Category: Greinar

Categories
Greinar

En hvað með ung­dóminn, Guð­mundur?

Deila grein

09/05/2022

En hvað með ung­dóminn, Guð­mundur?

Eftir að hafa skrifað 2 greinar um það að eldast, sem greinilega voru lesnar og takk fyrir það, þá fékk ég spurninguna en hvað með ungdóminn?

Einhver ykkar vita að ég vinn í umhverfi þar sem eitthvað hefur farið úrskeiðis hjá ungdómnum okkar. Gott fólk úr okkar röðum hefur bent á að fyrir hverja krónu sem við verjum í upphafi þroskaferils barns erum við að spara 7-8 krónur á seinni stigum. Fyrir hverja milljón, sparast 7-8 milljónir. Er einhver í stjórnmálum til í að segja og sækja fylgi, með því að ætla að ná sparnaði í rekstri bæjarfélagsins eftir 8-12 ár. Viðkomandi þá jafnvel löngu hættur í stjórnmálum og enginn man neitt. Ég ætla að leyfa mér að benda á nokkur atriði í okkar bæjarfélagi sem er samt komið af stað í þessari vinnu, án þess að sérstaklega mikill kostnaður fylgi því, en gætu vissulega nýtt meiri pening til að gera meira. Það eru t.d. ekki öll íþróttafélög með mestan fókus á afreksíþróttir. Tökum Brettafélagið, Siglingaklúbbinn og Hestamannafélagið Sörla sem dæmi. Þessi félög ná að hlúa að einstaklingum sem eru ekki eins og við flest, finna þeirra styrkleika og leyfa þeim að njóta, án þess að þau séu að færa bikara og titla í hús. Þetta eru einstaklingar sem annars myndu hörfa undan álagi afreksíþrótta og jafnvel fara út af sporinu. Það er alveg ljóst að þessir einstaklingar og fjölskyldur þeirra eru að njóta góðs af þessari starfsemi og þeirri meðvituðu ákvörðun þeirra sem stjórna þar, að hlúa að þeim. Það kom mér skemmtilega á óvart þegar ég fékk að fylgja með í heimsókn til þessara félaga, þó ég hafi reyndar ekki kíkt á hestana, enda þekktur fyrir að vilja frekar borða þá, hvað það er verið að gera mikið í þágu samfélagsins og þeirra sem vilja fá að njóta íþrótta og útivistar, en ekki endilega að vera að mæta á fullt af mótum og meira krefjandi æfingum.

Síðan er það starfsemi eins og Ungmennahúsið Hamarinn við Suðurgötu, undir stjórn Margrétar Gauju. Sú starfsemi er ekki lögbundin þjónusta sveitarfélagsins. Vil ég þakka sérstaklega þeim sem höfðu þá fyrirhyggju að koma þessari starfsemi á koppinn og leyfa henni að halda áfram. Þangað sækja einstaklingar sem eru jafnvel félagslega einangraðir og eiga í erfiðleikum með að bjóða heim vinum og kunningjum vegna ástands heima fyrir. Þar hefur einnig aðstöðu Bergið headspace. Bergið er stuðnings- og ráðgjafasetur fyrir ungt fólk upp að 25 ára aldri. Markmið Bergsins er að bjóða upp á lágþröskuldaþjónustu með áherslu á stuðning, fræðslu og ráðgjöf. Í Berginu er lagt upp með að skapa notalegt og öruggt umhverfi fyrir ungt fólk sem vill fá aðstoð fagfólks og notenda með fjölbreytta reynslu. Einu sinni í viku er ráðgjafi frá Berginu í Hamrinum og er Hafnarfjörður eina sveitarfélagið á landinu sem býður upp á þetta. Í Hamrinum eru allir velkomnir, þar er meðal annars tekið á móti ungmennum úr hópi flóttafólks, þar er starfsemi kynsegin einstaklinga… orð sem ég er enn að átta mig á, krökkunum í Flensborg sem kíkja við í frímínútum og eyðum vegna nálægðar við skólann.

Það er alltaf hægt að gera betur og í sumum tilfellum mikið betur. Það að fjárfesta nógu snemma verður til þess að rekstur síðar meir verður ekki eins kostnaðarsamur. Þetta snýst heldur ekki allt um peninga. Það að gera betur í upphafi skilar sér einnig í bættri líðan hjá viðkomandi einstaklingum og eins fjölskyldum þeirra og það jafnvel út ævina. Við hjá Framsókn í Hafnarfirði viljum gera betur.

Guðmundur Fylkisson

Höfundur skipar 6. sæti á lista Framsóknarflokksins í Hafnarfirði.

Greinin birtist fyrst á visir.is 9. maí 2022.

Categories
Fréttir Greinar

Framsókn um allt land!

Deila grein

09/05/2022

Framsókn um allt land!

Í dag eru fimm dag­ar til sveit­ar­stjórn­ar­kosn­inga í land­inu þar sem um 277.000 kjós­end­ur munu hafa tæki­færi til að tjá hug sinn með at­kvæðum sín­um. Sveit­ar­stjórn­ar­mál skipta miklu máli í því góða lýðræðis­sam­fé­lagi sem við búum í. Á vett­vangi þeirra stíga marg­ir sín fyrstu skref í stjórn­mál­um og fé­lags­störf­um til þess að bæta sam­fé­lag sitt og auka lífs­gæði íbú­anna. Sveit­ar­fé­lög­in eru ábyrg fyr­ir að veita mik­il­væga og fjöl­breytta nærþjón­ustu sem snert­ir hag fólks með bein­um hætti á hverj­um ein­asta degi – til dæm­is með því að viðhalda litl­um um­ferðargöt­um, fjar­lægja rusl, skipu­leggja og út­hluta lóðum, veita barna­fjöl­skyld­um ýmsa stoðþjón­ustu, halda úti leik- og grunn­skól­um og þjón­usta eldri borg­ara.

Í fjöl­mörg­um sveit­ar­fé­lög­um hring­inn um landið býður Fram­sókn fram öfl­uga lista, skipaða fólki sem brenn­ur fyr­ir það að gera sam­fé­lagið sitt betra en það var í gær. Fram­bjóðend­ur flokks­ins koma úr ýms­um átt­um, nestaðir með fjöl­breytt­um bak­grunni, reynslu og þekk­ingu sem nýt­ist með ýmsu móti til þess að auka vel­sæld íbú­anna. Það er ánægju­legt að finna fyr­ir og heyra af þeim mikla meðbyr sem fram­bjóðend­ur Fram­sókn­ar finna út um allt land. All­ir eiga þeir það sam­eig­in­legt að vilja vinna sam­vinnu­hug­sjón­inni braut­ar­gengi og stuðla að upp­byggi­leg­um stjórn­mál­um út frá miðjunni. Sem miðju­flokk­ur legg­ur Fram­sókn áherslu á praktísk­ar og öfga­laus­ar lausn­ir sem eru til þess falln­ar að bæta líf fólks ásamt því að geta unnið með ólík­um stjórn­mála­flokk­um til þess að bæta sam­fé­lagið. Það hef­ur flokk­ur­inn margoft gert með góðum ár­angri; að brúa bilið milli ólíkra sjón­ar­miða til þess að ná ár­angri fyr­ir land og þjóð. Við í Fram­sókn segj­um gjarn­an að sam­fé­lag sé sam­vinnu­verk­efni og í því er fólg­inn mik­ill sann­leik­ur.

Það er ánægju­legt að sjá að kann­an­ir benda til þess að Fram­sókn sé sér­stak­lega að sækja í sig veðrið á höfuðborg­ar­svæðinu. Fólk er í aukn­um mæli að kalla eft­ir auk­inni sam­vinnu til þess að tak­ast á við áskor­an­ir sam­tím­ans. Það er klár­lega rými fyr­ir slíkt í ráðhúsi Reykja­vík­ur þar sem hörð átaka­stjórn­mál hafa verið stunduð und­an­far­in ár, á sama tíma og þjón­usta við borg­ar­búa hef­ur of oft ekki staðið und­ir vænt­ing­um – hvort sem um er að ræða ein­stak­linga eða fyr­ir­tæki. Þannig mæl­ist traust á ráðhús­inu minnst af öll­um stofn­un­um sem eru mæld­ar og ánægja Reyk­vík­inga með þjón­ustu borg­ar­inn­ar mæl­ist tals­vert minni en í ná­granna­sveit­ar­fé­lög­un­um. Þessu þarf að breyta og hug­mynda­fræði Fram­sókn­ar mun þar leika lyk­il­hlut­verk.

Ég hvet kjós­end­ur til þess að kynna sér fram­bjóðend­ur og mál­efni Fram­sókn­ar fyr­ir kom­andi kosn­ing­ar og nýta kosn­inga­rétt sinn í kosn­ing­un­um.

Lilja Dögg Al­freðsdótt­ir

Höf­und­ur er menn­ing­ar- og viðskiptaráðherra og vara­formaður Fram­sókn­ar.

Greinin birtist fyrst í Morgunblaðinu 9. maí 2022.

Categories
Greinar

Lítum okkur nær

Deila grein

09/05/2022

Lítum okkur nær

Öll mín fullorðinsár hef ég hlustað á þá sem standa framarlega í samfélaginu tala um Helguvík og allt það sem svæðið hefur upp á að bjóða. Svo mikil orka og kraftur hefur farið í þetta svæði að við erum búin að sannfæra okkur sjálf og alla þjóðina um það að annaðhvort gerist eitthvað stórfenglegt í Helguvík eða Reykjanesbær muni hreinlega deyja út.

Hin sorglega staðreynd mála er sú að í Helguvík er akkúrat ekki neitt að gerast og við höfum einungis horft upp á afturför. Þar er ekkert álver, blessunarlega, slagurinn um að moka burt Kísilverinu heldur áfram, síldarvinnslan hefur dregið sig út af svæðinu og grunnar brostinna drauma liggja þar um allt.

Hættum að tala um Helguvík

Því legg ég það til að við hættum að tala um Helguvík að sinni, hún er ekki að fara neitt og við höfum það svæði til reiðu þá og þegar ábyrgar og faglegar, grænar fjárfestingar banka þar upp á.

Lítum okkur nær og hugum að því sem í hendi er því þar er svo sannarlega af nægu að taka, við þekkjum það öll sem búum hér, störfum og lifum.

Með því að rækta okkar garð mun allt í kringum okkur blómstra og blómstrandi samfélag laðar að sér allt það góða sem í landi hér býr.

Leiðum vagninn

Með það hugarfar í forgrunni þurfum við ekki að taka á móti fólki og fjárfestum eins og hlýðnir hundar sem þakka náðsamlega fyrir hvern þann bita sem fellur þeim í skaut, heldur mætum við til leiks sem leiðtogar með opinn faðm. Tilbúinn að taka á móti þeim tækifærum sem bjóðast af ábyrgð, framsýni og festu.

Bjarni Páll Tryggvason

Höfundur skipar 2. sæti B-lista Framsóknar í Reykjanesbæ fyrir sveitarstjórnarkosningar 14. maí næstkomandi.

Greinin birtist fyrst á visir.is 9. maí 2022.

Categories
Greinar

Íbúar Hafnarfjarðar

Deila grein

08/05/2022

Íbúar Hafnarfjarðar

Síðustu fjögur ár hafa flogið áfram, verið skemmtileg og árangursrík. Það eru fyrst og fremst forréttindi að fá að starfa fyrir og í umboði bæjarbúa og ég er einlæglega þakklátur fyrir það traust sem mér og okkur var sýnt í kosningunum 2018. Ég hef lagt mig allan fram, er stoltur af verkum okkar og þá sérstaklega því að hafa lækkað álögur á fjölskyldufólk, fjárfest í fólki á öllum aldri og komið af stað kröfugri uppbyggingu íbúðarhúsnæðis. Þetta verða verkefnin áfram og við leggjum spilin óhrædd á borð fyrir kjósendur.

Það er rétt sem sagt hefur verið; saman getum við gert meira og betur. Nú erum við á lokametrunum í þessari kosningabaráttu. Í mínum huga hefur hún heilt yfir verið skemmtileg og málefnaleg. Undanfarnar vikur og daga hafa frambjóðendur Framsóknar ferðast um bæinn, haldið fjölda viðburða og reynt eftir fremsta megni að hitta ykkur sem flest. Takk fyrir að gefa ykkur tíma til að hitta okkur; opna fyrirtæki ykkar, heimili og jafnvel stoppa á götum úti til að eiga við okkur samtal.

Stjórnmálamenn, núverandi og verðandi, hafa það meginverkefni að búa öllum samfélag til að blómstra í og nýta eigin styrk og hæfileika. Valdimar Víðisson, skólastjóri, stendur nú fremstur í stafni og leiðir öflugan hóp Framsóknar í Hafnarfirði. Valdimar er traustur og góður stjórnandi sem fær fólk með sér í lið. Eins og alvöru þjálfari og fyrirliði í senn. Hann er einlægur og sannur í því sem hann tekur sér fyrir hendur líkt og hann hefur sýnt í störfum sínum sem formaður fjölskylduráðs á kjörtímabilinu. Óhræddur við að hlusta á aðra og leitast sífellt eftir bestu mögulegu niðurstöðunni fyrir fólk og samfélagið í heild. Með samvinnu komumst við lengra. Við skulum ekki leita til þeirra sem boða byltingar, sundrung og löngu úrelta stefnu. Við skulum kjósa framfarir, skynsemi og samvinnu. Við skulum kjósa velferð og aukin lífsgæði. Við óskum eftir þínum stuðningi til góðra verka. Framtíð Hafnarfjarðar ræðst á miðjunni – XB.

Ágúst Bjarni Garðsson

Höfundur er fráfarandi bæjarfulltrúi og formaður bæjarráðs þingmaður Framsóknar.

Greinin birtist fyrst á visir.is 8. maí 2022.

Categories
Greinar

Landbúnaðarháskólinn á Hvanneyri – mikilvægur hornsteinn

Deila grein

06/05/2022

Landbúnaðarháskólinn á Hvanneyri – mikilvægur hornsteinn

Nú sem aldrei fyrr er mikilvægt að standa vörð um íslenska landbúnaðarframleiðslu á breiðum grunni því við verðum að standa vörð um fæðu- og matvælaöryggi á Íslandi. Það höfum við fundið í þeirri stöðu sem uppi hefur verið undanfarin misseri í heimsfaraldri og nú stríði í Evrópu. Þá er það mikilvægt að styrkja íslenska matvælaframleiðslu vegna matvælaheilbrigðis og síðast en ekki síst til að minnka kolefnisspor.

Matvælaöryggið er mikilvægt en einnig hafa loftlagsmál aldrei verið mikilvægari og þar kemur landbúnaðurinn sterkur inn. Þeir sem yrkja landið vita að loftslagsmál eru forsenda þess að líf dafni. Styrkja þarf betur við skógrækt, landgræðslu og fjölbreyttra ræktun til að mæta betur skuldbindingum okkar í loftlagsmálum. Það skiptir máli að allt landið sé í byggð og bændur eru vörslumenn þeirrar auðlindar sem við eigum allt undir. Með styrkum stuðningi við landbúnað eflum við þróun mannlífs og byggð í landi öllu.

Menntun er máttur

Landbúnaðarskólinn á Hvanneyri á sér langa sögu eða allt frá 1889, þar er dágóð reynsla og þekking sem hefur myndast í gegnum árin. Frá árinu 2005 hefur þar verið Landbúnaðarháskóli og fer þar nú fram öflugt rannsóknar- og menntastarf í þágu landbúnaðar á Íslandi. Mikilvægi menntunar og rannsókna á þeim sviðum sem stunduð er á Hvanneyri hefur líklega sjaldan verið mikilvægari, þegar horft er til þeirra þátta sem ég nefndi í innganginum. Sérstaða skólans eru viðfangsefni hans en það eru náttúra landsins, nýting, viðhald og verndun, eins og segir á heimasíðu skólans. Þá er ánægjulegt að fyrirhugað er að stækka jarðræktarmiðstöðina í Hvanneyri, þar eru gerðar mikilvægar tilraunir og rannsóknir sem spila stórt hlutverk inn í framtíðina. Það má svo sannarlega segja að mikil gróska sé á Hvanneyri.

Gildi og markmið

Þegar rennt er yfir gildi og markmið skólans má sjá að horft er til framtíðar og þeirra aðstæðna sem eru og vænta má hér á norðlægum slóðum í samstarfi við alþjóðlegar rannsóknir og stefnur. Það er í samræmi við núverandi stefnumál stjórnvalda þar sem lögð er áhersla á að byggja upp innlenda þekkingu á sviði sem nýtist okkur í þeim hagsmunamálum þjóðarinnar. Þá er talað um mikilvægi menntunar í landbúnaði sem stuðlar að fræðslu, ráðgjöf, þróun og nýsköpun. Þá er gott að horfa til framtíðarmarkmiða Landbúnaðarháskólans sem er að skólinn stuðli að aukinni verðmætasköpun og fæðuöryggi til framtíðar með sjálfbærri nýtingu auðlinda. Málefni dagsins eru nefnilega loflagsmál og matvælaöryggi.

Við eigum góða skóla

Aðalsmerki Vesturlands eru tveir öflugir háskólar í Borgarfirði. Það er hlutverk bæði heimamanna og stjórnvalda að halda mikilvægi skólanna á lofti. Rúmlega 130 ára saga skólans á Hvanneyri er okkur kraftur til að halda áfram að styrkja öflugt starf á sviði menntunar og rannsóknar á landsbyggðinni.

Halla Signý Kristjánsdóttir

Höf. er þingmaður Framsóknar í Norðvesturkjördæmi.

Greinin birtist fyrst á skessuhorn.is 5. maí 2022.

Categories
Greinar

For­gangs­röðum í þágu barna!

Deila grein

05/05/2022

For­gangs­röðum í þágu barna!

Ég skipa annað sætið á lista Framsóknar fyrir komandi kosningar.

Það er stórt skref að bjóða sig fram í baráttu eins og sveitastjórnarkosningar eru en ég hef frá unga aldri haft mikinn áhuga á stjórnmálum og því rökrétt að virkja þann áhuga og bjóða fram krafta sína fyrir bæjarfélag sem er gott að búa í.

Sem er einmitt málið, Garðabær hefur reynst mér vel frá því að ég og fjölskylda mín fluttum hingað frá Svíþjóð árið 2016. Ég er upprunalega landsbyggðarmaður, ólst upp í Grundarfirði og bjó lengi bæði í Borgarnesi og Stykkishólmi. Það sem okkur hefur einmitt líkað vel er að Garðabær hefur marga eiginleika landsbyggðarinnar, samfélagið er samheldið og Garðbæingar stoltir af samfélaginu sem þau tilheyra. Bærinn hefur á sama tíma kosti þess að búa í stærra samfélagi. Ég er því ekki mættur til að tala allt niður sem gert hefur verið, enda margt gott verið gert.

En þó margt sé gott má auðvitað bæta samfélagið. Ég kem úr íþróttahreyfingunni og hef unnið með börnum og fjölskyldum þeirra nánast alla mína tíð. Garðabær hefur orð á sér fyrir að hér sé mikil velsæld og vissulega sést það víða í bænum, en ég tek líka eftir því að það eru ekki allir með sæti við háborðið. Ég vil halda áfram að vinna með börnum og ungmennum og ein af aðal ástæðunum fyrir því að ég býð mig fram fyrir Framsókn er að ég hef heillast af störfum Ásmundar Einars Daðasonar, mennta- og barnamálaráðherra. Hann hefur lagt mikla áherslu á málefni barna í sínum störfum og leitt sennilega mestu breytingu sem gerð hefur verið á umhverfi barna á Íslandi í áratugi.

Saga okkar Ásmundar er ekki ósvipuð. Í uppvextinum kynntumst við aðstæðum þar sem hlutirnir voru ekki eins og þeir eiga að vera og áherslumálin óneitanlega litast af því. Við eigum að setja börnin í forgrunn og þjóna hagsmunum þeirra og fjölskyldna þeirra sem best og þar vil ég byggja ofan á frábæra vinnu Ásmundar Einars í málaflokknum.

Þegar við ræðum um arðsemi fjárfestinga í samfélaginu okkar er áhugavert að við horfum yfirleitt á eitthvað efnislegt – virkjanir, iðnað eða nýsköpun – en sjaldan á arðsemi þess að fjárfesta í fólki til lengri tíma. Andleg líðan ungmenna blasir við mér á hverjum degi, og hversu mörg þeirra eiga í basli við að fóta sig vegna andlegra kvilla. Við lifum á tímum mikils hraða, áreitis og væntinga og þráum kannski fátt frekar en einfaldlega sálarró, það er mögulega ástæða fyrir því að andleg líðan bæði okkar og unga fólksins helst ekki alltaf í hendur við hagvaxtartölur. Það er löngu orðið tímabært að við forgangsröðum í þágu barna og ungmenna og fjárfestum í framtíðinni. Við fáum það margfalt til baka.

Við finnum fyrir meðbyr, Framsókn er að rísa í Garðabæ.

Ég og við yrðum þakklát fyrir ykkar stuðning, við gerum okkar besta.

Hlynur Bæringsson

Höfundur skipar 2. sæti lista Framsóknar í Garðabæ.

Greinin birtist fyrst á visir.is 5. maí 2022.

Categories
Greinar

Ég vil hlakka til að eldast með reisn í Kópavogi

Deila grein

05/05/2022

Ég vil hlakka til að eldast með reisn í Kópavogi

Eldri íbúar Kópavogs hafa aldrei verið fleiri en akkúrat núna, þau eru rúmlega 5000 talsins og þessi hópur kemur aðeins til með að stækka á komandi árum. Sem er vel og hafa skal í huga að þessi sístækkandi hópur, nær yfir fólk sem er eins mismunandi og þau eru mörg. Aldursbreidd aldraðra í Kópavogi spannar 36 ár, eða frá 67 til 103 ára. Það liggur því í augum uppi að hópurinn hefur ólíkar þarfir og ótækt að ætla að setja þetta fólk allt saman undir einn hatt. Það þýðir meðal annars að við getum alls ekki gert ráð fyrir að þau þurfi einsleita þjónustu. Einhverjir þurfa á heilbrigðisþjónustu að halda, læknisaðstoð og aðhlynningu meðan aðrir eru mjög frískir og fjörugir og vilja ólíkt meiri afþreyingu, fjölbreytta hreyfingu og mögulega heimaþjónustu. Við þurfum að mæta öllu þessu fólki og gera það vel.

Það eru forréttindi að fá að eldast og sveitarfélög eiga og mega setja það í forgang að hlúa vel að eldra fólki sem vill sækja þá þjónustu sem því hugnast innan síns sveitarfélags. Við hljótum öll að geta verið sammála um að vilja stuðla að því að fólki líði sem best, það haldi góðri heilsu og geti verið heima hjá sér í öryggi eins lengi og þau vilja. Fólk verður að hafa val og það verður að geta sótt þá þjónustu sem hentar hverjum og einum. Gleymum því heldur ekki að sumir njóta þess að búa heima hjá sér en vilja gjarnan eiga kost á því að fara í þjálfun eða dagdvöl á daginn.

Framsókn telur sérlega mikilvægt að bæta við dagþjálfunardeildum í bænum. Þar verðum við að gera betur! Að gera eldra fólki kleift að eldast með reisn á að vera forgangsatriði hjá okkur. Við í Framsókn viljum brúa bilið milli þess að búa heima og flytja á hjúkrunarheimili með því að stuðla að byggingu minni íbúða sem tengjast þjónustukjarna sem ætlaður er eldri borgurum. Það hefur sýnt sig að það er form sem hentar eldri borgurum vel. Við viljum hjálpa eldra fólki að styrkja félagsnet sitt og vinna að forvörnum gegn félagslegri einangrun og einmannaleika með eflingu félagsmiðstöðvanna í bænum.

Fjölbreytni, framboð og val er lykillinn að góðri lýðheilsu eldra fólksins okkar og með þau gildi að leiðarljósi, getum við öll hlakkað til að eldast í Kópavogi.

Björg Baldursdóttir, skólastjóri Kársnesskóla skipar 3.sæti á lista Framsóknar í Kópavogi..

Greinin birtist fyrst á kgp.is 5. maí 2022.

Categories
Fréttir Greinar

Þannig stjórn­mála­fólk ætlum við að vera

Deila grein

05/05/2022

Þannig stjórn­mála­fólk ætlum við að vera

Kosningabaráttan er komin á fullt. Út um allt land er öflugt fólk sem vill vinna vel fyrir sín bæjarfélög. Við höfum tekist á við það skemmtilega en um leið krefjandi verkefni að leiða lista Framsóknar í Garðabæ og Hafnarfirði. Við erum bæði tiltölulega ný í stjórnmálum, Brynja varaþingmaður frá því í haust og Valdimar varabæjarfulltrúi og formaður fjölskylduráðs á þessum kjörtímabili. Það má því með sanni segja að við höfum stokkið ofan í djúpu laugina þegar við ákváðum að gefa kost á okkur í þessi oddvitasæti.

Kosningarnar þann 14. maí næstkomandi snúast að stórum hluta um það hverjum kjósendur treysta til að fara með stjórn bæjarfélagsins. Þessa dagana keppast frambjóðendur við að kynna sig og stefnumál sinna flokka. Okkar leiðarljós í þessari kosningabaráttu er heiðarleiki, fagmennska, samvinna og gleði. Þannig höfum við hagað okkar baráttu og þannig munum við vinna eftir kosningar. Við ætlum ekki að gera lítið úr skoðunum annarra eða tala aðra niður til þess eins að reyna lyfta okkur á einhvern hærri stall. Það eru því miður alltof margir í því að gagnrýna aðra og hvað allt sé ómögulegt án þess að koma með lausnir. Þegar stjórnmálin eru hvað verst þá er hjólað í einstaklinga og þeir talaðir niður. Þannig stjórnmál viljum við ekki.

Framsókn er miðjuflokkur. Flokkur samvinnu og sátta. Við getum unnið með öllum. Hlustum á hugmyndir og rök. Leggjum svo mat á bestu mögulegu leiðina í samvinnu allra aðila.

Við sem störfum í sveitarstjórnum erum þar í umboði íbúa. Þurfum að gæta þeirra hagsmuna í hvívetna. Við kunnum að tala við fólk og hlusta. Við erum heiðarleg og einlæg. Við gerum mistök eins og aðrir og þá skiptir mestu máli að viðurkenna mistökin, læra af þeim og leiðrétta. Við höfum brennandi áhuga á samfélagsmálum og fólki. Tölum bæjarfélögin okkar upp. Hlustum á ólík sjónarmið og skoðanir.

Þannig stjórnmálafólk ætlum við að vera.

Framtíðin ræðst á miðjunni.

Brynja Dan Gunnarsdóttir, oddviti Framsóknar í Garðabæ.

Valdimar Víðisson, oddviti Framsóknar í Hafnarfirði.

Greinin birtist fyrst á visir.is 5. maí 2022.

Categories
Greinar

Múlaþing – gæfuspor

Deila grein

05/05/2022

Múlaþing – gæfuspor

Eins og flest­ar sam­ein­ing­ar sveit­ar­fé­laga átti sam­ein­ing­in í Múlaþing árið 2020 sér tölu­verðan aðdrag­anda. Grein­ar­höf­und­ur var bæj­ar­stjóri á Seyðis­firði árin 2011-2018 og á þeim árum var málið nokkuð til umræðu eins og sjá má í tíma­rit­inu Sveit­ar­stjórn­ar­mál­um frá í maí 2014. Þar var fjallað um umræðu sem varð um mögu­lega sam­ein­ingu Fljóts­dals­héraðs og Seyðis­fjarðar­kaupstaðar í aðdrag­anda sveit­ar­stjórn­ar­kosn­inga það ár.

Í grein­inni kem­ur fram að bæj­ar­ráð Seyðis­fjarðar­kaupstaðar og bæj­ar­stjórn Fljóts­dals­héraðs samþykktu bæði bók­un um kosti þess að sam­eina sveit­ar­fé­lög­in. Í bók­un bæj­ar­stjórn­ar Fljóts­dals­héraðs kom m.a. fram að mikl­ir mögu­leik­ar gætu fal­ist í frek­ari sam­ein­ingu sveit­ar­fé­laga á Aust­ur­landi og að með trygg­um vetr­ar­sam­göng­um milli sveit­ar­fé­lag­anna mætti telja lík­legt að all­ar for­send­ur væru til slíkr­ar sam­ein­ing­ar. Í bók­un bæj­ar­ráðs Seyðis­fjarðar­kaupstaðar kom m.a. fram að með tryggðum vetr­ar­sam­göng­um milli Seyðis­fjarðar og Fljóts­dals­héraðs yrðu til mik­il tæki­færi á Aust­ur­landi til enn frek­ari sam­vinnu og mögu­legr­ar sam­ein­ing­ar, stæði hug­ur íbúa á Aust­ur­landi til þess.

Seyðfirðing­ar hafa, ásamt fleir­um, lengi bar­ist fyr­ir jarðgöng­um und­ir Fjarðar­heiði til Héraðs. Í fyrr­nefndri grein er haft eft­ir þáver­andi bæj­ar­stjóra á Seyðis­firði að ef stytt­ist í göng­in verði for­send­ur fyr­ir því að kanna viðhorf íbú­anna. Þá gætu sveit­ar­fé­lög­in aukið sam­starf sín á milli og þá yrði sam­ein­ing greiðari síðar ef menn kysu hana.

Síðla árs 2017 þróuðust mál á þann veg að í sveit­ar­fé­lög­un­um sem sam­einuðust í Múlaþing, auk Vopna­fjarðar­hrepps og Fljóts­dals­hrepps, var ákveðið að láta fara fram könn­un um hug íbúa til sam­ein­ing­ar, en þessi sveit­ar­fé­lög höfðu lengi haft með sér sam­starf, m.a. um fé­lagsþjón­ustu og bruna­varn­ir. Niðurstaða þess­ar­ar könn­un­ar var nokkuð af­ger­andi já­kvæð hjá þeim sveit­ar­fé­lög­um sem síðan sam­einuðust en einnig skýr afstaða á ann­an veg í hinum.

Haustið efir sveit­ar­stjórn­ar­kosn­ing­ar 2018 hófst síðan sú veg­ferð sem leiddi á end­an­um til sam­ein­ing­ar í Múlaþing. Þeirri vinnu verða ekki gerð sér­stak­lega skil hér enda er það efni í aðra grein. Óhætt er þó að segja að vandað var til verka, sem full­yrða má að létti mjög sam­ein­ing­una og starfið við stofn­un hins nýja sveit­ar­fé­lags. Mark­miðið með sam­ein­ing­unni var skýrt: að bæta þjón­ustu, efla stjórn­sýslu og styrkja innviði. Sér­stök áhersla var lögð á sam­göng­ur milli byggðarlag­anna og að varðveita sér­stöðu byggðakjarn­anna og tryggja áhrif íbúa nærsam­fé­lags­ins inn­an þeirra.

Við upp­haf Múlaþings voru inn­leidd­ar nýj­ung­ar hvað varðar stjórn­sýslu sveit­ar­fé­laga, s.s. með til­komu heima­stjórna sem er mál manna að hafi gef­ist vel og haft já­kvæð áhrif á virkni íbúa og áhuga á mál­efn­um nærsam­fé­lags­ins. Einnig hef­ur vel tek­ist til með ra­f­ræn­ar lausn­ir, s.s. hvað fjar­fundi varðar, sem jafn­ar aðstöðu íbúa í afar víðfeðmu sveit­ar­fé­lagi til að taka þátt í störf­um á vett­vangi þess. Áhersla var lögð á að áfram yrðu skrif­stof­ur í hverju byggðarlagi eins og verið hafði. Þannig verða störf í stjórn­sýslu sveit­ar­fé­lags­ins a.m.k. að hluta ekki háð staðsetn­ingu og íbú­ar hafa aðgang að stjórn­sýslu sveit­ar­fé­lags­ins í sín­um byggðakjörn­um.

Það hef­ur verið góð sam­vinna og sam­starf í sveit­ar­stjórn, ráðum og heima­stjórn­um sem hef­ur gert starfið ár­ang­urs­rík­ara, sem ætíð skipt­ir miklu máli, en sér­stak­lega á tím­um um­fangs­mik­illa breyt­inga. Þannig vilj­um við Fram­sókn­ar­fólk í Múlaþingi starfa áfram í þágu íbúa sveit­ar­fé­lags­ins og ósk­um eft­ir stuðningi kjós­enda hinn 14. maí nk. til þess.

Vilhjálmur Jónsson

Höf­und­ur er sveit­ar­stjórn­ar­full­trúi og skip­ar 2. sæti á lista Fram­sókn­ar­fé­lags Múlaþings fyr­ir kom­andi sveit­ar­stjórn­ar­kosn­ing­ar. jons­son.vil­hjalm­ur@gmail.com

Greinin birtist fyrst í Morgunblaðinu 5. maí 2022

Categories
Greinar

Hækkum hvata­greiðslur í 60.000 krónur

Deila grein

04/05/2022

Hækkum hvata­greiðslur í 60.000 krónur

„Góðan dag, ég heiti Sighvatur og er nýfluttur í Innri-Njarðvík,“ sagði ég hátt og snjallt við starfsmann í byggingavöruverslun í Reykjanesbæ sumarið 2018. Hann svaraði brosandi: „Ég votta þér samúð.“ Með frábærum húmor sem minnti mig á heimahagana í Vestmannaeyjum kom maðurinn því vel til skila með þessum orðum að hann væri Keflavíkurmegin í lífinu.

Ég sprakk úr hlátri sem varð til þess að afgreiðslumaðurinn baðst afsökunar á þessu góðlátlega gríni. „Ef þú vilt losna við svona brandara þá skaltu bara segjast vera nýfluttur í Reykjanesbæ. Þá vitum við að þú ert aðkomumaður,“ sagði hann vinalegri og ráðgefandi röddu.

Íþróttir, menntun, menning og markaðsmál

Maður þarf að hafa húmor fyrir ríg sem ríkir á milli nágrannaliða eins og Keflavíkur og Njarðvíkur. Ég spilaði fótbolta í Eyjum lengst af með Þór. Ég fór reyndar yfir í Tý í 3. flokki og hef því reynslu af því að spila með bláa liðinu og því græna.

Ég hef kynnst ýmsum hliðum samfélagsins í Reykjanesbæ eftir búsetu í Innri-Njarðvík þetta kjörtímabil. Konan mín kennir á svæðinu, börnin æfa fótbolta með Njarðvík og ég er í Barna- og unglingaráði knattspyrnudeildar Njarðvíkur ásamt því að syngja með Sönghópi Suðurnesja. Íþrótta- og menntamál standa mér nærri. Einnig menningar- og markaðsmál eftir áralanga reynslu af fjölmiðlum, dagskrárgerð, framleiðslu heimildarmynda og vinnslu ýmis konar kynningarefnis til stafrænnar markaðssetningar.

Hvatagreiðslur fyrir 4-18 ára

Sem ég er kallaður Hvati hef ég séð hversu mikilvægar svokallaðar hvatagreiðslur eru fyrir iðkendur íþrótta í Reykjanesbæ. Ég og félagar mínir í Framsókn erum sammála um hversu áríðandi það er að berjast fyrir því strax að öll börn á aldrinum 4-18 ára njóti þessarar niðurgreiðslu frá sveitarfélaginu. Við munum jafnframt beita okkur fyrir því á komandi kjörtímabili að hvatagreiðslurnar verði hækkaðar í 60.000 krónur.

Reykjanesbær styður vel við íþróttafélögin í sveitarfélaginu. Fyrir komandi sveitarstjórnarkosningar leggjum við í Framsókn áherslu á að bæta við þann stuðning. Á kjörtímabilinu sem nú er að ljúka var hafist handa við byggingu nýs íþróttahúss við Stapaskóla í Innri-Njarðvík sem á eftir að bæta enn frekar umgjörð körfuboltans í Reykjanesbæ. Ný Ljónagryfja verður eitt af glæsilegum höfuðvígum körfuboltans á landinu.

Tryggjum íbúum Reykjanesbæjar jöfn tækifæri.

Sighvatur Jónsson, skipar 6. sæti á B-lista Framsóknar í Reykjanesbæ fyrir sveitarstjórnarkosningar 14. maí næstkomandi.

Greinin birtist fyrst á visir.is 4. maí 2022.