Month: May 2016

„Hæstv. forseti. Ég hef átt sæti í þingskapanefnd Alþingis síðan ég tók sæti á Alþingi fyrir þremur árum. Hlutverk þingskapanefndar er að endurskoða lög um þingsköp og markmiðið er að bæta skilvirkni og ásýnd Alþingis sem er okkur öllum mjög hugleikin. Lítið hefur gerst í nefndinni í vetur þar sem við höfum rekið okkur á að nauðsynlegar breytingar sem mundu gera störf þingsins skilvirkari og ásýnd þingsins betri hanga á ákveðnum stjórnarskrárbreytingum, þannig að starf nefndarinnar er í raun stopp í bili.
En hvaða breytingar er ég að tala um? Jú, ég hallast t.d. að því að þegar umdeild stór mál stöðvast í þinginu verði að vera hægt að vísa þeim í þjóðaratkvæðagreiðslu, samanber í danska þinginu. Með slíku fyrirkomulagi mundum við geta komist hjá langdregnu málþófi sem kostar bæði tíma og peninga og hefur verulega neikvæð áhrif á ímynd þingsins.
Ég vil einnig nefna reglur um líftíma þingmála. Ég tel að þingmál eigi að fá að lifa kjörtímabilið til að auka skilvirkni þingsins en nú er staðan þannig að við þurfum alltaf að byrja á byrjuninni við setningu nýs þings, hvert einasta haust, leggja sömu málin fram að nýju, bíða eftir að fá að mæla fyrir þeim, fá umsagnir frá sama fólki og síðast o.s.frv. Það er algjör tímasóun að mínu mati sem kemur í veg fyrir að þjóðþrifamál fáist hér afgreidd.
Hæstv. forseti. Varðandi líftíma mála kemur fram í minnisblaði frá Ásmundi Helgasyni, fyrrverandi aðallögfræðingi Alþingis, frá 18. september 2008 að sú regla 48. gr. þingskapa, áður 52. gr. þingskapa, um að þingmál sem ekki hafi hlotið lokaafgreiðslu við þinglok falli niður — þetta er svokölluð discontinuitets-regla — verði ekki afnumin nema með stjórnarskrárbreytingu. Byggir hann niðurstöðu sína á því að um sé að ræða stjórnskipunarvenju sem verði ekki vikið til hliðar nema með stjórnarskrárbreytingu. Þessi niðurstaða er þó álitamál sem okkur hér ber skylda til að fara nánar í saumana á.“
Silja Dögg Gunnarsdóttir í störfum þingsins 25. maí 2016.

Sigurður Ingi Jóhannsson forsætisráðherra flutti setningarræðu á ráðstefnu um mikilvægi heilsueflingar á íslenskum vinnumarkaði í síðustu viku. Fór hann m.a. yfir að lýðheilsa og forvarnarstarf séu meðal forgangsverkefna ríkisstjórnarinnar, enda hægt að draga úr beinum og óbeinum kostnaði fyrir samfélagið. Unnið hefur verið að drögum að lýðheilsustefnu sem verður kynnt innan tíðar.
Verkefnið hefur vakið athygli Alþjóðaheilbrigðismálastofnunarinnar WHO og telur hún það til fyrirmyndar þar sem unnið er þvert á ráðuneyti, með víðtæku samstarfi sérfræðinga og hagsmunaaðila. Einnig að áhersla sé lögð á heilsu í allar stefnur og að sveitarfélög á Íslandi verði heilsueflandi samfélög.
Sigurður Ingi sagði „að framkvæmd lýðheilsustefnunnar sé þegar hafin. En embætti landlæknis hefur um skeið unnið gott starf þar, meðal annars með heilsueflandi leikskóla, grunnskóla og framhaldsskóla“.
Ræða Sigurðar Inga Jóhannssonar forsætisráðherra í heild sinni:
„Ágætu málþingsgestir.
Það er mér ánægja að ávarpa ykkur hér, á málþingi um mikilvægi heilsueflingar á íslenskum vinnumarkaði.
Eitt það mikilvægasta í lífi hvers manns er góð heilsa, líkamleg, andleg og félagsleg. Við þekkjum það Íslendingar að vinna langan vinnudag, lengri en margar aðrar þjóðir. Ef svefninn er frátalinn þá dveljum við flest lengur á vinnustaðnum, eða við vinnu en á nokkrum öðrum stað samanlagt. Þessi staðreynd vekur mann til umhugsunar um mikilvægi heilsueflingar á vinnustöðum.
Ætli það skipti máli að boðið sé upp á vatn og ávexti á áberandi stað á vinnustaðnum og á fundum – eða allt sé vaðandi í óhollustu? Jú, líklega er hollara að borða ávexti á milli reglulegra máltíða sem eru ríkir af vítamínum, en að skófla í sig sykurvörum sem oft eru án allra næringarefna.
Áríðandi er að á vinnustöðum sé stuðlað að hreyfingu starfsmanna með hvatningu, sveigjanleika og góðri aðstöðu. Keppikeflið ætti að vera að auka hreysti, bæta heilsu og þar með afköst.
Fram kemur í stefnuyfirlýsingu ríkisstjórnarinnar að lýðheilsa og forvarnastarf verði meðal forgangsverkefna. Með því móti er hægt að draga úr beinum og óbeinum kostnaði fyrir samfélagið. Til að vinna að þessu var sérstök ráðherranefnd um lýðheilsu stofnuð 2014 og geta allir ráðherrar ríkisstjórnarinnar komið þar að borði. Lýðheilsunefnd, samráðshópur á forræði velferðarráðherra, vann drög að lýðheilsustefnu sem velferðarráðherra mun kynna í ráðherranefndinni innan tíðar.
Stofnun ráðherranefndarinnar hefur hlotið athygli út fyrir landssteinana. Alþjóðaheilbrigðismálastofnunin WHO telur verkefnið til fyrirmyndar þar sem unnið er þvert á ráðuneyti, með víðtæku samstarfi sérfræðinga og hagsmunaaðila. Einnig að áhersla sé lögð á heilsu í allar stefnur og að sveitarfélög á Íslandi verði heilsueflandi samfélög.
Segja má að framkvæmd lýðheilsustefnunnar sé þegar hafin. En embætti landlæknis hefur um skeið unnið gott starf þar, meðal annars með heilsueflandi leikskóla, grunnskóla og framhaldsskóla.
Heilsa í allar stefnur, á ábyrgð forsætisráðuneytis er meðal aðgerða í lýðheilsustefnunni og byggist á þeirri hugmyndafræði að við stefnumótun og aðra áætlanagerð stjórnvalda verði gætt að áhrifum á heilsu og líðan einstaklinga. Ekki er hugmyndin að finna upp hjólið því hægt er að líta til nágrannaþjóða okkar. Finnar hafa verið brautryðjendur í að innleiða heilsu í allar stefnur og Norðmenn hafa sett sér lög um lýðheilsu.
Hér á landi væri mikilvægt að draga úr heilsufarslegum ójöfnuði milli hópa í samfélaginu og stuðla að því að allir geti lifað heilbrigðu lífi og auka þannig starfsgetu og aðra færni fram á efri ár.
Eins og ég nefndi þurfa stjórnvöld í ríkara mæli að kynna sér með hvaða hætti hægt er að hafa áhrif, efla forvarnir og sporna gegn svo kölluðum lífsstílssjúkdómum. Í því sambandi er nú til skoðunar tilraunaverkefni í nokkrum sveitarfélögum sem nefnist: Fjölþætt heilsurækt – leið að farsælli öldrun. Verkefnið byggist á doktorsrannsókn sem sýnir að með fjölþættri þjálfun eldra fólks megi bæta heilsu þess og hreysti.
Þekking á heilsu og forvörnum fleygir fram og það skiptir máli að virkja sem flesta til þátttöku. Hver og einn þarf að bera ábyrgð á sinni heilsu, hreyfingu og mataræði, en aðstæður, ákvarðanir stjórnenda og fyrirmyndir á vinnustað skipta vafalítið einnig máli. Stjórnvöld og vinnumarkaðurinn þurfa því að hvetja til heilsueflingar þegar fólk er við störf.
Góðir gestir. Þrátt fyrir annasöm störf verðum við að gefa okkur tíma til að huga að heilsunni Við þurfum öll að setja hreyfinguna á dagskrá og venja okkur á að borða hollan og góðan mat.
Ég segi málþingið sett.“

„Hæstv. forseti. Um þessar mundir birtast margar jákvæðar fréttir af lífskjörum þjóðarinnar. Engum dylst að horfur í efnahagslífinu á Íslandi eru bjartar um þessar mundir og gangi spá hagdeildar ASÍ eftir verður samfelldur hagvöxtur hér á landi næstu átta ár. Vöxturinn hvílir á styrkum stoðum í hagkerfinu og við sjáum birtingarmynd þess í því að kaupmáttur launa hefur aukist verulega á síðustu missirum.
Laun hafa hækkað mikið um leið og verðbólga hefur haldist lág. Almenningur finnur áhrifin í auknum ráðstöfunartekjum samfara lækkandi skuldum en skuldir heimilanna hafa lækkað mikið á síðustu árum og vanskilum fækkað verulega. Veðsetningarhlutfall heimilanna hefur einnig lækkað mikið. Augljóst er að skuldalækkunaraðgerðir ríkisstjórnarinnar hafa tekist mjög vel og styrkt stöðu heimilanna í landinu eins og að var stefnt. Staða ríkissjóðs hefur stórbatnað vegna vel heppnaðrar áætlunar um losun hafta og stöðugleikaframlög og erlend staða þjóðarbúsins er sú besta í a.m.k. hálfa öld.
Það sem af er kjörtímabilinu hefur 40 milljörðum kr. verið varið til heilbrigðismála. Í fjármálaáætlun ríkisstjórnarinnar er gert ráð fyrir að framlög til heilbrigðismála verði aukin verulega á næstu árum þannig að þau verði orðin ríflega 30 milljörðum kr. hærri árið 2021. Mikil vinna hefur verið lögð í að skapa nýtt húsnæðiskerfi og jafna stöðu leigjenda og húseigenda en ég geri ráð fyrir að Alþingi samþykki þrjú að fjórum frumvörpum húsnæðismálaráðherra á næstu dögum, þ.e. húsaleigulög, almennar íbúðir og húsnæðisbætur. Frumvarp um húsnæðissamvinnufélög hefur þegar verið samþykkt.
Við hljótum að geta verið sammála um að þetta er einstakur árangur á aðeins þremur árum. Hagvöxtur og stöðugleiki kemur öllum til góða. Í ljósi þess tel ég að það hafi verið vanhugsað að samþykkja kosningar nú í haust. Ég tel að hagsmunum Íslands sé best borgið með því að leyfa núverandi ríkisstjórn að klára kjörtímabilið, að hún fái að halda áfram með aðkallandi verkefni — og helst næsta, já — og leggja frekari grunn að áframhaldandi framförum hér á landi og uppbyggingu í landinu öllu.“
Silja Dögg Gunnarsdóttir í störfum þingsins 24. maí 2016.

Verkefnisstjórn verndar- og orkunýtingaráætlunar mun skila inn tillögum um flokkun virkjunarkosta til Sigrúnar Magnúsdóttur, umhverfis- og auðlindaráðherra, 1. september 2016.
Opið 12 vikna lögbundið umsagnarferli stendur nú yfir þar sem almenningi og öðrum hagsmunaaðilum gefst kostur á að koma athugasemdum á framfæri. Umsagnarferlingu lýkur á miðnætti miðvikudaginn 3. ágúst 2016.
Drög að endurskoðaðri skýrslu endurskoðaða lokaskýrslu voru lögð fram þar sem gerðar eru tillögur um flokkun 26 virkjunarkosta og landsvæða.
Verkefnisstjórn leggur til að eftirfarandi kostir fari í orkunýtingarflokk:  Skrokkölduvirkjun, Holtavirkjun, Urriðafossvirkjun, Austurgilsvirkjun, Austurengjar, Hverahlíð II, Þverárdalur og Blöndulundur.
Í verndarflokk fari fjögur svæði með eftirtöldum virkjunarkostum:  Héraðsvötn (Villinganesvirkjun, Skatastaðavirkjanir C og D), Skjálfandafljót (Fljótshnúksvirkjun og Hrafnabjargavirkjanir A, B og C), Skaftá (Búlandsvirkjun) og Þjórsá vestur (Kjalölduveita).
Í biðflokk fari tveir virkjunarkostir í Hólmsá (við Atley og án miðlunar), Búðartunguvirkjun, Hagavatnsvirkjun, Stóra-Laxá, Trölladyngja, Innstidalur, Hágönguvirkjun, Fremrinámar og Búrfellslundur.
Skýrslu verkefnisstjórnar með tillögum hennar að flokkun virkjunarkosta, auk fylgigagna, er að finna undir flipanum „Kynningargögn“. Jafnframt er kallað eftir umsögnum vegna umhverfismats áætlana, sem er að finna sem viðauka við skýrslu verkefnisstjórnar.
Hægt er að senda inn umsögn rafrænt með því að velja flipann „Senda umsögn“. Að lokum er hægt að kynna sér þegar innsendar umsagnir undir samnefndum flipa.
https://www.ramma.is/rammaaaetlun/samrad/umsagnir-2016