Month: May 2018

B-listi Framsóknar- og félagshyggjufólks vill að börn og ungmenni í Dalvíkurbyggð fái menntun við hæfi því nám er undirstaða framtíðarinnar og mikilvægt að börnunum okkar líði vel í skóla og þau njóti sín í námi. Markmið grunnskólanna er að byggja upp góða grunnþekkingu og námsáhuga á sem flestum sviðum.  Við viljum veita framúrskarandi þjónustu og menntun í skólastofnunum okkar og vera stolt af því. Við erum heppin með að búa vel að góðum og fjölbreyttum mannauði í menntastofnunum okkar, það eru ekki allir grunnskólar með starfandi þroskaþjálfa, iðjuþjálfa og náms- og starfsráðgjafa við sínar stofnannir og er það eitt af því sem við megum vera hreykin af.  Við viljum að nám barnanna okkar sé í sífelldri mótun og að skólarnir nýti þá tækni og þróun sem býðst í skólastarfi hverju sinni. Teymisvinna innan grunnskólanna hefur reynst vel og er mikilvægt að styðja við hana. Eins hefur teymisvinna utan um einstaklinga og fjölskyldur í samvinnu við félagsþjónustu og skólahjúkrunarfræðing skilað góðum árangri síðastliðinn tvö ár og er í sífelldri þróun sem er afar jákvætt og mikilvægt að halda þeirri vinnu áfram.  Við viljum efla stoðþjónustu með því að tryggja leik- og grunnskólum aðgang að fjölskylduráðgjafa og/eða sálfræðingi. Það myndi auka þekkingu og styrkja og styðja við börnin okkar og fjölskyldur þeirra til framtíðar.

Það er þannig í öllu að alltaf er hægt að gera betur og ýmis sóknarfærin. T.d. væri flott ef skólarnir mættu vinna að því að kenna fjármálalæsi markvisst, efla nám á milli Dalbæjar, Félags eldri borgara og grunnskólanemenda svo sem með því að grunnskólanemendur færu og myndu aðstoða og kenna þeim eldri á Ipad/spjaldtölvur eða tölvur. Í því fellst mikið nám og góður ávinningurinn fyrir alla.

Leikskólarnir búa yfir mikilli reynslu og þekkingu sem alltaf má hlúa betur að og vinna markvissara með. Góður mannauður er í leikskólunum okkar og þarf að skoða leiðir til að efla áhuga, draga úr álagi og skoða starfsumhverfi í leikskólunum til að laða að leikskólakennara, aðra starfsmenn og auka nýliðun í stéttinni. Okkur ber að gæta þess að nám á fyrstu æviskeiðum barnanna okkar séu sem best og skilyrði til þess að þroskast og dafna séu framúrskarandi.

Þórhalla Franklín Karlsdóttir

Höfundur skipar 3. sæti B-lista í Dalvíkurbyggð.

Áhrifarík leið til að veita jöfn tækifæri til íþróttaiðkunar óháð efnahag er að halda kostnaði í skefjum. Víða erlendis þurfa ungir íþróttaiðkendur ekki að standa skil á nema broti af þeim kostnaði sem hér tíðkast og oft fylgir fatnaður eða einhverskonar fríðindi með í æfingagjöldum.

Tálsýn meirihlutans í Kópavogi
Hverjar eru efndir Kópavogsbæjar á loforði um jöfn tækifæri til íþróttaiðkunar óháð efnahag? Er vilji til þess að halda niðri kostnaði í þágu iðkenda í Kópavogi?

Óþarft er að leggja í ítarlega rannsókn á pólitískri stefnumörkun meirihlutans í íþróttamálum til að komast að raun um að svo er ekki, þvert á móti hefur markaðsöflunum verið gefinn laus taumur í vösum foreldra með börn í íþrótta og tómstundastarfi.

Meirihlutinn hefur ekkert aðhafst á kjörtímabilinu til að sporna við hækkandi kostnaði. Þess í stað hefur hann hleypt markaðsöflunum enn dýpra í vasa iðkenda, meðal annars í gegnum sölu á æfinga- og keppnisfatnaði.

Samskipti bæjaryfirvalda við íþróttafélögin einkennast af skorti á samtali og skilningi gagnvart þörfum íþróttafélaganna og ekki síður foreldrum iðkenda. Því er þörf á virkri stefnumörkun af hálfu bæjaryfirvalda hvernig standa skuli að fjárstuðningi við íþrótta- og tómstundastarf barna og unglinga.

Nýjar lausnir
Í þessum anda geri ég að tillögu minni að Kópavogsbær vinni með íþróttafélögunum að lækkun kostnaðar við íþróttaiðkun barna, t.d. með lækkun kostnaðar við innkaup á íþróttafatnaði og öðrum búnaði. Bæjarfélagið gæti til að mynda veitt auka framlag til íþróttafélaganna með hverjum iðkanda, gegn því að keppnisfatnaður sé innifalinn eða til annarra kostnaðar lækkunar. Þannig myndi bæjarfélagið öðlast betri yfirsýn yfir raunkostnað iðkenda.

Þessi hugmyndafræði er ekki ólík þeirri aðgerð sem hefur þegar verið framkvæmd varðandi ókeypis skólagögn. Í krafti stærðar ættu íþróttafélögin að geta fengið mun hagstæðari kjör á fatnaði heldur enn einstakir iðkendur.

Með þessu yrði kostnaði raunverulega haldið niðri og skref tekið í þá átt að efna loforð um jöfn tækifæri til íþróttaiðkunar, óháð efnahag foreldra.

Sverrir Kári Karlsson.

Höfundur skipar 5. sæti á lista Framsóknarflokksins í Kópavogi fyrir komandi bæjarstjórnarkosningar.

Greinin birtist fyrst í Fréttablaðinu 14. maí 2018.

Að stunda hestamennsku getur verið allt í senn, íþrótt, atvinna, áhugamál og lífstíll þar sem umgengni við náttúru og dýr er í aðalhlutverki.

Í starfi mínu hef ég fengið einstakt tækifæri til að kynnast starfsemi á vettvangi hestamennsku og hrossaræktar bæði innanlands og á alþjóðavettvangi. Hrossaræktin og hestamennska sem áhugamál og íþrótt eru nátengd og styður þar hvort annað en áskoranir á þessum vettvangi eru margar og samkeppnin um tíma og áhuga fólks er mikil.

Eitt af stóru umræðumálunum á vettvangi hestamennskunnar er nýliðun í greininni, annað stórt mál eru öryggismál hestamanna. Það er mikilvægt fyrir framtíð hestamenskunnar og þar með okkur hestamenn að það sé raunhæfur valkostur fyrir nýtt fólk að koma inn í greinina. Eitt af þeim atriðum sem skipta miklu máli hvað það varðar er að hægt sé að skapa umhverfi þar sem allir upplifa sig örugga og geta notið sín. Þar bera báðir aðilar ábyrgð, annars vegar sveitarfélög að stuðla að uppbyggingu innviða sem gera slíkt mögulegt og hins vegar við hestamenn sjálfir með því að sýna hvort öðru tillitsemi og styðja við bakið á þeim sem eru að stíga sín fyrstu skref og taka tillit til þeirra sem kjósa að stunda sína hestamennsku á öðrum forsendum en við kannski veljum sjálf. Munum að það besta við hestamennskuna er fjölbreytileikinn og okkar styrkur er að í hestamennsku ættu allir að geta fundið eitthvað við sitt hæfi.

Að stunda hestamennsku innan bæjarmarka á stórum þéttbýlisstað getur verið áskorun fyrir okkur sem höfum alist upp við það að geta þvælst á hesti út um allar koppagrundir án þess að spyrja kóng eða prest, helst með fleiri en einn til reiðar og hund með í för. Við hestamenn þurfum að sýna gott fordæmi og ganga um umhverfi okkar með hliðsjón af því að við erum í návist við þéttbýli og í sambýli við annað útivistarfólk. Við þurfum jafnframt að vera dugleg að fræða þá sem ekki þekkja til okkar íþróttar um okkur og okkar þarfir þannig að sambýlið við aðra geti gengið sem best fyrir sig.

Akureyri hefur alla möguleika á að efla hestamennsku sem hluta af íþróttalífi, afþreyingu og ferðaþjónustu í bænum og að hér verði öflugur miðpunktur hestamennsku og starfsemi í kringum hana. Ég er tilbúin að vinna með  hestamönnum að því verkefni.

Gunnfríður Elín Hreiðarsdóttir.

Höfundur er fagstjóri búfjárræktar hjá Ráðgjafarmiðstöð Landbúnaðarins, hestaeigandi, útivistarmanneskja og skipar 3. sæti lista Framsóknarflokksins á Akureyri.

Þann 11. nóvember síðastliðinn urðu kaflaskipti í lífi Garðbúa og Sandgerðinga. Við tókum þá ákvörðun um að sameinast í eitt öflugt sveitarfélag. Þennan laugardag varð strax ljóst að breytinga væri að vænta. Breytingum fylgja sóknarfæri og við B-lista fólk viljum fá að vera í fararbroddi í þeirri sókn. Við erum með skýra framtíðarsýn á verkefnin framundan og höfum samvinnu að leiðarljósi.

Samvinna við mótun nýs sveitarfélags

Íbúar í okkar nýja sveitarfélagi eiga það skilið að tilvonandi sveitastjórnarfólk vinni þétt saman að mikilvægum málum, eins og fræðslu- og öldrunarmálum, dagvistun, skipulags- og menningarmálum, svo eitthvað sé nefnt. Að mati okkar hjá B-listanum er ótímabært að langir loforðalistar detti inn um bréfalúgu íbúa þar sem öllu fögru er lofað. Við setjum okkur markmið og leggjum fram ákveðan framtíðarsýn. Líklega hefur enginn af tilvonandi sveitastjórnarfólki áður tekið þátt í að sameina sveitarfélög. Það verkefni er afar spennandi áskorun og tækifæri til að bæta þjónustu við íbúa og þróa okkar góða samfélag til framtíðar.

Aðkoma íbúa að ákvörðunum

Tölurnar sýna að hið nýja sveitarfélag verði með um 250.000 milljónir króna til umráða til nýframkvæmda fyrir árið 2019. Að mati okkar hjá B-listanum er mikilvægt að íbúar komi að ákvarðanatöku um hvernig verkefnum verði forgangsraðað og fjármunum til þeirra úthlutað. Það gerum við með íbúakosningum.

Aukum lífsgæði eldri borgara

Við vitum öll að sveitarfélögin hafa ekki gert nóg í málefnum aldraða. Nú er tækifæri að gera betur í þeim efnum. Við hjá B-listanum viljum auka heimaþjónustu við aldraða, bjóða uppá fjölbreyttara félagsstarf, bæta akstursþjónustu og margt fleira sem eykur lífsgæði eldri borgara. En heilsugæsla í heimabyggð er líka eitt af þeim verkefnum sem við B-lista fólk ætlum að beita okkur sérstaklega fyrir.

Nýtt upphaf er á næsta leyti. Framsókn og óháðir eru tilbúnir til að leggja sitt af mörkum til að gera gott samfélag ennþá betra fyrir okkur öll. Við biðjum um þinn stuðning til þess.

Daði Bergþórsson, oddviti B-lista Framsóknar og óháðra í Sandgerði og Garði.

Framsóknarmenn á Akureyri leggja sérstaka áherslu á fræðslu- og dagvistarmál í sinni stefnu og mikilvægi þess að huga jöfnum höndum að velferð barna og frábæru starfsfólki skólanna. Margt hefur áunnist en það er alltaf hægt að gera betur. Við viljum skoða sérstaklega starfsaðstæður leik- og grunnskólakennara, innleiða snemmbæra íhlutun sem fyrirbyggjandi forvörn við vaxandi kvíða og þunglyndi barna, verða leiðandi í fjölbreyttu skólastarfi og tryggja öllum börnum á Akureyri vistunarpláss. Frambjóðendur funduðu með hópi grunn- og leikskólakennara og vonumst við til þess að það endurspegli stefnu okkar í þessum málaflokki.

Aukum veg og virðingu leik- og grunnskólakennara
Af öðrum starfsmönnum Akureyrarbæjar ólöstuðum þá gegna leik- og grunnskólakennarar mikilvægu hlutverki í að byggja upp Akureyri til framtíðar. Framsóknarmenn vilja vinna að því að gera skólana að eftirsóknarverðum vinnustað fyrir góða og áhugasama kennara, sem því miður leita nú meira en oft áður í önnur störf. Aðgerða er þörf og í samstarfi við menntamálaráðherra okkar, Lilju Alfreðsdóttur, sjáum við vonandi fram á bjartari tíma.

Það þarf að samræma tækjakost allra skóla og íþróttamannvirkja, skoða hvort ekki megi finna samlegðaráhrif milli skóla svo tími kennara nýtist betur en um leið styrkja þá skóla sem vilja auka vald sitt og sjálfstæði. Það þarf að tryggja viðeigandi ráðgjöf til handa kennurum eftir þörfum þeirra og minnka álag á þeim með því að ráða sálfræðinga, fleiri sérkennara og annað fagmenntað fólk inn í skólana. Leggjum niður viðbótarskráningu á vinnustund og stefnum að sveigjanlegum og fjölskylduvænum vinnutíma.

Við leggjum einnig áherslu á að bæta starfsaðstæður barna og starfsmanna í leikskólum og fækka börnum inn á deildum. Auka þarf stuðningskennslu og stytta greiningarferli hjá börnum í leikskólum og á yngsta stigi grunnskóla.

Að lokum viljum við skoða kosti þess að taka upp í tilraunaskyni svipað fyrirkomulag og notast er við í leikskólanum Hólmasól við góðan orðstír. Þar býðst stafsmönnum að vinna styttri vinnudag þar sem faglegt starf fer að mestu fram milli 10:00 og 14:00.

Snemmbær íhlutun
Rannsóknir sína að kvíði og þunglyndi barna hefur aukist og neysla er vaxandi vandamál. Ráðherra Framsóknarmanna, Ásmundur Einar Daðason, hefur talað fyrir því að aðgerða sé þörf og horfir sérstaklega til snemmbærar íhlutunar, það þarf að bregðast fyrr við en áður og ná til yngri barna.

Áreitið í nútímasamfélagi er gífurlegt og sú veröld sem börnin okkar búa við í tækniheiminum er oft á tíðum óhugnanleg og markaðsáreitið varasamt börnum. Það þarf að fræða börnin um kosti og galla þessarar tækni, um muninn á net- og raunsjálfi, kenna þeim að þekkja duldar auglýsingar, þjálfa þau í félagslegum samskiptum og vinna með styrkleika þeirra. Til þess þurfum við að ráða sérmenntað fagfólk inn í skólanna sem sinnir þessari fræðslu í samstarfi við kennara.

Það þarf að bæta sálfræði- og aðra sérfræðiþjónustu í skólum, vinna að forvörnum í víðu samhengi og stytta ferli frá ósk um aðstoð til aðgerða. Setjum börnin okkar í forgang.

Spennandi tímar framundan
4. iðnbyltingin býður upp á heilmörg tækifæri fyrir börnin okkar, tækifæri sem við gerum okkur ekki í hugarlund í dag. Við þurfum að búa okkur undir að mörg þeirra starfa sem við vinnum í dag verða ekki til í náinni framtíð. Við verðum að haga menntun barnanna okkar eftir því. Skapandi störfum og störfum tengd tækni og nýsköpun mun fjölga og þess vegna er mikilvægt að sinna þeim þáttum vel í skólastarfinu og auka samvinnu enn frekar við framhaldsskóla og atvinnulíf með sérstakri áherslu á verk- og tækninám. Það er á okkar stefnuskrá að Akureyrarbær verði leiðandi í innleiðingu á tækni í skólastarfi og bjóði upp á fjölbreytt og spennandi nám þar sem allir ættu að finna eitthvað við sitt hæfi.

Umbætur í dagvistarmálum
Til að auðvelda foreldrum þátttöku í atvinnulífinu þarf að tryggja úrræði eftir að fæðingaorlofi lýkur og leikskólaganga hefst. Við viljum leikskóla frá 12 mánaða aldri í samræmi við fyrirhugaða lengingu fæðingarorlofs og jafna kostnað við dagsvistun barna á leikskólaaldri til að mismuna ekki foreldrum eftir því hvenær á árinu barnið er fætt. Það þarf að móta framtíðarsýn fyrir uppbyggingu leikskólamannvirkja í tengslum við ungbarnadeildir og fækkun barna inni á deildum. Þetta teljum við raunhæfan kost þegar nýr leikskóli við Glerárskóla er risinn. Einnig viljum við halda þeim möguleika opnum að halda áfram starfsemi í Pálmholti í einhverri mynd eftir að nýr leikskóli opnar árið 2020. Í vetur kom upp erfið, en jafnframt ánægjuleg, staða þegar 40 börn fluttu óvænt í bæinn og verkefni sem þurfi að leysa. Nú eru öll börn fædd í jan., feb., og mars á síðasta ári komin með pláss á leikskóla í haust sem ber að fagna.

XB Akureyri til framtíðar

Sunna Hlín Jóhannesdóttir framhaldsskólakennari 5. sæti og Jóhannes Gunnar Bjarnason grunnskólakennari 6. sæti.

Greinin birtist fyrst á kaffid.is 5. maí 2018.

Á meðan skólagöngu minni í Danmörku stóð var ég sífellt spurður af heimamönnum þarlendis afhverju ég ætlaði að flytja heim. „Líkar þér ekki Danmörk?“ var ég spurður.  Eina svarið sem ég gat gefið var að mig langaði bara… heim. Heim þangað sem ég ólst upp og sæki í að vera hverja einustu stund. Heim í Borgarbyggð. Af skólabekknum hef ég fylgst með ungu fólki, mörgum af mínum bestu vinum, flytja heim og koma sér fyrir með sínar fjölskyldur.  Mig langaði bara heim líka!

Fyrir fólk sem vill koma sér fyrir í okkar fallegu byggð er mikilvægt að sveitarstjórn sýni vilja til þess að fá það heim með því að styðja við bakið á því með einhverju móti. Framsóknarfólk í Borgarbyggð vill beita sér fyrir því að sá stuðningur komi í formi lækkaðra gatnagerðagjalda. Það er okkar von að slíkur fjárhagslegur hvati komi til með að styrkja íbúa með beinum hætti og skapi betri möguleika fyrir fólk sem vill flytja á nýtt heimili. Gatnagerðagjöldin munu ekki einungis skila sér til íbúa í íbúðarhugleiðingum, heldur einnig stórauka möguleika nýrra fyrirtækja til að koma sér upp atvinnustarfsemi í okkar héraði og ekki síður gamalgróinna fyrirtækja að stækka við sig.

Varðandi skipulagsmál í Borgarbyggð vildi ég óska þess að ég gæti hér komið fram með töfralausn. Leysa ráðgátuna með einu bragði og öðlast með því hylli kjósenda! En það er því miður ekki svo, hér vantar ekki eina lausn. Heldur eru það margir litlir hlutir sem þarf að sinna með elju og þolinmæði. Í Borgarbyggð þarf að fara í stórátak til að styrkja skipulagssviðið með skilvirkni að leiðarljósi. Fara þarf vel yfir alla þá verkferla sem eiga sér stað allt frá því að umsókn berst til stjórnsýslunnar til afgreiðslu. Mynda þarf góða yfirsýn yfir öll þau litlu vandamál í ferlinu sem eiga sér stað.  En það er ekki nóg að benda bara á vandamálin, heldur þarf að vinna að og skila úrlausn á þeim vandamálum!  Framsóknarfólk í Borgarbyggð vill aðskilja skipulagsnefnd frá Umhverfis- og landbúnaðarnefnd. Með því teljum við að nefndirnar báðar geti skilað af sér skilvirkara starfi og skilað til okkar, íbúum Borgarbyggðar, betra starfi!

Með fjárhagslegum ívilnunum sem og bættu skipulagi er vonin sú að það verði auðveldara fyrir íbúa sem og fyrirtæki að koma sér fyrir í Borgarbyggð. Koma heim.

Að lokum vildi ég óska þess að framsóknarfólk í Borgarbyggð gæti tryggt þér lesandi góður betra veðri! En ef við hefðum nokkuð um það að segja værum  við löngu búin að því!

Orri Jónsson

Höfundur skipar 5. sæti Framsóknarflokksins í Borgarbyggð.

Greinin birtist fyrst á skessuhorn.is 

„Ég hef lengi haft mikinn áhuga á barnavernd og réttindum barna og velt vöngum yfir því hvað megi fara betur í kerfinu á þessu sviði. Umræðan um brot gegn börnum og barnaníðinga hefur verið hávær undanfarna mánuði og ár og ég hef hlustað af athygli á hana – hlustað á fórnarlömb þessara manna og hvernig kerfið hefur oft á tíðum brugðist þeim. Frumvarpið er tilraun til að bæta lagaumgjörð um þessi málefni,“ segir Silja Dögg alþingimaður um ástæður þess að hún lagði fram frumvarp um að auka skyldi eftirlit með dæmdum, hættulegum barnaníðingum.

Finna hættulegustu einstaklingana

Að sögn Silju fjallar málið um að auka heimildir Barnaverndarstofu til eftirlits og að dæmdir barnaníðingar skuli undirgangast áhættumat á meðan á afplánun dóms stendur þannig að hægt sé að finna út hvaða einstaklingar eru mjög líklegar til að endurtaka kynferðisbrot gegn börnum. „Lítill hluti þeirra sem dæmdur er fyrir barnaníð flokkast í hættulegasta hópinn. Líklega er um að ræða örfáa einstaklinga á ári. En það er mjög mikilvægt að ná utan um hópinn og veita þessum einstaklingum aukið eftirlit. Barnavernd á hverjum stað og lögregla þarf að vita hvar þessi aðilar búa og einnig er nauðsynlegt að upplýsingum sé komið á framfæri við barnaverndaryfirvöld þegar þeir skipta um nafn, sem algengt er að þeir geri til að reyna að dyljast í samfélaginu,“ segir Silja Dögg.

Aukið eftirlit og öryggisráðstafanir

Ef frumvarpið nær fram að ganga mun Barnaverndarstofa meðal annars geta tilkynnt viðkomandi barnavernd ef dæmdur kynferðisbrotamaður, sem gerst hefur brotlegur gagnvart börnum, og veruleg hætta er talin stafa af, flytur í umdæmið. Ef rík barnaverndarsjónarmið mæla með getur barnavernd einnig gert öðrum viðvart að fengnu samþykki Barnaverndarstofu.

Þá verður einnig hægt að gera kröfu um að viðhafðar séu ákveðnar öryggisráðstafanir eftir að einstaklingur sem brýtur kynferðislega gagnvart barni afplánar dóm sinn, ef verulegar líkur eru talar á því, sam­kvæmt mati heilbrigðisstarfsmanns, að viðkomandi brjóti aftur gagnvart barni.

Eftirfarandi öryggisráðstafanir verður hægt að kveða á um í dómi:

• skyldu til að sinna nauðsynlegri meðferð á vegum heilbrigðisstarfsmanna,
• skyldu til að mæta í skipulögð viðtöl hjá félagsþjónustu,
• eftirlit með internetnotkun og notkun samskiptamiðla og -forrita,
• að einstaklingur haldi sig frá neyslu áfengis og vímuefna,
• eftirlit með heimili og
• bann við búsetu á heimili þar sem börn eru búsett eða dvelja reglulega.

Ef í ljós kemur að einstaklingur sinnir ekki fyrirmælum um öryggisráðstafanir getur það varðað allt að 2 ára fangelsi.

Upplýsingar um dvalarstað

Aðrar breytingar, sem kveðið er á um í frumvarpinu, eru þær að þegar dómar falla vegna kynferðisbrota gagnvart börnum skal Ríkissaksóknari láta Barnaverndarstofu dómana í té. Þá skal Fangelsismálastofnun veita upplýsingar um upphaf og lok afplánunar, sem og skilyrði sem sett eru fyrir reynslulausn, fyrirhugaðan dvalarstað viðkomandi einstaklings, auk gagna frá heilbrigðisstarfsmönnum um einstaklinginn. Viðkomandi einstaklingi er jafnframt skylt að tilkynna breyttan dvalarstað til Barnaverndarstofu allan þann tíma sem áframhaldandi öryggisráðstafanir eiga að vara.

Bresk fyrirmynd

„Það er augljóst að víða eru misbrestir í því kerfi sem á að vernda börnin okkar. Dæmin sýna okkur það. Verkferlar innan stofnana eru ekki alltaf nógu vandaðir og samskipti á milli stofnana, og jafnvel á milli starfsmanna innan sömu stofnana, virðast einhvern veginn eiga það til að fara fyrir ofan garð og neðan á kostnað barnanna. Það vantar aukna samhæfingu á milli stofnana og bætt upplýsingaflæði, ég held að það sé alveg ljóst,“ segir Silja Dögg og bætir við að fyrirmyndin sé tekin frá Bretlandi en þar hefur svipað kerfi verið notað í rúma tvo áratugi með góðum árangri.

Verndum börnin

„Gráa svæðið er auðvitað persónuverndarsjónarmið og mannréttindi þess einstaklings sem hefur gerst brotlegur en hefur svo afplánað sinn dóm. En ég lít svo á að mannréttindi séu ekki án takmarkana. Ef áhættumatið sýnir fram á að það sé nánast öruggt að viðkomandi einstaklingur haldi áfram að níðast börnum, þá verði samfélagið að bregðast við því. Í slíkum tilfellum þá þurfa aðrar reglur að gilda. Markmiðið er að vernda okkar viðkvæmustu einstaklinga, börnin og það er skylda okkar sem samfélags að leita allra leiða til þess,“ segir Silja Dögg að lokum.

Greinin birtist fyrst í Suðurnesjablaðinu.

Hjón ein komast að því að fjölgunar sé að vænta í fjölskyldunni. Mikil gleði ríkir og lífið brosir við þeim. Bæði eru þau í góðri vinnu og allt er eins og best verður á kosið. Þegar líður á meðgönguna koma upp áleitnar spurningar. Hvað á að gera við barnið þegar móðirin þarf að fara í vinnu eftir fæðingarorlof? B-listinn vill stofna ungbarnaleikskóla til að mæta þessari þörf.

Það er sorglegt í okkar samfélagi að foreldrar geti ekki verið saman á þessum tíma þegar nýr erfingi kemur í heiminn. Mikil óvissa er um hvert sé hægt að leita þegar móðirin þarf að snúa aftur til starfa eftir fæðingarorlof. Mikill tími fer í að skipuleggja fæðingarorlof beggja foreldra svo hægt verði að brúa bilið þar til krílið kemst á leikskóla. Oftar en ekki frestar faðirinn sínu fæðingarorlofi og jafnvel sumarfríi svo hægt sé að brúa þetta bil.

Nokkur dæmi eru um að mæður hafi þurft að segja upp vinnu sinni þar sem fá úrræði eru í boði. Hér í sameiginlegu sveitarfélagi er ein dagmamma sem vitað er um og er hún augljóslega mjög umsetin.
Það er löngu orðið tímabært að komið sé til móts við þennan hóp fólks og að stofnaður verði ungbarnaleikskóli fyrir börn frá 9 mánaða aldri til 2 ára.

Við sem stöndum að B-listanum höfum brennandi áhuga á þessum málaflokki og stöndum heilshugar saman í þeim vilja að gera ungbarnaleikskóla í nýju bæjarfélagi að veruleika.

Álfhildur Sigurjónsdóttir, 2. sæti B-lista Framsóknar og óháðra í Sandgerði og Garði

Framundan eru sveitarstjórnarkosningar og snúast þær um að taka afstöðu til málefna næstu fjögurra ára, málefna framtíðarinnar í samfélaginu okkar. Mér finnst mjög mikilvægt að ungt fólk taki virkan þátt í þeim ákvörðunum.

Mig langar til þess að hvetja unga kjósendur til að gefa sér tíma og kynna sér málefnin vel, t.d. með því að lesa stefnuskrár, skoða áhersluatriði á komandi kjörtímabili og horfa á það með gagnrýnum hætti. Kynna sér vel hvað hvert og eitt framboð leggur áherslu á og velta fyrir sér t.d. hvað mun það kosta, hvað mun það koma til með að gera fyrir sveitafélagið okkar, og hvaða áhrif hefur það á fjármál sveitafélagsins okkar til lengri tíma o.s.frv. Það er mikilvægt að skoða sveitarstjórnarmálin eins og við skoðum okkar eigið líf, velja og hafna eftir því hvað maður hefur efni á að gera hverju sinni.

Ég hvet ykkur til að vera dugleg að kíkja á kosningaskrifstofurnar og ræða við frambjóðendur. B-listinn vill hlúa vel að unga fólkinu í samfélaginu og teljum við mikilvægt að fá að heyra skoðanir ykkar og hugmyndir. B-listinn vill hafa sterkt og öflugt ungmennaráð sem er rödd unga fólksins til sveitarstjórnar.

Miðvikudagskvöldið 23.maí ætlum við hjá B-listanum að bjóða upp á kvöldstund á kosningaskrifstofunni sem er tileinkuð ungum kjósendum. Þar verða pizzur og pub quiz en þar verða líka umræður og er það tilvalið tækifæri fyrir ykkur til þess að koma ykkar skoðunum á framfæri.

Umfram allt vil ég hvetja ykkur til þess að nýta kosningarrétt ykkar og lýðræðið. Mætum á kjörstað og kjósum. Okkar skoðun skiptir máli.

Með kveðjum,

Eydís Arna Hilmarsdóttir – 13. sæti B-lista

Góð heilsa gulli betri

Íþróttir eru mikilvægar fyrir samfélagið okkar, þær bæta ekki einungis lýðheilsu íbúanna sem þær stunda heldur eru þær einnig mikilvæg forvörn fyrir börnin okkar og unglinga. Því er nauðsynlegt að gera íþróttum og tómstundum hátt undir höfði og tryggja að flestum standi til boða íþrótta- og tómstundarstarf. En rekstur faglegrar íþróttastarfsemi er almennt kostnaðarsamur fyrir íþróttafélögin sjálf og deildir þeirra og þ.a.l. iðkendur og forráðamenn þeirra. Bæði er kostnaður við starfið sjálft mikill og einnig eru mannvirki og búnaður, sem þarf til að stunda hinar ýmsu íþróttir, kostnaðarsamur. Þar þarf sveitarfélagið að hjálpa til eins og frekast er unnt. Tómstundarstyrkur sveitarfélagsins hefur komið til móts við kostnað barna í íþróttum og forráðamanna þeirra sem er af hinu góða. En tómstundarstyrkurinn þarf síðan að fylgja eðlilegri verðlagsþróun tengdri íþróttastarfseminni. Einnig er nauðsynlegt að koma til móts við aukinn kostnað foreldra í dreifbýli vegna aksturs í íþrótta- og tómstundarstarf. Það er í sambandi við mannvirkin sem sveitarfélagið þarf e.t.v. að grípa ennþá sterkar inn í. Þó eru ekki öll börn og unglingar sem finna sig í íþróttum og það er nauðsynlegt að hlúa einnig að þeim. Í því sambandi er rekstur félagsmiðstöðvarinnar nauðsynlegur nú sem áður. Félagsmiðstöðin fékk á dögunum nýtt og endurbætt húsnæði sem er vel. Það góða innra starf sem þar er unnið þarf sveitarfélagið e.t.v. að styrkja enn betur með lengri og auknum opnunartíma.

Staðan

Íþróttastarfið er í ágætum blóma hér í Hornafirði og er framboð ólíkra íþróttagreina ótrúlega fjölbreytt að mínu mati miðað við fjölda íbúa. Körfuknattleikurinn er í miklum uppgangi þessi misserin og blakið er jafnframt vaxandi. Þá er fimleikastarfið öflugt og knattspyrnan er alltaf vinsæl meðal iðkenda. En alltaf má gera betur og það þarf að vanda til verka nú sem áður. Undirrituðum hefur alltaf þótt heillandi að hafa bæði húsnæði Grunnskólans, mest notuðu íþróttamannvirkin og miðsvæði til útivistar og afþreyingar á sama svæðinu. Svæði þar sem börn þurfa ekki að fara yfir umferðargötu til að komast á milli skólabygginga og allra helstu íþróttamannvirkjanna. Síðan er Vöruhúsið, miðja skapandi greina, ásamt félagsmiðstöðinni ekki langt undan. Það eru mikil forréttindi að geta haft þetta svona og taka þarf mið af því til framtíðar.

Nýtt íþróttamannvirki

Oft hefur verið rætt um að næsti áfangi í tengslum við uppbyggingu íþróttamannvirkja ætti að vera millibygging milli sundlaugar og Heppuskóla. En upp á síðkastið hafa ýmsar fleiri framkvæmdir verið nefndar sem menn telja þarft að ráðast í. Meðal þeirra er t.d. nýtt íþróttahús, framtíðarhúsnæði fyrir líkamsræktarstöð, stærra húsnæði fyrir fimleika, vallarhús fyrir knattspyrnu- og frjálsíþróttavöllinn og nýja áhorfendastúku fyrir knattspyrnuvöllinn. Er jafnvel hægt að leysa flestar þessar framkvæmdir með einni nýrri byggingu? Þá losnar líka um gamla íþróttahúsið sem gæti nýst fyrir t.d. líkamsrækt, bardagaíþróttir, danskennslu, klifur auk annars. Með byggingu á nýju íþróttahúsi gætum við skapað iðkendum í þessum íþróttagreinum, ásamt greinum sem áður hafa verið nefndar, miklu betri aðstæður til æfinga og leikja. Listi Framsóknar og stuðningsmanna þeirra vilja setja uppbyggingu íþróttamannvirkja á dagskrá. Við getum samt ekki ráðist í þær framkvæmdir og forgangsraðað hugsanlegum áföngum nema að undangengnu víðtæku samráði við íþróttahreyfinguna og skólasamfélagið. Við viljum byrja á samtali við þau áður en ákvarðanir verða teknar, en ekki ráðast blint í einhverjar framkvæmdir sem e.t.v. leysa vandann bara tímabundið. Það þarf að hugsa lengra en til fjögurra ára í þessum efnum, áætlanir þurfa að taka mið af þörf og notkun næstu 20-30 ára.

Björgvin Óskar Sigurjónsson, 4. sæti á lista Framsóknar og stuðningsmanna þeirra á Hornafirði.