Ágúst Bjarni Garðarsson, alþingismaður, segir það langhlaup að leysa úr stöðunni í efnahagsmálum þjóðarinnar. Skyndilausnir sem breyta eða leysa úr stöðunni á einum degi eða nokkrum vikum eru ekki til, heldur sé þetta langhlaup þar sem við munum komast í mark. Það sé sameiginlegt verkefni okkar.
„Stýrivextir hækka, matarkarfan hækkar, útgjöld heimilanna hækka og væntanlega munu vextir bankanna einnig hækka í kjölfar stýrivaxtahækkunar. Sumir þurfa að græða meira, virðist vera,“ segir Ágúst Bjarni.
„Heilt yfir búum við í góðu samfélagi hér á landi og staða okkar á langflestum sviðum er góð. Það segja flestar tölur. Við búum í samfélagi þar sem náungakærleikur ríkir og samkennd með öðru fólki er ofar öllu. Við stöndum saman og hjálpumst að við að gera gott samfélag betra. Þetta sjáum við víða þegar á bjátar,“ segir Ágúst Bjarni.
„Fram undan eru áskoranir á húsnæðismarkaði. Við glímum við ákveðið ójafnvægi í dag sökum þess að of lítið hefur verið byggt af íbúðum síðustu 10–15 ár. Í stjórnarsáttmála núverandi ríkisstjórnar eru háleit markmið um byggingu íbúða á næstu árum og hefur hæstv. innviðaráðherra nú þegar kynnt metnaðarfull markmið hvað það varðar og gert samninga. En það þarf meira til og samhliða þessu þarf að gera almenna markaðnum kleift að taka þátt í þeirri uppbyggingu sem nauðsynleg er á næstu árum,“ sagði Ágúst Bjarni að lokum.
Ræða Ágústs Bjarna í heild sinni á Alþingi:
„Virðulegur forseti. Umræða um efnahagsmál hefur verið allsráðandi í samfélaginu undanfarnar vikur og skyldi engan undra. Stýrivextir hækka, matarkarfan hækkar, útgjöld heimilanna hækka og væntanlega munu vextir bankanna einnig hækka í kjölfar stýrivaxtahækkunar. Sumir þurfa að græða meira, virðist vera. Í allri umræðu um efnahagsmál verður að horfa á stóru myndina. Heilt yfir búum við í góðu samfélagi hér á landi og staða okkar á langflestum sviðum er góð. Það segja flestar tölur. Við búum í samfélagi þar sem náungakærleikur ríkir og samkennd með öðru fólki er ofar öllu. Við stöndum saman og hjálpumst að við að gera gott samfélag betra. Þetta sjáum við víða þegar á bjátar. Þýðir þetta að við sem samfélag stöndum ekki frammi fyrir áskorunum? Nei, við stöndum frammi fyrir áskorunum. Það eru svo sannarlega miklar áskoranir til staðar og alger óþarfi að fara í felur með það. Þetta er sameiginlegt verkefni okkar allra.
Við glímum við mikla verðbólgu í landinu líkt og löndin í kringum okkur og fólk er farið að finna verulega fyrir því. Ég hef áður fjallað um þessi mál, bæði í ræðum hér á Alþingi og í greinum, en við megum ekki missa sjónar á því að til eru lausnir við þessum áskorunum, þó engar skyndilausnir sem breyta eða leysa úr stöðunni á einum degi eða nokkrum vikum. Þetta er langhlaup og við munum komast í mark.
Fram undan eru áskoranir á húsnæðismarkaði. Við glímum við ákveðið ójafnvægi í dag sökum þess að of lítið hefur verið byggt af íbúðum síðustu 10–15 ár. Í stjórnarsáttmála núverandi ríkisstjórnar eru háleit markmið um byggingu íbúða á næstu árum og hefur hæstv. innviðaráðherra nú þegar kynnt metnaðarfull markmið hvað það varðar og gert samninga. En það þarf meira til og samhliða þessu þarf að gera almenna markaðnum kleift að taka þátt í þeirri uppbyggingu sem nauðsynleg er á næstu árum.“
Deila
Prenta grein
01/06/2023
Stjórnvöld sendi skýr skilaboð út í feltiðÞórarinn Ingi Pétursson, alþingismaður, segir það mjög mikilvægt að stjórnvöld hafi trú og horfi til framtíðar með matvælaframleiðendum. Að Ísland verði sjálfbær þjóð varðandi fæðuöflun og fæðuöryggi.
„Það er hverri þjóð mjög mikilvægt að hlúa að matvælaframleiðslu sinni og horfa til þess að vera sjálfri sér næg í fæðuframboði. Við eigum mikið verk eftir óunnið hér á landi er kemur að því að geta sagt að við séum sjálfbær þjóð varðandi fæðuöflun. Vissulega erum við öflug í sjávarútvegi en við eigum mikið í land í því er snýr að fæðuöryggi þjóðarinnar og varðar landbúnaðarframleiðslu.
Það er því mikið fagnaðarefni fyrir alla áhugamenn og þá sem vinna við framleiðslu matvæla að stjórnvöld sendi þessi skýru og góðu skilaboð út í feltið, eins og sagt er,“ sagði Þórarinn Ingi.
Ræða Þórarins Inga í heild sinni á Alþingi:
„Frú forseti. Ég ætla hér að ræða ákveðin mál sem hefur verið á dagskrá og mál sem verður á dagskrá í dag, þ.e. um matvælastefnu og landbúnaðarstefnu sem matvælaráðherra lagði fram og hafa verið til umfjöllunar í hv. atvinnuveganefnd. Það er vissulega ánægjuefni að á þessum fallega vordegi, er mér óhætt að segja, séum við að ræða um framtíð matvælaframleiðslu og landbúnaðar hér á landi. Það er mjög mikilvægt fyrir framleiðendur matvæla hér á landi að stjórnvöld sendi skýr skilaboð til þeirra sem í stafni standa um það að stjórnvöld hafi trú og horfi til framtíðar með þeim sem framleiða matvæli. Það er hverri þjóð mjög mikilvægt að hlúa að matvælaframleiðslu sinni og horfa til þess að vera sjálfri sér næg í fæðuframboði. Við eigum mikið verk eftir óunnið hér á landi er kemur að því að geta sagt að við séum sjálfbær þjóð varðandi fæðuöflun. Vissulega erum við öflug í sjávarútvegi en við eigum mikið í land í því er snýr að fæðuöryggi þjóðarinnar og varðar landbúnaðarframleiðslu. Það er því mikið fagnaðarefni fyrir alla áhugamenn og þá sem vinna við framleiðslu matvæla að stjórnvöld sendi þessi skýru og góðu skilaboð út í feltið, eins og sagt er.“
Deila
Prenta grein
Norræn menning blómstrar!
31/05/2023
Norræn menning blómstrar!Hafdís Hrönn Hafsteinsdóttir, alþingismaður, sat stjórnarfund Norræna menningarsjóðsins í vikunni. Verkefni fundarins var að fara yfir þá styrki sem voru veittir á þessu ári og þá öflugu listamenn sem hafa sótt um styrki í sjóðinn.
„Gróskan er mikil og hlakka til að halda áfram að fylgjast með norrænni menningu blómstra,“ sagði Hafdís Hrönn.
„Á fundinum var samþykkt að halda næsta vorfund á Íslandi sem er fagnaðarefni því venjan er að fundirnir séu haldnir í Kaupmannahöfn. Þá var þetta síðasti fundur Benny Marcel sem hefur verið framkvæmdastjóri sjóðsins í 8 ár og lagt mikið til í því hvernig sjóðurinn hefur vaxið og styrkst á þeim árum,“ sagði Hafdís Hrönn.
Norræni menningarsjóðurinn er norrænn styrktarsjóður sem styrkir norræn samstarfsverkefni á sviði lista (myndlistar, leiklistar, dans, tónlistar og bókmennta). Í gegnum tíðina hefur sjóðurinn aðallega styrkt listviðburði. Hann var stofnaður af Norðurlandaráði 1. september 1966. Höfuðstöðvar sjóðsins eru í Kaupmannahöfn. Stjórn sjóðsins skipa tveir fulltrúar frá hverju Norðurlandanna auk eins fulltrúa frá heimastjórnarsvæðunum Grænlandi, Færeyjum og Álandseyjum.
Deila
Prenta grein
30/05/2023
Eitt dauðsfall er of mikiðÍ gær voru áhrifaríkir og fallegir tónleikar haldnir í Hörpu til að vekja athygli á ópíóðafíkn og styrkja skaðaminnkandi úrræði Rauða krossins. Undanfarið hefur mikil umræða skapast í samfélaginu um ópíóðafíkn og þann skaða sem af henni getur hlotist. Hér á landi eru vísbendingar um að ópíóðar séu í aukinni umferð í samfélaginu og að notkun þeirra sé að aukast þrátt fyrir það að dregið hafi úr lyfjaávísunum á ópíóða undanfarin ár. Það er mikilvægt að fylgjast vel með þróuninni, bregðast hratt við og tryggja að viðeigandi úrræði séu til staðar og aðgengi að þeim sé tryggt.
Ráðist í aðgerðir
Ríkisstjórnin hefur samþykkt tillögur undirritaðs um víðtækar aðgerðir og fjölbreytt úrræði til að sporna við vímuefnavanda með áherslu á skaðlega notkun ópíóíða og alvarlegar afleiðingar ópíóíðafíknar. Tillögur þessa efnis voru nýlegar kynntar fyrir ríkisstjórn. Þær voru í kjölfarið ræddar í ráðherranefnd um samræmingu mála og ákveðið að útvíkka þær enn frekar í samráði við forsætisráðuneytið, fjármála- og efnahagsráðuneytið, dómsmálaráðuneytið, félagsmála- og vinnumarkaðsráðuneytið, mennta- og barnamálaráðuneytið, háskóla-, iðnaðar- og nýsköpunarráðuneytið og auka áður áætlað fjármagn í aðgerðir úr 170 milljónum króna í 225 milljónir króna. Auk aðgerða sem miða að forvörnum, meðferð, endurhæfingu og skaðaminnkun verður gagnasöfnun tengd vímuefnavanda samræmd og efld. Áhersla verður jafnframt lögð á stefnumótun, aukna upplýsingagjöf og fræðslu til almennings.
Aukið fjármagn í rannsóknir, gagnasöfnun og upplýsingamiðlun
Verkefni og aðgerðir sem ráðist verður í á þessu ári eru fjölmörg. Fjármagn verður eyrnamerkt styrkjum til félagasamtaka í verkefni til að vinna gegn fíknisjúkdómum, veita lágþröskuldaþjónustu, stuðning, fræðslu og styðja við fjölskyldur og aðstandendur einstaklinga með fíknisjúkdóma. Aðgengi að viðhaldsmeðferð verður aukið og aðgengi að neyðarlyfi við ofskömmtun ópíóíða bætt enn frekar um allt land. Viðbragðsþjónusta verður efld, afeitrunarplássum fjölgað og samstarf stofnana fyrir fólk í vanda með áherslu—á ópíóíðamisnotkun—verður aukið. Einnig verður ráðist í tilraunaverkefni að norskri fyrirmynd um þverfaglega endurhæfingu við ópíóíðafíkn.
Ráðist verður í vinnu þvert á viðeigandi ráðuneyti og stofnanir við að samræma öflun og birtingu gagna sem gefa raunsanna mynd af umfangi vandans og þróun þessara mála. Með því móti fæst betri yfirsýn, forgangsröðun verður markvissari, öll umræða verður gegnsærri og ákvarðanataka verður markvissari. Setja þarf upp rafrænt skráningarkerfi og gagnagrunn í þessu skyni. Enn fremur verður hlutverk Rannsóknarstofu í lyfja- og eiturefnafræðum aukið og rannsóknargeta efld með áherslu á mælingar, rannsóknir og tölfræði sem tengjast fíknisjúkdómum. Að lokum er vert að nefna að rekstur neyslurýmis hefur nú þegar verið fjármagnaður af heilbrigðisráðuneytinu og beðið er eftir að Reykjavíkurborg finni neyslurými varanlegt húsnæði.
Stefnumótun um fíknisjúkdóma
Alþingi samþykkti á liðnu ári ályktun um stefnu í geðheilbrigðismálum til ársins 2030 og aðgerðaáætlun í geðheilbrigðismálum er nú til umfjöllunar í þinginu. Þar eru lagðar til fjölmargar aðgerðir sem snúa almennt að geðþjónustu þvert á velferðarkerfið og munu nýtast vel við að þróa og efla þjónustu m.a. vegna fíknisjúkdóma. Til lengri tíma litið er mikilvægt að móta heildstæða stefnu um fíknisjúkdóma sem tekur til forvarna, heilsueflingar, skaðaminnkunar, greiningar, meðferðar og endurhæfingar með áherslu á samvinnu og samhæfingu. Því hefur undirritaður ákveðið að hefja þá vinnu.
Skaðaminnkun
Á liðnum árum hefur hugmyndafræði skaðaminnkunar rutt sér til rúms víða um heim. Skaðaminnkun miðar að því að draga úr skaðlegum afleiðingum hegðunar eða lífsstíls, óháð því hvort hún sé æskileg, lögleg eða ólögleg. Skaðaminnkandi úrræði í fíknisjúkdómum eru meðal annars lyfjameðferð við ópíóðum, neyslurými og afglæpavæðing. Hér á landi hafa nú þegar verið stigin mikilvæg skref varðandi þróun og innleiðingu skaðaminnkandi úrræða en það er tímabært að taka enn stærri skref og vinna að stefnu og aðgerðaáætlun sem styður við það.
Skýr stefna er nauðsynleg
Í viðkvæmum málaflokkum skiptir miklu máli að skýr stefna liggi fyrir til að skapa sátt um aðgerðir. Sérstaklega þegar þær þarfnast aðkomu margra ólíkra hagsmunaaðila. Undirritaður hefur því ákveðið að hefja vinnu við að móta stefnu í skaðaminnkun út frá þeirri þekkingu og reynslu sem hefur myndast og þróa aðgerðaáætlun byggða á henni. Sú vinna mun einnig styrkja og tengjast heildarstefnumótun fyrir fíknisjúkdóma. Starfshópurinn sem verður skipaður er hugsaður sem fámennur kjarnahópur sem verður falið að hafa vítt samráð og eiga virkt samtal við helstu hagaðila til að stuðla að samþættingu, samvinnu og sátt.
Víðtækt samstarf
Vímuefnavandinn er fjölþættur og ekki aðeins einskorðaður við ópíóða eða alvarlegustu birtingarmynd vandans, ótímabær dauðsföll. Því þarf að nálgast verkefnið heildstætt. Hér á landi eru dauðsföll af völdum eitrana ávana- og fíkniefna í flestum tilfellum vegna blandaðrar neyslu og í gegnum tíðina hafa ófá dauðsföll orðið af óbeinum völdum ávana- og fíkniefna sem erfiðara er að henda reiður á. Þegar kemur að ópíóðum vitum við að þeir eru einna hættulegastir vímuefna og því er full ástæða til að rýna í stöðuna og kanna hvar þarf að þétta öryggisnetið. Eitt dauðsfall af völdum vímuefna er einu dauðsfalli of mikið.
Þau verkefni sem hér hefur verið fjallað um kalla á víðtækt samstarf og samráð milli áðurnefndra ráðuneyta, stofnana, stjórnsýslustiga og félagasamtaka til að ná þeim árangri sem að er stefnt. Síðast en ekki síst skiptir aðkoma einstaklinga í vanda og aðstandenda þeirra miklu máli og því verður aukin áhersla á notendasamráð og notendamiðaða þjónustu, hvort sem fjallað er um þau úrræði sem þegar eru fyrir hendi, þróun nýrra úrræða eða stefnumótun.
Willum Þór Þórsson, heilbrigðisráðherra.
Greinin birtist fyrst á visir.is 30. maí 2023.
Deila
Prenta grein
Varnarlínur sauðfjársjúkdóma
26/05/2023
Varnarlínur sauðfjársjúkdómaLilja Rannveig Sigurgeirsdóttir, alþingismaður, segir í yfirlýsingu að mikilvægt sé að hækka eigi fjárveitingu til viðhalds á Hvammsfjarðarlóinu og Tvídægurlínu. Eins og kunnugt er, vegna riðutilfella í Miðfirði, skapaðist mikil umræða um varnarlínur sauðfjársjúkdóma og viðhald í vetur.
„Mér fannst nauðsynlegt að fá svör við ýmsum spurningum í tengslum við þessi mál og sendi því fyrirspurn á matvælaráðherra,“ segir Lilja Rannveig.
„Svar ráðherra dregur fram með skýrum hætti hvaða varnarlínur eru á viðhaldsáætlun. Einnig kemur fram að framlög til viðhalds þessara varnarlína hafa lækkað á undanförnum árum.“
„Það er hins vegar mikilvægt að nú hefur verið ákveðið hefur verið að hækka fjárveitingu til viðhalds á Hvammsfjarðarlínu og Tvídægrulínu,“ segir Lilja Rannveig.
Yfirlýsingu Lilju Rannveigar í heild sinni má sjá hér að neðan:
– Varnarlínur sauðfjársjúkdóma – Í kjölfar riðutilfella sem komu upp í Miðfirðinum nú í vetur skapaðist mikil umræða um…
Posted by Lilja Rannveig on Föstudagur, 26. maí 2023
***
153. löggjafarþing 2022–2023.
Þingskjal 1826 — 1001. mál.
Svar matvælaráðherra við fyrirspurn frá Lilju Rannveigu Sigurgeirsdóttur um varnarlínur sauðfjársjúkdóma.
1. Hvaða varnarlínum sauðfjársjúkdóma hefur ráðherra ákveðið að skuli viðhalda, sbr. 12. gr. laga um dýrasjúkdóma og varnir gegn þeim, nr. 25/1993, og hvernig flokkast þær í aðalvarnarlínur og aukavarnarlínur?
Ráðherra ákveður viðhald varnarlína að fengnum tillögum Matvælastofnunar þar um. Flokkun varnarlína í aðalvarnarlínur og aukavarnarlínur er skilgreind í auglýsingu nr. 88/2018, um varnarlínur vegna sauðfjársjúkdóma.
Fyrir árið 2023 hefur ráðherra samþykkt tillögur Matvælastofnunar um viðhald á eftirfarandi varnarlínum:
Tafla 1. Línur sem eru á viðhaldsáætlun 2023 og lýsing á staðsetningu þeirra.
| Lína | Lýsing |
| 2. Kaldadalslína / Sogs- og Bláskógalína | Sog frá Ölfusá um Þingvallavatn og úr því um Ármannsfell í Hvalfjarðarlínu við Kvígindisfell. |
| 4. Hvalfjarðarlína | Úr Hvalfirði við Múlafjall um Hvalvatn að Kvígindisfelli að Brunnum við Uxahryggi í Hrúðurkarla við Þórisjökul. |
| 5. Snæfellslína | Úr Skógarnesi um Ljósufjöll í Álftafjörð. |
| 6. Hvammsfjarðarlína | Úr Hvammsfirði milli Þorbergsstaða og Hrútsstaða um Laxárdalsheiði í Hrútafjörð sunnan Fjarðarhorns. |
| 7. Gilsfjarðarlína | Úr Gilsfirði um Snartartungu í Bitrufjörð. |
| 9. Tvídægrulína | Úr Hvammsfjarðarlínu við Skeggöxl um Kvíslavötn og Arnarvatn stóra í Langjökul við Jökulstalla. |
| 10. Miðfjarðarlína | Úr Miðfirði um Miðfjarðarvatn í Arnarvatn stóra. |
| 12. Kjalarlína | Milli Langjökuls og Hofsjökuls. |
| 13. Héraðsvatnalína | Héraðsvötn og Austari-Jökulsá. |
| 17. Fjallalína | Jökulsá á Fjöllum. |
| 20. Reyðarfjarðarlína | Úr Reyðarfirði upp með þjóðvegi og þaðan upp í Áreyjatind. Úr Áreyjatindi í Sandfell og þaðan niður í Gilsá í Grímsá. Grímsá í mörk Vaðs og Geirólfsstaða og þaðan yfir í Hallormsstaðargirðingar í Gilsá í Gilsárdal í Löginn. |
| 24. Kýlingarlína / Tungnaárlína | Frá Botnjökli í Mýrdalsjökli um Mælifellssand í Torfajökul, frá Hábarmi um Kirkjufellsvatn í Tungnaá og þaðan að Jökulgrindum í Vatnajökli. |
| 26. Þjórsárlína | Þjórsá. |
2. Hver hefur kostnaður verið við viðhald varnarlína á landinu á árunum 2018–2022? Svar óskast sundurliðað eftir einstökum varnarlínum og árum.
Tafla 2. Samþykkt kostnaðaráætlun fyrir viðhald varnarlína árin 2018–2022 eftir einstökum varnarlínum og heildar raunkostnaður við viðhald varnarlína fyrir árin 2018–2022.
| Lína | 2018 | 2019 | 2020 | 2021 | 2022 |
| 2. Kaldadalslína / Sogs- og Bláskógalína | 0 kr. | 3.700.000 kr. | 3.700.000 kr. | 1.700.000 kr. | 2.000.000 kr. |
| 4. Hvalfjarðarlína | 12.000.000 kr. | 11.000.000 kr. | 0 kr. | 500.000 kr. | 500.000 kr. |
| 5. Snæfellslína | 2.700.000 kr. | 3.700.000 kr. | 3.700.000 kr. | 4.700.000 kr. | 3.000.000 kr. |
| 6. Hvammsfjarðarlína | 3.800.000 kr. | 3.700.000 kr. | 3.700.000 kr. | 3.000.000 kr. | 3.000.000 kr. |
| 7. Gilsfjarðarlína | 850.000 kr. | 850.000 kr. | 1.600.000 kr. | 1.200.000 kr. | 1.200.000 kr. |
| 9. Tvídægrulína | 6.700.000 kr. | 9.000.000 kr. | 9.000.000 kr. | 4.500.000 kr. | 4.500.000 kr. |
| 10. Miðfjarðarlína | 4.000.000 kr. | 4.000.000 kr. | 5.000.000 kr. | 6.000.000 kr. | 6.000.000 kr. |
| 11. Vatnsneslína | 4.000.000 kr. | 5.000.000 kr. | 3.300.000 kr. | 4.200.000 kr. | 2.000.000 kr. |
| 12. Kjalarlína | 4.000.000 kr. | 4.300.000 kr. | 5.000.000 kr. | 4.300.000 kr. | 4.500.000 kr. |
| 13. Héraðsvatnalína | 0 kr. | 0 kr. | 0 kr. | 150.000 kr. | 200.000 kr. |
| 17. Fjallalína | 0 kr. | 50.000 kr. | 100.000 kr. | 100.000 kr. | 100.000 kr. |
| 20. Reyðarfjarðarlína | 500.000 kr. | 500.000 kr. | 9.250.000 kr. | 5.000.000 kr. | 5.000.000 kr. |
| 24. Kýlingarlína / Tungnaárlína | 0 kr. | 600.000 kr. | 600.000 kr. | 600.000 kr. | 800.000 kr. |
| 26. Þjórsárlína | 0 kr. | 0 kr. | 50.000 kr. | 50.000 kr. | 100.000 kr. |
| SAMTALS ÁÆTLAÐ | 38.550.000 kr. | 46.400.000 kr. | 45.000.000 kr. | 36.000.000 kr. | 32.900.000 kr. |
| RAUNKOSTNAÐUR | 40.547.832 kr. | 59.174.627 kr. | 52.789.478 kr. | 38.069.395 kr. | 33.199.172 kr. |
3. Hversu margir línubrjótar voru skráðir árið 2022? Svar óskast sundurliðað eftir einstökum varnarlínum.
Tafla 3. Heildaryfirlit yfir línubrjóta árið 2022 eftir varnarlínum, aldri og kyni línubrjóta.
| Varnarlína | Ær | Veturgamalt | Hrútar | Lömb | Samtals |
| Brúarárlína | 1 | 0 | 0 | 3 | 4 |
| Gilsfjarðarlína | 6 | 2 | 0 | 7 | 15 |
| Hamarsfjarðarlína | 2 | 0 | 0 | 8 | 10 |
| Héraðsvatnalína | 2 | 0 | 0 | 3 | 5 |
| Hvalfjarðarlína | 1 | 1 | 2 | 2 | 6 |
| Hvalfjarðarlína og Sogs- og Bláskógalína | 3 | 0 | 0 | 3 | 6 |
| Hvammsfjarðarlína | 3 | 6 | 0 | 6 | 15 |
| Hvítárlína | 13 | 7 | 0 | 18 | 38 |
| Jökulsárlína | 3 | 0 | 0 | 7 | 10 |
| Kjalarlína | 6 | 0 | 0 | 11 | 17 |
| Kjalarlína og Þjórsárlína | 1 | 0 | 0 | 2 | 3 |
| Kjalarlína, Þjórsárlína o.fl. | 1 | 0 | 0 | 1 | 2 |
| Kollafjarðarlína | 1 | 0 | 0 | 2 | 3 |
| Lagarfljótslína | 4 | 1 | 0 | 5 | 10 |
| Markarfljótslína | 1 | 0 | 0 | 1 | 2 |
| Miðfjarðarlína | 9 | 1 | 0 | 13 | 23 |
| Reyðarfjarðarlína | 2 | 0 | 0 | 4 | 6 |
| Skjálfandalína | 4 | 1 | 0 | 7 | 12 |
| Snæfellslína | 7 | 0 | 0 | 12 | 19 |
| Tungnárlína | 4 | 4 | 0 | 12 | 20 |
| Tvídægrulína | 4 | 3 | 0 | 10 | 17 |
| Úr Húna- og Skagahólfi í Vesturlandshólf | 0 | 0 | 0 | 2 | 2 |
| Úr Miðfjarðarhólfi og fór í Vesturlandshólf | 1 | 1 | 0 | 1 | 3 |
| Úr Vesturlandshólfi yfir í Grímsnes- og Laugardalshólf | 1 | 0 | 0 | 2 | 3 |
| Vatnsneslína | 0 | 2 | 1 | 2 | 5 |
| Þjórsárlína | 4 | 1 | 0 | 7 | 12 |
| Ekki skráð | 0 | 1 | 0 | 2 | 3 |
| SAMTALS | 84 | 31 | 3 | 153 | 271 |
4. Hver er áætlaður kostnaður vegna fyrirhugaðs viðhalds varnarlína á yfirstandandi ári? Svar óskast sundurliðað eftir einstökum varnarlínum.
Tafla 4. Kostnaðaráætlun vegna viðhalds varnarlína 2023.
| Lína | Kostnaðaráætlun 2023 |
| 2. Kaldadalslína / Sogs- og Bláskógalína | 2.500.000 kr. |
| 4. Hvalfjarðarlína | 600.000 kr. |
| 5. Snæfellslína | 3.500.000 kr. |
| 6. Hvammsfjarðarlína | 5.000.000 kr. |
| 7. Gilsfjarðarlína | 1.500.000 kr. |
| 9. Tvídægrulína | 8.000.000 kr. |
| 10. Miðfjarðarlína | 7.000.000 kr. |
| 12. Kjalarlína | 5.000.000 kr. |
| 13. Héraðsvatnalína | 250.000 kr. |
| 17. Fjallalína | 150.000 kr. |
| 20. Reyðarfjarðarlína | 5.500.000 kr. |
| 24. Kýlingarlína / Tungnaárlína | 1.000.000 kr. |
| 26. Þjórsárlína | 150.000 kr. |
| SAMTALS | 40.150.000 kr. |
5. Hyggst ráðherra grípa til einhverra sérstakra aðgerða varðandi viðhald eða endurnýjun varnarlína milli Miðfjarðarhólfs og aðliggjandi varnarhólfa á yfirstandandi ári?
Í kjölfar þess að riðutilfelli komu upp í Miðfjarðarhólfi lagði Matvælastofnun fram tillögur um auknar fjárveitingar til viðhalds á Tvídægrulínu og Hvammsfjarðarlínu milli Vesturlandshólfs og Miðfjarðarhólfs svo mögulegt væri að skipta út verst förnu hlutum girðinganna og gera þær vel fjárheldar. Ráðherra samþykkti tillögur Matvælastofnunar um hækkun á fjárveitingu til viðhalds á Hvammsfjarðarlínu úr 3,5 millj. kr. í 5,0 millj. kr. og á Tvídægrulínu úr 5,0 millj. kr. í 8,0 millj. kr.
Deila
Prenta grein
Ný stjórn Framsóknar í Hveragerði
26/05/2023
Ný stjórn Framsóknar í HveragerðiAðalfundur Framsóknarfélags Hveragerðis fór fram 24. maí s.l. í Reykjadalsskála í Hveragerði.
Á aðalfundinum var gerð sú lagabreyting að sætum í stjórn var fjölgað úr þremur í fimm. Nýkjörna stjórn skipa, frá vinstri:
Kolbrún Edda Jensen Björnsdóttir, Sæbjörg Lára Másdóttir, Marta Rut Ólafsdóttir, Lóreley Sigurjónsdóttir og Arnar Ingi Ingólfsson.
Ástæða er til að óska nýkjörinni stjórn til hamingju með kjörið og verður spennandi að fylgjast með áframhaldandi öflugu og kröftugu starfi Framsónarmanna í Hveragerði.
Aðalfundur félags Framsóknar í Hveragerði fór fram í Reykjadalsskála í kvöld. Ný fimm manna stjórn var kosin á…
Posted by Framsókn í Hveragerði on Miðvikudagur, 24. maí 2023
Deila
Prenta grein
Heimahjúkrun er lykillinn
24/05/2023
Heimahjúkrun er lykillinnHalla Signý Kristjánsdóttir, alþingismaður, segir að það verði að styðja við færni eldra fólks til sjálfstæðrar búsetu svo því sé stætt að búa heima hjá sér, eins lengi og hægt sé. „Það eru sjálfsögð mannréttindi.“ Hér skiptir heimahjúkrun lykilmáli.
„Það er því ekki að ástæðulausu að heilbrigðisráðherra hefur ráðstafað 300 millj. kr. á fjárlögum ársins til að efla heimahjúkrun um allt land.
Auk þess hefur 1,4 milljarði kr. verið bætt inn í fjármögnunarlíkan heilsugæslunnar til að styrkja enn frekar hlutverk hennar á landsvísu sem fyrsta viðkomustaðar fólks í heilbrigðiskerfinu,“ sagði Halla Signý.
„Heilsugæslur um landið hafa verið í sérstakri vakt þessarar ríkisstjórnar frá árinu 2017 og hefur verið bætt verulega við fjárveitingu til þeirra í takt við aukið hlutverk.“
„Í þessu samhengi langar mig að nefna þá þróun sem hefur átt sér stað á Norðurlöndunum varðandi velferðartækni í þjónustu við eldra fólk. Þar hafa ýmiss konar tæknilausnir og nýsköpun sýnt að slíkt eykur líkur á því að fólk geti búið lengur heima, enda fer þeim sífellt fjölgandi í hópi eldra fólks sem geta tileinkað sér þessa nýju stafrænu tækni. Í hópi eldra fólks eru flestir orðnir vel tæknifærir.
Í Finnlandi hefur samþætting í þjónustu við eldra fólk gengið sérstaklega vel og þar hefur verið kynnt ný tækni til að rjúfa félagslega einangrun og ná þannig til stærri hóps fólks, sérstaklega í dreifðari byggðum. Þar vinna saman félagsþjónustan, endurhæfing og heimahjúkrun við að rjúfa einangrun og veita heildstæða nálgun við þjónustu til að byggja upp færni og sjálfstæði eldri borgara,“ sagði Halla Signý að lokum.
Ræða Höllu Signýjar í heild sinni á Alþingi:
„Virðulegi forseti. Það eru sjálfsögð mannréttindi að eldra fólki sé gert kleift að búa heima hjá sér eins lengi og stætt er. Svo að það sé mögulegt þarf að styðja við færni fólks til sjálfstæðrar búsetu. Bætt lýðheilsa er mikilvæg og huga þarf að andlegri og líkamlegri færni auk þess sem félagslegi þátturinn þarf alltaf að vera í fyrirrúmi. Til að mæta þörfum fólks sem býr heima en þarfnast aðstoðar til að viðhalda færni skiptir heimahjúkrun lykilmáli. Það er því ekki að ástæðulausu að heilbrigðisráðherra hefur ráðstafað 300 millj. kr. á fjárlögum ársins til að efla heimahjúkrun um allt land. Auk þess hefur 1,4 milljarði kr. verið bætt inn í fjármögnunarlíkan heilsugæslunnar til að styrkja enn frekar hlutverk hennar á landsvísu sem fyrsta viðkomustaðar fólks í heilbrigðiskerfinu. Heilsugæslur um landið hafa verið í sérstakri vakt þessarar ríkisstjórnar frá árinu 2017 og hefur verið bætt verulega við fjárveitingu til þeirra í takt við aukið hlutverk.
Í þessu samhengi langar mig að nefna þá þróun sem hefur átt sér stað á Norðurlöndunum varðandi velferðartækni í þjónustu við eldra fólk. Þar hafa ýmiss konar tæknilausnir og nýsköpun sýnt að slíkt eykur líkur á því að fólk geti búið lengur heima, enda fer þeim sífellt fjölgandi í hópi eldra fólks sem geta tileinkað sér þessa nýju stafrænu tækni. Í hópi eldra fólks eru flestir orðnir vel tæknifærir.
Virðulegi forseti. Í Finnlandi hefur samþætting í þjónustu við eldra fólk gengið sérstaklega vel og þar hefur verið kynnt ný tækni til að rjúfa félagslega einangrun og ná þannig til stærri hóps fólks, sérstaklega í dreifðari byggðum. Þar vinna saman félagsþjónustan, endurhæfing og heimahjúkrun við að rjúfa einangrun og veita heildstæða nálgun við þjónustu til að byggja upp færni og sjálfstæði eldri borgara.“
Deila
Prenta grein
„Gjörið svo vel, reddið þessu“
24/05/2023
„Gjörið svo vel, reddið þessu“Ingibjörg Isaksen, formaður þingflokks Framsóknar, var málshefjandi í sérstakri umræðu um styttingu vinnuvikunnar á Alþingi.
Í kjarasamningum stjórnvalda og stéttarfélaga 2019 var gert samkomulag um verkefnið „Betri vinnutími“. Því er ætlað að vera útfærslu vinnutíma, með möguleika á mismunandi styttingu vinnuvikunnar, þannig að mest getur hún styst um allt að fjórar klukkustundir á viku.
Sett voru fram nokkur markmið með verkefninu, s.s. að bæta vinnustaðamenningu og starfsánægju, auka skilvirkni, bæta þjónustu og tryggja sveigjanleika starfsmanna. En forsenda breytinganna var að hvort tveggja þjónustustig og framleiðni yrði sú sama og áður eða betri.
Ingibjörg telur nú er rúm tvö ár eru liðin frá því að styttingin tók gildi, teldi hún „tímabært að staldra aðeins við og skoða hvaða reynslu við höfum af fyrirkomulaginu, útfærslu þess og framtíðaráformum hvað varðar vinnutíma starfsmanna.“
„Í skýrslu KPMG, sem gefin var út í nóvember í fyrra fyrir tilstilli fjármála- og efnahagsráðuneytisins, var staðan á „Betri vinnutíma“ metin og kostir og gallar tilgreindir eftir samtöl, greiningar og kannanir,“ sagði Ingibjörg.
„Af skýrslunni er ljóst að upplýsingar um ýmsa mikilvægi þætti eru enn óljósar hvað varðar afrakstur í kjölfar betri vinnutíma. Illa hefur gengið að greina mælanlegan árangur þar sem engar kröfur þess efnis voru gerðar til stjórnenda og stofnana. Eftirfylgni eða nánari rýni var engin af hálfu ráðuneytanna. Ekki var lögð áhersla á að taka núllpunkt eða greina stöðuna í upphafi styttingarinnar svo hægt væri að greina afköst og gæði starfsemi hverrar stofnunar fyrir sig. Því eru ansi margir þættir hér óljósir.“
„Flestar stofnanir ríkisins tóku þá ákvörðun að fara í hámark styttingar vinnuvikunnar þvert gegn ráðleggingum. Forræði yfir verkefninu og hlutverk aðila var heilt yfir óljóst og undirbúningstíminn var knappur. Það var í höndum hverrar stofnunar fyrir sig, stjórnenda þeirra og starfsmanna, að ákveða hvernig fyrirkomulagið væri. Í raun var það viðamikla verkefni að takast á við þær breytingar sem fólust í innleiðingunni fljótt komið í annarra manna hendur og í raun bara sagt: Gjörið svo vel, reddið þessu. En til að takast á við verkefnið hratt og vel þurfti mannauð, þekkingu og skipulag sem sumar stofnanir glímdu við og því fór mikill tími innan hverrar stofnunar í útfærslu, eins og kemur einmitt fram í skýrslu KPMG,“ sagði Ingibjörg.
„Einu haldbæru gögnin sem við höfum í höndunum eru ánægjukannanir starfsmanna með fyrirkomulagið sem koma jákvætt út. Að sjálfsögðu er ánægjulegt að starfsmenn hafi meiri tíma utan vinnustaðar til að sinna öðrum verkefnum, við sækjumst eftir því; eiga gæðastundir með fjölskyldu og vinum og skapa tækifæri fyrir ungar fjölskyldur til að geta jafnvel sótt börnin sín fyrr á leikskóla eða dagvistun. Hins vegar voru fleiri forsendur tilgreindar í upphafi verkefnisins, t.d. að þjónustustig og framleiðni starfsmanna minnki ekki.“
„Í skýrslu KPMG kemur fram að vísbendingar séu um að þjónustustig hafi heilt yfir lækkað í kjölfar styttingar vinnuvikunnar. Því kemur til álita hvort markmiðum um gagnkvæman ávinning af betri vinnutíma hafi verið náð. Hugmyndin um styttingu vinnuvikunnar er góð og gild en framkvæmdin hefur ekki gengið á öllum starfsstöðvum án þess að hafa áhrif á þjónustustig eða að hún hefur kallað eftir auknu fjármagni. Það á sérstaklega við um stofnanir sem bjóða aðallega upp á vaktavinnu en um þriðjungur ríkisstarfsmanna vinnur vaktavinnu, sem eflaust má einnig heimfæra á sveitarfélög. Á slíkum stöðum myndast mönnunargat í kjölfar betri vinnutíma sem kallar á fleiri stöðugildi til að viðhalda þjónustustigi. Við vitum að launakostnaður hefur hækkað og stöðugildum fjölgað með tilheyrandi áhrifum á fjárhag ríkisins, sveitarfélaga og einkaaðila. Þar hafa margir þættir áhrif. En þær stofnanir sem báru mestan þunga af þessu voru einmitt þær sem urðu mest fyrir áhrifum af heimsfaraldi Covid-19.“
„Þó má velta fyrir sér hvaða áhrif stytting vinnuvikurnar hefur haft á þessa þróun. Engin opinber gögn sýna bein tengsl, en það væri áhugavert að vita hvort hæstv. ráðherra lumi á slíkum gögnum og þá sérstaklega hvað varðar heilbrigðisstofnanir.“
„Af öllu þessu er skýrt að mörgum spurningum er ósvarað. Stytting vinnuvikunnar hefur leitt til jákvæðrar þróunar á starfsánægju, sem skiptir máli. Hins vegar er nauðsynlegt að við fáum haldbærar upplýsingar um þróun annarra markmiða verkefnisins. Ég vil því spyrja hæstv. ráðherra hvernig verkefnið hafi gengið að hans mati með tilliti til þeirra markmiða sem sett voru í upphafi samninga og innleiðingar,“ sagði Ingibjörg að lokum.
Deila
Prenta grein
23/05/2023
Tvöföldun Reykjanesbrautarinnar, takk fyrir!Það var á sumarmánuðum 2019 sem þáverandi bæjaryfirvöld í Hafnarfirði hófu viðræður við innviðaráðherra, Sigurð Inga Jóhannsson, um að flýta framkvæmdum við tvöföldun Reykjanesbrautar frá Hvassahrauni að mislægum gatnamótum við Krýsuvík. Þetta krafðist mikillar vinnu og meðal annars góðs samstarfs við Vegagerðina, Carbfix og álverið í Straumsvík um skipulagsmál á svæðinu.
Á sínum tíma voru áform uppi um stækkun álversins í Straumsvík og keypti álverið þá land undir þá fyrirhuguðu stækkun. Á því landi sem álverið keypti liggur núverandi vegstæði Reykjanesbrautarinnar. Vegna þessa var vegstæði Reykjanesbrautarinnar á aðalskipulagi Hafnarfjarðarbæjar fært ofar og átti sá flutningur brautarinnar að eiga sér stað um leið og álverið þyrfti landið og lóðina til stækkunar. Áform álversins um stækkun voru hins vegar felld naumlega í vel þekktri íbúakosningu árið 2007 og varð því ekkert af tilfærslu brautarinnar.
Skýrsla Vegagerðarinnar og Mannvits sýndi að hagkvæmast væri að breikka Reykjanesbrautina í núverandi vegstæði í stað þess að færa hana líkt og aðalskipulagið gerði ráð fyrir. Góð og lausnamiðuð samtöl við Sigurð Inga Jóhannsson innviðráðherra, fulltrúa Vegagerðarinnar og álversins í Straumsvík urðu svo til þess að þessari mikilvægu framkvæmd var flýtt og aðalskipulagi bæjarfélagsins breytt. Hér er um að ræða 5,6 kílómetra vegkafla, en einnig byggingu brúarmannvirkja og undirganga fyrir akandi, gangandi og hjólandi. Fyrir alla þessa vinnu og skilning ber að þakka og þar set ég undir alla þá aðila sem að þessum málum komu með einum eða öðrum hætti.
Þann 17. maí skrifuðu Vegagerðin og ÍAV undir verksamning um þessa mikilvægu framkvæmd. ÍAV bauð tæpa fjóra milljarða í verkið sem er talsvert undir þeirri kostnaðaráætlun sem lagt var upp með. Undirbúningur hefst strax og framkvæmdir munu hefjast í sumar. Umferðaröryggi er málefni sem snertir okkur öll og nú hyllir undir að kláraðar verði framkvæmdir við tvo slysamestu vegi landsins, Suðurlandsveg og svo Reykjanesbraut. Þetta eru því mikil gleðitíðindi fyrir okkur Hafnfirðinga og landsmenn alla.
Ágúst Bjarni Garðarsson, þingmaður Framsóknar og fyrsti varaformaður efnahags- og viðskiptanefndar Alþingis.
Greinin birtist fyrst á visir.is 23. maí 2023.
Deila
Prenta grein
23/05/2023
126 milljarða tekjur í menninguNýverið samþykkti Alþingi tillögur mínar til þingsályktanir um myndlistarstefnu og tónlistarstefnu til ársins 2030 ásamt því að samþykkja frumvarp um fyrstu heildarlöggjöf um tónlist á Íslandi. Markmiðið er skýrt; að efla umgjörð þessara listgreina til framtíðar.
Með myndlistarstefnunni er sett framtíðarsýn myndlistarumhverfisins til ársins 2030 með meginmarkmiðum um að á Íslandi ríki kraftmikil myndlistarmenning, að stuðningskerfi myndlistar á Íslandi verði einfalt og skilvirkt, að íslensk myndlist verði sýnileg og vaxandi atvinnugrein og að íslensk myndlist skipi alþjóðlegan sess.
Lagðar eru til markvissar aðgerðir til að einfalda en að sama skapi styrkja stofnana- og stuðningskerfi myndlistar og hlúa markvissar en áður að innviðum atvinnulífs myndlistar. Með því má bæta samkeppnishæfni fyrirtækja og efla útflutning og markaðssetningu á íslenskri myndlist.
Ný tónlistarstefna og heildarlöggjöf um tónlist er af sama meiði; að efla umgjörð tónlistarlífsins á Íslandi. Með lögunum hillir undir nýja Tónlistarmiðstöð sem stofnuð verður í ár og er ætlað að sinna uppbyggingu og stuðningi við hvers konar tónlistarstarfsemi sem og útflutningsverkefni allra tónlistargreina. Þar að auki mun miðstöðin sinna skráningu, umsýslu og miðlun íslenskra tónverka. Með stofnun Tónlistarmiðstöðvar er stigið stórt skref í áttina að því að veita listgreininni aukið vægi og til að greiða leið íslensks tónlistarfólks, innan lands sem utan. Nýr og stærri Tónlistarsjóður verður einnig að veruleika. Mun hann sameina þrjá sjóði sem fyrir eru á sviði tónlistar. Lykilhlutverk hans verður að efla íslenska tónlist, hljóðritagerð og þróunarstarf í tónlistariðnaði. Með tilkomu sjóðsins verður styrkjaumhverfi tónlistar einfaldað til muna og skilvirkni og slagkraftur aukin verulega!
Í lögunum er sömuleiðis að finna ákvæði um sérstakt tónlistarráð sem verður stjórnvöldum og tónlistarmiðstöð til ráðgjafar um málefni tónlistar. Tónlistarráði er ætlað að vera öflugur samráðsvettvangur milli stjórnvalda, Tónlistarmiðstöðvar og tónlistargeirans enda felst í því mikill styrkur að ólík og fjölbreytt sjónarmið komi fram við alla stefnumótunarvinnu á sviði tónlistar.
Ofangreint mun skipta miklu máli til að styðja enn frekar við menningu og skapandi greinar á landinu og styðja vöxt þeirra sem atvinnugreina. Til marks um umfang þeirra þá birti Hagstofan nýverið uppfærða Menningarvísa í annað sinn. Samkvæmt þeim voru rekstrartekjur í menningu og skapandi greinum rúmlega 126 milljarðar króna árið 2021 og hækkuðu um 5,6% frá fyrra ári. Þá starfa um 15.400 einstaklingar á aldrinum 16-74 við menningu, eða um 7,3% af heildarfjölda starfandi, samkvæmt vinnumarkaðsrannsókn Hagstofunnar.
Ég er staðráðin í því að halda áfram að tryggja undirstöður þessara greina þannig að þær skapi aukin lífsgæði og verðmæti fyrir íslenskt samfélag til framtíðar. Ég vil einnig þakka þeim kraftmikla hópi fólks úr grasrótinni sem kom að fyrrnefndri stefnumótun, framlag þess skipti verulegu máli.
Lilja Dögg Alfreðsdóttir, menningar- og viðskiptaráðherra og varaformaður Framsóknar.
Greinin birtist fyrst í Morgunblaðinu 23. maí 2023.
Deila
Prenta grein