Category: Fréttir

Halla Signý Kristjánsdóttir, alþingismaður, fór yfir breytingar á lögum um félagslega aðstoð og lögum um almannatryggingar í störfum þingsins á Alþingi í dag. Sagði hún að verið væri að stíga skref til mikilla réttarbóta fyrir öryrkja. „Markmiðið er að draga úr áhrifum annarra tekna en bóta almannatrygginga og félagslegrar aðstoðar við útreikning sérstakrar uppbótar á lífeyri fyrir framfærslu örorku- og endurhæfingarlífeyrisþega og afnema þar með það sem kallað er í daglegu tali króna á móti krónu skerðing,“ sagði Halla Signý.
Öryrkjum hefur fjölgað undanfarin ár af margvíslegum ástæðum. Halla Signý hefur kallað eftir með þingsálylktun á Alþingi að heilbrigðisyfirvöld beiti sér fyrir fræðslu til almennings um vefjagigt, þessum þögla sjúkdómi. Mikilvægt sé að styrkja greiningarferlið og boðið sé upp á heildræna meðferð, byggða á niðurstöðum gagnreyndra rannsókna. Vill hún að viðurkennt sé að vefjagit sé stór þáttur í að fólk á öllum aldri detti út af vinnumarkaði. Sjúklingar einangrast á heimilum sínum með verkjasjúkdóma sem geri hann óvirkan, bæði á vinnumarkaði og sem þátttakanda í samfélaginu.
„Í einni auglýsingu segir að það sjáist hverjir drekka Kristal. Þeir sem eru með vefjagigt bera það ekki utan á sér. Þessi þingsályktunartillaga fær sennilega bíða úrlausnar á næsta þingi en vonandi nær hún þá í gegn. Það virðist vera stærri og mikilvægari mál, virðulegi forseti, sem þurfa að taka tíma hér á Alþingi, t.d. þurfa sumir þingmenn tíma til að upplýsa þjóðina um hvaða vá liggur fyrir henni ef Alþingi samþykkir að byggja undir sjálfstæði Orkustofnunar. Það sér ekki fyrir endann á þeirri ógn.
Það sést ekki á mér að ég drekki Kristal en vonandi ber ég með mér fyrir hvað ég stend,“ sagði Halla Signý.

• Þingsályktun: Fræðsla um og meðferð við vefjagigt.

 Ræða Höllu Signýjar Kristjánsdóttur, alþingismanns, í störfum þingsins á Alþingi 5. júní 2019.

Líneik Anna Sævarsdóttir, alþingismaður, ræddi mikilvægi menntunar fyrir matvælaframleiðslu í landinu í störfum þingsins á Alþingi í dag.
„Í morgun hlustaði ég á umfjöllun þar sem kallað var eftir fleiri nemendum í næringar- og matvælafræði en hlutfallslega færri mennta sig á því sviði hér en í löndunum í kringum okkur. Auk þekkingar á matvælafræði er undirstaða matvælaframleiðslu alltaf þekkingu á náttúrunni og náttúrulegum ferlum, svo sem úr líffræði og jarðfræði. Í búfræði fléttast svo saman þekking á náttúrunni, sjálfbærri landnýtingu og matvælaframleiðslu,“ sagði Líneik Anna.
Rakti Líneik Anna að nemum á sviði landbúnaðar og meistara- og doktorsnemum í landbúnaðarfræðum hafi fækkað stórlega. Þessari þróun sé mikilvægt að snúa við og að tryggt sé að á Íslandi séu til fræðimenn til að byggja á til framtíðar, með þekkingu á íslenskum aðstæðum og tengja hana aðþjóðlegri þekkingu. Fjöldinn allur af verkefnum er í landbúnaðarfræðum, en samt hafi fastráðnum vísindamönnum fækkað.
„Það vill svo til að sami menntunargrunnur er líka mjög mikilvægur fyrir þekkingu á allri sjálfbærri nýtingu náttúruauðlinda og umhverfisvernd, bæði fyrirbyggjandi aðgerðir og viðbrögð við hamfarahlýnun byggja á þekkingu,“ sagði Líneik Anna.
Ræða Líneikar Önnu Sævarsdóttur, alþingismanns, í störfum þingins á Alþingi 5. júní 2019.

Ríkisstjórn Framsóknarflokks, Sjálfstæðisflokks og Vinstrihreyfingarinnar – græns framboðs hefur kynnt að Ísland stefndi fyrst ríkja að banni á dreifingu á matvælum með sýklalyfjaónæmum bakteríum. „Þetta hefur verið mikið baráttumál Framsóknar eins og fólk hefur eflaust tekið eftir.
Í febrúar héldum við fjölmennan opinn fund þar sem Lance Price, prófessor við Washington háskóla og Karl G. Kristinsson prófessor við Háskóla Íslands og yfirlækni við sýklafræðideild Landspítalans fjölluðu um þá ógn sem heiminum stafar af sýklalyfjaónæmi.
Spár vísindamanna sýna að ef ekki er brugðist við af mikilli festu þá muni um 10 milljónir deyja af völdum sýklalyfjaónæmra baktería árið 2050, fleiri en af völdum krabbameins,“ þetta kemur fram í grein Sigurðar Ingi Jóhannssonar, samgöngu- og sveitarstjórnarráðherra, á frettabladid.is 29. maí s.l.
„Þessi framsókn Íslands gegn sýklalyfjaónæmi er tengd því sem oft er kallað hráa-kjöts-málið. Við í Framsókn höfum lagt gríðarlega áherslu á það í vinnu við þingsályktun og lagafrumvarp að tryggja það að lýðheilsa þjóðarinnar og heilbrigði dýra séu eins og best verður á kosið og að íslenskur landbúnaður keppi á jafnréttisgrundvelli við innflutt matvæli.
Við höfum óttast að óheftur innflutningur matvæla frá svæðum með stórum verksmiðjubúum þar sem dýraheilbrigði er fyrir borð borið myndi refsa íslenskum matvælaframleiðendum fyrir að framleiða hágæða matvæli og einfaldlega knýja þá til að draga úr gæðum í framleiðslu. Með þeim aðgerðum sem boðaðar hafa verið er íslenskur landbúnaður í sókn en ekki vörn.
Þess ber að geta að bann við sýklalyfjaónæmum bakteríum í matvælum nær ekki aðeins til kjöts heldur einnig annarra matvæla, svo sem grænmetis,“ segir Sigurður Ingi.

• Framsókn gegn sýklalyfjaónæmi.

„Það er jákvætt hversu margir velja að læra erlendis. Við eigum að hvetja ungt fólk til að afla sér þekk­ing­ar sem víðast og skapa því viðeig­andi um­gjörð sem ger­ir því það kleift. Í störf­um mín­um sem mennta- og menn­ing­ar­málaráðherra legg ég mikla áherslu á að styrkja ís­lenskt mennta­kerfi, til dæm­is með því að bæta starfs­um­hverfi kenn­ara, en ekki síður að við horf­um út í heim og rækt­um góð sam­skipti við aðrar þjóðir á sviði mennta-, vís­inda- og menn­ing­ar­mála. Und­an­farið hafa náðst ánægju­leg­ir áfang­ar á þeirri veg­ferð sem fjölga tæki­fær­um okk­ar er­lend­is.“ Þetta skrifar Lilja Dögg Alfreðsdóttir, mennta- og menningarmálaráðherra, í grein er birtist í Morgunblaðinu 18. maí s.l.
Tímamótasamingur um aukið sam­starf í mennta­mál­um á milli Íslands og Kína var undirritaður í opinberri heimsókn Lilju Alfreðsdóttur þar í landi. Með samningunum er stuðlað að gagn­kvæmri viður­kenn­ingu á námi milli land­anna. „Kína hef­ur gert hliðstæða samn­inga við rúm­lega 50 önn­ur ríki, þar á meðal við hin nor­rænu lönd­in. Rúm­lega 30 kín­versk­ir náms­menn stunda nú nám á Íslandi en um 30 Íslend­ing­ar stunda nám í Kína á ári hverju en ís­lensk­ir há­skól­ar eiga þegar í marg­vís­legu sam­starfi við kín­verska há­skóla,“ segir Lilja Dögg.

• Vöxtur í alþjóðlegu menntasamstarfi.

Ásmundur Einar Daðason, félags- og barnamálaráðherra, minnti okkur á alþjóðlegan dag fjölskyldunnar í grein í Fréttablaðinu 15. maí s.l. En Sameinuðu þjóðirnar tileinka á hverju ári 15. maí málefnum „fjölskyldunnar“. „Ástæðan er sú að þótt fjölskyldur séu jafn ólíkar og þær eru margar eru þær grunnstoð samfélagsins og erfitt að finna aðra einingu innan þess sem gegnir jafn þýðingarmiklu og flóknu hlutverki,“ segir Ásmundur Einar.
„Í ár leggja Sameinuðu þjóðirnar sérstaka áherslu á mikilvægi fjölskyldunnar þegar kemur að aðgerðum í loftslagsmálum en undanfarið hafa loftslagsbreytingar af mannavöldum verið í brennidepli. Stór verkefni eru fram undan til að Ísland nái markmiðum sínum í þeim efnum og ljóst að þeim verður ekki náð nema með átaki samfélagsins í heild. Þar hefur ekki skort þátttöku íslenskra barna og unglinga sem meðal annars hafa skipulagt loftslagsverkföll á Austurvelli og víðar um landið síðustu mánuði. Þrátt fyrir að kolefnisfótspor hverrar fjölskyldu sé lítið í stóra samhenginu er ljóst að fjölskyldur landsins munu í sameiningu gegna risastóru hlutverki í baráttunni fram undan,“ segir Ásmundur Einar.

• Grunnstoð samfélagsins

Halla Signý Kristjánsdóttir, alþingismaður og framsögumaður meirihluta velferðarnefndar Alþingis, fylgdi vel á eftir áherslum Framsóknarmanna í meðförum Alþingis á þingsályktun heilbrigðisráðherra „Heilbrigðisstefnu til ársins 2030“ á Alþingi í gær.
„Hér er verið að setja ramma utan um heilbrigðisstefnuna til 2030 og það sem á að rúmast innan hennar skal vera sett í aðgerðaáætlun. Það er mjög mikilvægt að þessi heilbrigðisstefna landsins fylgi ekki duttlungum hverrar ríkisstjórnar fyrir sig, að settur verði ákveðinn rammi sem við getum sætt okkur við,“ sagði Halla Signý.
Hún sagði ennfremur að „hér erum við að taka tillit til allra þegna, hvort sem er í fæðingu eða á hjúkrunarheimili, þannig að allir njóti sömu réttinda hvar á landinu sem þeir búa og á hvaða aldri sem þeir eru.“
Atkvæðaskýring, Höllu Signýjar Kristjánsdóttur, alþingismanns og framsögumanns meirihluta velferðarnefndar Alþingis, 3. júní 2019.

Framsókn hefur lagt áherslu á að innlend heilbrigðisþjónusta verði áfram í fremstu röð, að við nýtum fjármuni betur og eflum þjónustu heilsugæslunnar sem fyrsta viðkomustaðar. Við viljum vinna að sameiningu greiðsluþátttökukerfis læknisþjónustu og lyfja. Að tryggt sé að tannlækninga-, sálfræði og ferðakostnaður sjúklinga falli undir greiðsluþátttökukerfið. Fólk á aldrei að þurfa að glíma við fjárhagsörðugleika vegna veikinda sinna, barna eða skyldmenna. Takmarkið er að veikir borgi ekki.
Heilbrigðisráðherra verður nú í framhaldi falið það verkefni að leggja fram aðgerðaáætlanir til fimm ára í senn, sem verði endurskoðaðar árlega og teknar til umræðu á Alþingi.
Markmið heilbrigðisstefnu er um rétta þjónusta á réttum stað og fólkið í forgrunni.

• Tillaga til þingsályktunar um heilbrigðisstefnu til ársins 2030.

Ræða Höllu Signýjar Kristjánsdóttur, alþingismanns og framsögumaður meirihluta velferðarnefndar Alþingis 14. maí 2019:

Halla Signý Kristjánsdóttir, alþingismaður, var ræðumaður Framsóknar í eldhúsdagsumræðum á Alþingi í vikunni. Sagði Halla Signý ríkisstjórnina náð góðum samhljómi, mörg mál verið tekin fyrir á Alþingi á þessu þingi, sem munu koma þjóðinni til góða til framtíðar.
Halla Signý nefndi sérstaklega byggða- og atvinnumál í ræðu sinni, og þá sérstaklega breytingar á lögum um fiskeldi sem munu skipta þjóðarbúið miklu máli. Að vanda verði lagaramma og kröfur til eldisfyrirtækja og að greinin muni skila ríkissjóði umtalsverðum tekjum á næstu árum. Minnti hún á að Íslendingar hafi háleit markmið varðandi umhverfi og náttúru, og að gæta verði sérstaklega að heilbrigði dýra og umhverfis svo að fiskeldi verði byggt upp til sjálfbærni, vistfræðilega, félagslega og efnahagslega. En fara verði að ýtrustu nærgætni við starfsemina og að hið opinbera tryggi gott og vandað aðhald og eftirlit. Það verði enginn afsláttur gefinn, „enda erum við sprottin af sterkri náttúru og verðum hluti af henni að lokum,“ sagði Halla Signý.
Ræddi Halla Signý fyrirvara þingflokks Framsóknarmanna við frumvarp á reglum um innflutning á ferskum matvælum, talaði um mikilvægi sömu gæðakrafna til innflutra matvæla frá EES svæðinu og gerðar séu til íslenskrar matvælaframleiðslu. Og brýndi fyrir áheyrendum að lýðheilsa beri ekki skaða af innflutningi vegna sýktra matvæla.
„Tilgangur matvælalöggjafar EES snýr að því að auka gæði matvæla og bæta stöðu neytenda. Því er mikilvægt að sömu kröfur séu gerðar til innlendrar matvælaframleiðslu og innfluttrar.
Framsóknarflokkurinn hefur í vetur tekið sér stöðu og vera óhræddur við að benda á þá ógn sem við stöndum frammi fyrir hvað varðar fjölónæmar bakteríur. Þær áhyggjur eru ekki gripnar úr lausu lofti en samkvæmt Alþjóðaheilbrigðismálastofnuninni er sýklalyfjaónæmi ein mesta ógn sem heilsufar manna stendur frammi fyrir í dag. Undir það taka helstu sérfræðingar okkar á sviði sýkla- og veirufræða og hafa brýnt fyrir okkur að verja þurfi þá sérstöðu sem við búum við á Íslandi. Á grunni sérstöðunnar á Íslandi á Ísland að vera í fararbroddi í aðgerðum til að draga úr útbreiðslu sýklalyfjaónæmis með banni á dreifingu matvæla sem í greinast sýklalyfjaónæmar bakteríur,“ sagði Halla Signý.
Halla Signý bætti við, að „kolefnisfótspor og önnur umhverfisáhrif íslensks grænmetis og annarra afurða garðyrkjunnar eru miklu minni en þess innflutta. Því er í ljósi fæðuöryggis, umhverfisþátta og orkunýtingar skynsamlegt að hvetja til meiri innlendrar framleiðslu.“
Ræða Höllu Signýjar Kristjánsdóttur á eldhúsdegi á Alþingi 29. maí.

Líneik Anna Sævarsdóttir, alþingismaður, var ræðumaður Framsóknar í eldhúsdagsumræðum á Alþingi í vikunni. Líneik Anna vildi minna á frumkvæði Framsóknarmanna á töluverða umfjöllun um auðlindir á landi, svo sem um:

• um landnýtingu,
• ráðstöfun og eignarhald jarða,
• ráðstöfun og nýtingu takmarkaðra auðlinda á landi,
• fyrirkomulag samstarfs um skipulag,
• nýtingu og vernd miðhálendisins og náttúruverndarsvæða,
• nýtingu lands í vinnunni gegn loftslagsbreytingum,
• ný heildarlög, bæði um landgræðslu og skógrækt.

Kom Líneik Anna inn á að allt landið sé auðlind sem nýtist í margt, svo sem til matvælaframleiðslu og sem aðdráttarafl ferðamanna. Landi geti fylgt hlunnindi eins og veiði-, námu- og vatnsréttindi. „Það felast miklir almannahagsmunir í ráðstöfun og meðferð lands og því geta ekki gilt sömu reglur um kaup og sölu á landi og um hverja aðra fasteign væri að ræða,“ sagði Líneik Anna. Og í framhaldi benti hún á að tryggja verði eignarhald landsmanna og að takmarka fjölda jarðeigna í eignarhaldi sömu aðila, einnig nefndi hún að skýra verði ábyrgð og skyldur þeirra sem fara með ráðstöfunarrétt á landi. Nefndi Líneik Anna að nýta eigi skipulag betur sem stjórntæki við landnýtingu og bæta skráningu landeigna.
„Ég hef miklar væntingar til vinnu sem nú er unnin á vegum ríkisstjórnarinnar um endurskoðun laga og reglna varðandi eignarhald á landi og fasteignum,“ sagði Líneik Anna.
Líneik Anna kom inn á í ræðu sinni vinnu við gróður- og jarðvegsvernd, endurheimt vistkerfa og uppbyggingu gróðurauðlindar og minnti á sú vinna veltur á miklu að rækta samstarf við bændur og aðra sem beri ábyrgð á landi eða búa í strjálbýli. Minnti á Líneik Anna á mikilvægi þess að flétta saman sem flest markmið uppbyggingar, verndar og sjálfbærrar nýtingar við landnotkun, landgræðslu, skógrækt og landvörslu. „Samvinna skilar samfélagslegum ávinningi langt umfram það sem gerist ef hver vinnur í sínu horni. Þar á meðal er skilgreind nágrannavarsla við náttúruperlur og viðkvæm svæði. Við vorum svo rækilega minnt á það nú í vor, þegar ryk frá Sahara fauk yfir landið, að alþjóðasamfélagið þarf að leggja miklu meiri áherslu á landgræðslu í baráttunni gegn fátækt og loftslagsvánni,“ sagði Líneik Anna.
„Öll verkefni stjórnmálanna eru samvinnuverkefni sem hríslast um allt samfélagið. Vinna okkar þarf að sameina krafta og hvetja til þróunar á öllum sviðum. Við getum aldrei leyft okkur að hafa bara eitt mál á dagskrá og það er aldrei nóg að segja nei, það þarf alltaf að finna lausnir. Bestu óskir um gott sumar um allt land. Áfram veginn,“ sagði Líneik Anna.
Ræða Líneikar Önnu Sævarsdóttur á eldhúsdegi á Alþingi 29. maí 2019.

Willum Þór Þórsson, alþingismaður, var ræðumaður Framsóknar í eldhúsdagsumræðum á Alþingi í vikunni. Í ræðu sinni fór hann yfir mikilvægi þess að ákvarðanir Alþingis fyrir landsmenn, atvinnulíf og heimili hafi góðáhrif til framtíðar, að alþingismenn allir séu þátttakendur í móta jöfn tækifæri fyrir alla til að nýta krafta sína, tækni og hugvit til framfærslu og framfara fyrir land og þjóð. Kraftmikið samkeppnishæft atvinnulíf sé gunnur lífsgæða og bættra lífskjara.
Framsýni, samvinna og samstaða einkennir störf ríkisstjórnarinnar sagði Willum Þór og sagði þessa stefnu ríma vel við áherslur og stefnu Framsóknar. Fjárlög ársins 2019 endurspegluðu hagvöxt á liðnum árum, þar sem áfram sé verið að byggja upp samfélagslega innviði á sama tíma og greitt er af skuldum. Aukin séu framlög til samgöngumála og fjarskipta þar sem uppsöfnuð viðhalds- og nýfjárfestingarþörf er hvað mest, til heilbrigðis- og velferðarmála, menntamála, nýsköpunar og rannsókna og umhverfis- og loftslagsmála.
Lífskjarasamningarnir leggja frekari grunn að „efnahagslegum og félagslegum stöðugleika. Í þeim felst aukinn jöfnuður þar sem áherslan er á tekjulægri hópa og barnafjölskyldur með skattkerfisbreytingum og lægri sköttum, hækkuðum barnabótum, lengra fæðingarorlofi og hærri orlofsgreiðslum. Samanlagt geta til að mynda ráðstöfunartekjur fjögurra manna fjölskyldu aukist um 411.000 kr. á ári,“ sagði Willum Þór og minnti einnig á fjölmargar lausnir á sviði húsnæðismála:

• aðstoð við fyrstu kaup,
• aukið framboð á félagslegu húsnæði,
• nýting séreignarsparnaðar og tilgreindrar séreignar, „svissneska leiðin“
• endurskoðun á húsnæðislið vísitölunnar og verðtryggingar

„Lífskjarasamningarnir eru gífurlega mikilvægt innlegg og gefa svigrúm til vaxtalækkunar Seðlabankans sem um leið er merki um aukinn styrk hagkerfisins, trúverðugleika bankans og sjálfstæða stefnu. Það hefur lengi verið kallað eftir því að peningamálastefna og ríkisfjármálastefna togi í sömu átt.“
Hvað er skynsamlegast að gera fyrir land og þjóð?
„Mér finnst svarið blasa við: Ábyrg stefna og sterk staða ríkissjóðs gerir það að verkum að við erum í færum til að halda áfram samfélagslegri uppbyggingu, að bæta í skynsamlegar innviðafjárfestingar og stuðla að sjálfbærum hagvexti til góða fyrir alla landsmenn,“ sagði Willum Þór.
Ræða Willum Þórs Þórssonar á eldhúsdegi á Alþingi 29. maí 2019.

Halla Signý Kristjánsdóttir, alþingismaður, segir í yfirlýsingu í gær, að Ísland geti „verið í fararbroddi í aðgerðum til að draga úr útbreiðslu sýklalyfjaónæmis með banni á dreifingu matvæla sem í greinist sýklalyfjaónæmar bakteríur“. Meginstefið í áherslum Framsóknarmanna er að ná því fram að banna ætti dreifingu matvæla sem innihalda kampýlóbakter, salmónellu og fjölónæmar bakteríur.
Þegar hrákjötsfrumvarpið var lagt fyrir Alþingi í vetur bókaði þingflokkur Framsóknarmanna fyrirvara um málið og hefur verð unnið eftir í meðferð málsins í atvinnuveganefnd Alþingis. Fyrirvararnir snúa að því að:

• sömu gæðakröfur verði gerðar til innfluttra matvæla frá Evrópska efnahagssvæðinu og gerðar eru til íslenskrar matvælaframleiðslu.
• lýðheilsa beri ekki skaða af innflutningi vegna sýktra matvæla.

„Framsóknarflokkurinn hefur í vetur tekið sér stöðu og verið óhræddur við að benda á þá ógn sem við stöndum frammi fyrir hvað varðar fjölónæmar bakteríur. Fjölmennur fundur var haldinn á Hótel Sögu þar sem okkar helsti sérfræðingur Karl G. Kristinsson, prófessor í sýklafræði við læknadeild Háskóla Íslands, og yfirlæknir við sýkla- og veirufræðideild Landspítalans, fór yfir staðreyndir málsins. Auk þess sem við fengum Lance Price, prófessor George Washington-háskóla, og stjórnanda rannsóknaseturs skólans sem rannsakar ónæmi gegn sýklalyfjum. Hann brýndi fyrir fundarmönnum að verja þyrfti þá sérstöðu sem við búum við á Íslandi. Á grunni sérstöðunnar ættum við möguleika á að banna dreifingu á matvælum sem innihalda fjölónæmar bakteríur til að verja lýðheilsu manna og heilbrigði búfjár í landinu,“ segir Halla Signý.