borð við frestun gjalddaga opinberra gjalda, stuðningslán með ríkisábyrgð og nú síðast tekjufallsstyrki, er nauðsynlegt til að viðhalda fyrirtækjum og verkefnum sem eiga framtíð fyrir sér og munu skapa þjóðarbúinu tekjur og störf um ókomin ár. Þrátt fyrir framangreindar aðgerðir er þörf á almennari hvötum til tekju- og atvinnusköpunar sem komast hratt til framkvæmda.

Síðasta áratuginn hefur hagvöxtur verið borinn uppi af nýjum störfum og atvinnuþróun á breiðum grunni, svo sem í iðnaði, sjávarútvegi og afleiddum tæknigeira, fiskeldi, kvikmyndagerð og síðast en ekki síst ferðaþjónustu. Fyrir áratug voru flestir sem borið hafa þessa þróun uppi í öðrum störfum. Um allt land er því fólk sem hefur gripið tækifærin sem gefist hafa síðasta áratug. Margt af þessu fólki er nú tilbúið til nýrra verka.

Tillögunni er ætlað að greiða fyrir því að þessi mannauður, fyrirtækin og fjármagnið sem til eru í landinu geti skapað tekjur til að mæta kostnaði einstaklinga og samfélags af heimsfaraldrinum. Viðfangsefni tillögunnar er að skapa hvata og draga úr tregðu til fjárfestinga í gjaldeyrisskapandi atvinnuþróun hvort sem er í tækni, framleiðslu, þjónustu eða undirbúningi verkefna í ferðaþjónustu þar sem stuðst er við þekkta tækni eða nýsköpun. Tillögunni er ætlað að bregðast við vísbendingum um að niðursveiflan í hagkerfinu magnist vegna þess að fyrirtæki hafi ekki aðgang að lánsfjármagni fyrir góð og arðbær verkefni. Með aðgerð af þessu tagi senda stjórnvöld skýr skilaboð um að framtíðin á Íslandi sé björt og stíga nauðsynlegt skref til að örva atvinnulífið, draga úr atvinnuleysi og glæða hagkerfið.

Hvatinn sem felst í ríkisábyrgðum ætti að geta nýst fyrirtækjum af öllum stærðum og gerðum þó að verkefnin sem ráðist verður í verði flest lítil eða meðalstór. Þetta eru verkefni sem lánveitendur teldu vænlegan fjárfestingarkost í hefðbundnu árferði en gjalda nú fyrir óvissuna. Íslenskt samfélag hefur ekki efni á að bíða eftir að faraldurinn líði undir lok heldur þarf framþróun og nýting tækifæra að halda áfram. Aðgerðinni er ekki ætlað að raska samkeppni og þróun sem er á innlendum markaði heldur styðja við þróun og uppbyggingu í sem flestum greinum sem geta skapað verðmæti og gjaldeyristekjur fyrir samfélagið. Má þar nefna iðnað, skapandi greinar, þróun umhverfislausna, landbúnað, fiskeldi, kvikmyndagerð, sjávarútveg og afleiddan tæknigeira, heilbrigðisþjónustu og lyfjaiðnað, auðlindanýtingu o.fl.

Umfang aðgerðar

Hlutfall ríkisábyrgðar, hámarksupphæð láns, heildarupphæð ábyrgða og tímalengd.

Mikilvægt er að hvatningin sem felst í aðgerðinni nái til margra lögaðila en lánin geti þó orðið nógu há til að hafa raunveruleg áhrif á atvinnuþróun. Því er nauðsynlegt að ákvarða hámark á fjárhæð hvers láns og á fjölda lána til sama eða tengdra aðila. Í því ljósi gæti talist eðlilegt að fjárhæð ábyrgðar yrði að hámarki 200 millj. kr. og að hver lögaðili gæti aðeins hlotið viðspyrnulán með ríkisábyrgð vegna eins atvinnuþróunarverkefnis.

Útfærslan verður að stuðla að því að lán með ríkisábyrgð dreifist til sem fjölbreyttastra verkefna í samfélaginu. Ríkisábyrgð er að jafnaði ekki veitt á fulla lánsupphæð og samkvæmt viðmiðum OECD gæti verið ráðlegt að veita ábyrgð fyrir allt að 70% lánsfjárhæðar samkvæmt nánari útfærslu.

Til að aðgerðin hafi marktæk áhrif við að örva útlán til atvinnusköpunar telja flutningsmenn að heildarupphæð lána sem njóta ríkisábyrgðar þurfi að lágmarki að nema 10–15 milljörðum kr. Þá telja flutningsmenn að marka þurfi ríkisábyrgð á láni ríflegan gildistíma til að aðgerðin skili tilsettum árangri. Skynsamlegt sé að miða við að ríkisábyrgðar njóti við allan lánstíma lána sem veitt eru til átta ára eða skemmri tíma en falli ella niður að átta árum liðnum frá lánveitingu.

Mat á áhrifum á ríkissjóð

Áhrif aðgerðarinnar á ríkissjóð ráðast af ýmsum þáttum, svo sem eftirspurn eftir lánunum og framgangi þeirra atvinnuþróunarverkefna sem lánin eru veitt til. Vænta má að áhrif á ríkissjóð verði jákvæð bæði í formi sjóðstreymis og endanlegrar afkomu.

Í greinargerð með tillögu til þingsályktunar um fjármálaáætlun fyrir árin 2021–2025 (bls. 33), sbr. 2. mál á yfirstandandi löggjafarþingi, kemur fram að svokallaður ríkisfjármálamargfaldari, sem lýsir sambandi ríkisfjármála og hagvaxtar, sé nú áætlaður um 0,3–0,4. Þetta þýðir að á hver króna í ríkisútgjöld af því tagi sem hér er lagt til skilar sér með 30–40% álagi inn í hagkerfið. Á þeim grunni mætti setja fram það markmið að full nýting lánanna skilaði á bilinu 470–630 störfum auk afleiddra starfa.

Flutningsmenn telja samkvæmt þessu að yfirgnæfandi líkur standi til þess að uppsöfnuð áhrif af aðgerðinni á afkomu hins opinbera verði jákvæð þegar fram í sækir. Mikilvægt er að horfa til þess að kostnaður ríkissjóðs af ábyrgðum sem kunna að falla á hann muni vart koma til fyrr en eftir að önnur verkefni hafa skilað þangað tekjum.

Ríkisstyrkir og opinber úrræði vegna heimsfaraldurs

Opinberir styrkir til fyrirtækja í samkeppnisrekstri eru almennt óheimilir innan Evrópska efnahagssvæðisins, sbr. 1. mgr. 61. gr. EES-samningsins, nema þeir falli undir einhverja af þeim undanþágum sem tilgreindar eru í samningnum. Í b-lið 3. mgr. 61. gr. samningsins er kveðið á um heimild til ríkisstyrkja til að bregðast við alvarlegri röskun á efnahagslífi aðildarríkis. Sambærilegt ákvæði er í b-lið 3. mgr. 107. gr. sáttmálans um starfshætti Evrópusambandsins (TFEU).

Í ljósi þeirrar stöðu sem hagkerfi heimsins standa frammi fyrir hefur framkvæmdastjórn Evrópusambandsins heimilað ríkjum sambandsins að veita ríkisaðstoð til fyrirtækja í vanda í mun meira mæli en í venjulegu árferði. Hið sama á við um Eftirlitsstofnun EFTA og EES-ríkin. Aðgerðir sem íslensk stjórnvöld hafa gripið til vegna faraldursins til þessa hafa ýmist rúmast innan reglugerða Evrópusambandsins um minni háttar aðstoð (e. de minimis aid) eða hlotið sérstaka undanþágu á grundvelli tímabundinnar heimildar vegna faraldursins.

Við útfærslu tillögunnar þarf m.a. að gæta að reglum um ríkisaðstoð og samspili úrræðisins við aðrar opinberar stuðningsaðgerðir í þeim tilvikum sem þær hafa þegar komið í hlut lántaka viðspyrnulána með ríkisábyrgð til atvinnuþróunar.

Framkvæmd

Aðgerðin beinist að lögaðilum sem sækja um lán vegna atvinnuþróunarverkefna og fjármálastofnunum sem veita lán til atvinnuþróunar.

Afmörkun atvinnuþróunarverkefna

Mikilvægt er að atvinnuþróunarverkefni verði skýrt afmarkað verkefni til þróunar á vöru, þjónustu eða framleiðsluaðferð. Vanda þarf mjög til mótunar skilyrða fyrir því að atvinnuþróunarverkefni falli undir aðgerðina þannig að lán sem veitt er til verkefnisins geti notið ríkisábyrgðar. Þá þarf að skilgreina leiðir fyrir lögaðila til að sýna fram á að verkefni uppfylli skilyrðin og ákveða hvort eða hvernig lagt verði faglegt mat á verkefnin áður en veitt er vilyrði fyrir ríkisábyrgð. Eins þarf að liggja skýrt fyrir hvaða upplýsingum stjórnvöld þurfa á að halda á meðan ríkisábyrgð er í gildi.

Eðlilegt er að byggja skilyrði faglegs mats á eftirfarandi atriðum sem eru grundvöllur þess að markmið tillögunnar náist:

1. Að verkefnið leiði af sér vöru eða þjónustu sem er gjaldeyrisskapandi.
2. Að verkefnið sé atvinnuskapandi á Íslandi.
3. Að verkefnið feli í sér nýnæmi, annaðhvort svæðisbundið eða á landsvísu.
4. Að útskýrt sé hvernig verkefnið geti staðið af sér hefðbundnar efnahagssveiflur.
5. Að viðskiptaáætlun sé vel skilgreind með tilliti til framangreindra atriða.

Eftirfarandi er nánari skýring á framangreindum atriðum:

1. Krafa um að verkefni leiði af sér vöru eða þjónustu sem er gjaldeyrisskapandi byggist á því að ein helsta áskorun íslensks samfélags er samdráttur í vöru- og þjónustuútflutningi. Setja þarf lágmarksviðmið um að hlutfall vöru eða þjónusta verði seld á erlenda markaði eða verði gjaldeyrisskapandi á annan hátt.
2. Krafa um að verkefni sé atvinnuskapandi hér á landi byggist á því að nauðsynlegt er að skapa sem flest störf á tímum atvinnuleysis. Eðlilegt væri að gera kröfu um að verkefni yrði viðhaldið á Íslandi meðan ábyrgðin væri í gildi og þar með að höfuðstöðvar viðkomandi lögaðila væru á Íslandi þar sem ríkisaðstoð er ætlað að ráða bót á alvarlegu áfalli í efnahagslífi hér á landi.
3. Krafan um að verkefnið feli í sér nýnæmi, annaðhvort svæðisbundið eða á landsvísu, byggist á því að mikilvægt er að fara nýjar leiðir við framleiðslu og þjónustu vegna samfélagsbreytinga. Slíkt nýnæmi getur byggst á endurnýtingu hugmynda og yfirfærslu á tækni sem nú þegar er til. Skilgreina þarf kröfuna um nýnæmi mun rýmra en vegna stuðnings nýsköpunarsjóða. Lágmarka þarf áhrif á innlenda samkeppnismarkaði.
4. Krafan um að verkefnið geti staðið af sér efnahagslegar sveiflur byggist á því að íslenskt efnahagslíf býr við sveiflur og styrkur atvinnulífsins felst í þolinu gagnvart þeim. Þannig yrðu fjármálastofnanir og lögaðilar sem sæktu um ábyrgðir fyrir lánum að gera grein fyrir því hvaða varnir verkefnið hefði fyrir efnahagssveiflum.
5. Gerð skal grein fyrir atvinnuþróunarverkefni í viðskiptaáætlun sem innihaldi greinargerð um verkefnið og sýni hvernig það uppfyllir sett skilyrði og hverjir möguleikar þess eru, ásamt rekstraráætlun og lýsingu á starfsemi fyrirtækis.

Faglegt mat verkefna

Rannsóknamiðstöð Íslands, Rannís, hefur mikla reynslu af faglegu mati á verkefnum í atvinnulífinu og því liggur beinast við að fela þeirri stofnun faglega umsýslu ef slíkt mat verður grundvöllur fyrir veitingu ríkisábyrgðar. Þannig yrði ríkisábyrgð á atvinnuþróunarlánum til lögaðila veitt til fjármálastofnana vegna atvinnuþróunarverkefna sem Rannís hefði staðfest að uppfylli skilyrði til að falla undir aðgerðina.

Eðlilegt væri að innheimta hóflegt umsýslugjald til að standa undir kostnaði við afgreiðslu og umsýslu ábyrgða. Líta mætti til 3. mgr. 17. gr. laga um fjárstuðning til minni rekstraraðila vegna heimsfaraldurs kórónuveiru, nr. 38/2020, í því samhengi en þar segir að umsýsluþóknun vegna stuðningsláns með ríkisábyrgð megi í hæst nema 2% af höfuðstóli láns.

Lánveitendur

Atvinnuþróunarlán yrði veitt lögaðila vegna staðfests atvinnuþróunarverkefnis í samræmi við skilyrðin sem verkefnið þarf að uppfylla. Lán yrði veitt af viðurkenndum lánveitanda, þar sem lögaðili leitar lánsfjármögnunar vegna atvinnuþróunarverkefnis. Viðurkenndir lánveitendur geta verið viðskiptabankar, sparisjóðir, lánafyrirtæki, verðbréfafyrirtæki eða rekstrarfélög verðbréfasjóða skv. 1. tölul. 1. mgr. 1. gr. laga um fjármálafyrirtæki, nr. 161/2002, en einnig er mikilvægt að lífeyrissjóðir og hugsanlega vísisjóðir eða aðrir sjóðir sem hafa það að markmiði að styðja atvinnuþróun geti tekið þátt í verkefninu.

Afgreiðsla, umsýsla og eftirfylgni

Eðlilegt er að ráðherra verði heimilt að semja við Seðlabanka Íslands um að annast umsýslu vegna ríkisábyrgða á lánum til atvinnuþróunar. Seðlabankinn semji aftur við lánveitendur lánanna um framkvæmd þeirra líkt og við á um stuðningslán með ríkisábyrgð, sbr. 20. gr. laga nr. 38/2020. Jafnframt mætti fela nefnd sem ráðherra hefur skipað samkvæmt ákvæði til bráðabirgða II í lögum um ríkisábyrgðir, nr. 121/1997, eftirlit með aðgerðinni, sbr. 21. gr. sömu laga.

Mikilvægt er að skýrt sé hvað fellur undir atvinnuþróun og atvinnuþróunarkostnað í skilningi aðgerðarinnar, þ.m.t. fjárfestingar í tækjum og búnaði. Jafnframt er mikilvægt að lögaðili geti á einfaldan hátt sýnt fram á að láninu sé varið í samræmi við þau skilyrði t.d. við skattskil og með aðgreiningu verkefnis frá öðrum verkefnum í bókhaldi og ársreikningi. Þar mætti leita fyrirmynda í reglum um skattafslætti vegna rannsókna- og þróunarkostnaðar. Þá þarf að skilgreina stjórnsýslu vegna umsýslu ábyrgða.

Samandregið gæti framkvæmdin orðið á þessa leið:

• Lögaðili óskar eftir láni frá fjármálastofnun vegna verkefnis sem hann telur að falli undir skilgreiningu á atvinnuþróunarverkefni. Lögaðili eða lánveitandi sækir um faglegt mat á verkefninu og ríkisábyrgð á viðspyrnuláninu.
• Ef faglegt mat á verkefninu er jákvætt er lögaðila, fjármálastofnun og umsýsluaðila ríkisábyrgðar tilkynnt þar um.
• Ábyrgð er veitt og verkefni getur hafist.
• Lögaðilar sem fá samþykkta ábyrgð á viðspyrnulán skulu eingöngu nýta lánsfé til að standa straum af atvinnuþróunarkostnaði í samræmi við samþykkta umsókn og uppfylla skilyrði að öðru leyti.
• Fjármálastofnun fylgist með ráðstöfun lánsins eftir hefðbundnum samskiptaleiðum við lántaka.
• Lögaðili gerir grein fyrir framkvæmd verkefna í skattskilum.
• Ábyrgð fellur niður að tilteknum tíma liðnum eða ef lán er endurgreitt að fullu fyrir lok gildistíma ábyrgðar. Ábyrgð fellur jafnframt niður ef sýnt er að lánveitanda hafi mátt vera ljóst að skilyrði fyrir henni hafi ekki verið uppfyllt þegar lánið var veitt.

Í Norðvesturkjördæmi fer fram póstkosning um val á framboðslista Framsóknarflokksins, samkvæmt reglum flokksins þar um.

Framboðsfrestur til þátttöku í póstkosningunni rennur út þriðjudaginn 17. janúar 2021, kl. 12:00 á hádegi.

Kjörskrá verður gerð samkvæmt félagatali 2. janúar 2021.

Framboðum skal skila til formanns kjörstjórnar, Valgarðs Hilmarssonar, á netfangið vallih@centrum.is.  Formaðu veitir einnig frekari upplýsingar.

Atkvæðisseðlar verða sendir út 1. febrúar og er frestur til að skila þeim inn til og með 26. febrúar.  Kosið verður um 5 efstu sæti listans.  Sjá nánar inn á framsokn.is.

KJÖRSTJÓRN KFNV.

Silja Dögg Gunnarsdóttir, alþingismaður, gerði grein fyrir atkvæði sínu í atkvæðagreiðslu um kynrænt sjálfræði, á Alþingi í dag. Sagði hún mikilvægt að taka mark á áliti þeirra er hafa reynslu og þekkingu, frekar en örfáum þingmönnum er hrópa hátt.

„Virðulegi forseti. Ég vil taka undir með næstum því öllum þeim sem talað hafa í dag. Ég fagna því frumvarpi sem við greiðum nú atkvæði um og tek undir að þetta er stór dagur. Þetta er dagur mannréttinda. Ég er komin í jólaskap. Mér líður vel. Ég ætla að túlka orðræðu Miðflokksins sem misskilning, ekki mannfyrirlitningu. Ég held að karlarnir sem tóku hér til máls í gær skilji þetta ekki almennilega þó að þeir haldi öðru fram. Og ég tek undir með þeim sem síðast talaði, hv. þm. Páli Magnússyni, og ég verð að segja það fyrir mig, og ég held að það sé kannski eðlileg niðurstaða, að þegar við höfum fengið álit frá því fólki sem hefur reynslu og þekkingu á þeim hlutum sem um ræðir hlýtur maður að taka meira mark á því, eftir margra ára vinnu, en örfáum þingmönnum hér í þingsal sem hrópa hátt en virðast ekki hafa kynnt sér málið,“ sagði Silja Dögg.

• Kynrænt sjálfræði