Category: Uncategorized

Willum Þór Þórsson heilbrigðisráðherra boðar til heilbrigðisþings 2022 sem að þessu sinni verður helgað lýðheilsu. Þingið verður haldið 10. nóvember á hótel Hilton Reykjavík Nordica. Þingið er öllum opið en fulltrúar heilbrigðisstofnana, fræðasamfélagsins, sveitarfélaga, skólanna, íþróttahreyfingarinnar og annarra félagasamtaka sem láta sig málið varða eru sérstaklega hvattir til þátttöku.

Boðsbréf ráðherra til útprentunar 

Kæri viðtakandi.

Heilbrigðisþing hafa verið haldin árlega frá árinu 2018 þegar gildandi heilbrigðisstefna til ársins 2030 var í mótun. Þingin hafa verið tileinkuð mikilvægum málefnum sem varða heilbrigðiskerfið og skipulag heilbrigðisþjónustu. Í ár hef ég ákveðið að helga þennan árlega viðburð lýðheilsu og boða því til lýðheilsuþings 10. nóvember næstkomandi. Þar verður einstaklingurinn í forgrunni með áherslu á allt það sem við getum sjálf gert til að efla, vernda og viðhalda góðri heilsu. Jafnframt verður fjallað um hvernig stjórnvöld og stofnanir samfélagsins geta með ákvörðunum sínum og aðgerðum skapað almenningi sem bestar aðstæður til heilsueflingar á öllum æviskeiðum.

Alþingi samþykkti á síðasta ári lýðheilsustefnu til ársins 2030. Stefnan á sér stoð í heilbrigðisstefnu þar sem fram koma þau markmið að lýðheilsustarf með áherslu á heilsueflingu og forvarnir verði hluti af allri heilbrigðisþjónustu. Samkvæmt lýðheilsustefnu skulu stjórnvöld stuðla að því að landsmenn verði meðvitaðir um ábyrgð á eigin heilsu, m.a. með fræðslu og vitundarvakningu um gildi forvarna og heilsueflingar, svo sem á sviði næringar, hreyfingar og geðræktar. Liður í því er að tryggja fólki greiðan aðgang að hagnýtum og gagnreyndum upplýsingum um þessi efni sem auðvelda hverjum og einum að stunda heilbrigðan lífsstíl og viðhalda heilsu sinni eða bæta hana.

Verkefnahópur vinnur nú að mótun aðgerðaáætlunar um framkvæmd lýðheilsustefnu og er gert ráð fyrir að nýta afrakstur lýðheilsuþingsins inn í þá vinnu. 

Heilsulæsi – lykill að árangri

Þótt öflugt heilbrigðiskerfi og góð heilbrigðisþjónusta skipti miklu fyrir heilsufar landsmanna eru ótalmargir aðrir þættir sem eru ráðandi um það hvort almenn lýðheilsa sé góð. Við tökum á hverjum degi ákvarðanir sem hafa áhrif á heilsu okkar, oft án þess að leiða hugann sérstaklega að því. Dæmi um þetta eru ákvarðanir og val sem snýr t.d. að mataræði og öðrum neysluvörum, hreyfingu, svefni, félagslegum samskiptum, ýmsum streituvaldandi þáttum og svo mætti áfram telja. Mikilvægt er að hver og einn þekki og skilji hvaða áhrif ólíkir valkostir geta haft á heilsuna. Það skiptir jafnframt miklu máli að fólk þekki hvaða líkamleg eða andleg einkenni geta falið í sér viðvörun um að bregðast þurfi við og breyta venjum eða leita hjálpar heilbrigðisstarfsfólks. Þekking og skilningur á þessum þáttum nefnist heilsulæsi en þar kemur þó margt fleira til sem fjallað verður um á lýðheilsuþinginu 10. nóvember. 

Þátttaka og skráning

Lýðheilsuþingið er öllum opið en ég hvet sérstaklega fulltrúa heilbrigðisstofnana, fræðasamfélagsins, sveitarfélaga, skólanna, íþróttahreyfingarinnar og annarra félagasamtaka sem láta sig málið varða, til að taka daginn frá. 

Lýðheilsuþingið 10. nóvember verður haldið á hótel Hilton Reykjavík Nordica kl. 8.30 – 16.30. Nánari upplýsingar eru á heilbrigdisthing.is og þar fer einnig fram skráning þátttöku. Einnig er minnt á facebooksíðu þingsins. Aðgangur er ókeypis.

Willum Þór Þórsson, heilbrigðisráðherra.

Tilkynningin birtist fyrst á stjornarradid.is 21. október 2022.

Síðastliðinn laugardag var haldið 20. Landsþing Landssambands Framsóknarkvenna sem nú hefur fengið nýtt nafn Konur í Framsókn eftir lagabreytingartillögu, Berglindar Sunnu Bragadóttur, sem samþykkt var á þingingu. Fundarstjóri var kosinn Hafdís Hrönn Hafsteinsdóttir, alþingismaður og fundarritari,Hjördís Guðný Guðmundsdóttir, varaformaður LFK.

Fráfarandi formaður Linda Hrönn Þórssdóttir stiklaði á stóru um þriggja á ára formannstíð sína. Heimsfaraldur setti sinn mikla svip á það metnaðarfulla starf sem hafði verið skipulagt. Hún ræddi stöðu kvenna í heiminum eftir heimsfaraldur og vísaði í erlendar rannskóknir. Talaði um mikilvægi hreyfingar eins og Kvenna í Framsókn í þágu jafnréttismála og þátttöku kvenna í stjórnmálum. Án þátttöku kvenna í stjórnmálum verður jafnrétti aldrei raunverulega náð.

Hjördís Guðný Guðmundsdóttir og Linda Hrönn fóru yfir ársreikninga sambandsins í fjarveru gjaldkera.

Þá flutti Sigurður Ingi Jóhannsson, formaður Framsóknar, ávarp og þakkaði grasrótinni fyrir velgengni í sveitarstjórnarkosningunum. Hann talaði einnig um mikilvægi baklandsins þegar nýliðar eru fyrsta sinn í stjórn og taka þarf á krefjandi málum.

Lilja Dögg Alfreðsdóttir, varaformaður Framsóknar talaði um mikivægi öflugs félags eins og Kvenna í Framsókn. Hún fór yfir stöðu kvenna í samfélaginu m.t.t. jákvæðrar þrjóunar á atvinnumarkaði sl. 35 ár. Að hér væri lagaumhverfi sem stuðli að þessum jákvæðu breytingum með lögum um kynjahlutföll í stjórnum t.d. Ekki síður mikilvægt að aðgengi að leikskólum sé gott og daggæslu sem gert var átak í á sínum tíma undir forystu Kvennalistans og Framsóknar.

Fjöldi kvenna stóð í pontu og tjáðu sig um sín áherslumál. Konur hvöttu aðrar konur til að taka pláss og láta í sér heyra. Leikskólamálin voru rædd, rasismi í samfélaginu, MeToo, staða kvenna þegar kemur að fæðingarorlofi, konur lengur heima því þær eru oftar launalægri. Einnig rætt að það hafi aldrei verið betra að vera kona í stjórnmálum en í dag. Þá var ný stjórn hvött til að taka upp stöðu kvenna í atvinnulífinu.

Nýr formaður var kosinn Guðveig Eyglóardóttir og sagði hún m.a. í framboðsræðu sinni að hennar köllun væri í dag að valdefla aðrar konur.

Þingið var öflugt í alla staði, lagðar fram kraftmiklar ályktanir og augljóst var á konum á þinginu að það var orðið tímabært að hittast. Lilja Dögg Alfreðsdóttir, varaformaður Framsóknar og ráðherra bauð Konum í Framsókn í móttöku á vinnustofu Kjarvals að þingi loknu.

Ný stjórn er eftirfarandi:

Formaður: Guðveig Eyglóardóttir (NV)

Framkvæmdastjórn:

Berglind Sunna Bragadóttir (R)

Hjördís Guðný Guðmundsdóttir (SV)

Jóhanna Ýr Jóhannsdóttir (S)

Unnur Þöll Benediktsdóttir (R)

Til vara:

Anna Karen Svövudóttir (SV)

Karítas Ríkharðsdóttir (R)

Landsstjórn (6 og 6 til vara)

Díana Hilmarsdóttir (S)

Fanný Gunnarsdóttir (R-N)

Linda Hrönn Þórisdóttir (SV)

Rakel Dögg Óskarsdóttir (R-S)

Sigurlaug Þóra Gunnarsdóttir (NA)

Sonja Lind Estrajher Eyglóardóttir (NV)

Drífa Sigfúsdóttir (S)

Ingveldur Sæmundsdóttir (R)

Magnea Gná Jóhannsdóttir (R-N)

Pálína Margeirsdóttir (NA)

Ragnheiður Ingimundardóttir (NV)

Þórey Anna Matthíasdóttir (SV)

Skoðunarmenn reikninga (2)

Hildur Helga Gísladóttir (SV)

Þorbjörg Sólbjartsdóttir (SV)

Mennta- og barnamálaráðuneytið hefur styrkt samtökin Móðurmál um 15 milljónir króna. Styrkurinn er liður í aðgerðum stjórnvalda vegna barna á flótta og barna af erlendum uppruna.

Móðurmál eru samtök um tvítyngi sem kenna móðurmál önnur en íslensku, styðja við og taka þátt í rannsóknum á virku tvítyngi í samfélaginu. Þau hafa boðið upp á kennslu fyrir fjöltyngd börn á yfir 20 tungumálum frá árinu 1994.

Fyrr í vikunni lauk mennta- og barnamálaráðuneytið úthlutun styrkja til sveitarfélaga vegna móttöku barna á flótta. Stuðningurinn var veittur tímabundið til að styðja við fjölbreytt tómstunda- og menntunarúrræði fyrir börnin og undirbúning skólastarfs í haust.

Leiðarvísir um stuðning við móðurmál og virkt fjöltyngi í skóla- og frístundastarfi.

Fréttin birtist fyrst á stjornarradid.is 16. september 2022.

Mynd: Stjórnarráðið

Lilja Dögg Alfreðsdóttir, menningar- og viðskiptaráðherra leiddi sendinefnd á vegum Íslandsstofu og Útflutningsskrifstofu íslenskrar tónlistar (ÚTÓN) með áherslu á kvikmyndir og tónlist. Markmið ferðarinnar er að kynna Ísland sem áfangastað sköpunar, kynna íslenska menningu og hvetja til erlendrar fjárfestingar í skapandi greinum á Íslandi.

Í Stjórnarsáttmála ríkisstjórnarinnar er lögð áhersla á uppbyggingu skapandi greinum. Jafnframt er ítrekað í stefnu stjórnvalda að kvikmyndagerð geti orðið enn mikilvægari þáttur í íslensku atvinnu- og menningarlífi. Ljóst er að tækifærin innan greinarinnar eru mikil og hafa áhrif á atvinnu um allt land. Í því ljósi kynnti ráðherrann Ísland sem ákjósanlegan fjárfestingakost í skapandi greinum og fór yfir sterka stöðu landsins efnahagslega. Meðal umræðuefna á fundnum ráðherra með fyrirtækjunum voru tækifæri og áskoranir í kvikmyndagerð ásamt þeim tækifærum sem felast í skapandi greinum á Íslandi. Nýleg hækkun úr 25% í 35% á endurgreiðslu framleiðslukostnaðar í kvikmyndagerð, sem samþykkt var á Alþingi í vor, var kynnt fulltrúum fyrirtækjanna og geta Íslands til að takast á við stór kvikmyndaverkefni rædd.

Eitt af dótturfyrirtækjum Universal, HBO max, tilkynnti í sumar um að þáttaröðin True Detective verði tekin upp á Íslandi. Um er að ræða stærsta kvikmyndaverkefni Íslandssögunnar en umfang þess er áætlað um 9 milljarðar króna en tökur munu standa yfir í 9 mánuði.

,,Ég finn fyrir miklum meðbyr hér í Los Angeles með þeim aðgerðum sem við höfum verið að hrinda í framkvæmd á undanförnum misserum til þess að efla skapandi greinar á Íslandi. Verkefnið True Detective er stærsta erlenda fjárfesting á sviði menningar í Íslandssögunni. Með skýrri sýn og margþáttuðum aðgerðum er okkur að takast að gera landið okkar að mjög álitlegum samstarfskosti í heimi kvikmyndanna. Alþjóðleg kvikmyndafyrirtæki eru tilbúin til þess að fjárfesta í stærri verkefnum til lengri tíma en þau gerðu. Það er gríðarlegur sigur fyrir íslenska menningu og efnahagslíf og staðfesting þess að það sem stjórnvöld eru að gera skiptir máli,’’ sagði Lilja D. Alfreðsdóttir menningar- og viðskiptaráðherra.

Þá veitti ráðherra miðlunum Deadline, The Location Guide og Hollywood Reporter viðtöl þar sem hún fór yfir sýn sína um að gera Ísland að skapandi miðstöð milli Evrópu og Bandaríkjanna.

Fréttin birtist fyrst á stjornarradid.is 11. september 2022.

Mynd: Menningar- og viðskiptaráðuneytið

Umgjörð kvikmyndagerðar á Íslandi og hækkaðar endurgreiðslur vegna kostnaðar í kvikmyndagerð voru ræddar á fundi Lilju D. Alfreðsdóttur menningar- og viðskiptaráðherra með fulltrúum Netflix í Los Angeles ásamt því að kynna sér starfsemi fyrirtækisins.

Á fundinum fór ráðherra meðal annars yfir nýsamþykktar breytingar á lögum um endurgreiðslur framleiðslukostnaðar í kvikmyndagerð sem fela í sér hækkun úr 25% í 35% að uppfylltum ákveðnum skilyrðum. Markmið breytinganna er að laða að stærri erlend kvikmyndaverkefni sem alfarið verða unnin á Íslandi.

Breytingarnar eru liður í Kvikmyndastefnu fyrir Ísland til ársins 2030 sem kynnt var árið 2020 en ýmsum aðgerðum í stefnunni hefur nú þegar verið hrint í framkvæmd, allt frá vegvísi um sjálfbærni í kvikmyndagerð til nýrrar kvikmyndadeildar við Listaháskóla Íslands.

,,Ég hef sterka sannfæringu fyrir mikilvægi þess að búa skapandi greinum hagfelld skilyrði á Íslandi og stjórnvöld eru á slíkri vegferð. Nýleg hækkun á endurgreiðsluhlutfalli mun auka alþjóðlega samkeppnishæfni landsins í kvikmyndaheiminum og hafa jákvæð margfeldisáhrif á íslenskt samfélag. Í kvikmyndagerð eru fjölmörg spennandi og vel launuð störf, sem skemmtilegt er að takast á við. Ísland hefur margt fram að færa á þessu sviði, góða innviði og mannauð ásamt stórbrotinni náttúru,’’ sagði Lilja D. Alfreðsdóttir menningar- og viðskiptaráðherra.

Fundurinn er hluti af ferð ráðherra til Los Angeles sem skipulögð er af Íslandsstofu og Útflutningsskrifstofu íslenskrar tónlistar (ÚTÓN) með áherslu á kvikmyndir og tónlist. Markmið ferðarinnar er að kynna Ísland sem áfangastað sköpunar, kynna íslenska menningu og hvetja til erlendrar fjárfestingar í skapandi greinum á Íslandi.

Fréttin birtist fyrst á stjornarradid.is 7. september 2022.

Mynd: Mennta- og menningarmálaráðuneytið

Landstjórn Framsóknar samþykkti í vor að boða til haustfundar miðstjórnar í Norðvestur kjördæmi og var 12. – 13. nóvember fyrir valinu. Fundurinn verður haldinn í Edinborgarhúsinu og hefst kl. 10:00 á laugardagsmorgun og stendur fram yfir hádegi á sunnudeginum. Kvöldverðarhóf verður á laugardagskvöldinu.

Hægt verður að fá gistingu á Hótel Ísafirði og Holt Inn.

Hægt er að panta gistingu á Hótel Ísafirði með því að senda tölvupóst á  lobby@hotelisafjordur.is kóðinn er „fundur Framsóknar“. 

Til að bóka á Holt Inn senda tölvupóst á holtinn@holtinn.is „Framsókn“. 

Upplýsingar um gistinguna:

Hótel Ísafjörður:

•              tveggja manna herbergi 20.000.- m/morgunmat nóttin

•              eins manns herbergi 16.500 m/morgunmat nóttin

https://isafjordurhotels.is/

Holt Inn:

•              Um þrjár herbergistegundir er að ræða, verðin eru eftirfarandi með morgunmat: 15.173.-, 16.618.- og 19.508.- 

Við hvetjum fólk til að panta sem fyrst til þess að hægt sé að bregðast við ef tryggja þarf fleiri herbergi.

Aðalmenn í miðstjórn eru vinsamlegast beðnir um að staðfesta komu eða forföll til skrifstofu Framsóknar í síma 540-4300 eða á netfangið framsokn@framsokn.is. Mikilvægt er að vita um forföll í tíma til að geta boðað varamenn á fundinn.

Á haustfundi skal taka félagsstarf flokksins á komandi starfsári sérstaklega til umræðu. 

Fastanefndir miðstjórnar munu flytja skýrslu um störf sín og jafnframt skulu miðstjórnarmenn kjósa úr sínum hópi til eins árs í senn:

a) fjóra fulltrúa í fræðslu- og kynningarnefnd Framsóknarflokksins og tvo til vara og

b) fjóra fulltrúa í málefnanefnd Framsóknarflokksins og tvo til vara.

Fræðslu- og kynningarnefnd. 

Hana skipa formaður sem framkvæmdastjórn skipar og fjórir meðstjórnendur skv. a-lið gr. 10.4. Hlutverk nefndarinnar er að skipuleggja og hafa umsjón með framkvæmd kynningar- og fræðslumála Framsóknarflokksins.

Málefnanefnd. 

Hana skipa formaður sem framkvæmdastjórn skipar og fjórir meðstjórnendur skv. b-lið gr. 10.5. Hlutverk nefndarinnar er að skipuleggja og hafa umsjón með málefnastarfi og stefnumótunarvinnu Framsóknarflokksins.

Miðstjórnarmenn eru hvattir til að gefa kost á sér í þessar nefndir og senda framboð á netfangið framsokn@framsokn.is.

Framsókn