Categories
Fréttir

Mikilvægt að styrkja stöðu náttúruverndar í sem víðtækastri sátt

Deila grein

30/09/2013

Mikilvægt að styrkja stöðu náttúruverndar í sem víðtækastri sátt

Sigurður Ingi JóhannssonUmhverfis- og auðlindaráðherra hefur ákveðið að endurskoða lög um náttúruvernd nr. 60/2013 sem voru samþykkt á Alþingi rétt fyrir þinglok í vor. Ráðherra mun leggja frumvarp til endurskoðaðra laga fyrir Alþingi áður en lög nr. 60/2013 taka gildi.
Ráðherra hyggst fela umhverfis- og auðlindaráðuneytinu að hefja endurskoðun á náttúruverndarlögunum með það að markmiði að styrkja stöðu náttúruverndar og ná um þau sátt. Gert er ráð fyrir að nýtt frumvarp til náttúruverndarlaga verði lagt fram til umfjöllunar Alþingis, þegar framangreindri vinnu er lokið. Við þá vinnu verður m.a. stuðst við þær fjöldamörgu athugasemdir sem liggja fyrir frá vinnunni við frumvarpið sl. vetur, auk þess sem haft verður samráð við hagsmunaaðila.
Ljóst er að huga þarf nánar að veigamiklum atriðum vegna vinnu við gerð nýs frumvarps til laga um náttúruvernd, eins og kom fram í umfjöllun um frumvarp til nýrra náttúruverndarlaga sl. vetur. Hér er um ýmis grundvallaratriði að ræða enda afar mikilvægt að ný náttúruverndarlög feli í sér skýrar skyldur og jafnframt skýra framkvæmd, náttúruvernd til hagsbóta. Er ekki síður mikilvægt að slíkar breytingar séu unnar í sem víðtækastri sátt við hagsmunaaðila og almenning.

Categories
Fréttir

Þingflokkur og landsstjórn á Suðurnesjum

Deila grein

26/09/2013

Þingflokkur og landsstjórn á Suðurnesjum

frambjodendurBoðað er til opins stjórnmálafundar Framsóknar í Salthúsinu í Grindavík, laugardaginn 28. september kl. 11:00.  Það eru allir velkomnir meðan húsrúm leyfir. Þar mun gefast gott tækifæri til að koma skoðunum á þjóðmálunum beint til þingmanna.
Þingflokkur og landsstjórn Framsóknar eru á ferð um Suðurnesin á laugardaginn og verða vinnustaðir heimsóttir. Mikilvægt er að þingmenn og fulltrúar í landsstjórn kynnist því sem er á seiði og að heimamenn hafi tök á að koma sínum málum á framfæri.

Categories
Fréttir

Vilhjálmur 99 ára í dag

Deila grein

20/09/2013

Vilhjálmur 99 ára í dag

sigmundur_og_vilhjalmurVilhjálmur Hjálmarsson á Brekku, fyrrverandi alþingismaður og menntamálaráðherra, er 99 ára í dag. Hann er elstur af þeim mönnum núlifandi sem setið hafa á Alþingi. Vilhjálmur er við hestaheilsu, þrátt fyrir háan aldur.
Vilhjálmur kann vel að koma fyrir sig orði. Í umræðum um frumvarp til laga um Sinfóníuhljómsveit Íslands í menntamálaráðherra tíð Vilhjálms komst hann svo að orði: „Ég vil þakka háttvirtum þingmanni fyrir ágætan stuðning við þetta mál. Skilst mér að hver einasti þingmaður sem hér hefur tekið til máls hafi lýst stuðningi við frumvarpið. Það er til dæmis ekki bráðónýtt fyrir mig að fá stuðning tveggja fyrrverandi menntamálaráðherra við þetta frumvarp. Því betur kemur það sér fyrir núverandi ráðherra þar sem hann þekkir ekki nóturnar og er þar að auki nokkurn veginn laglaus.“
Vilhjálmur Hjálmarsson er fæddur á Brekku í Mjóafirði 20. september 1914. Foreldrar voru Hjálmar Vilhjálmsson útvegsbóndi og Stefanía Sigurðardóttir húsmóðir, móðursystir Sigurðar Vilhjálmssonar vþm., ömmusystir Tómasar Árnasonar alþingismanns og ráðherra.
Vilhjálmur lauk héraðsskólaprófi frá Laugarvatni 1935. Var bóndi á Brekku í Mjóafirði 1936-1967, fyrst með föður og föðurbróður, síðar með syni. Kennari við barnaskólann í Mjóafirði 1936-1947, skólastjóri 1956-1967. Vann jafnan nokkuð við jarðvinnslu í Mjóafirði haust og vor, síðar forstöðumaður Ræktunarfélags Mjóafjarðar, verkstjóri við vegagerð um tíma. Rak með öðrum síldarsöltun í Mjóafirði 1964-1970. Skipaður 28. ágúst 1974 menntamálaráðherra, lausn 27. júní 1978, en gegndi störfum til 1. september. Aðstoðarsáttasemjari 1979-1980.
Í hreppsnefnd Mjóafjarðarhrepps 1946-1990, oddviti 1950-1978. Fulltrúi Sunnmýlinga á fundum Stéttarsambands bænda 1945-1967, í stjórn sambandsins og Framleiðsluráði landbúnaðarins 1963-1974 og í verðlagsnefnd landbúnaðarafurða 1965-1972. Formaður skólanefndar Húsmæðraskólans á Hallormsstað 1954-1974. Í sýslunefnd Suður-Múlasýslu 1960-1988. Formaður Kjördæmissambands framsóknarmanna á Austurlandi 1962-1967. Skipaður 1965 í endurskoðunarnefnd laga um afurðasölu landbúnaðarins, 1968 í nefnd til að athuga ýmsa þætti landbúnaðarmála, 1969 í endurskoðunarnefnd laga um stofnlánadeild landbúnaðarins o. fl. og 1972 í nefnd til að endurskoða löggjöf um réttindi og skyldur opinberra starfsmanna. Fulltrúi Mjóafjarðarhrepps í Sambandi sveitarfélaga á Austurlandi 1967-1990, í stjórn þess 1980-1983, formaður tvö ár. Kosinn 1973 í flutningskostnaðarnefnd, formaður nefndarinnar. Í kirkjuráði 1976-1982. Skipaður 1978 formaður nefndar um rekstrarlán landbúnaðarins. Í byggingarnefnd Safnahússins á Egilsstöðum 1979-1991. Formaður stjórnar Menningarsjóðs félagsheimila 1980-1988. Formaður útvarpsráðs 1980-1983. Var í nefnd um endurskoðun útvarpslaga 1981-1982 og í byggingarnefnd Ríkisútvarpsins 1981-1990.
Alþingismaður Framsóknarflokksins 1949-1956 og 1959, og 1967-1979. Varaþingmaður mars 1961, maí 1964, apríl-maí 1965 og apríl-maí 1966. Menntamálaráðherra 1974-1978.
Framsóknarflokkurinn óskar Vilhjálmi til hamingju með daginn.

Categories
Fréttir

Lífið er saltfiskur

Deila grein

18/09/2013

Lífið er saltfiskur

bryggjuspjall_grindavikÞegar öllu er á botninn hvolft er lífið þó umfram alt saltfiskur orti skáldið.
Saltfiskmarkaðir hafa verið erfiðir undanfarin misseri, eitt af verkefnum sjávarútvegsráðherra nú er að huga að markaðsmálum sjávarútvegsins og breyttum skilyrðum.
Þó svo að markaðarnir séu eitthvað þyngri var ekki að finna annað en að mikill kraftur væri innan þeirra fyrirtækja sem Sigurður Ingi heimsótti í Grindavík um daginn. Nýsköpun, frumkvöðlahugsun, hugvit og þróun skein í gegn.
thorbjorn_grindavik3Úr frekari fullvinnslu afurða hefur sprottið upp hausaþurrkunar fyrirtæki, samstarfsverkefni um notkun ensíma úr fiski í snyrtivörur og prótein í saltfisk og sannað hvernig tengja má sjávarútveginn og ferðamannaiðnaðinn saman.
Allt skapar þetta aukin tækifæri til starfa og gjaldeyristekna.

Categories
Fréttir

Sveinbjörg Birna nýr formaður LFK

Deila grein

16/09/2013

Sveinbjörg Birna nýr formaður LFK

Sveinbjörg Birna SveinbjörnsdóttirSveinbjörg Birna Sveinbjörnsdóttir varaþingmaður var kosin formaður Landssambands framsóknarkvenna á 16. landsþingi þess haldið 7. september. Með Sveinbjörgu Birnu í framkvæmdastjórn landsambandsins eru Rakel Dögg Óskarsdóttir, Sunna Gunnars Marteinsdóttir, Björg Baldursdóttir og Anna Kolbrún Árnadóttir.
Sveinbjörg Birna Sveinbjörnsdóttir skipaði 3. sæti á framboðslista Framsóknarflokksins í Reykjavíkurkjördæmi suður í síðustu alþingiskosningum. Sveinbjörg Birna er fædd í Reykjavík 1973, stúdent frá Verzlunarskóla Íslands, lauk lögfræðiprófi frá Háskóla Íslands 2001 og fékk héraðsdómslögmannsréttindi 2002.
Ný stjórn vill koma á framfæri þakklæti til fráfarandi formanns, Gerði Jónsdóttur og hennar stjórn, fyrir vel unnin störf.
Á þinginu voru fjölmargar ályktanir samþykktar og má sjá þær hér að neðan.
 

Ályktanir 16. Landsþings framsóknarkvenna, LFK, 7. september 2013:

Ályktun um breytingu á leigureglum vegna íbúðarhúsnæðis.
16. landsþing Landssambands framsóknarkvenna haldið í Reykjavík laugardaginn 7. sept. 2013 skorar á ríkisstjórn Sigmundar Davíð Gunnlaugssonar að skoða möguleika á því að gera fólki kleift að leigja út hluta eigin húsnæðis sem það býr í, allt að 40% íbúðarhúsnæðisins, án þess að leigutekjur séu reiknaðar til tekna húsnæðiseiganda og að þær skerði ekki lífeyrisgreiðslur og/eða bætur. Þessi ráðstöfun kæmi sérstaklega til góða fullorðnu fólki sem ýmist getur ekki selt, eða vill ekki selja, stórar eignir sem það hefur búið í drjúgan hluta ævi sinnar. Einnig mundi það bæta nýtingu á stórum íbúðarhúsum.
Ályktun um Reykjarvíkurflugvöll.
16. landsþing Landssambands framsóknarkvenna haldið í Reykjavík laugardaginn 7. sept. 2013 vill, vegna tillögu umhverfis- og skipulagsráðs Reykjavíkur um flutning Reykjavíkurflugvallar úr Vatnsmýrinni, minna á þá ábyrgð og skyldur sem höfuðborg landsins hefur. Greiðar flugsamgöngur landsbyggðarinnar til og frá Reykjavík er forsenda þess að borgin geti gegnt hlutverki sínu sem höfuðborg landsins alls. Í höfuðborginni eru höfuðstöðvar stjórnsýslu Íslands auk fjölda opinberra viðskipta-, mennta-, menningar- og heilbrigðisstofnana.
Með tillögunni er verið að rýra aðgengi fólks að þessari þjónustu. Þá vekur þingið athygli á þeim mikla kostnaði sem flutningur Reykjavíkurflugvallar hefur í för með sér fyrir ríkið vegna nýrra vegaframkvæmda (stofnbrauta) og uppbyggingu nýs flugvallar.
Ályktun um stjórnir fyrirtækja.
16. landsþing Landssambands framsóknarkvenna haldið í Reykjavík laugardaginn 7. sept. 2013 áréttar lagaskyldu um hlutföll kynja í stjórnum fyrirtækja. Þingið hvetur þær stjórnir sem enn fullnægja ekki gildandi reglum að bregðast við nú þegar og kjósa nýjar stjórnir. Fyrirtæki sem stjórnað er jöfnum höndum af konum og körlum búa yfir viðtækari reynslu og þekkingu. Reynsluheimur kynjanna er ólíkur og því eðlilegt að ætla að fjölbreyttari leiða sé beitt við ákvaðanatöku. Framsóknarkonur hvetja stjórnir fyrirtækja að framfylgja strax núgildandi lögum.
Ályktun um heilbrigðisþjónustu.
16. landsþing Landssambands framsóknarkvenna haldið í Reykjavík laugardaginn 7. sept. 2013 skorar á stjórnvöld að bregðast við þeim alvarlega bresti sem kominn er í heilbrigðiskerfið. Þingið telur að nú þegar þurfi að hefja að nýju uppbyggingu heilbrigðisþjónustu um allt land. Slík uppbygging mun efla öryggi landsmanna og draga úr álagi á LHS.
Ályktun um launamun kynjanna.
16. landsþing Landssambands framsóknarkvenna haldið í Reykjavík laugardaginn 7. sept. 2013 kallar eftir, í ljósi nýrra upplýsinga um viðvarandi launamun kynjanna, tafalausum aðgerðum. Hér er átt við ríki, sveitarfélög og aðila vinnumarkaðarins. Það er með öllu óásættanlegt að ekki hafi enn tekist að uppræta kynbundinn launamun og vinna gegn launamun kynjanna. Árum saman hafa sambærilegar upplýsingar legið fyrir og ráðamenn lýst því að bregðast verði við en lítið þokast í rétta átt. Framsóknarkonur vilja að leitað verði allra leiða til að uppræta óviðunandi ástand og kallar alla þá er málið varðar til ábyrgðar. Það er vitað að íslenskur vinnumarkaður er kynbundinn og hefðbundin kvennastörf eru ávísun á lægri laun en hefðbundin karlastörf. Einnig er ekkert annað en kyn starfsmanna sem getur skýrt launamun í sambærilegum störfum þegar tillit hefur verið tekið til allra þátta sem áhrif geta haft á laun. Það þarf að nýta öll þau tól og tæki sem samfélagið býr yfir s.s. jafnlaunavottun. Velta þarf við öllum steinum og höfða til sameiginlegrar ábyrgðar okkar allra.
Ályktun um skuldavanda íslenskra heimila.
16. landsþing Landssambands framsóknarkvenna haldið í Reykjavík laugardaginn 7. sept. 2013 fagnar aðgerðaráætlun ríkisstjórnarinnar sem ætlað er að taka á skuldavanda íslenskra heimila. Sérstaklega vegna þess að í áætluninni er bæði að finna tímaramma og ábyrgðamenn einstakra málaflokka.
Ályktun um sjálfstæði sveitarfélaga.
16. landsþing Landssambands framsóknarkvenna haldið í Reykjavík 7. september 2013 telur að æskilegt sé að aukið vald, ábyrgð og fjármagn sé falið sveitarfélögunum í landinu til að veita íbúum sínum þjónustu. Sveitarstjórnir landsins eru þau stjórnvöld sem standa kjósendum næst og er það í anda kröfu um aukið lýðræði að fela þeim aukin verkefni ásamt auknum tekjum.
Þingið telur að skoða beri vandlega hvort sveitarfélög ættu að fá verulega aukið hlutfall ef tekjuskatti einstaklinga í sinn hlut auk þess sem eðlilegt er að þau fái einnig hlutdeild í skattekjum frá fyrirtækjum. Þá er eðlilegt að tekin verði upp skattheimta af nýtingu ýmissa náttúruauðlinda, svo sem virkjun vatnsafls og jarðvarma, sem renni til sveitarfélaga á nærsvæði framkvæmdanna. Leita má fyrirmynda um slíka skattheimtu erlendis, m.a. til Noregs.
Eftir að sveitarfélögunum hafa verið tryggðar auknar tekjur er eðlilegt að meta hvaða þjónustu er heppilegt og raunhæft að ætla að sveitarfélögin geti tekið að sér að veita, íbúum sínum til hagsbóta.
Ályktun um regluverk atvinnulífsins.
16. landsþing Landssambands framsóknarkvenna haldið í Reykjavík laugardaginn 7. sept. 2013 fagnar áformum ríkisstjórnar við að einfalda regluverk gagnvart stofnunum og fyrirtækjum í landinu. Þingið leggur einnig áherslu á að innleiðingaferli verði vandað og vel gætt að eftirfylgni á öllum sviðum stjórnsýslunnar.
Ályktun um umhverfismál.
16. landsþing Landssambands framsóknarkvenna haldið í Reykjavík laugardaginn 7. sept. 2013 minnir á að endurnýting og endurvinnsla takmarkaðra auðlinda jarðarinnar er eitt brýnasta viðfangsefni umhverfismálanna. Þingið hvetur ríkisstjórnina til þess að setja fram tímasetta áætlun um hvernig hægt er að þróa og nýta innlenda orkugjafa og auka hlutfall farartækja sem ganga fyrir innlendum orkugjöfum. Þingið bendir á að notkun innlendra orkjugjafa sparar gjaldeyri er umhverfisvænt og atvinnuskapandi.
Ályktun um náttúruvernd og nýtingu.
16. landsþing Landssambands framsóknarkvenna haldið í Reykjavík laugardaginn 7. sept. 2013 minnir á að virðing fyrir náttúrunni hefur verið grunnstef í stefnu Framsóknarflokksins frá stofnun hans. Þingið leggur áherslu á að efla beri landgræðslu. Ennfremur vill þingið benda á að ræktun og nýting skóga er til dæmis gott dæmi um vaxandi atvinnuskapandi auðlind. Stjórnvöld verða að marka sér skýra stefnu á þessu sviði.
Ályktun um jafnrétti til búsetu.
16. landsþing Landssambands framsóknarkvenna haldið í Reykjavík laugardaginn 7. sept. 2013 leggur áherslu á mikilvægi þess að blómleg byggð sé um allt land. Til þess að svo megi vera verður að tryggja íbúum ásættanlegt aðgengi að heilbrigðisþjónustu, öruggum samgöngum, fjarskiptasambandi og dreifikerfi raforku. Landsambandið hvetur því jafnframt til þess að teknir verði upp virkir og vel skilgreindir hvatar til þess að styrkja samfélög á skilgreindum varnasvæðum þar sem núverandi þjónusta getur lagst af.
Ályktun um starfsemi stofnana ríkisins á landsbyggðinni.
16. landsþing Landssambands framsóknarkvenna haldið í Reykjavík laugardaginn 7. sept. 2013 leggur ríka á herslu á mikilvægi þess að ríkið leiti leiða til þess að efla starfsemi stofnana sinna um land allt. Ríkið gangi þannig á undan með góðu fordæmi gagnvart fyrirtækjum í landinu og setji þannig jafnframt fram jákvæða hvata til þess að auðvelda fyrirtækjum rekstur, t.d. með afslætti/niðurfellingu tryggingargjalds.
Reynsla af flutningi starfa út á land hefur verið góð. Nægt framboð er af hæfu starfsfólki. Minni starfsmannavelta og lægri húsnæðiskostnaður gerir flutning starfa að fýsilegum kosti sem er til þess fallinn að efla byggð um allt land.
Ályktun um styttingu náms að háskóla.
16. landsþing Landssambands framsóknarkvenna haldið í Reykjavík laugardaginn 7. september 2013 leggur áherslu á samvinnu, samþættingu og samtal á milli skólastiga með það að markmiði að stytta nám að háskóla um eitt ár, án þess að skerða gæði náms og menntunar. Mikilvægt er að faglegur ávinningur af styttingu námsins sé ráðandi fremur en fjárhagslegur. Fram fari faglegt mat á vegum menntamálayfirvalda á mismunandi leiðum að því markmiði. Mikilvægt er að í því mati verði tekið tillit til félagslegra þátta og skólamenningar leik-, grunn- og framhaldsskóla og háskóla.
Ályktun um klám.
16. landsþing Landssambands framsóknarkvenna haldið í Reykjavík laugardaginn 7. sept. 2013 kallar eftir almennri vitundarvakningu og tafarlausum aðgerðum stjórnvalda í baráttunni gegn klámvæðingu og ofbeldi sem oftar en ekki beinist gegn konum.
Ályktun um jafna möguleika barna til íþrótta- og frístundastarfs.
16. landsþing Landssambands framsóknarkvenna haldið í Reykjavík laugardaginn 7. september 2013 leggur áhersu á jafnt aðgegni barna að íþróttum sem og öðru æskulýðs- og tómstundastarfi. Slíkt starf þroskar einstaklinginn og hefur mikið forvarnargildi.
Ályktun um fæðingarorlof.
16. landsþing Landssambands framsóknarkvenna haldið í Reykjavík laugardaginn 7. sept. 2013 hvetur ríkisstjórn Íslands að hverfa frá niðurskurði á greiðslum til fæðingarorlofs sem síðasta ríkisstjórn réðst í. Afleiðingarnar hafa fyrst og fremst verið að feður taka sér síður orlof.

Categories
Fréttir

Sigmundur Davíð á Al Jazeera

Deila grein

02/09/2013

Sigmundur Davíð á Al Jazeera

Sigmundur Davíð Gunnlaugsson forsætisráðherra verður á beinni línu hjá Al Jazeera í kvöld kl. 19:30.  Megin umræðuefnið verður efnahagsbati Íslands.
Almenningur semur spurningarnar fyrir viðtalið við Sigmund Davíð hér.
 
sdg-aljazeera

Categories
Fréttir

Sigmundur Davíð forsætisráðherra í 100 daga

Deila grein

02/09/2013

Sigmundur Davíð forsætisráðherra í 100 daga

Sigmundur Davíð GunnlaugssonSigmundur Davíð Gunnlaugsson var á Sprengisandi á Bylgjunni í gær, sunnudag. Þar fór hann m.a. yfir að verkefnin er var lagt upp með í upphafi væru öll samkvæmt áætlun og á þeim hraða sem sem gert var ráð fyrir. Sigmundur Davíð tók sérstaklega fram að eðlilegt væri að þegar þing væri ekki að störfum að fólk verði ekki vart við vinnuna sem á sér stað inni í ráðuneytinum. En Sigmundur Davíð segist vera mjög bjartsýnn á framhaldið og að okkur takist að breyta hlutum mjög hratt þegar þing kemur saman.
Hlutverk stjórnvalda í dag er að skapa þær aðstæður að tækifæri séu nýtt. Það hafa menn verið að gera í skattamálum og eins í vinnu í stjórnarráðinu um einföldun regluverksins og verður kynnt á ráðstefnu á morgun (í dag). Þessi grundvallaratriði eru til endurskoðunar og forsenda þess að hægt sé að fjárfesta og gera áætlanir og byggja á til framtíðar.
Hér er hægt að nálgast upptökur af viðtalinu við Sigmund Davíð:
Sprengisandur: SDG 1. hluti. Segir öll verk vera á áætlun
Sigmundur Davíð Gunnlaugsson segir verkefni ríkisstjórnarinnar vera á áætlun og eðlilegt sé að það taki menn tíma að trúa að óhætt sé að fjárfesta og byggja upp.
https://vefutvarp.visir.is/upptokur?itemid=20677
Sprengisandur: SDG 2. hluti. Forsendum verðtryggingar verður breytt
Sigmundur Davíð Gunnlaugsson segir að grunni vístölunnar verði breytt svo fyrirsjáanleg hækkun á eldsneyti hækki ekki lán Íslendinga uppúr öllu valdi.
https://vefutvarp.visir.is/upptokur?itemid=20678
Sprengisandur: SDG 3. hluti. Breytt lög um lífeyrissjóði
Sigmundur Davíð Gunnlaugsson segir þörf á að breyta lögum um líeyrissjóði svo þeim verði gert unnt að fjárfestar víðar en nú. Hann benti einnig á að lífskjör okkar séu tekin að láni, þar sem við framleiðum ekki fyrir nauðsynjum.
https://vefutvarp.visir.is/upptokur?itemid=20679
Sprengisandur: SDG 4. hluti. Nýr umhverfisráðherra innan skamms
Sigmundur Davíð Gunnlaugsson segir að ekki sé langt að bíða þess að hér verði skipaður nýr umhverfisráðherra í stærra og veigameira ráðuneyti.
https://vefutvarp.visir.is/upptokur?itemid=20680
 

Categories
Fréttir

Tveir sérfræðingahópar skipaðir um skuldavanda heimila

Deila grein

19/08/2013

Tveir sérfræðingahópar skipaðir um skuldavanda heimila

Sigmundur Davíð GunnlaugssonForsætisráðherra hefur skipað eftirtalda aðila í sérfræðingahópa um skuldavanda heimila. Eiga þeir að skila af sér í nóvember 2013 og fyrir lok árs 2013 skv. þingsályktunartillögu sem samþykkt var á sumarþingi.
Sérfræðingahópur um höfuðstólslækkun verðtryggðra húsnæðislána og kosti og galla leiðréttingasjóðs:

  • Dr. Sigurður Hannesson, stærðfræðingur, formaður.
  • Dr. Arnar Bjarnason, hagfræðingur
  • Einar Hugi Bjarnason, hrl.
  • Ingibjörg Ólöf Vilhjálmsdóttir, hdl.
  • Lilja Alfreðsdóttir, alþjóðahagfræðingur
  • Sigrún Ólafsdóttir, alþjóðaviðskiptafræðingur í forsætisráðuneyti
  • Sigurður Guðmundsson, skipulagsfræðingur í fjármála- og efnahagsráðuneyti

Sérfræðingahópur um afnám verðtryggingar af neytendalánum:

  • Ingibjörg Ingvadóttir, hdl, formaður
  • Hafdís Ólafsdóttir, lögfræðingur í fjármála- og efnahagsráðuneyti
  • Iða Brá Benediktsdóttir, viðskiptafræðingur
  • Sigrún Ólafsdóttir, alþjóðaviðskiptafræðingur í forsætisráðuneyti
  • Tómas Brynjólfsson, hagfræðingur í fjármála- og efnahagsráðuneyti
  • Valdimar Ármann, hagfræðingur/fjármálaverkfræðingur
  • Vilhjálmur Birgisson, formaður Verkalýðsfélags Akraness
Categories
Fréttir

Yfirlýsing ríkisstjórnar Íslands vegna hótana Evrópusambandsins í garð Færeyinga og Íslendinga

Deila grein

16/08/2013

Yfirlýsing ríkisstjórnar Íslands vegna hótana Evrópusambandsins í garð Færeyinga og Íslendinga

Sigmundur Davíð GunnlaugssonÍsland á mikilla hagsmuna að gæta hvað varðar stjórnun ýmissa sameiginlegra fiskistofna á Norðaustur-Atlantshafi. Íslensk fiskveiðistjórnun hefur um langt árabil tryggt sjálfbæra nýtingu sjávarauðlindarinnar ólíkt því sem gildir um fiskveiðistefnu ESB.
Á undanförnum mánuðum hefur Evrópusambandið (ESB) ítrekað hótað að beita þvingunaraðgerðum gegn Íslandi og Færeyjum í því skyni að ná betri stöðu í samningaviðræðum um stjórnun veiða úr sameiginlegum fiskistofnum. Þessi háttsemi brýtur í bága við ýmsar skuldbindingar samkvæmt hafréttarsamningi Sameinuðu þjóðanna og almennum reglum þjóðaréttar, einkum skuldbindingu strandríkja til að koma sér saman um ráðstafanir sem tryggi vernd og þróun sameiginlegra stofna. Slíkar aðgerðir myndu enn fremur stangast á við skuldbindingar ESB samkvæmt samningi Alþjóðaviðskiptastofnunarinnar (WTO) og, að því er Ísland varðar, samkvæmt EES-samningnum.
Það er ríkisstjórn Íslands mikið áhyggjuefni að ESB leitist við að skerða rétt annarra strandríkja á svæðinu til frjálsra samningaviðræðna og samninga í því skyni að ná fram hagsmunum tiltekinna aðildarríkja sambandsins. Það er Íslandi einnig áhyggjuefni að ESB sniðgengur vísvitandi þær leiðir til lausnar deilumála sem hafréttarsamningurinn kveður á um.
Ríkisstjórn Íslands mótmælir því harðlega að ESB grípi til hótana um að beita þvingunaraðgerðum gegn Íslandi og Færeyjum sem leið til að leysa deilur um stjórnun veiða úr sameiginlegum fiskistofnum. Ríkisstjórnin krefst þess að ESB dragi hótanir sínar til baka og virði þannig skuldbindingar sínar samkvæmt þjóðarétti.
Sjá má yfirlýsinguna hérna: https://www.forsaetisraduneyti.is/frettir/nr/7661
Categories
Fréttir

Miðjuflokkar Norðurlandaráðs funduðu á Íslandi

Deila grein

16/08/2013

Miðjuflokkar Norðurlandaráðs funduðu á Íslandi

Sumarfundur flokkahóps miðjumanna í Norðurlandaráði fór fram á Hilton Reykjavík Nordica dagana 14. og 15. ágúst
Á sumarfundi Flokkahóps miðjumanna í Norðurlandaráði í Reykjavík í gær samþykkti flokkahópurinn einhuga að Björt framtíð fengju aðild að flokkahópi miðjumanna í Norðurlandaráði.
Aðaláhersla fundarins var á réttindi barna og úrbætur á því sviði en einnig kynntu fundarmenn sér endurnýtanlega orku og skipulag almannavarna á Íslandi.
Fundinn sóttu 14 norrænir þingmenn. Heimsóttu þeir meðal annars Samhæfingamiðstöð Almannavarna þar sem Víðir Reynisson deildarstjóri almannavarnardeildar Ríkislögreglustjóra og Guðmundur Fylkisson varðastjóri kynntu skipulag og verklag almannavarna á Íslandi.
Einnig heimsótu þeir Barnahús sem var hið fyrsta sinnar tegundar á Norðurlöndum þegar það tók til starfa árið 1998 en Barnahús sinnir málefnum barna sem grunur leikur á að hafi sætt kynferðislegri áreitni eða ofbeldi. Þá hittu þingmennirnir Margréti Maríu Sigurðardóttir umboðsmann barna sem upplýsti fundarmenn um stöðu mála hvað varðar réttindi barna hér á landi og einnig Söndru Gísladóttur og Frímann Sigurðsson frá Hinu húsinu sem kynntu starfsemi þess.
Í fyrradag heimsóttu þeir Carbon Recycling International (CRI) á Reykjanesi, (CRI) fangar CO2 frá iðnaðarútblæstri og breytir því í hreint vistvænt metanól (RM). Carbon Recycling International er tilnefnt til umhverfisverðlauna Norðurlandaráð nú í ár. Sjá: https://www.norden.org/is/a-doefinni/frettir/einn-thessarra-hlytur-natturu-og-umhverfisverdlaun-nordurlandarads-arid-2013 .
Sigmundur Davíð Gunnlaugsson forsætisráðherra og samstarfsráðherra Norðurlanda og Eygló Harðardóttir félags og húsnæðismálaráðherra funduðu svo seinnipartinn í gær með þingmönnunum.
 
 
 
 
 
 
 
 
Í flokkahópi miðjumanna í Norðurlandaráði sitja fulltrúar og varafulltrúar Norðurlandanna og Færeyja, Grænlands og Álandseyja, sem tilheyra 25 frjálslyndum miðjuflokkum, grænum og kristilegum demókrataflokkum, Flokkahópurinn er næst stærstur fimm flokkahópa í Norðurlandaráði og mæta
14 þingmenn hópsins á fundinn í Reykjavík.